လက်ဖက်ရည်ဆိုင်မှာ ကြည့်ခဲ့ရတဲ့ ရုပ်ရှင်များ
လက်ဖက်ရည်ဆိုင်နဲ့ ပတ်သက်ပြီးတော့ ထရော်မာတွေ တော်တော်ရှိတယ် ပြောရမယ်။ အဓိကကတော့ ဆိုင်မှာဖွင့်ပြတဲ့ ဇာတ်ကားတွေကြောင့်ပဲ။ ဟိုးတုန်းက နေ့လယ်နေ့ခင်းဆိုရင် လက်ဖက်ရည်ဆိုင်တွေက ဇာတ်ကားတွေ ဖွင့်ပြတတ်တယ်။ လက်ဖက်ရည် သိပ်ကြိုက်တဲ့ အမေကြောင့် နေ့ခင်းဆိုရင် ဆိုင်သွားထိုင်၊ ပြီးတော့ ဇာတ်ကားတွေ တဝကြီး ကြည့်ခဲ့ရတာ။
မြွေတွေကို စကြောက်တတ်တာကလည်း လက်ဖက်ရည်ဆိုင်မှာ ပြတဲ့ ဇာတ်ကားကြောင့်ပဲ။ နာမည်တော့ မမှတ်မိဘူး။ အဲ့ဇာတ်ကားထဲမှာ နှိပ်စက်တဲ့ ဇာတ်ဝင်ခန်းတစ်ခုပါတယ်။ ဘယ်လိုလဲဆိုတော့ လူတစ်ယောက်ကို ကုလားထိုင်မှာ သေချာချုပ်၊ သွားတွေကို ဟပေးတဲ့ ကိရိယာတပ်ထားလိုက်တယ်။ ပြီးတော့ မြွေတစ်ကောင်ကို အဲ့လူပါးစပ်ထဲ ထည့်ချလိုက်တာ အဲဇာတ်ဝင်ခန်းက အခုထက်ထိ မျက်လုံးထဲ မြင်နေတုန်းပဲ။ ကြည့်ခဲ့ရတာက ဆယ်စုနှစ် နှစ်ခုစာတောင် ရှိရောမယ်၊ အဲထရော်မာက ခုထိ မပျောက်သေးဘူး။
နောက်တစ်ခုက ဂျပန်ကား ကြောက်တဲ့ ရောဂါလို့ ပြောရမယ်။ မှတ်မှတ်ရရဆိုရင် စာဖိုးမှူးက ဟင်းခွက်မှောက်ကျတော့ အပြစ်ပေးတဲ့အနေနဲ့ သူ့လက်ချောင်းတွေကို ခုတ်ဖြတ်ပြီး တစ်ချောင်းချင်း ဝါးစားခိုင်းတာပဲ။ အဲ့ဇာတ်ဝင်ခန်းကို အခုထိ မျက်လုံးထဲမှာ မြင်နေရတုန်းပဲ။ ပြီးတော့ လက်ကို ဖြတ်လိုက်လို့ သွေးတန်းကြီးတွေ ထွက်လိုက်တာ၊ ခေါင်းပြတ်သွားလို့ သွေးတွေပန်းထွက်လာတာကို စမူဆာကို ဆော့ချဉ်နဲ့ တို့စားရင်း ကြည့်ခဲ့ရတာ ထရော်မာတွေ ရချက်ပဲ။
အဲကနေစပြီး ဂျပန်ကားတွေကို ဝေးဝေးရှောင်ခဲ့တာ ယုယ မီကာမိ၊ အေးမိစံတို့ကို မသိခင်အထိပဲ (😛) ။ ဒီနောက်မှာမှ Your Name, Demon Slayer, ပြီးတော့ One Piece တို့ကို ပြန်ကြည့်ရင်း ဂျပန်ကားတွေကို ပြန်ကြည့်ခဲ့မိတာ အခုဆို ဂျပန်ကားမှ ဂျပန်ကားမှ ဖြစ်နေလေရဲ့။ ပြီးတော့ ဂျပန်ရုပ်ရှင်ရဲ့ ရုပ်ရှင်အသွားအလာနဲ့ အလေးအနက်ထားမှုတွေကို မြင်ရတိုင်း တအံ့တဩဖြစ်နေရတယ်။
လက်ဖက်ရည်ဆိုင်မှာ ကြည့်ခဲ့ရတဲ့ ရုပ်ရှင်တွေထဲမှာ မှတ်မှတ်ရရ ဖြစ်နေခဲ့တဲ့ နောက်ထပ် ရုပ်ရှင်တစ်ကားက Apocalypto (2006) ရုပ်ရှင်ပါ။ ဒီရုပ်ရှင်ကိုတော့ ပရိသတ်တွေ အများစု ကြည့်ဖူးမယ်လို့ ထင်ပါတယ်။ ရွာကို မာယာလူမျိုးတွေက ဝင်စီးတော့ မင်းသားက ပါသွားတယ်။ အဖမ်းမခံရခင်မှာ ကိုယ်ဝန်ဆောင်သည် မိန်းမကို တွင်းနက်ကြီးထဲမှာ ထားခဲ့ရတယ်။ ဒီနောက် ခေါင်းဖြတ်ပြီး ယဇ်ပူဇော်တဲ့ နေရာနဲ့ မင်းသားက ထွက်ပြေးနိုင်ပြီးတော့ သူ့မိန်းမဆီ အရောက်သွားတဲ့ ဇာတ်ဝင်ခန်းနဲ့ မိုးရွာတော့ တွင်းထဲ ရေဝင်ပြီး မိန်းမက ရေနစ်လုနစ်ခင်ဖြစ်၊ ရေထဲမှာတင် ကလေးမီးဖွားတဲ့ ဇာတ်ဝင်ခန်းတွေက ကြည့်လို့ကောင်းချက်ပါပဲ။
ဒါတွေက လက်ဖက်ရည်ဆိုင်မှာ ကြည့်ခဲ့ရတဲ့ ရုပ်ရှင်ဇာတ်ကားတွေပါ။ ပြောရရင် လက်ဖက်ရည်ဆိုင်မှာ ပြတဲ့ ဇာတ်ကားတွေကြောင့် ထရော်မာတွေ ရခဲ့သလို ဇာတ်ကားကောင်းတွေလည်း ကြည့်ခဲ့ရဖူးပါတယ်။ Terminator, King Kong တို့တွေလည်း လက်ဖက်ရည်ဆိုင်မှာ ကြည့်ခဲ့ရတဲ့ ဇာတ်ကားတွေထဲ ပါသေးတယ်။
ပရိသတ်တွေကော လက်ဖက်ရည်ဆိုင်မှာ ကြည့်ခဲ့ရတဲ့ မှတ်မှတ်ရရ ရုပ်ရှင်ကားတွေ ရှိလားဗျ။ ထရော်မာတွေကော ရခဲ့ဖူးသေးလား။
