“ ပါပီ... တကယ်တော့ ကံဆိုတာရဲ့ လှည့်စားခြင်းကို
လူတိုင်းခံနေရတယ် ဆိုတာ မင်း သိထားစမ်းပါ ။ အရှုံးကို ရင်ဆိုင်တတ်စမ်းပါ ။ အရှုံးတစ်ခုကို ရင်ဆိုင်ရပြီးတိုင်း ဘယ်တော့မှ ညည်းမနေနဲ့ ။ ရည်မှန်းချက်သစ် တစ်ခုကို ချက်ချင်း ပြန်ရှာပြီး ထပ်ကြိုးစားစမ်းပါ ။
လူ့ဘဝမှာ သေချာတယ်ဆိုတာ ပစ္စုပ္ပုန်မှာပဲ ရှိတယ် ။ ”
ပါပီလွန် နှင့် ဗင်ကို စာအုပ်ကို Henri Charriere က
ပြင်သစ်ဘာသာဖြင့် ရေးသားထားခြင်းဖြစ်သည် ။ မြန်မာပြန်ဆိုသူ ဦးလှဝင်း (လေသူရဲတစ်ဦး) က အင်္ဂလိပ်ဘာသာ မှ မြန်မာဘာသာသို့ ပြန်ဆိုထားခြင်းဖြစ်သည် ။ ပါပီလွန် အမည်ရ ပြင်သစ်မြေအောက် ဒုစရိုက်လောကတွင် ကျင်လည်ကျက်စားခဲ့သူတစ်ဦး၏ တကယ့်ဖြစ်ရပ်မှန် အဖြစ်အပျက်ကို ရေးသားထားသော ဖြစ်ရပ်မှန် စွန့်စားခန်း စာအုပ်လည်း ဖြစ်သည် ။ ၁၉၃၀ ခုနှစ်ဝန်းကျင်ကာလ ပြင်သစ်နိုင်ငံ၏ တရားစီရင်ရေးစနစ် နှင့် အကျဉ်းထောင်လောကအကြောင်း တစ်စေ့တစ်စောင်း တွေ့မြင်ရမည် ဖြစ်သည် ။
ပါပီလွန်သည် ပြင်သစ်နိုင်ငံ ပဲရစ်မြို့မှ မြေအောက်လောကသား ဒုစရိုက်သမားတစ်ဦး ဖြစ်သည် ။ သူ မသတ်ခဲ့ရသော လူသတ်မှုအတွက် တစ်သက်တစ်ကျွန်း ပြစ်ဒဏ်ကျခံခဲ့ရသူ ဖြစ်သည် ။ ပြင်သစ်နိုင်ငံ၏ တစ်သက်တစ်ကျွန်း ပြစ်ဒဏ်ဆိုသည်မှာ အမှန်တကယ် ကျွန်းသို့ ပို့သော ပြစ်ဒဏ်ဖြစ်သည် ။ ပါပီလွန်သည် သူ မတရားကျွန်းဒဏ်ခံရသည့်အတွက် သူ့အမှု၏ မမှန်သက်သေ သူ့ကို ဖမ်းခဲ့သော ရဲနှစ်ဦး နှင့် ဆွဲချ (အစိုးရရှေ့နေ) တို့ကို ကလဲ့စားချေသတ်ဖြတ်နိုင်ရန်အတွက် အယူခံပင် မဝင်တော့ဘဲ တစ်ကျွန်းမှ ထွက်ပြေးရန် ဆုံးဖြတ်လိုက်သည် ။
ပါပီလွန်မှာ ထောင်ဒဏ်တစ်သက်တစ်ကျွန်းကျသည့်နေ့မှာပင် မာရီအင်တိုနီ နန်းတော် အကျဉ်းထောင်သို့ ပို့လိုက်သည် ။ ထောင်မှ ထွက်ပြေးရန်ကြံစည်သော ပါပီလွန်သည် ထောင်တွင်းစရောက်သည့် အချိန်မှစ၍ ထွက်ပြေးရန်ကြိုးစားတော့သည် ။ ပြီးနောက် ကျွန်းပို့မည့်အကျဉ်းသားများ စုစည်းရာ ဆီးအကျဉ်းထောင်သို့ ပို့လိုက်သည် ။ ထောင်သားများ ပို့ဆောင်သော သင်္ဘောမဆန့်သဖြင့် ပါပီလွန် နှင့် အကျဉ်းသားတချို့ စိန့်မာတင်ထောင် သို့ ရောက်ရပြန်သည် ။ ထို့နောက်တွင်မှ တစ်ကျွန်းသို့ ပင်လယ်ကူး သင်္ဘောကြီးဖြင့် တစ်ကျွန်းသို့ ပို့ဆောင်လိုက်သည် ။ ပါပီလွန်တို့ကို ပို့ဆောင်သော တစ်ကျွန်းမှာ ပြင်သစ်နိုင်ငံမှ သင်္ဘောဖြင့် တစ်ဆယ့်ရှစ်ရက်ကြာအောင်သွားရသော တောင်အမေရိက အရှေ့မြောက်ဖျား မှ ပြင်သစ်ပိုင် ဂီရာနာရှိ ပင်လယ်အတွင်းကျွန်းစုတွင် ဖြစ်သည် ။ ထိုကျွန်းစုတွင် အကျဉ်းသားများကို ခွဲခြားချုပ်နှောင်ထားသည် ။
ထောင်မှ ထွက်ပြေးရန် အမြဲကြိုးစားနေသော ပါပီလွန်သည် ကျွန်းရောက်ပြီး မကြာမီ ထွက်ပြေးရန် ကြိုးစားတော့သည် ။ ပါပီလွန် ဘဝတာတွင် ထောင်၁၄ခု သို့ရောက်ရှိခဲ့ပြီး ထို ရောက်ရှိခဲ့သော ထောင်များတွင် ပြင်သစ် အကျဉ်းထောင်စနစ်၏ ရက်စက်ကြမ်းကြုတ်လှသော ပြန်လမ်းမဲ့ထောင် လူသေထောင် ဟုခေါ်သော
အလုံပိတ် အကျဉ်းထောင်များအထိ ရောက်ရှိခဲ့သည် ။ အကျဉ်းထောင်အတွင်း၌လည်း သေလုနီးပါး ထိခိုက်ဒဏ်ရာများ ရခဲ့သည် ။ ထောင်မှ မကြာခဏ ထွက်ပြေးရန်ကြိုးစားခဲ့ပြီး သူ ကြိုးစားခဲ့သည့်နည်းများတွင်
သာမာန်ထောင်ဖောက်ပြေးခြင်းအပြင် ယမ်းဘီးလူးဖြင့် ထောင်ဖောက်ပြေးခြင်း ပင်လယ်တွင်း တစ်ကျွန်းမှာဖြစ်၍ သာမာန်လှေငယ် ဖောင်များဖြင့် ထွက်ပြေးခြင်းအပြင် စက်လှေဝယ်ယူပြီး ထွက်ပြေးခြင်းအထိ စုံလင်လှသည် ။
ဒုတိယကမ္ဘာစစ်အတွင်း၌ ပါပီလွန်တို့ အကျဉ်းသားတစ်စု ထောင်မှ လှေဖြင့် ထွက်ပြေးရာ အောင်မြင်သွားပြီး တောင်အမေရိကနိုင်ငံ ဖြစ်သော အင်္ဂလိပ်ပိုင် ဂီရာနာနိုင်ငံမြို့တော် ဂျော့တောင်းသို့ ရောက်ရှိသွားသည် ။ ဂျော့တောင်းတွင် ဝမ်းရေးအတွက် အလုပ်လုပ်ခဲ့ရပြီး သူ၏ ရည်မှန်းချက်ဖြစ်သော လက်စားချေရေးလုပ်ငန်း ဆက်လက်ဆောင်ရွက်နိုင်ရန် ဗင်နီဇွဲလားနိုင်ငံသို့ ထွက်ခွာသွားခဲ့သည် ။ ဗင်နီဇွဲလားတွင်လည်း ထောင်ဒဏ်ကျခံခဲ့ရသေးသည် ။ သည်တစ်ကြိမ် ထောင်ဒဏ်ကျခံရသည်က ပါပီလွန်အတွက် နောက်ဆုံးအကြိမ် ထောင်ထဲသို့ရောက်ခြင်းပင် ဖြစ်သည် ။
