စာချုပ်သစ် မချုပ်ဆိုလာပါက မာတီတာအတွက် ကမ်းလှမ်းမှုများကို ပဲလေ့စ် စဉ်းစားလာမည်
=====================

ခရစ္စတယ်ပဲလေ့စ်ဟာ အကောင်းဆုံးပုံစံ ရရှိနေတဲ့ ပြင်သစ်တိုက်စစ်မှူးဂျိန်းဖီးလစ်ပီမာတီတာအား စာချုပ်သစ်ချုပ်ဆိုနိုင်ခြင်း မရှိပါက နွေရာသီတွင် အခြားကလပ်များရဲ့ ကမ်းလှမ်းမှုအား စဉ်းစားပေးလာတော့မှာ ဖြစ်ပါတယ်။
ပဲလေ့စ်နှင့် မာတီတာရဲ့ အေးဂျင့်တို့ဟာ စာချုပ်သစ်ချုပ်ဆိုရေး ဆွေးနွေးနေပေမယ့်လည်း တိုးတက်မှု အနည်းငယ်သာ ရှိနေပါတယ်။
ပဲလေ့စ်ဥက္ကဌစတိဗ်ပါရစ်ရှ်နှင့် ဘုတ်အဖွဲ့ဝင်များက အိုလီဗာဂလပ်စ်နာလက်အောက်တွင် အရေးပါတဲ့ အခန်းကဏ္ဍမှ ကစားနေတဲ့ မာတီတာကို အသင်းတွင် ဆက်ထိန်းထားလိုနေကြပါတယ်။
ဒါပေမယ့် ပဲလေ့စ်ဟာ ယခုရာသီအကုန်တွင် အသင်းခေါင်းဆောင်မာ့ခ်ဂူဟီအား အလွတ်ပြောင်းရွှေ့ကြေးဖြင့် လက်လွှတ်ရမယ့် အဖြစ်မျိုး နောက်ထပ် မကြုံစေရေးအတွက် စာချုပ်သစ်မချုပ်ဆိုပါက နွေရာသီတွင်ပင် ရောင်းချရန် စီစဉ်ထားပါတယ်။
မာတီတာဟာ ပဲလေ့စ်နှင့် ၂၀၂၇ ခုနှစ်အထိ စာချုပ်ချုပ်ဆိုထားသူ ဖြစ်ပြီး တစ်ပတ်လုပ်ခ ပေါင် ၇၀၀၀၀ သာ ရရှိနေကာ လုပ်ခတိုးမြှင့် ရရှိလိုနေပါတယ်။
သူဟာ ပြီးခဲ့တဲ့ရာသီတုန်းက ၁၇ ဂိုးသွင်းကာ ကလပ်သမိုင်းတွင် ပထမဆုံးဆုဖလားအဖြစ် အက်ဖ်အေဖလား ရရှိအောင် အဓိကနေရာမှ ကူညီခဲ့သူလည်း ဖြစ်ပါတယ်။
ပဲလေ့စ်က မာတီတာက ကလပ်ရဲ့ အရေးပါတဲ့ ကစားသမားများထဲမှ တစ်ဦးအဖြစ် သတ်မှတ်ထားပေမယ့်လည်း စာချုပ်သစ်မချုပ်ဆိုနိုင်ပါက ရောင်းချလာပါမယ်။
သူ့ကို စီးရီးအေထိပ်သီး အေစီမီလန်က ခေါ်ယူရန် စိတ်ဝင်စားနေပါတယ်။

စထရာဘော့ရဲ့ ပွဲပယ်ခံလာရမှုအပေါ် ချဲလ်ဆီးသို့ ရောက်လာမယ့် တိုက်စစ်မှူး တုံ့ပြန်လာ
===================

