လိုင်ဇာက KTV ဆိုင်တွေနဲ့ Melody ဆိုင်တွေ ရက်အကန့်အသတ်မရှိ ပိတ်ခိုင်း
မေ ၂၆၊ ၂၀၂၅
လိုင်ဇာ နယ်မြေက KTV ဆိုင်တွေနဲ့ Melody ဆိုင်တွေ အားလုံး ရက်အကန့်အသတ် မရှိ ပိတ် ဖို့ KIO/KIA အုပ်ချုပ်ရေးဌာနက မေလ ၂၄ ရက်နေ့ရက်စွဲနဲ့ အသိပေး ကြေညာစာ ထုတ်ပြန်ထားပါတယ်။
လိုင်ဇာ အုပ်ချုပ်ရေး နယ်မြေအတွင်း ဖွင့်လှစ်ထားတဲ့ KTV ဆိုင်တွေနဲ့ Melody ဆိုင်တွေ အားလုံး လက်ရှိ အခြေအနေပေါ် မူတည်ပြီး ရက်အကန့်အသတ် မရှိ ပိတ်ထားဖို့ ထုတ်ပြန်စာမှာ ဖော်ပြထားပါတယ်။
"ဘာကြောင့် ပိတ်ရတာလဲ ဆိုတော့ နိုင်ငံရေး အခြေအနေ ကြောင့်လို့ ပြောလို့ ရပါတယ်။ အမိန့်ထုတ်တဲ့ သူတွေထဲက တချို့ကပဲ ပိုသွားတာမျိုးပါ။ ရှင်းပြရရင် ရှည်တယ်။ အရေးယူဖို့ အဆင်မပြေသေးတဲ့ အခြေအနေ ဖြစ်နေသေးလို့" လို့ ဒေသခံ တေယာက်က ပြောပါတယ်။
"အခုက KTV မှာ အရင်တုန်းကလို သီချင်းဆို ဖျော်ဖြေ၊ အပန်းဖြေတာ မျိုး မဟုတ်ဘူး။ KTV မှာ WY, K, E, Happy Water တွေ သုံးကြတယ်။ လူငယ် ဆယ်ကျော်သက်တွေ ပျက်စီး ကုန်တယ်။" လို့ ဒေသခံ ေနာက်တယောက်က ပြောပါတယ်။
KTV တွေ ပိတ်သိမ်း ထားရင်တောင် အဲဒီ မူးယစ်ဆေးဝါး စွဲနေတဲ့ သူတွေက မူးယစ်ဆေးဝါး သုံးစွဲမယ့် နေရာ ထပ်ရှာ လာနိုင်တာယ်၊ မူးယစ်ဆေးဝါး တင်သွင်း သူတွေကို ထိထိရောက်ရောက် အရေးယူသင့်တယ်လို့ သူက ပြောပါတယ်။
လိုင်ဇာနယ်မြေထဲ မူးယစ်ဆေးဝါး သယ်ဆောင်လာတဲ့ ဂိုဏ်းကို သိရှိထားပြီ ဖြစ်ပြီး နောက်ကွယ်ကနေ ကြိုးကိုင်နေတဲ့ အဓိက ခေါင်းဆောင်ကို စုံစမ်းနေတယ်လို့ သိရကြောင်း သူက ပြောပါတယ်။
၂၀၂၅ မေလ ၂၄ ရက်နေ့ကစ KTV ဆိုင်တွေနဲ့ Melody ဆိုင်တွေကို ပိတ်ထားဖို့ တရားဝင် အသိပေးထားပြီး ဆိုင်ပိတ်ထားဖို့ ကြေညာထားတဲ့ ကာလအတွင်း ဆိုင်ဖွင့်တာတွေ၊ သတ်မှတ်ချက် စည်းကမ်း ချိုးဖောက်တာတွေ ရှိပါက ပြင်းပြင်းထန်ထန် အရေးယူသွားမှာဖြစ်ကြောင်းလို့ ထုတ်ပြန်ချက်မှာဖော်ပြထားပါတယ်။
KTV ဆိုင်တွေနဲ့ Melody ဆိုင်တွေ ပြန်လည် ဖွင့်လှစ်လို့ရမယ့် အခြေအနေ ရောက်ရင် မြို့နယ် အုပ်ချုပ်ရေး ရုံးကနေ ပြန်လည် အသိပေးသွားမှာ ဖြစ်ကြောင်းလည်း ဖော်ပြထားပါတယ်။
ဒီရက်ပိုင်းအတွင်း နစက နဲ့ ပူးပေါင်း တပ်ဖွဲ့တွေက KIA နဲ့ ပူးပေါင်း တပ်ဖွဲ့ ထိန်းချုပ်ထားတဲ့ ကချင်ပြည်နယ် ဖားကန့်လမ်းတွေနဲ့ ဝိုင်းမော်မြို့နယ် တွေမှာ ဆက်တိုက်ထိုးစစ်ဆင်နေတဲ့အပြင် ဗန်းမော်မှာလည်း တိုက်ပွဲ ဖြစ်ပွားနေဆဲ ဖြစ်ပါတယ်။
Photo Crd# လိုင်ဇာဒေသခံ
