မုံရွာမြို့၌ တည်ဆောက်နေသည့် မော်တော်ယာဥ်ရောင်းဝယ်ရေးစင်တာတွင် လုပ်ငန်းရှင် (၄၁) ဦးကို နေရာချထားပေးသွားမည်

စစ်ကိုင်းတိုင်းဒေသကြီး၊ မုံရွာမြို့၊ ဘုန်းစိုးရပ်၊ ကျောက်ကာလမ်းဘေးတွင် မော်တော်ယာဥ်ရောင်းဝယ်ရေးစင်တာတစ်ခုတည်ဆောက်နေပြီး လုပ်ငန်းရှင် (၄၁) ဦးကို နေရာချထားပေးသွားမည်ဖြစ်ကြောင်း သိရသည်။
"ပင်မအဆောက်အဦး (၄) ခုပါရှိပြီး ဆိုင်ခန်း (၄၁) ခန်းပါရှိပါတယ်။ ဆိုင်ခန်းငှားရမ်းအသုံးပြုဖို့ လာရောက်လျောက်ထားသူ (၇၁) ဦး ရှိပါတယ်။ အဲဒီအထဲကမှ အမှန်တကယ်ဆိုင်ခန်းဖွင့်လှစ်မယ့် (၄၁) ဦးကို စိစစ်ရွေးချယ် ဖွင့်လှစ်စေမှာဖြစ်ပါတယ်။ နေရာချထားရေးအဖွဲ့မှာ မုံရွာခရိုင်စီမံခန့်ခွဲရေးနဲ့အုပ်ချုပ်ရေးအဖွဲ့ ဥက္ကဋ္ဌ ခေါင်းဆောင်တဲ့ မြို့နယ်စည်ပင်သာယာရေးအဖွဲ့၊ မြို့နယ်စီမံခန့်ခွဲရေးအဖွဲ့ စတဲ့ အဖွဲ့ဝင်(၉) ဦးအဖွဲ့ကို စနစ်တကျဖွဲ့စည်းပြီး စစ်ကိုင်းတိုင်းဒေသကြီးအစိုးရကို တင်ပြပြီး အမှန်တကယ်လုပ်ကိုင်ဆောင်ရွယ်မယ့် သူတွေကို ရွေးချယ်နေရာချထားတာဖြစ်ပါတယ်။ လစဥ်ငှားရမ်းခနဲ့ ငှားရမ်းလုပ်ဆောင်လို့ ရအောင်စီစဥ်ထားပါတယ်"ဟု မုံရွာမြို့နယ်စည်ပင်သာယာရေးအဖွဲ့ အမှုဆောင်အရာရှိ ဦးထွန်းထွန်းက ပြောသည်။
မုံရွာမြို့တွင် ကား၊ ဆိုင်ကယ်နှင့် ယာဥ်မျိုးစုံဆက်စပ်ပစ္စည်းများ ရောင်းဝယ်နိုင်မည့် မော်တော်ယာဥ်ရောင်းဝယ်ရေးစင်တာကိုတည်ဆောက်ပေးလျက်ရှိရာ ပင်မအဆောက်အဦး (၄) ခုပါရှိကာ ဆိုင်ခန်း (၄၁) ခန်းပါဝင်ကြောင်း သိရသည်။
မုံရွာမြို့တွင် ကားဆိုင်ကယ်နဲ့ယာဥ်မျိုးစုံဆက်စပ်ပစ္စည်းများ ရောင်းဝယ်နိုင်သည့် မော်တော်ယာဥ်ရောင်းဝယ်ရေးစင်တာကို မုံရွာမြို့၊ ဘုန်းစိုးရပ်၊ ကျောက်ကာလမ်းဘေးမှာရှိသည့် မြေအကျယ် (၃ဒသမ၉) ဧက ပေါ်တွင် စစ်ကိုင်းတိုင်းဒေသကြီး အစိုးရအဖွဲ့ လမ်းညွှန်ချက်နှင့် အညီအကောင်အထည်ဖော်ဆောင်ရွက်နေခြင်း ဖြစ်သည်။
"စင်တာနေရာဟာ အရင်က ခြုံနွယ်ပိတ်ပေါင်းတွေနဲ့ အမြင်မသင့်တော်ခဲ့ဘူး။ မီးဘေးအန္တရာယ်လည်း စိုးရိမ်ရတယ်။ ဒါကြောင့် မုံရွာမြို့နယ် စည်ပင်သာယာရေးအဖွဲ့အနေနဲ့ စည်ပင်သာယာရေး ဥပဒေ ၁၅ (က) ၊ ပုဒ်မခွဲ (၃၆) အရ တိုင်းဒေသကြီး အစိုးရကိုတင်ပြပြီး မော်တော်ယာဥ်ရောင်းဝယ်ရေးစင်တာကိုဆောင်ရွက်ခဲ့တာဖြစ်ပါတယ်။ မော်တော်ကားနဲ့ပါတ်သက်တဲ့ ပစ္စည်းစုံရောင်းဝယ်မယ့်နေရာဖြစ်ပါတယ်။ ပြုပြင်ထိမ်းသိမ်းတဲ့ ဌာနတွေလည်းပါဝင်ပါမယ်။ ရေဆေးရုံလည်းပါပါမယ်။ မော်တော်ဆိုင်ကယ်နဲ့ ပါတ်သက်တဲ့ပစ္စည်းတွေရောင်းဝယ်ဖို့လည်း ပါဝင်ပါတယ်။ မော်တော်ဆိုင်ကယ်အရောင်းဆိုင်လည်း ပါမှာဖြစ်ပါတယ်။ စားသောက်ဆိုင်တန်းလည်းပါဝင်မှာပါ။ အလှပြင်ဆိုင်၊ ဆံသဆိုင်တွေပါထည့်သွင်းထားပါတယ်။ စတိုးဆိုင်တွေ၊ တိရစ္ဆာန်အစာဆိုင်တွေကိုပါထားသွားမှာပါ"ဟု ဦးထွန်းထွန်းက ရှင်းပြသည်။
ယခုစင်တာ တည်ဆောက်ပေးခြင်းသည် မုံရွာမြို့ထဲတွင် တကွဲတပြားဖြင့် ကား၊ ဆိုင်ကယ်များ ရောင်းဝယ်နေရာမှ တစ်နေရာတည်း ကျယ်ကျယ်ဝန်းဝန်း စနစ်တကျဖြင့် ရောင်းဝယ်နိုင်ခွင့်ရှိသလို ကားဆိုင်ကယ်ပြုပြင်ခြင်း ရေဆေးခြင်းစသဖြင့် အစစအရာရာအဆင်ပြေချောမွေ့စွာဆောင်ရွက်နိုင်မည်ဖြစ်သည့်အပြင် အလုပ်အကိုင်အခွင့်အလမ်းများစွာရရှိကြမည်ဖြစ်သည်။

လက်ဖက်ပွဲတော်ပြုလုပ်သည့်အတွက် မြန်မာ့လက်ဖက်ကို ကျယ်ကျယ်ပြန့်ပြန့် သိရှိလာနိုင်
------------------------------------------------------------------
မြန်မာ့လက်ဖက်ပွဲတော်ကို ကျင်းပပြုလုပ်တဲ့အတွက် မြန်မာ့လက်ဖက်ကို ပြည်သူ့တွေထဲမှာ ထဲထဲဝင်ဝင် သိရှိ လာနိုင်တယ်လို့ ရန်ကုန်တိုင်းဒေသကြီးဝန်ကြီးချုပ် ဦးစိုးသိန်းက ပြောပါတယ်။
ဖေဖော်ဝါရီ(၁၃)ရက်က ရန်ကုန်မြို့ရှိ စိမ်းလန်းစိုပြေ ဥယျာဥ်မှာ ကျင်းပပြုလုပ်တဲ့ လက်ဖက်ပွဲတော် တတိယနေ့မှာ အခုလို ပြောကြားခဲ့တာဖြစ်ပါတယ်။
ဒါအပြင် ထူးခြားဝိသေသရှိတဲ့ လက်ဖက်စို စားသုံးတဲ့ ယဉ်ကျေးမှု ဓလေ့ကိုလည်း ပိုမိုတန်ဖိုး ထားတတ် လာကြ လိမ့်မယ်လို့ ဆိုပါတယ်။
မြန်မာ့လက်ဖက်ယဉ်ကျေးမှုကို ကမ္ဘာ့ကစိတ်ဝင်စားလာမယ်ဆိုပါက လက်ဖက်စိုဟာ ရောင်းကောင်းတဲ့ ထုတ်ကုန် တစ်ခု ဖြစ်လာနိုင်တယ်လို့လည်း ရန်ကုန်တိုင်းဒေသကြီး ဝန်ကြီးချုပ် ဦးစိုးသိန်းက ပြောပါတယ်။
မြန်မာ့ယဥ်ကျေးမှုအမွေအနှစ်များ ထိန်းသိမ်းစောင့်ရှောက်ရေးအဖွဲ့ နဲ့ မြန်မာနိုင်ငံ လက်ဖက်စိုက်ပျိုး ထုတ်လုပ် တင်ပို့ ရောင်းချသူများအသင်းတို့ ပူးပေါင်းပြီး မြန်မာ့လက်ဖက်ပွဲတော်ကို ဖေဖော်ဝါရီ ၁၁ ရက်ကနေ ၁၄ ရက် အထိ မနက် ၁၀ နာရီကနေ ည ၈ နာရီအထိ ကျင်းပပြုလုပ်နေတာ ဖြစ်ပါတယ်။
လက်ဖက်ပွဲတော်တတိယနေ့မှာဆိုရင်လက်ဖက်နဲ့ပြုလုပ်ထားတဲ့မုန့်မျိုးစုံတွေ၊လက်ဖက်နဲ့လုပ်ထားတဲ့စားစရာမျိုးစုံကိုပြသခဲ့ကြတာဖြစ်ပြီးတိုင်းရင်းသားရိုးရာအကတွေနဲ့ဖျော်ဖြေမှုတွေပြုလုပ်ခဲ့ကြပါတယ်။