နွေရာသီတွင် ချဲလ်ဆီးသို့ ပြောင်းလာမယ့် အီမန်နူရယ်အီမီဂါဟာ စထရာဘော့အသင်းရဲ့ ပွဲပယ်ခြင်းခံထားရမှုအပေါ် တုံ့ပြန်မှု ပြုလုပ်လာပါတယ်။
နွေရာသီတွင် ချဲလ်ဆီးသို့ ၇ နှစ်စာချုပ်ဖြင့် ပြောင်းရွှေ့လာမယ့် ဒတ်ချ်တိုက်စစ်မှူးဟာ စနေနေ့တွင် တူးလေ့စ်အား အဝေးကွင်းသို့ သွားရောက်ကစားရမယ့်ပွဲစဉ်တွင် ပွဲပယ်ခံထားရပါတယ်။
သူဟာ နိုင်ငံတကာပွဲစဉ်များကာလအတွင်း ပြုလုပ်ခဲ့တဲ့ အင်တာဗျူးကြောင့် ကလပ်ရဲ့ ပွဲပယ်ခြင်းခံထားရတာပါ။
အီမီဂါဟာ ယင်းအင်တာဗျူးတွင် ဒဏ်ရာကြောင့် အနားယူနေရစဉ်အတွင်း စထရာဘော့ရဲ့ ယခုရာသီ ခြေစွမ်းမပြနိုင်မှုအပေါ် ဝေဖန်ထားတဲ့အပြင် စထရာဘော့သို့ မပြောင်းမီတုန်းက ကလပ်ကို ပြင်သစ်ကလပ်လို့ မယူဆဘဲ ဂျာမန်ကလပ်တစ်ခုလို့ ယူဆခဲ့ကြောင်းလည်း ဖွင့်ဟခဲ့ပါတယ်။
ဒါကြောင့်လည်း ချဲလ်ဆီးရဲ့ ညီအစ်မ ကလပ်စထရာဘော့ဟာ နယ်သာလန်အတွက် ပူပူနွေးနွေး ကစားခွင့်ရထားတဲ့ အီမီဂါအား ယခုအပတ်အကုန် လီဂူး၁ ပွဲအတွက် လူစာရင်းတွင် ချန်လှပ်ကာ အရေးယူထားကြောင်း ကြေညာထားပါတယ်။
ယခုအခါ အီမီဂါက ကလပ်ရဲ့ အရေးယူမှုကို လက်ခံကြောင်း၊ ကလပ်ကို ထိခိုက်ရန်အတွက် မရည်ရွယ်ကြောင်း ဆိုလာပါတယ်။
စက်တင်ဘာလတုန်းက ချဲလ်ဆီးသို့ ပြောင်းရန် သဘောတူညီမှု ရရှိပြီးနောက် ပရိသတ်များရဲ့ လှောင်ပြောင်ခြင်းခံခဲ့ရတဲ့ အီမီဂါက "ဒီအပတ်ပွဲကို ပွဲပယ်ဖို့ ကလပ်ရဲ့ ဆုံးဖြတ်ချက်အပေါ် လက်ခံပါတယ်၊ နားလည်လည်ပါတယ်။ ကျွန်တော့်အသက် ၂၂ နှစ်ပဲ ရှိပါသေးတယ်။ အမှားတွေ လုပ်ခဲ့တယ်။ သင်ယူရဦးမယ်ဆိုတာ သိပါတယ်။ ဒီအမှားကလည်း သင်ယူသွားပါမယ်။ ကလပ်ကို ကိုယ်စားပြုပြီး ကွင်းတွင်း ကွင်းပြင် ပိုကောင်းဖို့ လိုတယ်၊ ပိုကောင်းအောင် လုပ်ရမယ်ဆိုတာ သိပါတယ်။ ဒါက အရေးပါပါတယ်။ ဘယ်သူကိုမှ မနစ်နာစေချင်ဘူးဆိုတာ ရှင်းရှင်းလင်းလင်း ပြောချင်ပါတယ်။ အသက် ၁၉ နှစ်အရွယ်မှာ ဒီကို ရောက်လာတယ်။ စထရာဘော့အတွက် အားလုံးလုပ်ပေးလာခဲ့တာပါ။ ဒီကလပ်အတွက် ကစားခွင့်ရလို့ ဂုဏ်ယူတယ်။ အသင်းခေါင်းဆောင်လက်ပတ်ဝတ်ဆင်ခွင့်ရလို့ ဂုဏ်ယူတယ်။ ဒီမှာ အစတုန်းက မလွယ်ကူခဲ့တာ အားလံးလည်း အသိပါ။ စထရာဘော့မှ အောင်မြင်မှုရဖို့က ကျွန်တော့်အတွက် ကြီးမားတဲ့ စိန်ခေါ်မှု ဖြစ်ခဲ့တယ်။ ဒါပေမယ့် ဖြစ်လာအောင် နေ့တိုင်း ကြိုးစားခဲ့တယ်။ ပြီးခဲ့တဲ့အပတ်က ကွင်းအတွင်း ခြေချလိုက်တဲ့အချိန်မှာ စထရာဘော့ကစားသမားတစ်ဦးအနေနဲ့ အကြီးမားဆုံးခံစားချက် ရခဲ့တယ်။ ကွင်းထဲဝင်လာချိန်မှာ အားပေးမှု၊သွေးပူလေ့ကျင့်ခန်းလုပ်ချိန်မှာ ကလေးတွေရဲ့ အားပေးမှုက တကယ့်အစစ်အမှန်ခံစားရစေတယ်။ ဒီအတွက် အသည်းထဲကနေ လှိုက်လှိုက်လှဲလှဲကျေးဇူးတင်ပါတယ်။ ဥက္ကဌမာ့ခ်ကယ်လာနဲ့ အကြာကြီး စကားပြောခဲ့တယ်။ အရိုးသားပြောခဲ့ကြတာ။ သူ့အကြံဉာဏ်တွေအတွက် ကျေးဇူးတင်ပါတယ်။ ဒီကလပ်ကို ကျွန်တော် ဘယ်လောက် ချစ်တယ် နေ့တိုင်း ဘယ်လို အလုပ်ကြိုးစားတယ်ဆိုတာ သူ သိပါတယ်။ ကစားဖော်တွေ၊ ဝန်ထမ်းတွေ၊ နည်းပြလီယမ်ရိုဆာရီယို၊ အားကစားဒါရိုက်တာဒေးဗစ်ဝီယာနဲ့ ကလပ်မှာ ရှိတဲ့လူတိုင်းကို ကျေးဇူးတင်ပါတယ်။ သူတို့ ကျွန်တော့်ကို နေ့တိုင်း မြင်နေရတာပါ။ ကျွန်တော် ဘယ်လိုလူလဲ ဘယ်လို အလုပ်လုပ်လဲ သူတို့ ကောင်းကောင်းသိပါတယ်။ တခါတလေ ကျွန်တော့်စကားက နားလည်မှု လွဲသွားစေပါတယ်။ အထူးသဖြင့် ကျွန်တော့်အပေါ် နားမလည်တဲ့သူမျိုးဆိုရင်ပေါ့။ ဒါပေမယ့် သေချာတာတစ်ခုက စထရာဘော့၊ အလာဆစ်၊ လာမိုင်နူ၊ ပရိသတ်တွေ၊ ကစားဖော်တွေ၊ ကလပ်တစ်ခုလုံးကို အဆုံးစွန်အထိ လေးစားတယ်ဆိုတာပါ။ စနေနေ့မှာ အသင်းနောက်ကနေ ၂၀၀ ရာခိုင်နှုန်းအားပေးနေပါမယ်"လို့ ပြောကြားသွားပါတယ်။

