ရွေးကောက်ပွဲဝင်ပြိုင်မည့် ကိုယ်စားလှယ်လောင် ၄၉၀၀ ကျော် အမည်စာရင်းတင်သွင်းထား
စက်တင်ဘာ ၂၄
လာမည့် ဒီဇင်ဘာ လ ၂၈ ရက်နေ့တွင် စတင်ကျင်းပမည့် ပါတီစုံဒီမိုကရေစီ အထွေထွေရွေးကောက်ပွဲတွင် ဝင်ရောက်ယှဉ်ပြိုင်ရန် နိုင်ငံရေးပါတီ ၅၇ ပါတီနှင့် တစ်သီးပုဂ္ဂလတို့က ဝင်ရောက်ယှဉ်ပြိုင်ကြမည့် လွှတ်တော်ကိုယ်စားလှယ်လောင်း စုစုပေါင်း ၄၉၆၃ ဦး၏ အမည်စာရင်းများကို တင်သွင်းခဲ့ကြသည်ဟု ပြည်ထောင်စုရွေးကောက်ပွဲကော်မရှင်(UEC) က ယနေ့ စက်တင်ဘာလ ၂၃ ရက်တွင် အသိပေးထုတ်ပြန်ခဲ့သည်။
အဆိုပါ နိုင်ငံရေးပါတီ ၅၇ ပါတီနှင့် တစ်သီးပုဂ္ဂလ လွှတ်တော်ကိုယ်စားလှယ်လောင်းများအနေဖြင့် လွှတ်တော်ကိုယ်စားလှယ်လောင်း အမည်စာရင်းတင်သွင်းခြင်းကို စက်တင်ဘာ ၈ ရက်နေ့မှ ၂၂ ရက်နေ့အထိသက်ဆိုင်ရာကော်မရှင်အဖွဲ့ခွဲအသီးသီးတွင် အမည်စာရင်းတင်သွင်းခဲ့ကြခြင်းဖြစ်သည်။
UEC ၏ ထုတ်ပြန်ချက်အရ ပြည်ထောင်စုတစ်ဝန်းလုံး စည်းရုံးမည့် နိုင်ငံရေးပါတီ ၆ ပါတီအနက် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီက ကိုယ်စားလှယ်လောင်းစုစုပေါင်း ၁၀၁၈ ဦးဖြင့် အများဆုံးတင်သွင်းထားသည်။
၎င်းနောက်တွင် တိုင်းရင်းသားစည်းလုံး ညီညွတ်ရေးပါတီက ကိုယ်စားလှယ်လောင်းစုစုပေါင်း ၆၉၄ ဦးဖြင့် ဒုတိယအများဆုံး တင်သွင်းထားသလို ပြည်သူ့ရှေ့ဆောင်ပါတီက ကိုယ်စားလှယ်လောင်း ၆၇၂ ဦးဖြင့် တတိယအများဆုံး တင်သွင်ထားသည်။
ထို့နောက် ရှမ်းနှင့်တိုင်းရင်းသားများ ဒီမိုကရက်တစ်ပါတီ (ကျားဖြူပါတီ)က ကိုယ်စားလှယ်လောင်း ၅၈၄ ဦး၊ ပြည်သူ့ပါတီက ၅၁၂ ဦးနှင့် မြန်မာနိုင်ငံတောင်သူလယ်သမား ဖွံ့ဖြိုးတိုးတက်ရေးပါတီက ၄၂၈ ဦး တင်သွင်းထားသည်။
အလားတူ တိုင်းဒေသကြီး/ပြည်နယ် တစ်ခုအတွင်း စည်းရုံးမည့် နိုင်ငံရေးပါတီ ၅၁ ပါတီတို့က စုစုပေါင်း ကိုယ်စားလှယ်လောင်း ၉၆၀ ဦးနှင့် တစ်သီးပုဂ္ဂလက ၉၅ ဦး တင်သွင်းထားသည်။
တင်သွင်းထားသည့် အဆိုပါ ကိုယ်စားလှယ်လောင်း အမည်စာရင်းများကို စက်တင်ဘာ ၂၃ ရက်မှ အောက်တိုဘာ ၄ ရက်နေ့အထိ သက်ဆိုင်ရာကော်မရှင်အဖွဲ့ခွဲအသီးသီး၌ စိစစ်ခြင်းလုပ်ငန်းများ ဆောင်ရွက်လျက်ရှိကြောင်း ပြည်ထောင်စုရွေးကောက်ပွဲကော်မရှင်၏ သတင်းထုတ်ပြန်မှုအရ သိရသည်။
#centralnewsnaypyitaw
