ကောလင်းနဲ့ ဝန်းသိုကြားမှာ လေကြောင်း တိုက်ခိုက်မှုတွေနဲ့ တိုက်ပွဲပြင်းထန်နေ

စစ်ကိုင်းတိုင်း၊ ကောလင်းနဲ့ ဝန်းသိုမြို့ကြားမှာ လေကြောင်း တိုက်ခိုက်မှုတွေနဲ့အတူ တိုက်ပွဲတွေ ပြင်းထန်နေတယ်လို့ စစ်ရေး သတင်းရင်းမြစ်တွေက ပြောပါတယ်။
ပြီးခဲ့တဲ့ ဇန်နဝါရီ ၁၆ ရက်နေ့ကစပြီး အစိုးရတပ်က နယ်မြေရှင်းလင်းရေး လုပ်ဆောင်လာတဲ့အတွက် ဒေသတွင်း လက်နက်ကိုင် တပ်တွေနဲ့ တိုက်ပွဲ ဖြစ်ပွားနေခြင်းဖြစ်ပြီး လေယာဉ်၊ ဒရုန်း အသုံးပြု တိုက်ခိုက်မှုတွေလည်း ရှိနေတယ်လို့ သိရပါတယ်။
“အစိုးရတပ်က ဇန်နဝါရီ ၁၆ ရက်နေ့၊ မနက် ၅ နာရီလောက်က ချဥ်ပစ်ခုံကျေးရွာစျေးကို စပြီး နယ်မြေရှင်းတာလုပ်တယ်။ အဲဒီမှာ လူသေဆုံးတာတွေလည်း ဖြစ်ခဲ့တယ်။ တိုက်ပွဲက အဲဒီ နေ့ကတည်းက ပြင်းထန်နေတာ ဒီနေ့နဲ့ဆို ခြောက်ရက်ရှိပြီပေါ့။ အခုထိ လေယာဉ်တွေ ဆက်တိုက်ဆိုသလို ဝဲနေတုန်း။ လေကြောင်းရန်က ရှိနေတုန်းပဲ” လို့ စစ်ရေး သတင်းရင်းမြစ် တယောက်က ပြောပါတယ်။
ဒီကနေ့ ဇန်နဝါရီ ၂၁ ရက်၊ မနက်ပိုင်းမှာလည်း ဝန်းသိုမြို့နယ်ကနေ ကောလင်းမြို့ဘက်ကို ဝင်ရောက်လာတဲ့ အစိုးရတပ် စစ်ကြောင်းကို ဒေသတွင်း လက်နက်ကိုင်တပ်တွေက ကြားဖြတ် တိုက်ခိုက်ခဲ့တာကြောင့် တိုက်ပွဲတွေ ပြင်းထန်စွာ ဖြစ်ပွားခဲ့တယ်လို့ သိရပါတယ်။
တိုက်ပွဲဖြစ်နေချိန်မှာ ကန့်ဘလူ ‌အမြောက်တပ် ၆၀၀၆ ကနေ Mi-17 တက်လာသလို ဝန်းသိုမြို့နယ်ထဲက ခြေမြန်တပ်ရင်း (ခမရ - ၁၀၁ ၊ ၁၂၀) ကနေ ဒရုန်းတွေ တက်လာတယ်လို့ ဒေသတွင်း လက်နက်ကိုင်တပ်တွေဘက်က အသိပေး ထုတ်ပြန်ထားပါတယ်။