ယူနိုက်တက်အပေါ် စိတ်ပျက် ဒေါသထွက်ရကြောင်း အမိုရမ် ပြောကြားလာ
=======================

ရူဘင်အမိုရမ်က ကြာသပတေးနေ့တုန်းက အိုးထရက်ဖို့ဒ်ကွင်းတွင် ဝက်စ်ဟမ်းနှင့် တစ်ဂိုးစီသရေကျပြီးနောက် အသင်းအပေါ် စိတ်ပျက် ဒေါသထွက်ရကြောင်း ပြောကြားလာပါတယ်။
ယူနိုက်တက်ဟာ ဒီယေဂိုဒါလော့ရဲ့ ဂိုးဖြင့် ပွဲကို ဦးဆောင်နိုင်ခဲ့ပေမယ့်လည်း ပွဲချိန် ၈၃ မိနစ်တွင် မာဂက်စ်ဆာရဲ့ ချေပဂိုးကြောင့် သရေကျဖြင့်သာ ကျေနပ်ခဲ့ရပြီး ချန်ပီယံလိဂ်ဝင်ခွင့် အဆင့် ၅ နေရာသို့ တက်လှမ်းနိုင်မယ့်အခွင့်အရေး လက်လွှတ်လိုက်ရပါတယ်။
ယူနိုက်တက်ဟာ ပြီးခဲ့တဲ့လအစမှ စတင်ကာ ၄ ပွဲမြောက် သရေကျလာခဲ့တာ ဖြစ်ပြီး ကြီးမားတဲ့ ထိုးနှက်ချက်ကြုံလာရပါတယ်။
ပွဲအပြီးတွင် ယူနိုက်တက်ပရိသတ်များဟာ နောက်ဆုံး ၅ ပွဲတွင် ၁ ပွဲတည်းသာ အနိုင်ရထားတဲ့အသင်းသားများကို လှောင်ပြောင်ခဲ့ကြပါတယ်။
အမိုရမ်က "စိတ်ပျက်ရတယ်၊ ဒေါသထွက်ရတယ်။ ဒုတိယဘောလုံးဆုံးရှုံးမှုကြောင့် ပထမဆုံးအကြိမ် ဂိုးပေးလိုက်ရတာ ဖြစ်ဖို့ များတယ်။ ပြီးတော့ မားသီးယပ်စ်(ကန်ညာ)က ပထမ သို့မဟုတ် ဒုတိယဘောလုံး ရယူပြီး အပြောင်းအလဲလုပ်ရမယ်။ သူတို့က ဖြတ်တင်ဘော သို့မဟုတ် ထောင့်ကန်ဘောရဖို့ ကြိုးစားနေမှန်းသိလို့ ဂိုးနဲ့ ဝေးဝေးမှာ ခုခံဖို့ ကြိုးစားခဲ့တယ်။ ဖြစ်သွားတယ်။ အဝေးဘောပဲ။ ကျွန်တော်တို့ ခံစစ်သမား ၃ ယောက်ရှိနေတဲ့ကြားက သူတို့ ဒုတိယဘောလုံးရသွားတယ်။ ဒုတိယပိုင်းမှာ ကျွန်တော်တို့ ပိုကောင်းသင့်တယ်"လို့ ပြောကြားသွားပါတယ်။
အမိုရမ်ဟာ ဝက်စ်ဟမ်းနှင့်ပွဲတွင် ကစားသမား ၅ ဦးလဲလှယ်ရာမှာ ၄ ဦးအား ခံစစ်သမား ပြောင်းလဲခဲ့တာ ဖြစ်ပါတယ်။ သူဟာ ပထမပိုင်း ဂိုးမရှိသရေကျနေချိန်တွင် ရုန်းကန်နေရတဲ့ အေဒန်ဟဲဗင်းကို လီနီယိုရိုနှင့် လူစားလဲလှယ်ခဲ့ပါတယ်။ ဒါ့အပြင် ဘယ်နောက်ခံလူပက်ထရစ်ဒေါ်ဂူနှင့် ကွင်းလယ်ခံစစ်သမားအူဂတ်တီတို့ကိုလည်း ထည့်သွင်းခဲ့ပါတယ်။
ဝက်စ်ဟမ်းတို့ ချေပဂိုးရပြီးချိန်တွင်လည်း လီဆန်ဒရိုမာတီနက်ဇ်ကို ထည့်သွင်းခဲ့ပါတယ်။
ယူနိုက်တက်ဟာ လာမယ့်တနင်္လာနေ့တွင် ဝုဗ်ကို အဝေးကွင်းသို့ သွားရောက် ရင်ဆိုင်ကစားရပါမယ်။

