လေးကေ့ကော် စွယ်တော်ကုန်းနဲ့ ရှုခင်းသာကို အစိုးရတပ် ပြန်ထိန်းချုပ်ပြီး KK Park ကိုလည်း စီးနင်းဝင်ရောက်
အောက်တိုဘာ ၂၀
ထိုင်း - မြန်မာနယ်စပ်၊ မြဝတီမြို့နယ်ရှိ စစ်ရေးအရ အချက်အချာကျတဲ့ လေးကေ့ကော်မြို့သစ်၊ စွယ်တော်ကုန်းစခန်းနဲ့ ရှုခင်းသာစခန်းကို အစိုးရတပ်က ပြန်လည် ထိန်းချုပ်လိုက်ပြီး KK Park ကိုလည်း စီးနင်း ဝင်ရောက်ခဲ့တယ်လို့ မနေ့ အောက်တိုဘာ ၁၉ ရက်က သတင်း ထုတ်ပြန်ထားပါတယ်။
အစိုးရတပ်ဟာ လေးကေ့ကော်မြို့သစ်နဲ့ စွယ်တော်ကုန်း ဗျူဟာကုန်းစခန်းကို ပြန်လည် ရယူနိုင်ဖို့ ပြီးခဲ့တဲ့ စက်တင်ဘာလ ၂၀ ရက်နေ့မှ စတင်ကာ ထိုးစစ် ဆင်ခဲ့ခြင်းဖြစ်ပြီး နှစ်ဖက်တိုက်ပွဲတွေ ပြင်းထန်ခဲ့တယ်လို့ သိရပါတယ်။
အဲဒီနောက် အောက်တိုဘာ ၁၇ ရက်နေ့မှာ ရှုခင်းသာစခန်းကို သိမ်းပိုက်ခဲ့ပြီး မနေ့ အောက်တိုဘာ ၁၉ ရက်နေ့မှာတော့ ပွိုင့် (၁၀၇၈) စွယ်တော်ကုန်း စခန်းကို သိမ်းပိုက်နိုင်ခဲ့တယ်လို့ ထုတ်ပြန်ချက်မှာ ရေးသားထားပါတယ်။
“ရှမ်းမြောက်ကို အာရုံရောက်နေကြတဲ့ အချိန်မှာ တောင်ပိုင်းဒေသမှာလည်း အစိုးရတပ်က မြဝတီအတွက် အဓိကကျတဲ့ စစ်စခန်းကုန်းတွေဖြစ်တဲ့ လက်ခတ်တောင်၊ စွယ်တော်ကုန်း၊ လေးကေ့ကော်၊ ရှု့ခင်းသာတွေကို ပြန်ထိန်းချုပ်သွားနိုင်တာ တွေ့ရတယ်။ မနေ့က လေးကေ့ကော်ကို တပ်က ပြန်သိမ်းတယ်။ ဆက်တိုက်ပဲ လေးကေ့ကော်နားက ကျားဖြန့်ဂိုဏ်း အဆောက်အအုံကိုပါ ဝင်သိမ်းပစ်တယ်။ တိုက်ပွဲတလျှောက်မှာ အစိုးရတပ်ဘက်က လေကြောင်း၊ ဒရုန်းသုံးပြီး အပြင်းအထန် တိုက်ခိုက်ခဲ့တာ တွေ့ရတယ်။ ဒါကြောင့် လက်နက်ကိုင် တပ်တွေဘက်က နောက်ဆုတ်ပေးလိုက်ရတဲ့ အခြေအနေမျိုး ဖြစ်သွားတာပေါ့” လို့ စစ်ရေး သတင်းရင်းမြစ် တယောက်က ပြောပါတယ်။
အစိုးရရဲ့ ထုတ်ပြန်ချက်မှာ အပြင် ထိုင်း - မြန်မာ နယ်စပ်အနီးရှိ မဲ့ထော်သလေး (KK Park) ကိုလည်း ဝင်ရောက်စီးနင်းခဲ့တယ်လို့ ဖော်ပြထားပြီး အဲဒီလို စီးနင်းခဲ့ပေမယ့် KK Park အတွင်းမှာ ထူးခြားတဲ့ လက္ခဏာတွေ မတွေ့ရှိရဘဲ စတားလင့်ခ် (Starlink) အစုံ ၃၀ နဲ့ ဆက်စပ် ပစ္စည်းတွေကိုသာ တွေ့ရှိခဲ့ရတယ်လို့ ဆိုပါတယ်။
ဒါအပြင် KK Park အတွင်း အလုပ်သမား အမျိုးသား ၁၆၄၅ ယောက်၊ အမျိုးသမီး ၄၅၅ ယောက်၊ အမျိုးသားလုံခြုံရေး ၉၈ ယောက်၊ စုစုပေါင်း လူအယောက် ၂၁၀၀ ကျော်ကို တွေ့ရှိခဲ့ရတယ်လို့လည်း ဆိုပါတယ်။