အခု လက်ဖက်ပွဲတော်မှာ လက်ဖက်ကို မျိုးစုံစားလို့ရတယ်ဆိုတဲ့အသိကို ပေးနိုင်ခဲ့တယ်လို့ Maw Shan Green Tea and Laphet မှ မန်နေဂျင်းဒါရိုက်တာ ဒေါ်နေခြည်မြတ်ထွန်းက ပြောပါတယ်။
မြန်မာ့လက်ဖက်ပွဲတော်ကို ကျင်းပရတာက လက်ဖက်စိုစားသုံးတဲ့ ယဉ်ကျေးမှုဓလေ့ကို မြန်မာနိုင်ငံသားတွေ သာမက ကမ္ဘာ့နိုင်ငံ အသီးသီး ကပါ နှစ်သစ်ဖွယ်ရာ အစားအစာ တစ်ခုအဖြစ် သိမြင်လာစေဖို့ ရည်ရွယ်ပြီး ကျင်းပတာ ဖြစ်တယ်လို့ ဆိုပါတယ်။
ဒါ့အပြင် လက်ဖက်စားသုံးတဲ့ ယဉ်ကျေးမှု ဓလေ့ကို UNESCO Representative List of The Intangible Cultural Heritage ရဲ့လူသားမျိုးနွယ်ကိုယ်စားပြု ဒြပ်မဲ့ယဉ်ကျေးမှု အမွေအနှစ်အနေနဲ့ သတ်မှတ်စေဖို့နဲ့ မျိုးဆက်သစ်တွေ အပါအဝင် ပြည်သူတစ်ရပ်လုံးက မြန်မာ့လက်ဖက်စို စားသုံးတဲ့ဓလေ့ကို ထဲထဲ ဝင်ဝင် ပိုမိုသိရှိနားလည်ပြီး နှစ်သက် မြတ်နိုး တန်ဖိုးထားကာ ဆက်လက်ထိန်းသိမ်း စောင့်ရှောက်နိုင်စေဖို့ ရည်ရွယ်ကျင်းပတာဖြစ်တယ် လို့သိရပါတယ်။

တရုတ်-မြန်မာ ချစ်ကြည်ရေးသမိုင်းသစ် အတူတကွ ရေးဖွဲ့မည်
-------------------------------------
တရုတ်-မြန်မာ ချစ်ကြည်ရေးဆက်ဆံမှု သမိုင်းသစ်ကို အတူတကွ ရေးဖွဲ့သွားမယ်လို့ မြန်မာနိုင်ငံဆိုင်ရာ တရုတ် ပြည်သူ့သမ္မတနိုင်ငံ သံအမတ်ကြီး မစ္စ မာကျားက ပြောပါတယ်။
ဖေဖော်ဝါရီ ၁၄ ရက်က ရန်ကုန်မြို့၊ အမျိုးသားအားကစားပြိုင်ပွဲရုံ(၁) သုဝဏ္ဏမှာ ကျင်းပတဲ့ ၂၀၂၆ ခုနှစ် မြင်းနှစ် တရုတ် နှစ်သစ်ကူးပွဲတော်အခမ်းအနားမှာ အခုလို ပြောကြားခဲ့တာပါ။
၂၀၂၅ ခုနှစ်ဟာ တရုတ်-မြန်မာ ဆက်ဆံရေးအတွက် အရေးပါတဲ့နှစ်တစ်နှစ်ဖြစ်ခဲ့ပြီး နှစ်နိုင်ငံဆက်ဆံရေးဟာ ထိပ်သီးခေါင်းဆောင်တွေရဲ့ လမ်းညွှန်မှုအောက်မှာ အဆင့်သစ်တစ်ခုကို တက်လှမ်းခဲ့တယ်လို့ မစ္စ မာကျားက ပြောပါတယ်။
တရုတ်-မြန်မာ စီးပွားရေးပူးပေါင်းဆောင်ရွက်မှုမှာ တိုးတက်မှုအသစ်တွေ ရရှိခဲ့ပြီး နှစ်နိုင်ငံကုန်သွယ်မှုပမာဏဟာ ၁၉ ရာခိုင်နှုန်း တိုးတက်ခဲ့သလို တရုတ်နိုင်ငံရဲ့ မြန်မာနိုင်ငံမှာ ရင်းနှီးမြှုပ်နှံမှုကလည်း ၂၃၀ ရာခိုင်နှုန်းထိ တိုးတက် ခဲ့တယ်လို့ ဆိုပါတယ်။
