တရုတ်နိုင်ငံသမ္မတ ရှီကျင့်ဖျင်နဲ့ နလအ ဥက္ကဌ တို့ တွေ့ဆုံ၊ တရုတ်စီမံကိန်းတွေ ဘေးကင်းလုံခြုံရေး ရှီကျင်ဖျင် တောင်းဆို
ဩဂုတ် ၃၁ - ၂ဝ၂၅
KKO(VOM)
တရုတ်နိုင်ငံသမ္မတ ရှီကျင့်ဖျင်နဲ့ မြန်မာနိုင်ငံယာယီသမ္မတ နလအ ဥက္ကဌ တို့ဟာ သြဂုတ်လ ၃၀ ရက်၊ မွန်းလွဲပိုင်းအချိန်ကတရုတ်ပြည်သူ့သမ္မတနိုင်ငံသမ္မတမှာတွေ့ဆုံကာနှစ်နိုင်ငံ သီးသန့် ဆွေးနွေးမှုတွေကို ပြုလုပ်ခဲ့ကြတယ်လို့ သိရပါတယ်။
တွေ့ဆုံစဉ် သမ္မတ ရှီကျင့်ဖျင်က တရုတ်နိုင်ငံအနေနဲ့ မြန်မာနိုင်ငံက မိမိနိုင်ငံအခြေအနေ တွေနဲ့ ကိုက်ညီတဲ့ ဖွံ့ဖြိုးတိုးတက်ရေးလမ်း စဉ်ကိုလျှောက်လှမ်းခြင်း၊နိုင်ငံတော်ရဲ့အချုပ် အခြာအာဏာ၊လုံခြုံရေး၊ဖွံ့ဖြိုးတိုးတက်ရေးအကျိုးစီးပွားတွေကို ကာကွယ်စောင့်ရှောက်ခြင်းကို အားပေးထောက်ခံလျက်ရှိတယ်လို့ ပြောကြားခဲ့ပါတယ်။
ဒါအပြင် တရုတ်သမ္မတက မြန်မာနိုင်ငံ
အနေနဲ့ စည်းလုံးညီညွတ်ပြီး ပြည်တွင်းနိုင်ငံရေး အင်အားစုများစွာကို စုစည်းပြီး တည်ငြိမ်မှုနဲ့ ဖွံ့ဖြိုးတိုးတက်မှု ပြန်လည်ရရှိစေရေးကိုလည်းထောက်ခံလျက်ရှိတယ်လို့ ပြောကြားပါတယ်။
အဲဒါအပြင် နှစ်နိုင်ငံအနေနဲ့ တရုတ်-မြန်မာ စီးပွားရေးစင်္ကြံရဲ့ အဓိကစီမံကိန်းတွေကို တွန်းအားပေးပြီး စီးပွားရေးနဲ့ ကုန်သွယ်မှု ပူးပေါင်းဆောင်ရွက်မှုကို မြှင့်တင်သွားကြရမယ်လို့လည်းပြောကြားခဲ့သလို နယ်စပ်ဖြတ်ကျော် ရာဇဝတ်မှုတွေကို ပူးတွဲတိုက်ဖျက် ရေး၊တရုတ်-မြန်မာ နယ်စပ်ဒေသ တည်ငြိမ်အေးချမ်းရေးကို အတူတကွထိန်းသိမ်းသွားကြဖို့ကိုလည်း ထည့်သွင်းဆွေးနွေးခဲ့တယ်လို့ သိရပါတယ်။
ဆက်လက်ပြီး တရုတ်သမ္မတရှီက မြန်မာ
နိုင်ငံရှိတရုတ်စီမံကိန်းမှဝန်ထမ်းများ၊အဖွဲ့အစည်းတွေ စီမံကိန်းတွေ ဘေးကင်းလုံခြုံမှုကို အာမခံပေးဖို့တောင်းဆိုခဲ့သလိုငြိမ်း ချမ်းစွာအတူယှဉ်တွဲနေထိုင်ရေးမူကြီး(၅)ရပ်ရဲ့ စိတ်ဓာတ်ကိုပြန့်ပွားပြီး ကုလသမဂ္ဂကို ဗဟိုပြုသော နိုင်ငံတကာစနစ်အားပူးပေါင်းကာကွယ်ဖို့ကိုလည်းတိုက်တွန်းခဲ့ပါတယ်။
ဆွေးနွေးပွဲမှာ မြန်မာနိုင်ငံယာယီသမ္မတ နလအ ဥက္ကဌ ကတော့ မြန်မာနဲ့ တရုတ်နိုင်ငံတို့မှာ လေးနက်သော ဆွေမျိုးပေါက်ဖော် ချစ်ကြည်ရေးနဲ့ ငြိမ်းချမ်းရေး၊တည်ငြိမ်
ရေးကိုလိုက်စားသောဘုံရည်မှန်းချက်ရှိပြီးတရုတ်နိုင်ငံဟာ အစဥ်အမြဲ မြန်မာနိုင်ငံရဲ့ အိမ်နီးချင်းကောင်းမိတ်ဆွေးကောင်းဖြစ်တယ်လို့ ပြောကြားခဲ့ပါတယ်။