KK Park ခြံဝင်း မြေပိုင်ဆိုင်ခွင့်၊ အဆောက်အအုံတွေနဲ့ ပတ်သက်ပြီး တာဝန်ရှိသူတွေကို ဆင့်ခေါ်ခဲ့ပေမယ့်လည်း လာရောက်ခြင်း မရှိဘူးလို့ အစိုးရရဲ့ ထုတ်ပြန်ချက်မှာ ပါရှိပါတယ်။
အဲဒီ မြေပိုင်ဆိုင်မှု၊ အဆောက်အအုံတွေကို ဟိုတယ်နှင့် ခရီးသွားလာရေးဌာနရဲ့ ခွင့်ပြုမိန့်နဲ့ ဆောင်ရွက်ထားခြင်း ရှိ၊ မရှိ စစ်ဆေးခဲ့ပေမယ့်လည်း တရားဝင် စာရွက်စာတမ်းတွေ မတွေ့ရတဲ့အတွက် ဥပဒေနဲ့အညီ ဆောင်ရွက်သွားမယ်လို့ ဆိုပါတယ်။
KK Park အတွင်း ဆောက်လုပ်ပြီး အဆောက်အအုံ တထပ် တိုက် ၁၀ လုံး၊ နှစ်ထပ်တိုက် အလုံး ၁၀၀၊ လေးထပ်တိုက် အလုံး ၂၀၊ ငါးထပ်တိုက် နှစ်လုံး၊ တထပ်တိုက် ဈေးဆိုင်ခန်း အလုံး ၂၀၊ နှစ်ထပ်တိုက် ဈေးဆိုင်ခန်း အလုံး ၃၀ တို့ကို တွေ့ရှိရတယ်လို့ သိရပါတယ်။
ဒါအပြင် တထပ်တိုက် ဂိုထောင် ၁၅ လုံး၊ နှစ်ထပ်တိုက် ဂိုထောင် အလုံး ၂၀၊ လေးထပ်တိုက် ဂိုထောင် ၁၀ လုံး၊ ဆောက်လုပ်ဆဲ နှစ်ထပ်တိုက် ၂၁ လုံး၊ သုံးထပ်တိုက် ၁၀ လုံး၊ လေးထပ်တိုက် ငါးလုံး၊ ငါးထပ်တိုက် ငါးလုံးနဲ့ တထပ်တိုက် ဆေးပေးခန်း နှစ်ခန်းတို့ကိုလည်း တွေ့ရှိခဲ့ရတယ်လို့ သိရပါတယ်။
အစိုးရတပ်ဟာ မနေ့ အောက်တိုဘာ ၁၉ ရက်မှာ ပွိုင့် (၁၀၇၈) စွယ်တော်ကုန်း စခန်းကို ပြန်လည် ထိန်းချုပ်ခဲ့ပြီးနောက် နယ်စပ်ဒေသ တလျှောက်ကို နယ်မြေ ရှင်းလင်းရေးတွေ ဆက်လက် ပြုလုပ်နိုင်ဖို့ ဆောင်ရွက်လျက် ရှိတယ်လို့ သိရပါတယ်။
မြဝတီမြို့ (တောင်ဘက်)၊ ဝေါလေလမ်းပိုင်းမှာ ဆုံးရှုံးထားတဲ့ တပ်စခန်းတွေကို ပြန်လည်ရယူဖို့ အစိုးရတပ်က ဒရုန်း၊ လက်နက်ကြီး ပစ်ကူရယူပြီး အင်အားဖြည့်တင်းကာ စစ်ကြောင်း ငါးကြောင်းနဲ့ လေးကေ့ကော်မြို့သစ်ကို ထိုးဖောက် ဝင်ရောက်လာတာကြောင့် တိုက်ပွဲတွေ ပြင်းထန်ခဲ့တယ်လို့ သိရပါတယ်။
လက်ရှိ အချိန်အထိလည်း ရှု့ခင်းသာကုန်း၊ ရသေ့ဂူ ၊ မဲထော်သလေးဘက်တွေမှာ တိုက်ပွဲ ဆက်လက် ဖြစ်ပွားနေပြီး အစိုးရတပ်က လေးကေ့ကော်ဘက်ကို အလုံးစုံ ထိန်းချုပ်နိုင်ခြင်း မရှိသေးဘူးလို့ စစ်ရေး သတင်းရင်းမြစ်တွေက ပြောပါတယ်။
လက်ရှိ လေးကေ့ကော်မြို့သစ်မှာ တိုက်ပွဲ ပြင်းထန်နေတာကြောင့် အနီးဝန်းကျင်ရှိ ကျေးရွာပေါင်း ၁၀ ရွာကျော်က ဒေသခံ ၃၀၀၀ ဝန်းကျင် စစ်ဘေး တိမ်းရှောင်နေရတယ်လို့ သိရပါတယ်။