ပြီးခဲ့တဲ့နှစ်က မြန်မာနိုင်ငံကို လာရောက်တဲ့ တရုတ်ခရီးသွားဧည့်သည်ဦးရေကလည်း နှစ်သိန်းခွဲကျော် ရှိခဲ့ပြီး မြန်မာနိုင်ငံရဲ့ အကြီးဆုံး ခရီးသွားအရင်းအမြစ် နိုင်ငံအဖြစ် ဆက်လက်တည်ရှိခဲ့ပါတယ်။ တရုတ်နိုင်ငံဟာ ၁၅ ကြိမ်မြောက် ငါးနှစ်စီမံကိန်းကို စတင်အကောင်အထည်ဖော်တော့မှာ ဖြစ်ပြီး မြန်မာနိုင်ငံကလည်း ခရီးစဉ်သစ် တစ်ခုကို စတင်တော့မှာ ဖြစ်တယ်လို့ ဆိုပါတယ်။
ဒါ့အပြင် နှစ်နိုင်ငံခေါင်းဆောင်တွေ သဘောတူညီထားတဲ့ အရေးကြီးတဲ့ အချက်အလက်တွေကို အကောင် အထည်ဖော် ဆောင်ရွက်သွားမှာဖြစ်ပြီး ကံကြမ္မာတူ အသိုက်အဝန်းတည်ဆောက်ရေးကို လက်တွဲခိုင်မာစေကာ နှစ်နိုင်ငံ ကဏ္ဍအလိုက် ပူးပေါင်းဆောင်ရွက်မှုတွေကို တွန်းအားပေးဆောင်ရွက်သွားမှာ ဖြစ်တယ်လို့ မစ္စ မာကျားက ပြောကြားခဲ့ပါတယ်။

မရမ်းကုန်းတွင်ကစတိုးဆိုင်မီးလောင်ပြီး အမျိုးသမီးနှစ်ဦးသေဆုံး
-------------------------------------
ရန်ကုန်တိုင်းဒေသကြီး၊ မရမ်းကုန်းမြို့နယ်၊ အမှတ်(၂)ရပ်ကွက်၊ အောက်ဗဟိုလမ်းမပေါ်မှာ ဖွင့်လှစ်ထားတဲ့ စတိုးဆိုင်မှာ ဖေဖော်ဝါရီ ၁၅ရက် မနက်၃နာရီ ၃၇မိနစ်ခန့်က မီးလောင်မှုဖြစ်ပွားပြီး အသက်၆၀ကျော်ခန့်ရှိတဲ့ ညီအစ်မတော်စပ်သူ ဆိုင်ရှင်အမျိုးသမီးကြီးနှစ်ဦး သေဆုံးသွားတယ်လို့ ဖြစ်စဉ်ကိုသွားရောက်ကူညီခဲ့တဲ့ လူမှုကူညီရေးအသင်းအဖွဲ့တွေနဲ့ ဒေသခံတွေရဲ့ပြောကြားချက်အရ သိရပါတယ်။
အဲဒီမီးလောင်မှုကို မရမ်းကုန်းမြို့နယ်မီးသတ်စခန်းက မီးသတ်ယာဉ်တွေနဲ့ လူမှုကူညီရေးအသင်းအဖွဲ့တွေ ဝိုင်းဝန်းငြှိမ်းသတ်ခဲ့ရပြီး မနက် ၃နာရီ ၅၃မိနစ်မှာ မီးငြိမ်းသွားတယ်လို့လည်း မြန်မာနိုင်ငံမီးသတ်တပ်ဖွဲ့ရဲ့ ထုတ်ပြန်ချက်အရ သိရပါတယ်။
မီးလောင်ကျွမ်းရတဲ့အကြောင်းရင်းကိုတော့ စိစစ်နေဆဲဖြစ်တယ်လို့လည်း သိရပါတယ်။

ဖားဆောင်းမြို့အား တပ်မတော်က ပြန်လည်တိုက်ခိုက် ထိန်းချုပ်
--------------------------------------------
တပ်မတော်စစ်ကြောင်းတွေက KNPP၊ KNDF အဖွဲ့တွေ နဲ့ PDF အဖွဲ့တွေ ယာယီစိုးမိုးထားတဲ့ ကယားပြည်နယ်၊ ဖား ဆောင်းမြို့ကို ဖေဖော်ဝါရီ ၁၅ ရက်မှာ ပြန်လည်တိုက်ခိုက် ထိန်းချုပ်နိုင်ခဲ့တယ်လို့ အမျိုးသားကာကွယ်ရေး နှင့် လုံခြုံရေး ကောင်စီ သတင်းထုတ်ပြန်ရေးအဖွဲ့က ထုတ်ပြန်ပါတယ်။