ဒါအပြင် ဒီကနေ့ ဇန်နဝါရီ ၂၁ ရက်၊ မွန်းလွဲ ၃ နာရီ၊ မိနစ် ၅၀ ဝန်းကျင်ကလည်း ကောလင်းနယ် အရှေ့ခြမ်းမှာ လေကြောင်းတိုက်ခိုက်မှု ဖြစ်ပွားခဲ့ပြီး ထိခိုက်၊ သေဆုံးမှု အခြေအနေကိုတော့ မသိရှိရသေးဘူးလို့ စစ်ရေး သတင်းရင်းမြစ်က ပြောပါတယ်။
“အခုဖြစ်နေတဲ့ တိုက်ပွဲကတော့ ဒေသတွင်း လက်နက်ကိုင် တပ်တွေဘက်က အလစ်အငိုက် တိုက်ခိုက်ခံရတာတွေလည်း ရှိနေတော့ တော်တော်လေးကို အထိနာနေကြတယ်။ အသေအပျောက်များတယ်” လို့ သူက ပြောပါတယ်။
ဒါအပြင် စစ်ကူပေးနိုင်ဖို့အတွက် ဝန်းသိုအခြေစိုက် ခမရ ၁၁၁ နဲ့ ၁၂၀ ကနေ ထွက်လာတဲ့ စစ်ကြောင်းဟာလည်း မနေ့ ဇန်နဝါရီ ၂၀ ရက်ကတည်းက ကောလင်းမြို့ကို ဦးတည် နယ်မြေရှင်းလင်းရေး လုပ်ဆောင်နေတာကြောင့် တိုက်ပွဲတွေ ပိုမို ပြင်းထန်လာနိုင်တယ်လို့ ဆိုပါတယ်။
မနေ့ ဇန်နဝါရီ ၂၀ ရက်၊ ညနေ ၄ နာရီ ၃၂ မိနစ် ဝန်းကျင်ကလည်း ကောလင်းနယ်က ဝက်စာကုန်းကျေးရွာမှာ ဒရုန်းအသုံးပြု တိုက်ခိုက်မှု ဖြစ်ပွားခဲ့တာကြောင့် ၁၀ ယောက် သေဆုံးပြီး ဒဏ်ရာရသူတွေလည်း ရှိခဲ့တယ်လို့ သိရပါတယ်။
လက်ရှိ ဖြစ်ပွားနေတဲ့ တိုက်ပွဲတွေနဲ့ နယ်မြေရှင်းလင်းရေး လုပ်ဆောင်နေမှုတွေကြောင့် ကောလင်းနယ် အရှေ့ခြမ်းရှိ ချဥ်ပစ်ခုံ၊ တောင်မော်၊ အလယ်ခုံ၊ ပဒုမ္မာ၊ ခံသာ၊ ကျောက်တန်း၊ သစ်ဆိမ့်ကုန်း၊ ညောင်ပင်သာ၊ ဩဂ အစရှိတဲ့ ကျေးရွာတွေက ဒေသခံ သောင်းနဲ့ချီ စစ်ဘေး တိမ်းရှောင်နေကြရတယ်လို့ သိရပါတယ်။