၂ လကြာ နားရမယ့် ရီးရဲလ်မက်ဒရစ်ရဲ့ ထရန်းအလက်ဇန္ဒားအာနိုး
=====================

အင်္ဂလန်နောက်ခံလူထရန်းအလက်ဇန္ဒားအာနိုးဟာ ဘီလ်ဘာအိုအား အနိုင်ရတဲ့ပွဲစဉ်တွင် ပေါင်ကြွက်သားဒဏ်ရရှိသွားခဲ့ပြီးနောက် နှစ်လကြာ အနားယူလာရပါတော့မယ်။
ညာနောက်ခံလူဟာ ယခုရာသီတွင် ရီးရဲလ်မက်ဒရစ်အတွက် ၁၁ ပွဲတည်းသာ ကစားထားနိုင်သူ ဖြစ်ပါတယ်။ သူဟာ ဘီလ်ဘာအိုအား ၃-၀ ဂိုးဖြင့် အနိုင်ရတဲ့ပွဲတွင် ပထမဆုံးလာလီဂါဖန်တီးမှု ပြုလုပ်နိုင်ခဲ့ပါတယ်။
ဒါပေမယ့် သူဟာ ဒုတိယပိုင်း ၁၀ မိနစ်တွင် ပေါင်ကြွက်သားဒဏ်ရာရရှိကာ လူစားလဲလှယ်မှု ပြုလုပ်ခဲ့ရပါတယ်။
နွေရာသီတွင် လီဗာပူးမှ အလွတ်ပြောင်းရွှေ့ကြေးဖြင့် ပြောင်းလာခဲ့တဲ့ သူဟာ တံကောက်ကြောဒဏ်ရာကြောင့် ၆ ပတ်ကြာ အနားယူထားခဲ့ရပြီးသူလည်း ဖြစ်ပါတယ်။
ရီးရဲလ်မက်ဒရစ်နည်းပြအလွန်ဆိုဟာ အသင်းခေါင်းဆောင်ဒါနီကာဗာဂျယ်မှာလည်း ၂၀၂၆ နှစ် အစောပိုင်းအထိ အနားယူနေရမှုနှင့်အတူ အလယ်တန်းကစားသမားဗယ်ဗာဒီကို ညာနောက်ခံလူအဖြစ် အသုံးပြုနေရပါတယ်။

AI တွင် ရင်းနှီးမြှပ်နှံကာ လုပ်ငန်းတိုးချဲ့လာတဲ့ ခရစ္စတီယာနိုရော်နယ်ဒို
======================