ဖားဆောင်းမြို့ နဲ့ ဒေသတစ်ဝိုက်ကို ပြန်လည်ထိန်းချုပ်နိုင်ရေး လိုအပ်တဲ့ ပြင်ဆင်စုဖွဲ့မှုတွေ ဆောင်ရွက်ပြီး ၂၀၂၅ ခုနှစ်၊ စက်တင်ဘာ ၃၀ ရက်ကစပြီး ဘောလခဲ-ထူးချောင်း-ဖားဆောင်း ဆက်သွယ်ရေး လမ်းကြောင်းရဲ့ အနောက်ဘက်ခြမ်းက စတင်ပြီး အဆင့်ဆင့် ခြေကုပ်ယူပြီး နယ်မြေရှင်းလင်းတာတွေ ဆောင်ရွက်ခဲ့တယ်လို့ ဆိုပါတယ်။
နယ်မြေရှင်လင်းရေး လုပ်ငန်းတွေကို စစ်နည်းဗျူဟာမြောက် စစ်ကြောင်းတွေ ခွဲပြီး တစ်ဆင့်ပြီး တစ်ဆင့် တိုက်ခိုက် ချေမှုန်းခဲ့ရာ ၂၀၂၆ ခုနှစ်၊ ဖေဖော်ဝါရီ ၁၂ ရက်မှာ အကြမ်းဖက်သောင်းကျန်းသူတွေရဲ့ အမာခံကျေးရွာကြီးတွေဖြစ်တဲ့ နမ့်ကစ်ကျေးရွာ နဲ့ ပါပုကျေးရွာတို့ကို ခက်ခက်ခဲခဲ တိုက်ခိုက်သိမ်းပိုက် ထိန်းချုပ်နိုင်ခဲ့ပြီးမှ ဖားဆောင်းမြို့ကို ဆက်လက် ရှင်းလင်းချီတက်ခဲ့ရာ ဖေဖော်ဝါရီ ၁၅ ရက်မှာ ဖားဆောင်းမြို့ကို အပြီးတိုင် ပြန်လည်သိမ်းပိုက် ထိန်းချုပ်နိုင်ခဲ့တာလို့ ထုတ်ပြန်ချက်မှာ ဖော်ပြထားပါတယ်။
ဖားဆောင်းမြို့ကို ပြန်လည်ထိန်းချုပ်နိုင်ဖို့ တိုက်ပွဲကြီး/ငယ် ၃၁ ကြိမ် ဖြစ်ပွားခဲ့ပြီး ရန်သူ့ထံမှ လက်နက်မျိုးစုံ ၁၇ လက်၊ အကြမ်းဖက်သမား ရုပ်အလောင်းတွေ နဲ့ ဖောက်ခွဲရေးဆက်စပ်ပစ္စည်းတွေ သိမ်းဆည်းရရှိခဲ့ပြီး လုံခြုံရေးတပ်ဖွဲ့ဝင်အချို့ နိုင်ငံတော်အတွက် အသက်ပေးလှူခဲ့ရပြီး အချို့ ထိခိုက်/ဒဏ်ရာ ရရှိခဲ့ကြတယ်လို့ ထုတ်ပြန်ချက်မှာ ဖော်ပြပါရှိပါတယ်။
အခုလို တပ်မတော်စစ်ကြောင်းတွေက ဖားဆောင်းမြို့ကို ပြန်လည်သိမ်းပိုက် ထိန်းချုပ်နိုင်ခဲ့တဲ့အတွက် လွိုင်ကော်-ဒီး မော့ဆို-ဖရူဆို-ဘောလခဲ-ဖားဆောင်း ဆက်သွယ်ရေး လမ်းမကြီးကို မကြာမီအချိန်မှာ ပြန်လည်ဖွင့်လှစ်နိုင်တော့မှာ ဖြစ် ပြီး လိုအပ်တဲ့ နယ်မြေလုံခြုံရေးလုပ်ငန်းတွေကိုလည်း တိုးမြှင့် ဆောင်ရွက်နေတယ်လို့ ထုတ်ပြန်ထားပါတယ်။

ဘလက်ဘန်းအသင်းတွင် လက်ထောက်နည်းပြအဖြစ် ခန့်အပ်ခြင်းခံလာရတဲ့ ယူနိုက်တက်စတားဟောင်း
====================
ယူနိုက်တက်နောက်ခံလူဟောင်းဖီးလ်ဂျုံးစ်ဟာ နည်းပြဘဝ ပထမခြေလှမ်းအဖြစ် ဘလက်ဘန်းအသင်းတွင် နည်းပြမိုက်ကယ်အိုနေးလ်ရဲ့ လက်ထောက်နည်းပြများအဖြစ် ရိန်းဂျားနှင့် ဆောက်သမ်တန်အလယ်တန်းကစားသမားဟောင်းစတီဗင်ဒါးဗီးစ်နှင့်အတူ ခန့်အပ်ခြင်းခံလာရပါတယ်။
မြောက်အိုင်ယာလန်နည်းပြဟာ ချန်ပီယံရှစ်ကလပ်အား ရာသီအကုန်အထိ ကိုင်တွယ်ရန် သဘောတူညီမှု ရရှိကာ ဘလက်ဘန်းနှင့် မြောက်အိုင်ယာလန်တို့အား ပူးတွဲ ကိုင်တွယ်လာမှာလည်း ဖြစ်ပါတယ်။
