အင်ဒိုနီးရှား ဘာသာရေးကျောင်းပြိုကျမှု ပိတ်မိသူ ၅၉ ယောက် သေဆုံးဖွယ်ရှိ
အင်ဒိုနီးရှားနိုင်ငံ ဂျာဗားအရှေ့ပိုင်းမှာ ပြီးခဲ့တဲ့ တနင်္လာနေ့က ပြိုကျခဲ့တဲ့ ဘာသာရေးကျောင်း အပျက်အစီးတွေအောက်မှာ လူ ၅၉ ယောက်ပိတ်မိပျောက်ဆုံးနေပြီး သူတို့တွေကို ရှာဖွေနိုင်ရေး ကယ်ဆယ်ရေးအဖွဲ့တွေက အပူအတပြင်း လုပ်ဆောင်နေပါတယ်။
"ကျွန်တော်တို့ဟာ အပူအာရုံခံဒရုန်းတွေလို နည်းပညာမြင့်ပစ္စည်းတွေကို အသုံးပြုခဲ့ပြီး သိပ္ပံနည်းကျ အချက်အလက်တွေအရတော့ အသက်ရှင်နေတဲ့ လက္ခဏာတွေ မရှိတော့ပါဘူး" လို့ အင်ဒိုနီးရှား သဘာဝဘေးအန္တရာယ် လျော့ပါးသက်သာစေရေး အေဂျင်စီ၏ အကြီးအကဲ ဆူဟာရန်တိုက သတင်းစာရှင်းလင်းပွဲမှာ ပြောပါတယ်။
ဂျကာတာမြို့အရှေ့ဘက် 780 ကီလိုမီတာခန့်အကွာရှိ ဆီဒေါ်ဂျို အရှေ့ဘက် ဂျာဗားမြို့၌တည်ရှိသော Al Khoziny ဘာသရေးကျောင်း အပေါ်ထပ်မှာ တည်ဆောက်ရေးတခုထပ်လုပ်နေချိန်မှာ အောက်ခြေဖောင်ဒေးရှင်း မခိုင်မာတာကြောင့် ပြိုကျပြီး ဝတ်ပြု ဆုတောင်းနေကြသော ကျောင်းသား ဒါဇင်ပေါင်းများစွာ အပျက်အစီးတွေအောက်မှာ ပိတ်မိနေခဲ့ပါတယ်။
ပိတ်မိနေသူတွေကို ကယ်ထုတ်ဖို့ ကယ်ဆယ်ရေးသမားတွေက အပူတပြင်းလုပ်ဆောင်နေကြပြီး မနေ့ကတော့ အပျက်အစီးတွေအောက်ကနေ အသက်ရှင်ကျန်ရစ်သူ ငါးယောက်ို ကယ်ထုတ်နိုင်ခဲ့ပါတယ်။ ကျောင်းတက်စာရင်းနဲ့ မိသားစုတွေတင်ပြတဲ့ ပျောက်ဆုံးစာရင်းအရ လူ ၅၉ ယောက်ပိတ်မိနေတယ်လို့ သဘာ၀ဘေး လျော့ပါးရေး အေဂျင်စီ ပြောရေးဆိုခွင့်ရှိသူ အဗ္ဗဒူလ်မူဟာရီက ပြောပါတယ်။
ကယ်ဆယ်ရေး သမားသူတွေဟာ ပျောက်ဆုံးနေသူတွေရဲ့ နာမည်တွေကိုခေါ်ဆိုကာ အပျက်အစီးတွေအောက်က လှုပ်ရှားမှု သို့မဟုတ် ရွေ့လျားမှုလို အရေးပါတဲ့ လက္ခဏာတွေကို ခြေရာခံလုပ်ဆောင်နေကြတယ်လို့ ကယ်ဆယ်ရေး အေဂျင်စီမှ တာဝန်ရှိသူ အီမီဖရီဇာက ရိုက်တာကို ပြောပါတယ်။
လိမ္မော်ရောင်ဝတ်စုံနဲ့ ကယ်ဆယ်ရေးသမားတွေဟာ အပျက်အစီးများအောက်မှာ ပိတ်မိနေတဲ့ ကျောင်းသားတွေကို ရှာဖွေဖို့ ကျဉ်းမြောင်းတဲ့ ဥမင်လိုနေရာတွေကနေ အတွင်းကို ဝင်ရောက်ရှာဖွေနေကြပါတယ်။
အပျက်အစီးတွေကို စက်ယန္တယားကြီးတွေနဲ့ ဖယ်ရှားဖို့ရာမှာ ပိတ်မိနေသူတွေ ထိခိုက်မှာစိုးလို့ ယခင်နေ့တွေက လုပ်ဆောင်ခဲ့ခြင်းမရှိပေမယ့် ဒီနေ့မှာတော့ အချိတ်အဆက် ရှိမနေတဲ့ အပျက်အစီးများကို ဖယ်ရှားဖို့ ကရိန်းတစီးကို အသုံးပြု လုပ်ဆောင်နေတယ်လို့ တာဝန်ရှိသူတွေက ပြောပါတယ်။
