တောင်ငူမှာ ရေကြီးလို့ အနိမ့်ပိုင်း ရပ်ကွက်တချို့ ရွှေ့ပြောင်းရပြန်
အောက်တိုဘာ ၃ - ၂၀၂၅
SN (VOM)
ပဲခူးတိုင်း၊ တောင်ငူမြို့မှာ စစ်တောင်းမြစ်ရေ မြင့်တက်လာမှုကြောင့် အနိမ့်ပိုင်း ရပ်ကွက်တွေအတွင်း နေထိုင်သူတချို့ ကယ်ဆယ်ရေး စခန်းတွေဆီ ထပ်မံပြောင်းရွှေ့ နေထိုင်နေရတယ်လို့ ဒေသခံတွေနဲ့ ကယ်ဆယ်ရေး လုပ်ဆောင်နေသူတွေက ပြောပါတယ်။
တောင်ငူမြို့မှာ မနေ့ အောက်တိုဘာ ၂ ရက်၊ မနက်ပိုင်းကစပြီး စစ်တောင်းမြစ်ရေ မြင့်တက်လာတာဖြစ်ပြီး လက်ရှိ ရေကြီးမှုဟာ ခြောက်ကြိမ်မြောက်အထိ ရှိလာနေပြီ ဖြစ်တယ်လို့ ဒေသခံတွေက ပြောပါတယ်။
လက်ရှိမှာ (၈) ရပ်ကွက်၊ (၉) ရပ်ကွက်နဲ့ (၁၀) ရပ်ကွက်အတွင်း နေထိုင်သူတွေအပြင် မြစ်ကမ်းနံဘေး အနိမ့်ပိုင်းဖြစ်တဲ့ ကမ်းနီရွာက အိမ်ထောင်စု ၃၀၀ ဝန်းကျင်ဟာ TTC ကျောင်းဟောင်းနဲ့ စကားဘုန်းကြီးကျောင်း စတဲ့ ရေဘေးစခန်းတွေမှာ ပြောင်းရွှေ့ နေထိုင်နေကြရတာ ဖြစ်တယ်လို့ သိရပါတယ်။
“ရေနစ်တဲ့ ရပ်ကွက်က လူတွေအကုန်လုံး ပြောင်းရွှေ့ရတာပါ။ အိမ်ထောင်စု အတိအကျကတော့ ပြောလို့ မရသေးပါဘူး။ ကျွန်တော်တို့ စာရင်းကောက်နေတုန်း ဖြစ်တာကြောင့်ပါ။ အခုက တောင်ငူမှာ မိုးရွာလို့ ရေကြီးတာမဟုတ်ဘူး။ ဟိုး အထက်ဘက် ပေါင်းလောင်းတို့ဘာတို့၊ နေပြည်တော်ဘက်ကနေ ဆင်းလာတဲ့ တောင်ကျရေတွေကြောင့်ပါ။ အဲဒါကြောင့် ရေမြင့်တက်သွားတာ” လို့ ဒေသခံ တယောက်က ပြောပါတယ်။
လက်ရှိ ရေကြီးမှု အခြေအနေဟာ (၁၀) ရပ်ကွက်က စက်ရုံဟောင်းလမ်းမှာ ဆိုပါက ရေအမြင့် ၁၀ ပေလောက်အထိ မြင့်တက်နေပြီး နေအိမ် အောက်ထပ်တွေ အကုန်နီးပါး ရေနစ်မြုပ်နေတာ ဖြစ်တယ်လို့ သူက ပြောပါတယ်။
“အထက်ဘက်တွေမှာ မိုးလည်း ဆက်ကောင်းနေဦးမယ်။ ဒီမှာလည်း မိုးရွာမယ်၊ စစ်တောင်းမြစ်နေရ ထပ်တိုးနေဦးမယ် ဆိုရင်တော့ တောင်ငူမြို့ရဲ့ ရေကြီးမှု အခြေအနေက မနှစ်ကလိုမျိုး ဖြစ်သွားနိုင်တယ်။ အဲဒီလိုဆိုရင် ပြန်လည် ရွှေ့ပြောင်းခြင်းက လမ်းမပေါ်ကလူတွေပါ လုပ်ရမယ့်သဘော ဖြစ်သွားလိမ့်မယ်။ ဒါပေမယ့် စိုးရိမ်စရာတော့ မရှိပါဘူး။ တောင်ငူက ကျွန်တော်တို့ ကယ်ဆယ်ရေးအဖွဲ့တွေ အကုန်လုံး အသင့်အနေအထားနဲ့ စောင့်ကြည့်နေကြပါတယ်” လို့ ဒေသအခြေစိုက် ကယ်ဆယ်ရေး လုပ်ဆောင်နေသူက ပြောပါတယ်။