ခရစ္စတီယာနိုရော်နယ်ဒိုဟာ Perplexity တွင် ရင်းနှီးမြှပ်နှံကာ စီးပွားရေးလုပ်ငန်း တိုးချဲ့မှု ပြုလုပ်လာပါတယ်။
ယင်း AI ပလက်ဖောင်းက OpenAI ရဲ့ ChatGPT ရဲ့ ပြိုင်ဘက်လည်း ဖြစ်ပါတယ်။
ယခုအခါ Perplexity ဟာ ရော်နယ်ဒိုနှင့် ပူးပေါင်းမှု ပြုလုပ်ပြီး ကုမ္ပဏီရဲ့ ပရိုမိုးရှင်းများတွင် အသုံးပြုလာတော့မှာလည်း ဖြစ်ပါတယ်။
ခရစ္စတီယာနိုရော်နယ်ဒိုက "ကြီးကျယ်မြင့်မြတ်မှုအတွက် စူးစမ်းလိုစိတ်က လိုအပ်ချက်တစ်ခု ဖြစ်ပါတယ်။ နေ့စဉ် မေးခွန်းသစ်တွေ မေးနေမှ အောင်မြင်မှုတွေ ရပါလိမ့်မယ်။ ဒါကြောင့်လည်း Preplexity မှာ ရင်းနှီးမြှပ်နှံရမှုအပေါ် ဂုဏ်ယူစွာ ကြေညာလာပါတယ်။ Preplexity က ကမ္ဘာ့စူးစမ်းလိုစိတ်ကို စွမ်းအားပေးနေပါတယ်။ ပြီးတော့ ကျွန်တော်တို့ အတူ လက်တွဲပြီး လူတိုင်းကို မေးခွန်းတွေ မေးဖို့ လှုံ့ဆော်သွားပါမယ်"လို့ ပြောကြားသွားပါတယ်။
Preplexity ကို ၂၀၂၂ ခုနှစ်တွင် တည်ထောင်ခဲ့တာ ဖြစ်ပြီး အသုံးပြုများအနေဖြင့် သိလိုတဲ့ မေးခွန်းများကို AI ဖြင့် ဖြေကြားပေးပါတယ်။
အသက် ၄၀ နှစ်ရှိ ခရစ္စတီယာနိုရော်နယ်ဒိုဟာ အောက်တိုဘာလတုန်းက ပေါ်တူဂီတွင် Prestige Award ဆွတ်ခူးစဉ်တုန်းက Preplexity ကို အသုံးပြုကြောင်း ထည့်သွင်းပြောကြားသွားခဲ့ဖူးပါတယ်။

အီကွေဒေါပါရမီရှင်အမြွှာညီနောင်ကို အာဆင်နယ် ခေါ်ယူလာ
===================

အာဆင်နယ်ဟာ အီကွေဒေါမှ ပါရမီရှင် အမြွှာညီနောင်အား ခေါ်ယူလိုက်ပြီ ဖြစ်ပါတယ်။ ဒါပေမယ့် အာဆင်နယ်ပရိသတ်များအနေဖြင့် အသက် ၁၆ နှစ်ရှိ အမြွှာညီနောင်တို့ အသက် ၁၈ နှစ်ပြည့်ချိန်တွင်မှ ခေါ်ယူခွင့်ရရှိမှာဖြစ်လို့ မြင်တွေ့ရဖို့ ၂ နှစ်စောင့်ဆိုင်းရပါဦးမယ်။
အက်ဝင်းနှင့် ဟိုလ်ဂျာကွင်တီရို ညီနောင်တို့ဟာ ၂၀၂၇ ခုနှစ် ဩဂုတ်လတွင်မှ Independiente del Valle မှ အာဆင်နယ်သို့ တရားဝင် ပြောင်းရွှေ့လာကြပါမယ်။
ယင်းကလပ်မှာ အာဆင်နယ်နောက်ခံလူပီရိုဟန်ကာပီ ကစားသမားဘဝစတင်ခဲ့ရာ ကလပ်လည်း ဖြစ်ပါတယ်။
ဒါ့အပြင် ချဲလ်ဆီးကွင်းလယ်ကစားသမားကိုင်စီဒိုမှာလည်း ယင်းကလပ်တွင်ပင် ကစားသမားဘဝစတင်ခဲ့တာပါ။
အက်ဝင်းမှာ ဘယ်သန်ညာတောင်ပံကစားသမားတစ်ဦးဖြစ်ပြီး ဟိုလ်ဂျာမှာ ညာသန် အလယ်တန်းတိုက်စစ်သမားဖြစ်ပါတယ်။
ယင်းအမြွှာညီနောင်နှစ်ဦးတိုဟာ အီကွေဒေါယူ-၁၇ အသင်းမှာ ကစားခွင့်ရှိနေကြသူများလည်း ဖြစ်ပါတယ်။
အမြွှာညီနောင်တို့ဟာ Independiente del Valle တွင်ပင် နောက်ထပ် ၂ နှစ်ကစားကာ အရည်အချင်းပိုကောင်းလာရေး ကြိုးစားရပါမယ်။