ကျောက်တော်မှာ လေကြောင်းတိုက်ခိုက်ခံရလို့ လူ ၂၁ ယောက်သေဆုံးကာ ၃၀ လောက်ဒဏ်ရာရရှိခဲ့

ရခိုင်ပြည်နယ် ၊ ကျောက်တော်မြို့နယ် ၊ချောင်းတူရွာ အနီးမှာ လေကြောင်းတိုက်ခိုက်ခံရပြီး လူ ၂၁ ယောက် သေဆုံးကာ ထိခိုက်ဒဏ်ရာ ရရှိသူ အယောက် ၃၀ လောက်ရှိခဲ့တယ်လို့ သိရပါတယ် ။
ဖြစ်စဥ်က ဇန်နဝါရီ ၂၀ ရက်နေ့ ၊ ည ၇ နာရီခွဲလောက်မှာ လေကြောင်းတိုက်ခိုက်မှု နှစ်ကြိမ် ဖြစ်ပွားခဲ့တာ ဖြစ်ပြီး အဆိုပါ တိုက်ခိုက်မှုကြောင့် သေဆုံးသူနဲ့ ထိခိုက်ဒဏ်ရာရရှိသူ အများအပြား ရှိခဲ့တာလို့ သိရပါတယ် ။
" သိရသလောက် သေတာအားလုံးဆိုရင် ၂၁ ယောက်ရှိတယ် ။ ဒဏ်ရာရက ၃၀ လောက်ရှိတယ်လို့ သိရတယ်။ သေဆုံးတဲ့အထဲမှာ ကလေးတွေလည်း ပါတယ်ပြောတယ်။ အချင်းချင်း ချိတ်ဆက်ပြီး သိရတာပေါ့။ စစ်သုံ့ပန်းတွေလို့ ပြောတယ် ။ AA ကလည်း အဲဒီလိုထုတ်ပြန်ထားတာ တွေ့တယ် ။ " လို့ ရခိုင်ပြည်နယ်အတွင်း စစ်ရှောင်အရေး ကူညီနေသူက ပြောပါတယ်။
ထိခိုက်ဒဏ်ရာ ရရှိသူတွေထဲမှာ ဒဏ်ရာပြင်းထန်သူတွေ ပါဝင်တာကြောင့် လက်ရှိမှာ ဆေးဝါးကုသမှုတွေ ခံယူနေရတယ်လို့ သိရပါတယ် ။
အဆိုပါ လေကြောင်းတိုက်ခိုက်မှုနဲ့ပတ်သက်ပြီး AA ကလည်း သတင်းထုတ်ပြန်ထားတာ တွေ့ရပါတယ်။
လေကြောင်းတိုက်ခိုက်မှုမှာ သေဆုံးသူနဲ့ ထိခိုက်ဒဏ်ရာရရှိသူတွေဟာ စစ်သုံ့ပန်းမိသားစုဝင်တွေနဲ့ စစ်သုံ့ပန်းတချို့ ဖြစ်ကြောင်း ထုတ်ပြန်ထားပြီး သေဆုံး၊ ဒဏ်ရာရ အသေးစိတ်စာရင်းကိုတော့ ထပ်မံဖော်ပြပေးသွားမယ်လို့ AA ရဲ့ ထုတ်ပြန်ချက်မှာ ရေးသားထားပါ တယ်။
အဆိုပါစစ်သုံ့ပန်းတွေနဲ့ စစ်သုံ့ပန်းမိသားစုဝင်တွေဟာ မကြာမီမှာပြန်လည် လွှတ်ပေးဖို့အတွက် စီစဥ်ထားသူတွေဖြစ်တယ်လို့လည်း ထုတ်ပြန်စာမှာ ဖော်ပြထားတာ တွေ့ရပါတယ်။
၂၀၂၅ ခုနှစ် ၊ဒီဇင်ဘာ ၂၉ ရက်နေ့ ၊ ည၈ နာရီလောက်ကလည်း ရခိုင်ပြည်နယ် ထဲက AA ထိန်းချုပ်ဒေသ ဖြစ်တဲ့ သံတွဲမြို့နယ် ၊ငပလီမြို့ ၊ လင်းသာ ရပ်ကွက်မှာ လေကြောင်း တိုက်ခိုက်မှု ဖြစ်ပွားပြီး ခုနှစ်ယောက် သေဆုံးကာ ထိခိုက် ဒဏ်ရာ ရရှိသူ ၁၅ ယောက်လောက်အထိ ရှိခဲ့တယ်လို့ သိရပါတယ်။
အလားတူ ဒီဇင်ဘာ ၁၁ ရက်နေ့ကလည်း ကျောက်ဖြူမြို့နယ် ငလုံးစုရွာမှာ လေကြောင်းတိုက်ခိုက် ခံရပြီး ရှစ်ယောက် သေဆုံးကာ ၁၀ ယောက်ထိခိုက် ဒဏ်ရာရရှိ ခဲ့တယ်လို့ သိရပါတယ် ။
ဒီဇင်ဘာ ၁၀ ရက်နေ့ ကလည်း ရခိုင်ပြည်နယ် ၊ မြောက်ဦးမြို့နယ် မှာ လေကြောင်း တိုက်ခိုက် ခံရပြီး လူ ၃၃ ယောက် သေဆုံးကာ ထိခိုက်ဒဏ်ရာရသူ ၇၆ ယောက် ရှိခဲ့တယ် လို့ သိရပါတယ်။

ဂရင်းလန်း အရေးကြောင့် ဥရောပမဟာမိတ်တွေအပေါ် အခွန်တိုးမြှင့်ကောက်မှု ဒေါ်နယ်ထရန့် ရုပ်သိမ်း

