ပေါ့ပ်ဂီတစူပါစတား တေလာဆွစ်ဖ်နှင့် အမေရိကန်အသင်း ဘောလုံးသမား ထရက်ဗစ်ကယ်လ်စီတို့ စေ့စပ်
-----------------------------------
အမေရိကန် ပေါ့ပ်စူပါစတား တေလာဆွစ်ဖ်နှင့် အမေရိကန်နိုင်ငံဘောလုံးအသင်း (NFL) မှ ကစားသမား ထရက်ဗစ်ကယ်လ်စီတို့က ၎င်းတို့နှစ်ဦး စေ့စပ်ကြောင်းလမ်းလိုက်ပြီဖြစ်ကြောင်း ကြေညာလိုက်သည်။
လူမှုကွန်ရက်စာမျက်နှာ Instagram ပေါ်၌ ပူးတွဲတင်ထားသော ပို့စ်တစ်ခုတွင် ၎င်းတို့စုံတွဲက "ခင်ဗျားတို့ရဲ့ အင်္ဂလိပ်စာဆရာမနဲ့ Gym ဆရာတို့ လက်ထပ်တော့မယ်" ဟု ရေးသားထားပြီး ကယ်လ်စီက ဆွစ်ဖ်အား လက်ထပ်ခွင့်တောင်းနေသည့် ဓာတ်ပုံများကိုလည်း ဖော်ပြထားသည်။
အဆိုပါ စေ့စပ်ကြောင်းလမ်းသတင်းအား ပရိသတ်အများအပြားက လူမှုကွန်ရက်တွင် ကြိုဆိုခဲ့ကြပြီး ၎င်းတို့၏ Instagram ပို့စ်သည် တစ်နာရီခန့်အတွင်း Like ပေးသူ ၁၀ သန်းကျော် ရရှိခဲ့သည်။ NFL ဘောလုံးအသင်းကလည်း ၎င်းတို့စုံတွဲအား ဂုဏ်ပြုကြောင်း ဖော်ပြခဲ့သည်။
ဆွစ်ဖ်နှင့် Kansas City Chiefs အသင်းမှ ကစားသမား ကယ်လ်စီတို့သည် ၂နှစ်ကြာ ချစ်ကြိုက်ခဲ့ကြကြောင်း သိရသည်။ အသက် ၃၅ နှစ်ဝန်းကျင်ရှိပြီဖြစ်သော ၎င်းနှစ်ဦးသည် မည်သည့်နေ့ရက်က မည်သည့်နေရာတွင် စေ့စပ်ကြောင်းကို အတိအကျမသိရသေးပေ။
ကယ်လ်စီက ၎င်း၏ ပေါ့ဒ်ကတ်စ်အစီအစဉ်တွင် ဆွစ်ဖ်အပေါ် စိတ်ဝင်စားကြောင်း ထုတ်ပြောပြီးနောက် ၎င်းတို့ ၂ ဦးသည် ၂၀၂၃ ခုနှစ်တွင် စတင်ချစ်ကြိုက်ခဲ့ခြင်းဖြစ်ကြောင်း သိရသည်။
ထိုအချိန်မှစ၍ ဆွစ်ဖ်က Chiefs အသင်းပွဲများတွင် အားပေးနေသော ပုံများနှင့် ဆွစ်ဖ်၏ Eras ကမ္ဘာလှည့်ဖျော်ဖြေပွဲများတွင် ကယ်လ်စီ ပါဝင်ကပြနေသော ဗီဒီယိုများတွင် အကြိမ်ရေများစွာ မှတ်တမ်းတင်ထားသည်ကို တွေ့ရသည်။
တေလာ ဆွစ်ဖ်၏ ၁၂ ခုမြောက် စတူဒီယိုအသံသွင်း တေးအယ်လ်ဘမ်ကို အောက်တိုဘာလတွင် ဖြန့်ချိရန် စီစဉ်လျက်ရှိသည်။ ဆွစ်ဖ်သည် ကယ်လ်စီနှင့် ၎င်း၏အစ်ကိုတို့၏ ပေါ့ဒ်ကတ်စ်တွင် "The Life of a Showgirl" အယ်လ်ဘမ် ဖြန့်ချိမည့်ရက်ကို ကြေညာခဲ့ရာ မီဒီယာလောကတစ်ခုလုံးကို လှုပ်ခတ်သွားစေခဲ့သည်။
ဆွစ်ဖ် ၏သီချင်းများသည် သီချင်းအယ်လ်ဘမ်များအတွက် လူကြိုက်အများဆုံးဇယား ထိပ်ဆုံးတွင် ရပ်တည်နေခြင်းနှင့် မကြာသေးမီက ပြုလုပ်ခဲ့သော Eras (ခေတ်အဆက်ဆက်)ဟု အမည်ပေးထားသည့် ဖျော်ဖြေရေးခရီးစဉ်အတွင်း အဆိုပါပွဲများကို လက်ခံကျင်းပသည့် နိုင်ငံများ၏ စီးပွားရေးကို မြှင့်တင်ပေးနိုင်ခဲ့ခြင်းတို့ကြောင့် ကမ္ဘာပေါ်တွင် အကျော်ကြားဆုံး အနုပညာရှင်တစ်ဦးဖြစ်လာခဲ့သည်။
