#ပြည်တွင်းသတင်း
◼စစ်ဘေးရှောင်များကိုပြန်လွှတ်ပေးရန် India For Myanmar အဖွဲ့တောင်းဆို
အိန္ဒိယနိုင်ငံမဏိပူရ်နှင့် အာသံပြည်နယ်များတွင် ဖမ်းဆီးအကျဉ်းချခံထားရသည့် မြန်မာနိုင်ငံမှစစ်ဘေးရှောင် ၁၄၇ ဦးကိုအမြန်ဆုံးပြန်လွှတ်ပေးရန် စစ်ဘေးရှောင်များကိုကူညီနေသည့် India For Myanmar အဖွဲ့က ယနေ့ (မတ် ၁၇ ရက်) တွင် အိန္ဒိယနိုင်ငံဗဟိုအစိုးရထံတောင်းဆိုထားသည်။
အဆိုပါဖမ်းဆီအကျဉ်းချခံထားရသူများထဲတွင် ကိုယ်ဝန်ဆောင်အမျိုးသမီးများ၊ ထောင်တွင်း၌ မွေးဖွားခဲ့သည့်ကလေးငယ်များ၊ ကျောင်းနေအရွယ်လူငယ်များ၊ အမျိုးသမီးများနှင့် ကလေးငယ် ၅၀ ဦးကျော်နှင့် နာတာရှည်ရောဂါသည် ၁၂ ဦးပါဝင်နေကြောင်း ၎င်းတို့ထံမှသိရသည်။
၎င်းတို့ကိုအမြန်ဆုံးပြန်လွှတ်ပေးရန် India For Myanmar အဖွဲ့က အိန္ဒိယနိုင်ငံ ဗဟိုအစိုးထံ အိတ်ဖွင့်ပေးစာပေးကာ တောင်ဆိုခဲ့ခြင်းဖြစ်သည်။
ထို့ပြင် အိန္ဒိယနိုင်ငံ အကျဉ်းထောင်တွင်ဖမ်းဆီးခံထားရသူ စစ်ကိုင်းတိုင်းမှဦးအောင်မြင့်သည့် ဆေးကုသမှုလုံလောက်စွာမရရှိခြင်းကြောင့် ယခုမတ်လ ၁၀ ရက်တွင် သေဆုံးခဲ့သည့် ဖြစ်စဉ်နှင့်ပတ်သက်ပြီး တရားမျှတမှုရရှိရေးအတွက်လည်း တောင်းဆိုထားကြောင်း အဆိုပါ အိတ်ဖွင့်ပေးစာတွင်ဖော်ပြထားသည်။
အသက်(၅၇) နှစ်အရွယ်ရှိဦးအောင်မြင့်သည် အဆုတ်တွင်ရေဝင်နေသည့်ရောဂါခံစားနေရသောကြောင့် အိန္ဒိယနိုင်ငံသို့တတိယအကြိမ်ဆေးကုသမှုခံယူခဲ့ပြီး ၂၀၂၄ ခုနှစ်၊ ဇန်နဝါရီ ၂၉ ရက်က ပြန်လာစဉ် ဖမ်းဆီးခံရကာ Foreigners Act ဖြင့်တရားစွဲဆိုခံရပြီး အိန္ဒိယနိုင်ငံအင်းဖာလ်အကျည်းထောင်တွင် ဖမ်းဆီးခံထားရခြင်းဖြစ်သည်။
ယင်းသို့ဖမ်းဆီးခံရပြီးနောက် ကျန်းမာရေးအခြေအနေမကောင်းကြောင်း အကြိမ်ကြိမ်တင်ပြသော် လည်း ရှေ့နေငှားရမ်းခွင့်၊ ဆေးကုသခွင့်များမပေးဘဲ အကိုက်အခဲပျောက်ဆေးသာပေးခဲ့ကြောင်း၊ ထို့နောက် ကျန်းမာရေးဆိုးရွာလာချိန်တွင် အပြင်ဆေးရုံသို့ပို့ဆောင်ကာ ဆေးကုသခွင့်ပြုခဲ့သော်လည်း ဆရာဝန်များက အသက်ရှင်နိုင်ရန်မဖြစ်နိုင်တော့ဟုအသိပေးခဲ့ကြောင်း အဆိုပါ အိတ်ဖွင့်ပေးစာအရ သိရသည်။
ယင်းသို့အသိပေးလာချိန်တွင် ထောင်အာဏာပိုင်များက ဦးအောင်မြင့်အားလွှတ်ပေးခဲ့ပြီး တာဝန်မယူဘဲရှောင်ရှားခဲ့ရာ မိသားစုနှင့်တွေ့ဆုံခွင့်မရဘဲ မတ်လ ၁၀ ရက်တွင် ဆေးရုံ၌သေဆုံး ခဲ့သည်။ ဦးအောင်မြင့်၏ ရုပ်အလောင်းကိုပင် မိသားစုဝင်များကလာယူခွင့်မရခဲ့ကြောင်းနှင့် အိန္ဒိယ နိုင်ငံသားတစ်ဦးအကူအညီဖြင့် ခက်ခဲစွာပြန်ယူခဲ့ရကြောင်း စစ်ဘေးရှောင်များကို ကူညီနေသူများထံမှ သိရသည်။
အိန္ဒိယနိုင်ငံသည် ဒီမိုကရေစီနိုင်ငံဖြစ်သည့်အတွက် မြန်မာနိုင်ငံရေးအခြေအနေများကိုနားလည်မည်ဟု ယုံကြည်သောကြောင့် မြန်မာစစ်ဘေးဒုက္ဒသည်များကို ဖမ်းဆီးထောင်ချခြင်း၊ ထောင်တွင်း၌ သေဆုံး စေခြင်း၊ ကိုယ်ဝန်ဆောင်အမျိုးသမီးများကို ထောင်ထဲတွင်မီးဖွားစေခြင်းနှင့် ပညာသင်ယူသူ လူငယ်များကိုထိန်းသိမ်းခြင်းသည် အိန္ဒိယနိုင်ငံအတွက် အကျိုးမရှိကြောင်းနှင့် လူ့အခွင့်အရေးကို ထိပါသည်းလုပ်ရပ်များဖြစ်ကြောင်း အိတ်ဖွင့်ပေးစာတွင်ဖော်ပြထားသည်။
ထို့ကြောင့်ဦးအောင်မြင့်သေဆုံးမှုအတွက် တရားမျှတမှုရရှိရေးနှင့် ဖမ်းဆီးခံထားရသည်မြန်မာ စစ်ဘေးဒုက္ဒသည်များကိုအမြန်ဆုံးပြန်လွှတ်ပေးရန် India For Myanmar အဖွဲ့က အိန္ဒိယနိုင်ငံ ဗဟိုအစိုးထံအိတ်ဖွင့်ပေးစာပေးကာ တောင်းဆိုခဲ့ခြင်းဖြစ်ကြောင်း အဆိုပါအဖွဲ့ထံမှသိရသည်။
သတင်း - နေသစ်ဦး
ဓာတ်ပုံ - India For Myanmar