ဒါအပြင် လက်ရှိ ဖွင့်လှစ်ထားတဲ့ ကယ်ဆယ်ရေးစခန်း နှစ်ခုအပြင် တောင်ငူမြို့ရဲ့ ဘုန်းကြီးကျောင်းတွေမှာ ကယ်ဆယ်ရေးစခန်း ၂၂ နေရာကိုလည်း အသင့် ပြင်ဆင်ထားတယ်လို့ သူက ပြောပါတယ်။
ဒါအပြင် လက်ရှိမှာ တောင်ငူမြို့အတွင်းက သဖန်းပင်၊ ပြသောင်နဲ့ ဇီးဖြူပင်ရွာတို့မှာလည်း ရေဝင်ရောက်နေတယ်လို့ သိရပြီး အဲဒီရွာတွေက ဒေသခံတွေကတော့ ရွှေ့ပြောင်းဖို့ မလိုသေးတဲ့အတွက် အခြေအနေကို စောင့်ကြည့်နေကြဆဲ ဖြစ်တယ်လို့ သိရပါတယ်။
“နှစ်စဉ် ဒီမြေနိမ့်ပိုင်းတွေက ရေကြီးရေလျှံမှု ဖြစ်တတ်လို့ ဒေသခံတွေကို ကြိုတင်ပြင်ထားကြဖို့ ပြောထားပြီးသားပါ။ အရေးကြီး စာရွက်စာတမ်း၊ အဓိကကျတဲ့ ပစ္စည်းတွေပေါ့။ အဆင်သင့် သယ်ယူ ရွှေ့ပြောင်းနိုင်ဖို့ ပြောထားပါတယ်။ တချို့တွေကကျတော့ သူတို့အိမ်မှာကျန်ခဲ့မယ့် ပစ္စည်းတွေ ပျောက်ရှမှာကိုလည်း စိုးရိမ်နေကြတာ ရှိတယ်။ အဲဒါကြောင့် အဲဒီလို ဒေသခံတွေကိုလည်း ရေဘေးမှာ ပူးပေါင်းပါဝင်ကြဖို့ ကျွန်တော်တို့ လိုက်လံ အသိပေးထားပါတယ်” လို့ သူက ပြောပါတယ်။
ဒါအပြင် လက်ရှိမှာ ကယ်ဆယ်ရေးစခန်း ရောက်ရှိနေသူတွေ အတွက် စားရေးသောက်ရေး အခက်အခဲတွေ ရှိနေတယ်လို့ သိရပြီး အလှူရှင်တွေ နည်းပါးလာတာကြောင့် အဆင်မပြေမှုတွေ ဖြစ်ပေါ်နေတယ်လို့ သူက ပြောပါတယ်။
မိုးလေဝသနှင့် ဇလဗေဒညွှန်ကြားမှု ဦးစီးဌာနရဲ့ ဒီကနေ့ အောက်တိုဘာ ၃ ရက်၊ မနက် ၆ နာရီခွဲအချိန် တိုင်းထွာချက်အရ စစ်တောင်းမြစ်ရေဟာ တောင်ငူမြို့မှာ အဲဒီမြို့ရဲ့ စိုးရိမ်ရေမှတ် အထက် ၁ ပေခွဲခန့် ကျော်လွန်နေပြီး နောက်တရက်အတွင်း ၂ လက်မခန့် ကျဆင်းလာနိုင်ကာ မြို့ရဲ့ စိုးရိမ်ရေမှတ်အထက် ဆက်လက် တည်ရှိနိုင်တယ်လို့ သိရပါတယ်။
ဒါအပြင် မဒေါက်မြို့မှာလည်း စစ်တောင်းမြစ်ရေဟာ အဲဒီမြို့ရဲ့ စိုးရိမ်ရေမှတ် အထက် ပေဝက်ခန့် ကျော်လွန်နေပြီး နောက်တရက်အတွင်း ၂ လက်မခန့် ကျဆင်းလာနိုင်ကာ မြို့ရဲ့ စိုးရိမ်ရေမှတ်အထက် ဆက်လက် တည်ရှိနိုင်တယ်လို့ သိရပါတယ်။
ဒါကြောင့် တောင်ငူမြို့နဲ့ မဒေါက်မြို့အတွင်းရှိ မြစ်ကမ်းအနီးနဲ့ မြေနိမ့်ပိုင်း နေထိုင်သူတွေအနေနဲ့ ရေဘေးလွတ်ရာကို ရှောင်ရှားနိုင်ကြဖို့ မိုး/ဇလဌာနက သတိပေး နှိုးဆော်ထားပါတယ်။
Photo - Badan Sai (S.😭 Rescue Taungoo)