အိုနေးလ်ဟာ လာမယ့်လတွင် မြောက်အိုင်ယာလန်အား ကမ္ဘာ့ဖလားခြေစစ်ပွဲအောင်မြင်ရေး အီတလီနှင့် ပလေးအော့ဖ်ကစားရန် ရှိပေမယ့် ဘလက်ဘန်းအား ပူးတွဲ ကိုင်တွယ်လာမှာလည်း ဖြစ်ပါတယ်။
ဖီးလ်ဂျုံးစ်ဟာ ၂၀၂၄ ခုနှစ် ဩဂုတ်လတွင် ကစားသမားဘဝမှ အနားယူပြီးနောက် ယူနိုက်တက်ယူ-၁၄ ၊ ယူ-၁၈ တို့တွင် တာဝန်ထမ်းဆောင်ကာ နည်းပြအတွေ့အကြုံ ရယူခဲ့ပြီးလည်း ဖြစ်ပါတယ်။
သူဟာ ယူအီးအက်ဖ်အေအေလိုင်စင် ရရှိထားပြီးဖြစ်ကာ ပရိုလိုင်စင် ရရှိရေး လုပ်ဆောင်နေပါတယ်။
ယခုအခါ သူဟာ အိုနေးလ်ရဲ့ ဘလက်ဘန်းအား ချန်ပီယံရှစ်မှ တန်းမဆင်းရရေးအတွက် ထောက်ပံ့ကူညီလာရပါမယ်။
ဖီးလ်ဂျုံးစ်ဟာ ဘလက်ဘန်းတွင် ကစားသမားဘဝစတင်ကာ ၂၀၁၁ ခုစ်တွင် ယူနိုက်တက်သို့ ပြောင်းခဲ့ပြီး ပရီးမီးယားလိဂ်ဖလား၊ အက်ဖ်အေဖလားနှင့် ယူရိုပါလိဂ်ဖလားတို့ ရရှိခဲ့ပါတယ်။

လူတန်လေဆိပ်တွင် ရဲတပ်ဖွဲ့ဝင်အား တိုက်ခိုက်မှုကြောင့် ဖမ်းဆီးခြင်းခံခဲ့ရတဲ့ လီဗာပူးနှင့် အင်္ဂလန်ယူ-၂၁ စတားဟောင်း
====================
လီဗာပူးနှင့် အင်္ဂလန်ယူ-၂၁ စတားဟောင်းဂျော်ဒန်အိုင်ဘီဟာ ပြီးခဲ့တဲ့လတုန်းက လူတန်လေဆိပ်တွင် ဖမ်းဆီးထိန်းသိမ်းခြင်းခံခဲ့ရကြောင်း သိရပါတယ်။
ဘူလ်ဂေးရီးယားကလပ် လိုကိုမိုးတစ်ဆိုဖီယာတွင် ကစားနေတဲ့ အိုင်ဘီဟာ ဒီဇင်ဘာလလယ်ပိုင်းတုန်းက လူတန်လေဆိပ်သို့ ရောက်လာချိန်တွင် ရဲတပ်ဖွဲ့အား တိုက်ခိုက်မှုကြောင့် ဖမ်းဆီးခံခဲ့ရတာပါ။
အသက် ၃၀ နှစ်ရှိ အိုင်ဘီဟာ အာမခံဖြင့် ပြန်လည်လွတ်မြောက်လာခဲ့ပြီး မတ်လ ၆ ရက်နေ့တွင် ခရွိုင်ဒန်တရားရုံးတွင် အမှုရင်ဆိုင်ရပါမယ်။
သူဟာ အမှုရင်ဆိုင်ရခြင်း မရှိသေးမီ ဘူလ်ဂေးရီးယားသို့ ပြန်သွားခဲ့ပါတယ်။
အိုင်ဘီဟာ ပြီးခဲ့တဲ့ နိုဝင်ဘာလတုန်းက လိုကိုမိုးတစ်ဆိုဖီယာသို့ ပြောင်းခဲ့ပြီးနေက် ကလပ်အတွက် တစ်ပွဲမျှ ကစားခွင့်မရသေးသူလည်း ဖြစ်ပါတယ်။
သူဟာ ၂၀၁၆ ခုနှစ်တုန်းက လီဗာပူးမှ ဘုန်းမောက်သို့ ထိုစဉ်က ကလပ်စံချိန်တင်ပြောင်းရွှေ့ကြေး ပေါင် ၁၆ သန်းပြောင်းခဲ့သူလည်း ဖြစ်ပါတယ်။
ယခုကစားနေတဲ့ ဘူလ်ဂေးရီးယားကလပ်က အိုင်ဘီအတွက် ကစားသမားဘဝ ၁၁ ခုမြောက်ကလပ်လည်း ဖြစ်ပါတယ်။

သတင်းထောက်အား လက်ထောက်နည်းပြအဖြစ် တာဝန်ထမ်းဆောင်ရန် ကမ်းလှမ်းလာတဲ့ ဂွါဒီယိုလာ
===================
