ယခုနှစ်အတွင်း ကမ္ဘာ့အပြင်းထန်ဆုံးမုန်တိုင်း ဂျမေကာကို ဝင်ရောက်တိုက်ခတ်တော့မယ်
ယခုနှစ်အတွင်း ကမ္ဘာ့အပြင်းထန်ဆုံးမုန်တိုင်းကြီးတခု ဂျမေကာနိုင်ငံကို ဦးတည်တိုက်ခတ်နေတာကြောင့် အာဏာပိုင်တွေက သတိပေးချက်တွေ ထုတ်ပြန်ထားသလို ကြိုတင်ပြင်ဆင်မှုတွေ လုပ်ဆောင်နေပါတယ်။
လေတိုက်နှုန်း တနာရီ ၁၇၅ မိုင်အထိရှိတဲ့ ဟာရီကိန်းမယ်လီဆာဟာ အဆင့်-၅ အဖြစ် သတ်မှတ်ထားပြီး ပိုမိုအားကောင်းလာကာ အင်္ဂါနေ့အစောပိုင်းမှာ ကာရစ်ဘီယံကျွန်းနိုင်ငံဖြစ်တဲ့ ဂျမေကာကို ဝင်ရောက်ဖွယ်ရှိပါတယ်။
လက်ရှိမှာတော့ ဂျမေကာမှာ လူသုံးယောက်သေဆုံးခဲ့ပြီး ဟေတီနဲ့ ဒိုမီနီကန်တို့မှာလည်း လူလေးယောက် သေဆုံးခဲ့ပါတယ်။ မယ်လီဆာရဲ့ အရှိန်ကြောင့် အချို့ဒေသတွေမှာ မိုးသည်းထန်စွာရွာသွန်းနိုင်ပြီး အသက်အန္တရာယ်ရှိတဲ့ ရေကြီးမှုနဲ့ မြေပြိုမှုတွေ ဖြစ်နိုင်ခြေကို တိုးမြင့်စေနိုင်ကြောင်း ကျွမ်းကျင်သူတွေက သတိပေးပါတယ်။
အမေရိကန်အခြေစိုက် အမျိုးသားဟာရီကိန်းစင်တာ (NHC) မှ နောက်ဆုံးရရှိတဲ့ အချက်အလက်တွေအရ အမြင့်ဆုံးလေတိုက်နှုန်းနဲ့ ဗဟိုဖိအားနိမ့်ကျမှုအရ မယ်လီဆာဟာ ယခုနှစ်အတွင်း ကမ္ဘာ့အပြင်းထန်ဆုံးမုန်တိုင်းဖြစ်တယ်လို့ ဆိုပါတယ်။
လက်ရှိအင်အားအရ ၁၈၅၁ ခုနှစ်မှာ မှတ်တမ်းတွေ စတင်ချိန်ကစပြီး ဂျမေကာကို ဝင်ရောက်တိုက်ခတ်တဲ့ အပြင်းထန်ဆုံးဟာရီကိန်းလို့ ဆိုကြပါတယ်။ ဟာရီကိန်းမဝင်ရောက်မီ တနင်္လာနေ့ညနေပိုင်းမှာ မုန်တိုင်းနဲ့ ဆက်စပ်သောသေဆုံးမှု သုံးယောက်ရှိတယ်လို့ ဂျမေကာ ကျန်းမာရေးဝန်ကြီးက ပြောပါတယ်။
တနင်္လာနေ့ ညနေ ၆ နာရီက နောက်ဆုံးထုတ်ပြန်တဲ့ သတိပေးချက်မှာတော တနင်္လာနေ့ညနဲ့ အင်္ဂါနေ့အစောပိုင်းမှာ အသက်အန္တရာယ်ရှိတဲ့ လေပြင်းတိုက်ခတ်မှု၊ ရေကြီးမှုနဲ့ မုန်တိုင်းဒီရေတွေ ဖြစ်ပေါ်လာနိုင်ကြောင်း သတိပေးထားပါတယ်။
မယ်လီဆာသည် လက်ရှိမှာ မြို့တော်ကင်းစတန်ရဲ့ အနောက်တောင်ဘက် ၁၄၅ မိုင်အကွာတွင် ရှိနေပြီး အနောက်-အနောက်မြောက် ကို တနာရီလျှင် သုံးမိုင်နှုန်းနဲ့ ရွေ့လျားနေပါတယ်။ အင်္ဂါနေ့အထိ အသက်အန္တရာယ်ရှိတဲ့ ရုတ်တရက်ရေကြီးမှုနဲ့ မြေပြိုမှုတွေ ဖြစ်ပေါ်လာနိုင်တာကြောင့် နေအိမ်ပြင်ပမထွက်ကြဖို့ သတိပေးထုတ်ပြန်ထားပါတယ်။