အမေရိကန်ပြည်ထောင်စုဟာ ဂရင်းလန်းကျွန်းကိုဝယ်ယူမယ့် အစီအစဉ်ကို ဆန်ကျင်တဲ့ ဥရောပမဟာမိတ်တွေအပေါ် အခွန်ကောက်ခံမယ့် အစီအစဉ်များကို ရုပ်သိမ်းလိုက်ပြီလို့ သမ္မတ ဒေါ်နယ်ထရန့်က ပြောပါတယ်။
နေတိုးနဲ့ ဆွေးနွေးပြီးနောက် အခုလိုထုတ်ပြန်လာတာဖြစ်ပြီး ဂရင်းလန်းနဲ့ပတ်သက်ပြီး အလားအလာရှိတဲ့ သဘောတူညီချက်တခုကို ရှာဖွေနေတယ်လို့ ထရန့်က ပြောပါတယ်။ ထရန့်ဟာ နေတိုးအကြီးအကဲ မာ့ခရူတီနဲ့ တွေ့ဆုံခဲ့တာဖြစ်ပြီး ဒါဟာအလွန်အကျိုးရှိတဲ့ တွေ့ဆုံမှုလို့ ဆိုပါတယ်။
တွေ့ဆုံမှုဟာ ဂရင်းလန်းနဲ့ အာတိတ်ဒေသဆိုင်ရာ အလားအလာရှိတဲ့ သဘောတူညီချက် မူဘောင်ကို ဦးတည်စေခဲ့တယ်လို့ ထရန့်က ပြောပါတယ် ။ ဒါပေမယ့် အသေးစိတ်အချက်အလက်တွေကိုတော့ မပြောပါဘူး။
နေတိုးကလည်း အစည်းအဝေးကို အလွန်အကျိုးရှိတဲ့ အစည်းအဝေးအဖြစ် ဖော်ပြခဲ့ပြီး ထရန့်ပြောခဲ့တဲ့ မူဘောင်ဆိုင်ရာ ဆွေးနွေးမှုတွေဟာ အာတိတ်ဒေသလုံခြုံရေးကို သေချာစေဖို့အဓိကထားမယ်လို့ ဆိုပါတယ်။ ဂရင်းလန်းကို စစ်ရေးအင်အား အသုံးမပြုဘဲ ရယူရေးအတွက် ဒါးဗို့စ်မှာ ကျင်းပတဲ့ ကမ္ဘာ့စီးပွားရေးဖိုရမ်မှာ ဆွေးနွေးမှုတွေ ပြုလုပ်လိုကြောင်း ထရန့်က အစောပိုင်းမှာ ပြောပါတယ်။
"ဂရင်းလန်းနဲ့ အာတိတ်ဒေသတခုလုံးနဲ့ ပတ်သက်ပြီး အနာဂတ်သဘောတူညီချက်ရဲ့ မူဘောင်ကို ကျွန်တော်တို့ ဆွေးနွေးနေပြီး ဒီဖြေရှင်းချက်က ပြီးမြောက်သွားရင် အမေရိကန်ပြည်ထောင်စုနဲ့ နေတိုးအဖွဲ့ဝင်နိုင်ငံအားလုံးအတွက် အရမ်းကောင်းတဲ့ ဖြေရှင်းချက်တစ်ခု ဖြစ်လာမှာပါ။" လို့ ထရန့်က ဆိုပါတယ်။
ဖြစ်နိုင်ချေရှိသော သဘောတူညီချက်ဟာ အမြဲတည်တံ့နိုင်ပြီး သတ္တုပိုင်ဆိုင်မှုအပါအဝင် စီစဉ်ထားတဲ့ Golden Dome ဒုံးကျည်ကာကွယ်ရေးစနစ် ဖြန့်ကြက်ဖို့တွေလည်း ပါဝင်နိုင်ပါတယ်။ ဂရင်းလန်းကျွန်းဟာ ပထဝီအနေထားအရ မဟာဗျူဟာမြောက်နေရာမှာ တည်ရှိပြီး အရေးပါတဲ့ သတ္တုသိုက်တွေလည်း တည်ရှိနေပါတယ်။