မန်စီးတီးနည်းပြပက်ဂွါဒီယိုလာဟာ ယနေ့ညတွင် ဆဲလ်ဖို့ဒ်နှင့် ရင်ဆိုင်ကစားရမယ့် အက်ဖ်အေဖလားစတုတ္ထအဆင့်ပွဲစဉ်မတိုင်မီ သတင်းစာရှင်းလင်းပွဲတွင် နည်းဗျူဟာပိုင်းနှင့်ပတ်သက်ပြီး ထဲထဲဝင်ဝင် မေးမြန်းခြင်းခံရပြီးနောက် သတင်းထောက်အား သူ့ရဲ့ လက်ထောက်နည်းပြအဖြစ် တာဝန်ထမ်းဆောင်ရန် ကမ်းလှမ်းလာခဲ့ပါတယ်။
မန်စီးတီးဟာ စနေနေ့ညတွင် ဆဲလ်ဖို့ဒ်နှင့် အက်ဖ်အေဖလားစတုတ္ထအဆင့်ပွဲစဉ်အဖြစ် ရင်ဆိုင်ကစားရပါမယ်။ မန်စီးတီးဟာ ပြီးခဲ့တဲ့ရာသီတုန်းက ဆဲလ်ဖို့ဒ်နှင့် ရင်ဆိုင်ခဲ့စဉ်တုန်းက ၈-၀ ဂိုးဖြင့် အနိုင်ရခဲ့ပါတယ်။
ဂွါဒီယိုလာဟာ လိဂ် ၂ ကလပ်နှင့် ပွဲစဉ်တွင် လူစာရင်းအပြောင်းအလဲ တချို့ ပြုလုပ်လာမယ်လို့ ယူဆရပါတယ်။
ဂွါဒီယိုလာက "ကျွန်တော်ရည်မှန်းချက်က ဆဲလ်ဖို့ဒ်ကို အနိုင်ရပြီး နောက်တစ်ဆင့်သို့ တက်ဖို့ပါ။ ပြီးခဲ့တဲ့နှစ်တုန်းက သူတို့ လုပ်ပြခဲ့တာ အရမ်းကောင်းတယ်။ ဗိုလ်လုပွဲတွေနဲ့ ဆီမီးဖိုင်နယ်သို့ တက်ခဲ့တယ်။ ကံဆိုးစွာဘဲ နောက်ဆုံးဗိုလ်လုပွဲ ၂ ခုမှာ ကျွန်တော်တို့ မနိုင်ခဲ့ဘူး။ ဒါပေမယ့် အောင်မြင်မှု ရလာဖို့ မျှော်လင့်နေတယ်။ ကျွန်တော်တို့ ပွဲဆက်တွေ ကစားခဲ့ရတော့ စိတ်ပန်းလူပန်း ဖြစ်နေတယ်။ ရက်အနည်းငယ်နားခွင့်ရမယ်။ ဒီပွဲပြီးရင် အနည်းငယ်နားရက်ရဖို့မျှော်လင့်တယ်။ သူတို့က လိဂ် ၂ ကအသင်းဆိုပေမယ့် အိမ်ကွင်းမှာ ကစားရတာပါ။ ကစားသမားတွေကို ဘာအာမခံချက်မရှိတာကြောင်း အားလုံးက ခက်ခဲတဲ့အကြောင်း စိတ်ထဲမှာ ထည့်ပေးထားမယ်။ နောက်ပိုင်း လွယ်ကူလာနိုင်ပေမယ့် ကိုယ့်အလုပ်ကို ပြီးပြတ်အောင် လုပ်ရပါမယ်။ အက်ဖ်အေဖလား၊ ခါရာဘောင်ဖလားတို့မှာ ကျွန်တော်တို့က အမြဲတမ်း ရှိနေတာပါ။ ဒီလိုအမြဲရှိနေလို့လည်း အရမ်းကောင်းတယ်။ မနက်ဖြန်ပွဲလည်း ဘာမှ ထူးထူးထွေထွ မဖြစ်လာဖို့ မျှော်လင့်တယ်"လို့ ပြောကြားသွားပါတယ်။
ယင်းနောက်မှာတော့ ဂွါဒီယိုလာဟာ ယခုရာသီတွင် ရှေ့တန်း ၃ ဦးစနစ်အား အသုံးပြုနေမှုနှင့်ပတ်သက်ပြီး မေးခွန်းထုတ်ခြင်းခံခဲ့ရပါတယ်။
ထိုအခါ ဂွါဒီယိုလာက "ကျုပ်ရဲ့ လက်ထောက်နည်းပြ အဖြစ် မလုပ်ချင်ဘူးလား။ မင်း သောက်ရမ်းတော်တယ်။ မင်းက တကယ့်ထိပ်တန်းပဲ"လို့ ပြောဆိုခဲ့ရာ သတင်းစာရှင်းလင်းပွဲ တစ်ခန်းလုံး ရယ်သံများဖြင့် ဖုံးလွှမ်းသွားခဲ့ပါတယ်။

ဝါရင့်ကွင်းလယ်ကစားသမားမိုဒရစ်ကို အေစီမီလန် စာချုပ်သက်တမ်းတိုးမည်
====================

