တိုင်ဖွန်း ရာဂါဆာ တရုတ်တောင်ပိုင်းသို့ဝင်ရောက်၊ ထိုင်ဝမ်တွင် ၁၄ ဦး သေဆုံး
--------------------------------
အင်အားပြင်း တိုင်ဖွန်းမုန်တိုင်း ရာဂါဆာ (Ragasa) သည် စက်တင်ဘာ ၂၄ ရက်က တရုတ်နိုင်ငံ တောင်ပိုင်း ကွမ်တုံပြည်နယ် ကုန်းတွင်းပိုင်းသို့ ဝင်ရောက်ခဲ့ရာ လေပြင်းတိုက်ခတ်မှု၊ မိုးသည်းထန်စွာ ရွာသွန်းမှုများနှင့် လှိုင်းကြီးမှုများ ဖြစ်ပေါ်ခဲ့သလို ထိုင်ဝမ်တွင်လည်း ၁၄ ဦးထက်မနည်း သေဆုံးခဲ့သည်။
အဆိုပါ မုန်တိုင်းသည် လူဦးရေသန်းနှင့်ချီနေထိုင်သည့် ကွမ်တုံပြည်နယ်သို့ တစ်နာရီလျှင် လေတိုက်နှုန်း ၁၄၅ ကီလိုမီတာ (မိုင် ၉၀) အထိ အရှိန်အဟုန်ဖြင့် တိုက်ခတ်ဝင်ရောက်ခဲ့ရာ ယန်ကျန်းမြို့၌ အပျက်အစီးများစွာ ဖြစ်စေခဲ့သည်။
ကွမ်တုံပြည်နယ်သို့ မဝင်ရောက်မီ နာရီအနည်းငယ်အလိုက လူဦးရေထူထပ်သော ဟောင်ကောင်မြို့ကို ဖြတ်ကျော်ခဲ့ပြီး အနောက်မြောက် ပစိဖိတ်ဒေသတွင် ယခုနှစ်အတွင်း အပြင်းထန်ဆုံး မုန်တိုင်းအဖြစ် မြို့တော် မိုးလေဝသဌာနက သတ်မှတ်ခဲ့သည်။
ရာဂါဆာမုန်တိုင်း ထိုင်ဝမ်သို့ ဖြတ်သန်းသွားချိန်တွင် ဟွာလျန်ခရိုင် အရှေ့ပိုင်း၌ သက်တမ်းကြာမြင့်ပြီဖြစ်သည့် ရေကာတာကန်တစ်ခု ပွင့်ထွက်ခဲ့ရာ ၁၄ ဦး ထက်မနည်း သေဆုံးပြီး ၄၆ ဦး ဒဏ်ရာရရှိခဲ့သည်။