ပါပီလွန်သည် သူ့ဘဝကို ဗင်နီဇွဲလားနိုင်ငံတွင် ကုန်ဆုံးရန်ဆုံးဖြတ်ကာ ဗင်နီဇွဲလားနိုင်ငံသားအဖြစ်ရရှိအောင်ကြိုးစားခဲ့သည် ။ သူ၏ ဒုတိယဘဝကို ရရှိခဲ့သော်လည်း သူ့ရည်မှန်းချက်ဖြစ်သည့် သူ့အားထောင်ထဲရောက်အောင်ထည့်ခဲ့သော သက်သေလိမ် ရဲနှစ်ဦး နှင့် အစိုးရရှေ့နေ ဆွဲချကို လက်စားချေရန် မမေ့ခဲ့ချေ ။ ဗင်နီဇွဲလားနိုင်ငံတွင် ရွှေမိုင်း စိန်တွင်း တို့တွင် အလုပ်လုပ်ခြင်း ဟိုတယ်ပိုင်ရှင် ပုစွန်တင်ပို့ခြင်းလုပ်ငန်းများ လုပ်ကိုင်ခဲ့ပြီး အောင်မြင်ခြင်း ဆုံးရှုံးခြင်းများစွာကို တွေ့ကြုံခဲ့သည် ။ ဗင်နီဇွဲလားတွင် ရှိနေစဉ် အပေါင်းအဖော်များကြောင့် ဘဏ်တိုက်တစ်ခုကို ဖောက်ထွင်းရန်ကြိုးစားသော်လည်း မအောင်မြင်ခဲ့ပေ ။ ပါပီလွန်၏ဘဝတစ်လျှောက် ခက်ခဲကြမ်းတမ်းခြင်း ပင်ပန်းဆင်းရဲခင်းများစွာ တွေ့ကြုံခဲ့ရသော်လည်း အချစ်၏ ချိုမြိန်သောအသီးအပွင့်ကို ခံစားခဲ့ရသည်များလည်း ရှိခဲ့သည် ။
ကိုလံဘီယာနိုင်ငံ ရိုင်ရိုဟာချီ အကျဉ်းထောင်မှ ထောင်ဖောက်ထွက်ပြေးပြီးနောက် အင်းဒီးယန်းလူရိုင်း နယ်မြေသို့ ရောက်ခဲ့စဉ် လူရိုင်း ညီအစ်မနှစ်ဦးနှင့် ဖူးစာဆုံခဲ့ရသည် ။ ထိုလူရိုင်းမ ကိုယ်ဝန်ရှိစဉ်မှာပင် သူ့ရည်မှန်းချက်ဆောင်ရွက်ရန် ထွက်ခွာခဲ့ရသည် ။ ဂျော့တောင်းမြို့၌ ရှိစဉ်လည်း ဟိန္ဒူမျိုးနွယ် အင်ဒရာနှင့် သံယောဇဉ် ညှိတွယ်ခဲ့ရသည် ။ သူ့၏နောက်ဆုံးဇနီးမှာ ရီတာ ဖြစ်သည် ။
ပါပီလွန်သည် ပြင်သစ်နိုင်ငံသို့ ပြန်ဖို့ကြိုးစားရင်း ပြင်သစ်ရှိသူ၏ မိသားစုဝင်များနှင့် အဆက်အသွယ်ရသွားသည် ။ ပါပီလွန်သည် သူ၏ရန်သူများကို လက်စားချေရန် ရည်မှန်းချက်ဖြင့် ခက်ခဲကြမ်းတမ်းသောဘဝကို အပင်ပန်းခံလျှောက်လှမ်းရင်း သူ့ရည်မှန်းချက်ကို အကောင်အထည်ဖော်နိုင်ရန် စိတ်ကူးထဲ အမြဲထည့်ထားသည် ။
ဘဝတစ်လျှောက်လုံး အခက်အခဲများ နှင့် အမြဲတစေကြုံတွေ့ပြီး ရှင်သန်ရန် လွတ်မြောက်ရန် မနေမနား ရုန်းကန်လှုပ်ရှားနေရသော ပါပီလွန်သည် သူ ရှင်သန်ရုန်းကန်းရခြင်း၏ ရည်မှန်းချက်ဖြစ်သော ရန်သူကို လက်စားချေနိုင်မလားဆိုတာကိုတော့ စာအုပ်ဖတ်ရင်း အရသာခံစေချင်ပါတယ်။
ကိုဟိန်း
(သန့်ဇော်ဟိန်း)
#ပါပီလွန်နှင့်ဗင်ကို
#ပါပီလွန်နှင့်ဗင်ကို