ဆီးကျိတ်ကင်ဆာဝေဒနာခံစားနေရတဲ့ ပရီးမီးယားလိဂ်ဂန္ထဝင်ဆာကာဟစ်စလော့ပ်
==================

ပရီးမီးယားလိဂ်ဂန္ထဝင်ဆာကာဟစ်စလော့ပ်ဟာ ဆီးကျိတ်ကင်ဆာရောဂါဝေဒနာတိုက်ပွဲဝင်နေရပါတယ်။
အသက် ၅၆ နှစ်ရှိ ဟစ်စလော့ပ်ဟာ ပရော်ဖက်ရှင်နယ်ကစားသမားဘဝ ၁၅ နှစ်အတွင်း ဝက်စ်ဟမ်း၊ ရီးဒင်း၊ နယူးကာဆယ်နှင့် ပို့စ်မောက်တို့တွင် ကစားခဲ့သူ ဖြစ်ပါတယ်။
ဂိုးသမားဟောင်းဟာ ၂၀၀၇ ခုနှစ်တွင် ကစားသမားဘဝမှ အနားယူပြီးနောက် ဘောလုံးဝေဖန်ရေးသမားအဖြစ် ဆောင်ရွက်နေခဲ့ပြီး ESPN တွင် ထမ်းဆောင်စဉ်တုန်းက အကောင်းဆုံးဝေဖန်သုံးသပ်နိုင်သူအဖြစ် ပရိသတ်များရဲ့ ချီးကျူးခြင်းခံခဲ့ရပါတယ်။
ထရီနီဒတ်နှင့် တိုဘာဂိုဂိုးသမားဟောင်းဟာ လက်ရှိအချိန်တွင် ၇ ပတ်ခွဲကြာ ဆေးကုသမှုနှင့် ဓာတ်ရောင်ခြည်ကုထုံးဖြင့် ကုသမှု ခံယူနေပါတယ်။
သူဟာ လွန်ခဲ့တဲ့ ၁၈ လတုန်းက ဆေးစစ်ဆေးမှု ခံယူစဉ် ဆီးကျိတ်ကင်ဆာဖြစ်နေကြောင်း စစ်ဆေးတွေ့ရှိခဲ့တာလည်း ဖြစ်ပါတယ်။
ဟစ်စလောပ်က အသက် ၅၀ နှစ်သို့ ရောက်နေတဲ့ အမျိုးသားတိုင်း ဆီးကျိတ်အင်တီဂျင်စစ်ဆေးမှု ပြုလုပ်သင့်ကြောင်းနှင့် အာဖရိကနွယ်ဖြစ်ပါက အသက် ၄၀ နှစ်တွင်ပင် စစ်သင့်ကြောင်းလည်း တိုက်တွန်းသွားပါတယ်။
ပရိသတ်များဟာ ဆီးကျိတ်ဝေဒနာခံစားနေရတဲ့ ဟစ်စလော့ပ်အား ရောဂါမှ အမြန်ဆုံး ပျောက်ကင်းပါစေကြောင်း ဆုတောင်းပေးနေကြပါတယ်။

LAFC သို့ ပြောင်းရွှေ့သွားပြီး လအနည်းငယ်အကြာမှာဘဲ ဆန်ဟောင်မင်း ပြန်လာမယ်လို့ စပါးစ် အတည်ပြုလာ
======================