အေစီမီလန်ဟာ ဝါရင့်ကွင်းလယ်ကစားသမားလူကာမိုဒရစ်အား စာချုပ်ပါအချက်အတိုင်း တစ်နှစ်စာချုပ်သက်တမ်းတိုးချုပ်ဆိုလာပါမယ်။
Ballon d'Or ဆုရှင် ခရိုအေးရှားအသင်းခေါင်းဆောင်ဟာ နွေရာသီတုန်းက ရီးရဲလ်မက်ဒရစ်မှ ထွက်ခွာလာပြီးနောက် အေစီမီလန်သို့ ပြောင်းလာသူ ဖြစ်ပါတယ်။
သူဟာ မီလန်သို့ တစ်နှစ်စာချုပ်ဖြင့် ပြောင်းလာတာ ဖြစ်ပေမယ့်လည်း စာချုပ်အတွင်းတွင် ၁၂ လသက်တမ်းတိုးနိုင်မယ့်အချက် ထည့်သွင်းချုပ်ဆိုထားပါတယ်။
မိုဒရစ်ဟာ အသက် ၄၀ နှစ်ရှိပေမယ့်လည်း အေစီမီလန်အတွက် စီးရီးအေပွဲ ၂၃ ပွဲကစားထားကာ ၂ ဂိုးသွင်းပြီး အဓိကနေရာမှ ကစားနေသူလည်း ဖြစ်ပါတယ်။
အေစီမီလန်ဟာ မိုဒရစ်အား စာချုပ်သက်တမ်းတိုးရေး ဆုံးဖြတ်လာသလို တဖက်တွင် နံပါတ်တစ်ဂိုးသမားမိုက်မိုင်နန်၊ နောက်ခံလူဖီကာယိုတိုမိုရီနှင့် အမေရိကန်စတားပူလီဆစ်တို့ကိုလည်း စာချုပ်သစ်ချုပ်ဆိုနိုင်ရေး ဆွေးနွေးနေပါတယ်။

ချန်ပီယံလိဂ် Play-offs အဆင့်မှာ ရီးယဲလ်ကို ဘင်ဖီကာ ကျော်ဖြတ်နိုင်ရင် မော်ရင်ဟို စံချိန်သစ်တင်မယ်

ဘင်ဖီကာအသင်းရဲ့နည်းပြ မော်ရင်ဟိုဟာ ချန်ပီယံလိဂ် Play-offs အဆင့်မှာ ရီးယဲလ်ကို ကျော်ဖြတ်နိုင်ရင် မတူညီတဲ့ ကလပ်အသင်း(၇)သင်းနဲ့ ချန်ပီယံလိဂ်ရှုံ့းထွက်အဆင့် တက်ရောက်နိုင်တဲ့ ပထမဆုံးနည်းပြအဖြစ် စံချိန်သစ် တင်နိုင်မှာဖြစ်ကြောင်း သိရပါတယ်။
မော်ရင်ဟိုဟာ လက်ရှိအချိန်မှာ ကလပ်အသင်း(၆)သင်းကို ချန်ပီယံလိဂ်ရှုံးထွက်အဆင့် ပို့ဆောင်ပေးထားတာကြောင့် ရီးယဲလ်နည်းပြဟောင်း အန်ဆယ်လော့တီနဲ့ တူညီစွာရပ်တည်နေပါတယ်။
မော်ရင်ဟိုဟာ ပေါ်တို၊ ချယ်လ်ဆီး၊ အင်တာမီလန်၊ ရီးယဲလ်မက်ဒရစ်၊ မန်ယူနဲ့ စပါးအသင်းတွေကို ချန်ပီယံလိဂ်ရှုံးထွက်အဆင့် ပို့ဆောင်ပေးနိုင်ခဲ့တာဖြစ်ပြီး ပေါ်တိုနဲ့ အင်တာမီလန်အသင်းတွေမှာတော့ ချန်ပီယံလိဂ်ဖလားကိုပါ ရယူနိုင်ခဲ့ပါတယ်။
ဘင်ဖီကာအသင်းဟာ ချန်ပီယံလိဂ် Play-offs အဆင့်မှာ ရီးယဲလ်အသင်းနဲ့ ဆုံတွေ့နေတာကြောင့် ရှုံးထွက်(၁၆)သင်းအဆင့်ကို တက်ရောက်နိုင်ဖို့ မလွယ်ကူပေမဲ့ League Phase အဆင့် နောက်ဆုံးပွဲစဉ်မှာတုန်းက (၄-၂)ဂိုးနဲ့ အနိုင်ရထားတဲ့ မှတ်တမ်းတော့ ရှိနေပါတယ်။
ဘင်ဖီကာအသင်းဟာ Play-offs အဆင့် ပထမအကျော့ကို ဖေဖော်ဝါရီ(၁၇)မှာ အိမ်ကွင်း၊ ဒုတိယအကျော့ကို ဖေဖော်ဝါရီ(၂၅)မှာ အဝေးကွင်းအဖြစ် ယှဉ်ပြိုင်ကစားရမှာဖြစ်ကြောင်း သိရပါတယ်။