ဂျပန်ရှိ ကမ္ဘာ့အကြီးဆုံး နျူကလီးယားစက်ရုံ စတင်လည်ပတ်

၂၀၁၁ ခုနှစ် ဖူကူရှီးမား နျူကလီးယားစက်ရုံ ဘေးအန္တရာယ်ကြောင့် နိုင်ငံအတွင်းရှိ ဓာတ်ပေါင်းဖိုအားလုံးကို ပိတ်သိမ်းခဲ့ရပြီးနောက် ဂျပန်နိုင်ငံဟာ ကမ္ဘာ့အကြီးဆုံး နျူကလီးယားဓာတ်အားပေးစက်ရုံကို ဇန်နဝါရီ ၂၁ ရက်မှာ ပထမဆုံးအကြိမ် ပြန်လည်စတင်လည်ပတ်နေပြီဖြစ်ပါတယ်။
ဒေသခံတွေရဲ့ ဘေးကင်းရေးစိုးရိမ်မှုတွေရှိနေပေမယ့် တိုကျိုမြို့ အနောက်မြောက်ဘက်ရှိ ကာရှီဝါဇာကီ-ကာရီဝါရှိ ဓာတ်ပေါင်းဖိုအမှတ် ၆ ကို ပြန်လည်စတင်ဖို့ တာဝန်ရှိသူတွေက ဆုံးဖြတ်ချက်ချခဲ့တာပါ။ အချက်ပေးစနစ်ချို့ယွင်းမှုကြောင့် တရက်နှောင့်နှေးခဲ့ပြီး နောက်လမှာ စီးပွားဖြစ်လည်ပတ်ဖို့ စီစဉ်ထားပါတယ်။
စွမ်းအင်တင်သွင်းမှုအပေါ် များစွာမှီခိုနေရတဲ့ ဂျပန်နိုင်ငံဟာ နျူကလီးယားစွမ်းအင်ကို အစောပိုင်းကတည်းက လက်ခံကျင့်သုံးခဲ့တဲ့ နိုင်ငံတခုဖြစ်ပါတယ်။ ဒါပေမယ့် ၂၀၁၁ ခုနှစ်မှာတော့ နိုင်ငံသမိုင်းမှာ အဆိုးရွားဆုံး နျူကလီးယားဘေးအန္တရာယ်ဖြစ်တဲ့ ဖူကူရှီးမားနျူကလီးယားဓါတ်အားပေးစက်ရုံဟာ ဆူနာမီကြောင့် ပျက်စီးပြီးနောက်မှာ ဂျပန်နိုင်ငံရဲ့ နျူကလီးယား ဓာတ်ပေါင်းဖို ၅၄ ခုလုံးကို ပိတ်ပစ်ခဲ့ပါတယ်။
ကာရှီဝါဇာကီ-ကာရီဝါရှိ ခုနစ်ခုမြောက် ဓာတ်ပေါင်းဖိုကို ၂၀၃၀ ခုနှစ်အထိ ပြန်လည်လည်ပတ်နိုင်မှာမဟုတ်သလို ကျန်ငါးခုကိုလည်း ရပ်ဆိုင်းထားနိုင်ပါတယ်။ ဒါကြောင့် စက်ရုံဟာ ဓာတ်ပေါင်းဖို ခုနစ်ခုလုံး လည်ပတ်ခဲ့စဉ်ကထက် ၈ ဒဿမ ၂ ဂစ်ဂါဝပ်ထက် စွမ်းရည် အများကြီး လျော့နည်းသွားခဲ့ပါတယ်။
၂၀၁၅ ခုနှစ်မှစပြီး ဂျပန်နိုင်ငံဟာ လည်ပတ်နိုင်သော ဓာတ်ပေါင်းဖို ၃၃ ခုအနက် ၁၅ ခုကို ပြန်လည်စတင်ခဲ့သည်။ ကာရှီဝါဇာကီ-ကာရီဝါစက်ရုံဟာ Tepco ကုမ္ပဏီ ပိုင်ဆိုင်တဲ့ဓါတ်ပေါင်းဖိုတွေထဲက ပြန်လည်လည်ပတ်တဲ့ ပထမဆုံးစက်ရုံဖြစ်ပါတယ်။
ဂျပန်နိုင်ငံဟာ ၂၀၅၀ ပြည့်နှစ်မှာ ကာဗွန်ထုတ်လုပ်မှု လုံး၀ကင်းစင်တဲ့ထ ကြိုးပမ်းနေပါတယ်။ ၂၀၁၁ ခုနှစ်မတိုင်မီက နျူကလီးယားစွမ်းအင်ဟာ ဂျပန်နိုင်ငံရဲ့ လျှပ်စစ်ဓာတ်အား ၃၀ ရာခိုင်နှုန်းနီးပါးရှိပြီး ၂၀၃၀ ပြည့်နှစ်မှာ ၅၀ ရာခိုင်နှုန်း အထိ ရရှိရန် စီစဉ်ထားပါတယ်။

မြန်မာကိုယ်စားလှယ်အဖွဲ့ကိုထောက်ခံသူများ အထူးသတိပြုလိုက်နာရမည့်အချက်များကို အသိပေးနှိုးဆော်