ဆန်ဟောင်မင်းဟာ LAFC သို့ ပြောင်းရွှေ့သွားပြီး လေးလအကြာမှာဘဲ စပါးစ်သို့ ပြန်လာမယ်လို့ ကြေညာလာပါတယ်။
စပါးစ်ဂန္ထဝင်နှင့် ယူရိုပါလိဂ်ချန်ပီယံအသင်းခေါင်းဆောင်ဟာ လာမယ့်အပတ် မေဂျာလိဂ်ရာသီသိမ်းချိန်တွင် အသင်းဟောင်းစပါးစ်သို့ ပြန်လာပြီး ပရိသတ်များကို နှုတ်ဆက်လာမှာလည်း ဖြစ်ပါတယ်။
ဆန်ဟောင်မင်းဟာ ဒီဇင်ဘာလ ၉ ရက်နေ့ ဆလားဗီးယားပရက်နှင့် ချန်ပီယံလိဂ်ပွဲစဉ်ကို တက်ရောက်ကြည့်ရှုမှာ ဖြစ်ပြီး ပွဲမတိုင်မီ ကွင်းအတွင်းသို့ ဆင်းကာ ပရိသတ်များအား နှုတ်ဆက်လာမှာလည်း ဖြစ်ပါတယ်။
တောင်ကိုရိးယားဂန္ထဝင်ဟာ နွေရာသီတုန်းက စပါးစ်မှ ထွက်ခွာကာ LAFC သို့ ပြောင်းရွှေ့စဉ်တုန်းက ပရိသတ်များအား နှုတ်ဆက်ခွင့်မရခဲ့သူလည်း ဖြစ်ပါတယ်။
ဒါ့အပြင် သူဟာ Tottenham High Road တွင် ရေးဆွဲထားတဲ့ သူ့ပုံတူပန်းချီဖွင့်ပွဲသို့လည်း တက်ရောက်လာမှာ ဖြစ်ပြီး ပရိသတ်များနှင့် တွေ့ဆုံလာဦးမှာလည်း ဖြစ်ပါတယ်။ ယင်းပုံတူပန်းချီမှ ပုံကို ဆန်ဟောင်မင်းကိုယ်တိုင် ရွေးချယ်ထားတာလည်း ဖြစ်ပါတယ်။
ယင်းပုံတူပန်းချီကို လက်စလေကင်းနှင့် ဟယ်ရီကိန်းပုံတူတို့ကိုလည်း ရေးဆွဲခဲ့တဲ့ Murwells ကပင် ရေးဆွဲထားတာပါ။
အသက် ၃၃ နှစ်ရှိ ဆန်ဟောင်မင်းဟာ ပြီးခဲ့တဲ့ရာသီတုန်းက ယူရိုပါလိဂ်ဖလား ရရှိအောင် ကူညီကာ ၁၇ နှစ်ကြာ ဆုဖလားလက်မဲ့ဖြစ်မှုအား အဆုံးသတ်နိုင်အောင် ဦးဆောင်ခဲ့သူလည်း ဖြစ်ပါတယ်။
သူဟာ စပါးစ်တွင် ဆယ်နှစ်ကြာ ကစားစဉ်အတွင်း ၄၅၄ ပွဲကစားပေးခဲ့ကာ ၁၇၃ ဂိုးသွင်းပေးခဲ့ပါတယ်။

မြောက်အိုင်ယာလန်နှင့်ကစားရမယ့် ကမ္ဘာ့ဖလားပလေးအော့ဖ်ပွဲစဉ်ကို ဘာဂိုမိုတွင် ကစားလာမယ့် အီတလီ
======================

အီတလီဟာ လာမယ့်နှစ်မတ်လ ၂၆ ရက်နေ့တွင် မြောက်အိုင်ယာလန်နှင့် ကစားမယ့် ကမ္ဘာ့ဖလားပလေးအော့ဖ်ဆီမီးဖိုင်နယ်ပွဲစဉ်အား Stadio di Bergamo တွင် ကစားလာပါမယ်။
မိုက်ကယ်အိုနေးလ်ရဲ့ မြောက်အိုင်ယာလန်ဟာ ကမ္ဘာ့ဖလားခြေစစ်ပွဲ အုပ်စု(က)တွင် တတိယသာ ရရှိပေမယ့်လည်း နေးရှင်းလိဂ်စွမ်းဆောင်ရည်ကြောင့် ပလေးအော့ဖ်ကစားခွင့်ရလာခဲ့တာလည်း ဖြစ်ပါတယ်။
အီတလီမှာ ကမ္ဘာ့ဖလားအုပ်စု(ဈ)တွင် ဒုတိယနေရာမှာသာ ရပ်တည်ခဲ့ပြီး ပလေးအော့ဖ်တွင် ကမ္ဘာ့အဆင့်အကောင်းဆုံးအသင်းဖြစ်တာကြောင့် မြောက်အိုင်ယာလန်အား အိမ်ကွင်းအားသာချက်ဖြင့် ကစားခွင့်ရလာတာလည်း ဖြစ်ပါတယ်။
အီတလီဟာ မြောက်အိုင်ယာလန်နှင့်ပွဲကို အတ္တလန္တာရဲ့ အိမ်ကွင်း Stadio di Bergamo တွင် ကစားရန် ရွေးချယ်လာပါတယ်။
Stadio di Bergamo ကွင်းက ပရိသတ် ၂၁၃၀၀ တည်းသာ ဝင်ဆန့်ရာ မြောက်အိုင်ယာလန်မှာ လက်မှတ်ခွဲတမ်း ၁၀၀၀ ခန့်သာ ရရှိလာဖို့ ရှိနေပါတယ်။
အီတလီနှင့် မြောက်အိုင်ယာလန်ပွဲစဉ်မှ အနိုင်ရတဲ့အသင်းဟာ ကမ္ဘာ့ဖလားခြေစစ်ပွဲအောင်ခွင့် အဆုံးအဖြတ်ပွဲအဖြစ် ပလေးအော့ဖ်ဗိုလ်လုပွဲတွင် ဝေးလ်(သို့မဟုတ်) ဘော့စနီးယားနှင့် မတ်လ ၃၁ ရက်နေ့တွင် ကစားရပါမယ်။

