မယ်ဆိုင်းချောင်းရေမြင့်တက်လို့ တာချီလိတ်မှာ ရုတ်တရက်ရေကြီးပြန်၊ ၂၄ နာရီအတွင်း ၃ ပေထပ်တက်မယ် သတိပေး
အောက်တိုဘာ ၁၊၂၀၂၅
ရှမ်းပြည်နယ်၊ တာချီလိတ်မြို့မှာ တောင်ကျရေစီးဆင်းမှုကြောင့် မယ်ဆိုင်ချောင်းရေမြင့်တက်ပြီး ရပ်ကွက်လေး ခုလောက်မှာ ရုတ်တရက် ရေကြီးရေလျှံ မှုဖြစ်ပွားနေတဲ့အပြင် ကိုယ်ပိုင်အထက်တန်းကျောင်းက ကျောင်းသားတွေကိုလည်း အရေးပေါ်ကယ်ထုတ်ပေးခဲ့ရတယ်လို့သိရပါတယ်။
" တာချီလိတ်မှာက မိုးတအားမသည်းဘဲ ရုတ်တရက် ရေကြီးလာတာ။ဒီမနက် ၉ နာရီလောက်မှာမယ်ဆိုင်းချောင်းရေက ရုတ်တရက်ကိုမြင့်လာပြီးဖြစ်သွားတာ။တောင်ပေါ်ဘက်တွေမှာမိုးတအားရွာပြီး ဒီဘက်ကို ချောင်းတလျှောက်စီးလာတဲ့ရေတွေကြောင့် ဖြစ်နေတာပါ။" လို့ ဒေသခံကပြောပါတယ်။
မကာအိုခမ်း ရပ်ကွက်အပါအဝင် ဗိုလ်ချုပ်လမ်းမကြီးနဲ့ မြို့ပေါ်ရပ်ကွက်တွေဖြစ်တဲ့ ပုန်းထွန်၊ တာလော့ ၊ မယ်ခေါင်ရပ်ကွက် တွေမှာ ရေကြီးမှုဖြစ်ပွားနေတာဖြစ်ကြောင်း ၊ရုတ်တရက်ရေကြီးမှုကြောင့် မကာအိုခမ်းရပ်ကွက်ရှိ ရွှေမဟာကိုယ်ပိုင်ကျောင်းက ကလေးတွေကို ရေဘေးလွတ်ရာကို ရွှေ့ပြောင်းပေးခဲ့ရတာဖြစ်တယ်လို့သိရပါတယ်။
တာချီလိတ်မှာ ယခု ၂၀၂၅ ခုနှစ်အတွင်းမှာ ယခုရေကြီးမှုအပါအဝင်ဆိုပါက ရေကြီးမှုပေါင်း ၁၇ ကြိမ်ထက်မနည်းဖြစ်ပွားခဲ့တယ်လို့ သိရပါတယ်။
" ကျောင်းကိုအသွားအပြန်တက်တဲ့ကျောင်းသားတွေကိုသွားပြီးတော့ မီးသတ်ကစက်လှေနဲ့သွားကယ်ကြတာပေါ့။ရေက နိမ့်တဲ့နေရာမှာခါးအထက်ရောက်သွားတယ်။တခြားနေရာကတော့ ပေါင်လောက်ပေါ့ ။အထက်ဘက်က ရေကြီးတော့ အဲဘက်က ချောင်းရိုးတလျှောက်စုန်ဆင်းလာတဲ့ရေတွေကြောင့် မယ်ဆိုင်ချောင်းရေမြင့်တက်ပြီးရုတ်တရက်ရေကြီးတာပါ။တာချီလိတ်တခုပဲမိုးရွာတာမျိုးဆိုရေမကြီးဘူး။အခုတာချီလိတ်မှာရေက ခဏခဏတက်ပြီး ဗြုန်းစားကြီးကျ အဲဒီလိုဖြစ်နေတယ်။ဒီနှစ်ထဲမှာကိုရေခဏဏကိုတက်တယ်။" လို့ တာချီလိတ်မြို့မှ ဦးလှမိုးလူမှုကူညီရေးအသင်းတာဝန်ရှိသူမှပြောပါတယ်။
တာချီလိတ်မြို့နယ်မှာ မယ်ဆိုင်ချောင်းရေ မြင့်တက်လာပါက အမြဲတမ်းရေကြီးလေ့ရှိတာကြောင့် ချောင်းတွေ ၊ မြောင်းတွေကို မတိမ်ကောအောင် နူန်းတွေ တူးဖော်ဖို့လိုအပ်နေသလို ချောင်းနံရံတွေကိုလည်း ယခုထက်ပိုပြီး မြှင့်ပေးဖို့ လိုအပ်ကြောင်း ဒေသခံကပြောဆိုပါတယ်။
မယ်ဆိုင်ချောင်းရေက လက်ရှိမှာ တာချီလိတ်မြို့နယ်ရဲ့စိုးရိမ်ရေမှတ်အထက်ကို ၁ ပေကျော်လွန်နေပြီး ၂၄ နာရီအတွင်းမှာ နောက်ထပ် ၃ ပေထပ်တက်လာနိုင်တာကြောင့် ချောင်းကမ်းအနီးနေထိုင်သူတွေနဲ့ မြေအနိမ့်ပိုင်းနေထိုင်သူတွေ ရေဘေးလွတ်ရာကို ပြောင်းရွှေ့ကြဖို့ မိုးလေဝသနှင့်ဇလဗေဒဦးစီးဌာနကသတိပေးထားပါတယ်။
ဓာတ်ပုံ - မီးသတ်