ICJ ၌ မြန်မာနိုင်ငံကိုယ်စားပြုဖြေရှင်းနေသည့် မြန်မာကိုယ်စားလှယ်အဖွဲ့များကို အားပေးထောက်ခံသူများ အထူးသတိပြုလိုက်နာရမည့်အချက်များကို အသိပေးနှိုးဆော်ထားသည်။
မြန်မာကိုယ်စားလှယ်အဖွဲ့ကို အားပေးထောက်ခံသူများအနေဖြင့် ICJ တရားရုံးနှင့် တရားသူကြီးများအား ဝေဖန်ပုပ်ခတ်ခြင်း၊ ဖိအားပေးသည့်သဘောရေးသားပြောဆိုခြင်းများ လုံးဝမပြုလုပ်ကြပါရန်၊ လူမျိုးရေးခွဲခြားသည့် အသုံးအနှုံးများရေးသားပြောဆိုခြင်း၊ လက်ကိုင်ဆိုင်းဘုတ်ပြုလုပ်ခြင်းများ မပြုလုပ်ကြပါရန် အသိပေးနှိုးဆော်ထားသည်။
ထို့ပြင် တိုင်းရင်းသား အမျိုးအမည်တွင်မပါဝင်သည့်၊ တိုင်းရင်းသားအဖြစ်မသတ်မှတ်ထားသည့် လူမျိုးအမည်အားသုံးစွဲပြီး ထိုအမည်အား အမုန်းစကားများမပြုလုပ်ကြပါရန်၊ မြန်မာကိုယ်စားလှယ်အဖွဲ့အနေဖြင့် နိုင်ငံတကာဥပဒေများနှင့်အညီ သက်သေအထောက်အထားခိုင်လုံစွာဖြင့် တရားရုံးတွင်ရင်ဆိုင်ဖြေရှင်းနေကြောင်းကိုသာ ထောက်ခံရေးသားပြောဆိုကြပါရန်လည်း အသိပေးနှိုးဆော်ထားသည်။
မြန်မာကိုယ်စားလှယ်အဖွဲ့အနေဖြင့် နိုင်ငံတကာဥပဒေများနှင့်အညီ တရားရင်ဆိုင်ဆဲကာလဖြစ်ရာ အားပေးထောက်ခံမှုများအား လူမှုကွန်ရက်ပေါ်တွင်လည်းကောင်း၊ အဖွဲ့အစည်းများမှ မြို့/ရွာအသီးသီးတွင် ထောက်ခံပွဲများပြုလုပ်ရာတွင်လည်းကောင်း အထူးသတိပြုလိုက်နာကြပါရန် နှိုးဆော်ခဲ့ခြင်းဖြစ်သည်။

အဂတိလိုက်စားမှု ကျဆင်းစေရေးရန် SMS မှတဆင့် မေးမြန်းနိုင်သည့် အစီအစဉ် အဂတိလိုက်စားမှု တို-က်ဖျ-က်ရေးကော်မရှင် စတင်ဆောင်ရွက်

အဂတိလိုက်စားမှု လျော့နည်းကျဆင်းစေရေးရန် ရည်ရွယ်၍ ဖုန်း SMS မှတဆင့် မေးမြန်းနိုင်သည့် အစီအစဉ်ကို စတင်ဆောင်ရွက်နေပြီဖြစ်ကြောင်း အဂတိလိုက်စားမှု တို-က်ဖျ-က်ရေးကော်မရှင်က ယနေ့တွင် အသိပေးကြေညာထားသည်။
အဆိုပါ အစီအစဉ်ကို အများပြည်သူထံမှ တုံ့ပြန်မှုရယူခြင်းအစီအစဉ် (Public Feedback Programme - PFP)” ဟုအမည်ပေးထားပြီး သက်ဆိုင်ရာဌာနများနှင့် ပူးပေါင်းဆောင်ရွက်လျက်ရှိကြောင်း ဆိုသည်။
အစိုးရရုံး/ဌာနများတွင် ဝန်ဆောင်မှုရယူကြသည့် ပြည်သူများ၏ တယ်လီဖုန်းနံပါတ်များသို့ Short Code နံပါတ် "1111" အသုံးပြု၍ SMS မှ တဆင့် ဝန်ဆောင်မှုနှင့်စပ်လျဉ်းသည့် မေးခွန်းများ မေးမြန်းခြင်းဖြင့် တုံ့ပြန်မှုများရယူနိုင်မည်ဖြစ်ကြောင်း သိရသည်။
ယင်းအစီအစဉ်သည် အစိုးရဌာန/အဖွဲ့အစည်းများ၏ ဝန်ဆောင်မှုလုပ်ငန်းများပိုမိုကောင်းမွန်လာစေရေးနှင့် အဂတိ လိုက်စားမှုများ လျော့နည်းကျဆင်းစေရေးအတွက် ရည်ရွယ်၍ ဆောင်ရွက်နေသည့် ကိစ္စရပ်ဖြစ်သောကြောင့် Short Code နံပါတ် "1111" မှတဆင့် SMS ဖြင့် ပေးပို့မေးမြန်းသော မေးခွန်းများကို ပြည်သူများက အကြံပြုဖြေကြားပေးခြင်းဖြင့် အစိုးရဌာန ၊ အဖွဲ့အစည်းများ၏ ဝန်ဆောင်မှုလုပ်ငန်းများ၏ လိုအပ်ချက်နှင့် အားနည်းချက်များကို သိရှိပြုပြင်နိုင်မည်ဖြစ်ကြောင်း သိရသည်။
ထို့ကြောင့် ပြည်သူများအနေဖြင့် အဂတိလိုက်စားမှုတို-က်ဖျ-က်ရေးလုပ်ငန်းစဉ်များတွင် ပူးပေါင်းပါဝင်ဆောင်ရွက်ပေးနိုင်ရန်နှင့် ပြည်သူများက သက်သာသောနှုန်းထားဖြင့် SMS များ ပြန်လည်ဖြေကြားပေးနိုင်ရေး ဆက်သွယ်ရေးအော်ပရေတာများနှင့် ညှိနှိုင်းဆောင်ရွက်ထားကြောင်း အသိပေးထားသည်။

