ရန်ကုန်မှာ ဒီကနေ့မနက်ပိုင်း ယာဉ်တိုက်မှုနှစ်ကြိမ်ဖြစ်ပြီး သံဃာတပါးနဲ့အမျိုးသမီးတယောက်သေဆုံး
စက်တင်ဘာ ၁၆၊ ၂၀၂၅
ရန်ကုန်တိုင်း၊ စမ်းချောင်း မြို့နယ် နဲ့ မြောက်ဒဂုံမြို့နယ်တွေမှာ ဒီကနေ့ စက်တင်ဘာ ၁၆ ရက်မနက်ပိုင်းက ယာဥ်တိုက်မှုဖြစ်ပွားပြီး သံဃာတပါးနဲ့ အမျိုးသမီးတယောက်သေဆုံးခဲ့တယ်လို့သိရပါတယ်။
ဖြစ်စဥ်ကဒီနေ့မနက်အစောပိုင်းလောက်မှာ ဒဂုံမြို့သစ်မြောက်ပိုင်းမြို့နယ်၊ အမှတ်(၂)လမ်းမကြီး၊ သင်တန်း ကျောင်းမှတ်တိုင်အနီးမှာ ကားတိုက်ခံရပြီး ဦးခေါင်းကြေမွ ၊ ဝမ်းဗိုက်ပွင့်ဒဏ်ရာနဲ့ ဘုန်းကြီးတပါး နေရာမှာပဲပျံလွန်တော်မူခဲ့တာဖြစ်တယ်လို့သိရပါတယ်။
" ခေါင်းကကြေမွနေတယ်။ဘယ်ကားတိုက်လို့တိုက်သွားမှန်းတောင်မသိရဘူး။ တိုက်ခံရတဲ့ဘုန်းကြီးက အသက် ၅၀ ကျော်လောက်တော့ရှိမယ်။လူမှုရေးကားတွေက ဆေးရုံကိုပို့လိုက်တယ်။" လို့ ဒေသခံလူမှုကူညီရေးအသင်းဝင်တယောက်ကပြောပါတယ်။
ကားသမားက ဘုန်းကြီးကိုဝင်တိုက်ပြီး ကားမောင်းထွက်ပြေးသွားတာကြောင့် တိုက်ခဲ့တဲ့ကားကိုမသိရှိရသေးသလို ကားသမားကိုလည်းဖမ်းဆီးရမိခြင်းမရှိသေးဘူးလို့သိရပါတယ်။
အမျိုးသမီးတယောက်သေဆုံးမှုဖြစ်စဥ်ကတော့ လှိုင်သာယာမြို့နယ် ၊ အနော်ရထာလမ်းမှာ ဒီနေ့မနက်ပိုင်းက YBS 79 က စက်ဘီးကိုဝင်တိုက်မိပြီး စက်ဘီးစီးနင်းသူ အမျိုးသမီးသေဆုံးခဲ့တာဖြစ်ပါတယ်။
" တက်ကြိတ်မိတဲ့ပုံပါ။မနက်ကဖြစ်တာပါ။ကားသမားကမပြေးပါဘူး။သူတောင်ကူညီလုပ်ပေးပါသေးတယ်။သေတဲ့ကောင်မလေးက အသက် ၂၅ လောက်အရွယ်ပါ။" လို့ မြေပြင်ကူညီရေးလုပ်ခဲ့တဲ့ ကရုဏာတွဲလက်ရှင်ရေးနာရေးကူညီရေးအသင်းဥက္ကဋ္ဌဦးစန်းဦးကပြောပါတယ်။
သေဆုံးသူအမျိုးသမီးက လှိုင်သာယာမြို့နယ်နေထိုင်သူဖြစ်ကြောင်း လက်ရှိမှာ ဆေးရုံကိုပို့ဆောင်ထားတယ်လို့သိရပါတယ်။
စက်တင်ဘာ ၁၅ ရက်နေ့ကလည်း အင်းစိန်မြို့နယ်၊ ရန်ကုန်-ပြည်လမ်း၊ ထန်းပင်ကုန်း မှတ်တိုင်အနီးမှာ YBS 104 ကဝင်တိုက်လို့ အသက် ၄၅ နှစ်အရွယ်အမျိုးသမီးတယောက် နေရာမှာပဲ ပွဲချင်းပြီးသေဆုံးသွားခဲ့သလို မင်္ဂလာဒုံမြိုနယ်၊ အမှတ်(၃)လမ်းမကြီး၊ စက်သုံးဆီအရောင်းဆိုင်တစ်ဆိုင်ရှေ့မှာလည်း အဝေးပြေး Express ကားပေါ်မှဆင်းလာပြီး လမ်းဖြတ်ကူးသူ အမျိုးသမီးကို ဖယ်ရီကားကဝင်တိုက်မိပြီး သေဆုံးမှုရှိခဲ့ပါတယ်။
စက်တင်ဘာ ၁၁ ရက်ကလည်း မရမ်းကုန်းမြို့နယ် ကမ္ဘာအေးဘုရားလမ်းမပေါ်ရှိ နဝဒေးမီးပွိုင့်မှာ ကုန်စိမ်းကားနဲ့ ဘောက်စ်ကား တိုက်မိပြီး အမျိုးသားတယောက် သေဆုံးကာ ၁၁ ယောက် ထိခိုက် ဒဏ်ရာ ရရှိခဲ့ပါတယ်။
ဓာတ်ပုံ - မြို့လုလင်အသင်း /ကရုဏာတွဲလက်အသင်း