ဒါအပြင် နလအ ဥက္ကဌ က တရုတ်နိုင်ငံဟာမြန်မာနိုင်ငံမြောက်ပိုင်း ငြိမ်းချမ်းရေးနဲ့ တည်ငြိမ်ရေးအတွက် အပြုသဘောဆောင်သောအခန်းကဏ္ဍမှပါဝင်နေပြီး မြန်မာနိုင်ငံသည် တရုတ်တနိုင်ငံတည်းမူဝါဒ（One China Policy)ကို ခိုင်ခိုင်မာမာ လက်ကိုင်စွဲထားသလို တရုတ်နိုင်ငံနဲ့အတူ အရည်အသွေးမြင့် “Belt and Road” ကို ပူးတွဲတည်ဆောက် ရေး၊ ကုန်သွယ်မှု၊ ရင်းနှီးမြှုပ်နှံမှု၊ စွမ်းအင်၊ အခြေခံအဆောက်အအုံအစရှိတဲ့ နယ်ပယ်တွေမှာ ပူးပေါင်းဆောင်ရွက်မှုတွေကို ချဲ့ထွင်သွားမယ်လို့ ပြန်လည်ဆွေးနွေးပြောကြားခဲ့ပါတယ်။
ယခု နလအ ဥက္ကဌရဲ့တရုတ်ပြည်ခရီးစဉ်ဟာ
တရုတ်-မြန်မာ ဆွေမျိုးပေါက်ဖော်ချစ် ကြည်ရေးကိုဒုတိယအကြိမ်အကောင်းဆုံးပုံဖော်ပြသမယ့်ခရီးစဉ်ဖြစ်တယ်လို့ မြန်မာ့အရေးလေ့လာသူတွေက သုံးသပ်ထားကြပါတယ်။
"ဒါကတရုတ်ဘက်က တခုတ်တရကိုဖိတ်တာလေ၊ဗိုလ်ချုပ်မှူးကြီးကသူတာဝန်ယူစဉ်က တည်းကစပြီးတော့ပေါ့လေ၊ပြည်ပဆက်ဆံတဲ့အခါမှာ ရုရှားနဲ့ကအတော်လေးကိုရင်းရင်း နှီးနှီးဆက်ဆံခဲ့တယ်။ရုရှားနဲ့ တပ်ဘက် အရပ်ဖက်ဆက်ဆံရေးပေါ့လေ။တရုတ်နဲ့ ဆက်ဆံရေးကအစပိုင်းမှာနည်းနည်းလေးကသိကလွတ်ဖြစ်သွားတယ်။နောက်တခုကရှမ်းမြောက်ကိစ္စဖြစ်ပြီးနောက်ပိုင်းမှာတရုတ်ဘက်ဝမ်ယိတို့ဘာတို့လာတယ်။တရုတ်- မြန်မာဆက်ဆံရေးကအတော်လေးအရှိန် အဟုန်တိုးလာတာရှိတယ်။ဒါကြောင့်မို့လည်းမြန်မာဘက်ကတရုတ်နဲ့ဆက်ဆံရေးကိုပြန် လည်ကောင်းမွန်စွာတည်ဆောက်လာတယ်။ရှမ်းမြောက်ဖြစ်စဉ်တွေမှာတရုတ်ရဲ့အခန်းကဏ္ဍကိုတပ်ချုပ်ကြီးကပိုပြီး သတိပြုမိလာတဲ့သဘောမှာရှိပါတယ်။တရုတ်ရဲ့အရေးပါမှုကိုထည့်သွင်းစဉ်းစားလာပုံရပါတယ်"လို့ လေ့လာသုံးသပ်သူတယောက်က VOM ကို ပြောပါတယ်။
ဒါအပြင် ယခုတွေ့ဆုံမှုဟာ တရုတ် - မြန်မာနှစ်နိုင်ငံအတွက် ကောင်းမွန်တဲ့ ဆက်ဆံရေးဖြစ်တယ်လို့လည်းသုံးသပ်ထားကြပါတယ်။
မြန်မာနိုင်ငံယာယီသမ္မတ နလအ ဥက္ကဌ နဲ့ အဆင့်မြင့်ကိုယ်စားလှယ်အဖွဲ့ဟာ သမ္မတရှီရဲ့ဖိတ်ကြားမှုအရ ၂၀၂၅ ခုနှစ်၊ရှန်ဟိုင်းပူး ပေါင်းဆောင်ရွက်ရေးအဖွဲ့ ထိပ်သီးအစည်း အဝေး၊ တရုတ်ပြည်သူတွေရဲ့ဂျပန်ခုခံတော် လှန်ရေးစစ်ပွဲနဲ့ ကမ္ဘာ့ဖက်ဆစ်တော်လှန်ရေးစစ်ပွဲအောင်နိုင်ခြင်း နှစ်(၈၀)ပြည့်အထိမ်း အမှတ် အခမ်းအနားတွေကို တက်ရောက်ဖို့ တရုတ်နိုင်ငံသို့ ရောက်ရှိနေတာဖြစ်ပါတယ်။
တရုတ်နိုင်ငံသမ္မတ ရှီကျင့်ဖျင်နဲ့ မြန်မာနိုင်ငံယာယီသမ္မတ နလအ ဥက္ကဌ တို့ တွေ့ဆုံပွဲမှာ
နှစ်ဦးနှစ်ဖက်လုံးက အကောက်ခွန်နဲ့ သတင်းမီဒီယာစတဲ့ နယ်ပယ်တွေမှာ နှစ်နိုင်ငံပူးပေါင်းဆောင်ရွက်ရေး စာတမ်းတွေကိုလက်မှတ်ရေးထိုးခဲ့ကြတယ်လို့လည်း သိရပါတယ်။
တွေ့ဆုံဆွေးနွေးပွဲသို့ တရုတ်အစိုးရရဲ့အဆင့်မြင့်ပုဂ္ဂိုလ်တွေဖြစ်တဲ့ Mr. Cai Qi၊ Mr.Wang Yi နှင့် Mr. Chen Min'er တို့လည်း တက်ရောက်ခဲ့တယ်လို့ သိရှိရပါတယ်။
ဓါတ်ပုံ - မြန်မာနိုင်ငံဆိုင်ရာ တရုတ်သံရုံး။