ချုံချင့်မြို့ရှိ တက္ကသိုလ်များတွင်ပညာသင်ကြားနေသည့် မြန်မာကျောင်းသား၊ ကျောင်းသူများကို အခမဲ့မျက် စိစမ်းသပ်စစ်ဆေးပြီး မျက်မှန်ဝန်ဆောင်မှုပေး

ချုံချင့်မြို့၊ မြန်မာကောင်စစ်ဝန်ချုပ်ရုံးနှင့် Maylook မျက်စိဆေးရုံတို့ပူးပေါင်း၍ ချုံချင့်မြို့ရှိ တက္ကသိုလ်များတွင်ပညာသင်ကြားနေသည့် မြန်မာကျောင်းသား၊ ကျောင်းသူများကို အခမဲ့မျက်စိစမ်းသပ်စစ်ဆေးပြီး မျက်မှန်ဝန်ဆောင်မှုပေးခဲ့ကြောင်း သိရသည်။
ချုံချင့်မြို့ရှိ China-Singapore Maylook Eye Hospital တွင်ပြုလုပ်ခြင်းဖြစ်ရာ မြန်မာကောင်စစ်ဝန်ချုပ်ရုံး၊ ချုံချင့်မြို့မှ ကောင်စစ်ဝန်ချုပ်ဦးကျော်ဇေယျာလင်းမှ ယနေ့ ဇန်နဝါရီ ၂၁ ရက်နံနက်ပိုင်းက ကြည့်ရှုခဲ့ကြောင်း သိရသည်။
ထို့နောက် မြန်မာကောင်စစ်ဝန်ချုပ်သည် China- Singapore Maylook Eye Hospital မှတာဝန်ရှိသူများနှင့်တွေ့ဆုံ၍ ကျန်းမာရေးဆိုင်ရာပူးပေါင်းဆောင်ရွက်ရေး၊ မြန်မာနိုင်ငံနှင့် Maylook မျက်စိဆေးရုံကြား ပညာရှင်များ အပြန်အလှန်ဖလှယ်ရေးတို့ကို ဆွေးနွေးခဲ့ကြကြောင်း သိရသည်။

သာကေတမြို့နယ်၊ ရပ်ကွက်ပေါင်းစုံ ထမနဲထိုးပြိုင်ပွဲကျင်းပ

ရန်ကုန်တိုင်းဒေသကြီး၊ ဗိုလ်တထောင်ခရိုင်၊ သာကေတမြို့နယ် မြို့နယ်စီမံခန့်ခွဲရေးနှင့် အုပ်ချုပ်ရေးကော်မတီမှ ကြီးမှူး၍ သာကေတမြို့နယ်၊ ရပ်ကွက်ပေါင်းစုံ ထမနဲထိုးပြိုင်ပွဲကို ယနေ့တွင် ၄/ တောင်ရပ်ကွက်၌ ကျင်းပခဲ့သည်။
အဆိုပါ ထမနဲပြိုင်ပွဲကို အသင်းပေါင်း ၁၉ သင်းမှ ယှဉ်ပြိုင်ခဲ့ပြီး ၁၀/ တောင်ရပ်ကွက်မှ ပထမဆု၊ ၂/ တောင်ရပ်ကွက်မှ ဒုတိယဆု ရရှိခဲ့သည်။

