◾️ရန်ကုန်-ပုဂံ ရထားခရီးစဥ်များ ပြန်လည်ပြေးဆွဲမည့်ရက် အတိအကျမသိရသေးဟုဆို
ရန်ကုန်-ပုဂံသွားရထားလမ်းပေါ်ရှိ ရန်ပယ်ချောင်းတံတား၏ အလယ်တိုင် နိမ့်ဆင်းမှုကြောင့် ယမန်နေ့(အောက်တိုဘာ ၁ ရက်) မှစ၍ ရန်ကုန်-ပုဂံ ရထားခရီးစဉ်များကို ရက်အကန့်အသတ်မရှိရပ်နားထားကြောင်း ပုဂံဘူတာကြီးမှ ထုတ်ပြန်ထားသည်။
ထိုသို့ ရပ်နားထားရသည့် ခရီးစဥ်များအား မည်သည့်ရက်တွင် ပြန်လည် ပြေးဆွဲပေးမည်ကို အတိအကျ မသိရှိရသေးကြောင်း ရန်ကုန် ဘူတာကြီးမှတာဝန်ရှိသူတစ်ဦးကပြောသည်။
"မနက်ဖြန် အောက်တိုဘာ ၃ ရက်မှာလည်း ရန်ကုန်ပုဂံရထားကထွက်မှာမဟုတ်ပါဘူး။ ရောင်းချထားတဲ့ လက်မှတ်ဖိုးတွေလည်းမနက်ကျအကုန်ပြန်အမ်းပေးမှာပါ။ လက်ရှိတံတား ပြင်ချိန်ဘယ်လောက်ကြာမယ် ဘယ်တော့ရထားပြန်ထွက်မလဲဆိုတာတော့ ကျွန်မတို့အနေနဲ့အခုချိန်ထိတော့ဘာမှမသိသေးပါဘူး"ဟု ရန်ကုန် ဘူတာကြီးမှ တာဝန်ရှိသူတစ်ဦးကပြောသည်။
မကွေးတိုင်း၊ တောင်တွင်းကြီးမြို့နယ်၊ ဝက္ကသေးကျေးရွာ၊ ဝက္ကသေးဘူတာအနီးရှိ ရန်ပယ်ချောင်းတံတား၏ အလယ်တိုင်သည် စက်တင်ဘာ ၃၀ ရက်က ရေတိုက်စားခြင်းကြောင့် နိမ့်ဆင်းသွားသည့် အတွက်ရထားသွားလာ၍မရတော့ဘဲ ရထားပြေးဆွဲမှုကို ရပ်နားလိုက်ရကြောင်း သိရသည်။
နှစ်စဉ်သီတင်းကျွတ်ကာလရောက်တိုင် ပြည်သူများပုဂံဘုရားသို့အဆင်ပြေပြေသွားရောက်ဖူးမြော်နိုင်ရန် မြန်မာ့မီးရထားကအထူးရထားအဖြင့်ထပ်မံပြီးတိုးချဲ့ပြေးဆွဲပေးသော်လည်း ယခုနှစ်တွင်ရေကြီးမှုများရှိနေသောကြောင့် ရထားပြေဆွဲရန် သေချာမှုမရှိကြောင်း သိရသည်။
"တချို့တွေကတော့သူတို့ရဲ့ဘွက်ကင်ယူထားတွေကိုပြန်ရုပ်သိမ်းသွားကြတယ်။ အခုပုဂံလာမယ်သူတွေက ရထားနဲ့လာဖို့ဆိုတာတံတားကပြင်ရဦးမယ်ဆိုတော့မလွယ်လောက်ပါဘူး။ ကားနဲ့လာမယ်ဆိုတော့လည်း လမ်းမှာကရေတွေကြီးနေတယ်ဆိုတော့ ဘယ်လာကြပါမလဲ။ ဒါကြောင့်သူတို့တင်တဲ့ ဘွက်ကင်တွေကိုသူတို့ဘက်ကပဲပြန်ဖျက်သွားပါတယ်"ဟု ပုဂံဒေသအတွင်း ဟိုတယ်လုပ်ကိုင်နေသူတစ်ဦးကပြောသည်။
ဝက္ကသေးဘူတာအနီးရှိ ရန်ကုန်-ပုဂံသွားရထားလမ်းပေါ်ရှိ ရန်ပယ်ချောင်းတံတား၏ အလယ်တိုင်ကိုပြန်လည်ပြုပြင်ရန် ရေကျချိန်ကို စောင့်ဆိုင်းရမည်ဖြစ်ကြောင်းသိရသည်။
သတင်း - ပိုင်လေး
ဓာတ်ပုံ - မြန်မာ့မီးရထား
#ပြည်တွင်းသတင်း