ကမ္ဘာ့ဖလားပြိုင်ပွဲတွင် အရန်ကစားသမားများကို အဝတ်အစားလဲခန်းတွင် နေခိုင်းလာဖို့ ရှိနေတဲ့ သောမတ်စ်တူချယ်
====================

အင်္ဂလန်နည်းပြသောမတ်စ်တူချယ်က ပူပြင်းတဲ့ ရာသီဥတုကြောင့် လာမယ့်နှစ် ကမ္ဘာ့ဖလားပြိုင်ပွဲအတွင်းတွင် အရန်ကစားသမားများအား အဝတ်အစားလဲခန်းအတွင်းတွင်ပင် နေခိုင်းထားနိုင်ကြောင်း ပြောကြားလာပါတယ်။
၂၀၂၆ ကမ္ဘာ့ဖလားပြိုင်ပွဲကို အမေရိကန်၊ ကနေဒါနှင့် မက္ကဆီတို့က ပူးတွဲ ကျင်းပလာမှာ ဖြစ်ပြီး ယနေ့တွင် ဝါရှင်တန်ဒီစီတွင် ကမ္ဘာ့ဖလားအုပ်စုမဲခွဲမှု ပြုလုပ်လာပါမယ်။
ကမ္ဘာ့ဖလားပြိုင်ပွဲအား ဇွန်လတွင် ကစားမည်ဖြစ်ရာ ပူပြင်းတဲ့ နွေရာသီဒဏ်ကို ကစားသမားများ ခံစားလာရမှာလည်း ဖြစ်ပါတယ်။
ပြီးခဲ့တဲ့ နွေရာသီတုန်းက ကျင်းပတဲ့ ကလပ်ကမ္ညာ့ဖလားပြိုင်ပွဲတုန်းကလည်း ကစားသမားများ၊ နည်းပြများဟာ ပူပြင်းတဲ့ ရာသီအား စောဒကတက်မှု ပြုလုပ်ခဲ့ကြပါတယ်။
Football for the Future and Common Goal က ကမ္ဘာ့ဖလားကျင်းပမယ့် ကွင်း ၁၆ ကွင်းမှာ ၁၀ ကွင်းတွင် ဆိုးရွားလွန်းလှတဲ့ အပူချိန်ကို ကစားသမားများ ရင်ဆိုင်ရမှာ ဖြစ်ကြောင်း သတိပေးကြေညာထားပါတယ်။
တူချယ်က "ကျွန်တော်အပါအဝင် အားလုံးက အရန်ခုံကနေ ကွင်းအတွင်း ကစားသူတွေကို ခွန်အားပေးတာမျိုး လိုချင်ကြတော့ ဒီလို ဘယ်သူမှ မလုပ်ချင်ကြပါဘူး။ ဒါပေမယ့် ကလပ်ကမ္ဘာ့ဖလားမှာ ကစားသမားတွေ လုပ်တာ မြင်ခဲ့ရတာတွေကြောင့် ဒါကို ရှောင်လွဲလာနိုင်ဖို့ မျှော်လင့်ပါတယ်။ ကျွန်တော်တို့နှင့်အတူ အရန်ကစားသမားတွေလည်း အတူရှိနေတာကတော့ အကောင်းဆုံးပေါ့"လို့ ဆိုသွားပါတယ်။
အပူချိန်က ပွဲအပေါ် သက်ရောက်လာနိုင်မှုနှင့်ပတ်သက်ပြီး တူချယ်က "ထိပ်တန်းအဆင့်ဘောလုံးမှာ ဒါက ပြဿနာပါ။ ပွဲတွေရဲ့ ပြင်းထန်မှုကို လျှော့ကျစေတယ်။ ပြေးနှုန်း၊ တိုက်စစ်နဲ့ ခံစစ်တွေကို လျော့ကျစေတယ်။ ဒီတော့ ပွဲနဲ့ ဟန်ချက်ညီအောင် ပြင်ဆင်ထားရမယ်။ 21C မှာ ကစားရသလိုမျိုး 45C မှာ ကစားနိုင်မှာ မဟုတ်ပါဘူး။ ဒီတော့ ကစားသမားတွေကို ဟန်ချက်ညီညီ ကစားနိုင်အောင် ပြင်ဆင်ထားရမယ်။ အပူချိန်နဲ့ အံဝင်အောင် အအေးစနစ်တွေသုံးပြီး အံဝင်အောင် လုပ်ရမယ်။ ဒီအတွက်လည်း အများကြီး လုပ်ထားတယ်။ ကမ္ဘာ့ဖလားစတင်ချိန်မှာအသင့်ဖြစ်နေမှာပါ"လို့ ပြောကြားသွားပါတယ်။