ဧရာဝတီမြစ်ဆုံ-မြစ်ညာမြစ်ဝှမ်း‌ ရေအားလျှပ်စစ်စီမံ ကိန်းအတွက် လုပ်ငန်းညှိနှိုင်းဆွေးနွေး

ဧရာဝတီမြစ်ဆုံ- မြစ်ညာမြစ်ဝှမ်း ရေအားလျှပ်စစ်စီမံ ကိန်းဆိုင်ရာ အထောက်အကူပြုရေးနှင့် ပူးပေါင်းဆောင်ရွက်ရေး ကချင်ပြည်နယ်ဒေသခံကော်မတီ၏ (၁/၂၀၂၆)လုပ်ငန်းညှိနှိုင်းအစည်းအဝေးကို ဇန်နဝါရီ ၂၀ ရက်က ကချင်ပြည်နယ်ဝန်ကြီးချုပ်ဦးခက်ထိန်နန်ဦးဆောင်ကျင်းပခဲ့ကြောင်း သိရသည်။
ပြည်နယ်ဝန်ကြီးချုပ်ဦးခက်ထိန်နန်မှ ဧရာဝတီမြစ်ဆုံ- မြစ်ညာမြစ်ဝှမ်းရေအားလျှပ်စစ်စီမံကိန်းဆိုင်ရာ အ‌ ထောက်အကူပြုရေးနှင့် ပူးပေါင်းဆောင်ရွက်ရေး က ချင်ပြည်နယ်ဒေသခံကော်မတီဖွဲ့စည်းမှု အခြေအနေ၊ လမ်းညွှန်မှာကြားချက်များ၊ လုပ်ငန်းတာဝန်များနှင့် ကော်မတီတွင် ဖြည့်စွက်ဖွဲ့စည်းနိုင်ရေးတို့ကို ရှင်းလင်းပြောကြားခဲ့ကြောင်း သိရသည်။
ထို့နောက် ဒေသခံကော်မတီအဖွဲ့ဝင်များမှ ကော်မတီ၏ လုပ်ငန်းတာဝန်များအပေါ် ရှေ့ဆက်ဆောင်ရွက်ရမည့် ရှေ့လုပ်ငန်းစဉ်များနှင့်ပတ်သက်၍ မေးမြန်းဆွေးနွေးတင်ပြရာ ပြည်နယ်ဝန်ကြီးချုပ်က ဆက်လက်ဆောင် ရွက်မည့် ရှေ့လုပ်ငန်းအစီအစဉ်များအတွက်ညှိနှိုင်းဆောင်ရွက်ပေးခဲ့ကြောင်း သိရသည်။

တရုတ်နိုင်ငံသား(၃၀၀)ဦးအပါအဝင် ပြည်ပနိုင်ငံသားများကို ပြည်နှင်လွှဲပြောင်း

မြန်မာနိုင်ငံအတွင်းသို့ တရားမဝင်ဝင်ရောက်လာသည့် တရုတ်နိုင်ငံသား(၃၀၀)ဦးအပါအဝင် ပြည်ပနိုင်ငံသားများကို သက်ဆိုင်ရာနိုင်ငံများသို့ ယနေ့ ဇန်နဝါရီ ၂၁ ရက်က ပြည်နှင်လွှဲပြောင်းပေးခဲ့ကြောင်း သိရသည်။
တရုတ်နိုင်ငံသား(၃၀၀)ဦး၊ အီသီယိုးပီးယားနိုင်ငံသား (၇၈)ဦး၊ ဘင်္ဂလားဒေ့ရှ်နိုင်ငံသား(၈)ဦး၊ အင်ဒိုနီးရှားနိုင်ငံသား(၉၁)ဦးတို့အား မြန်မာနိုင်ငံမှတာဝန်ရှိသူများက သက်ဆိုင်ရာနိုင်ငံတာဝန်ရှိသူများထံ ပြည်နှင်လွှဲ ပြောင်းပေးခဲ့ကြကြောင်း သိရသည်။