ထိုင်းနိုင်ငံရောက်မြန်မာနိုင်ငံသားများ ထိုင်းနှင့် ကမ္ဘောဒီးယား နယ်စပ်ဒေသသို့ ခရီးသွားလာခြင်းကို ရှောင်ရှားရန်သတိပေး
ထိုင်းနှင့် ကမ္ဘောဒီးယား နှစ်နိုင်ငံနယ်စပ်ဒေသတွင် အပြန်အလှန်ပစ်ခတ်မှုများ ဖြစ်ပေါ်နေခြင်းကြောင့် ထိုင်းနိုင်ငံရောက်မြန်မာနိုင်ငံသားများနှစ်နိုင်ငံနယ်စပ်ဒေသသို့ ခရီးသွားလာခြင်းကို ရှောင်ရှားရန် ဘန်ကောက်ရှိ မြန်မာသံရုံးက သတိပေးထားသည်။
ထိုင်းနှင့် ကမ္ဘောဒီးယား နှစ်နိုင်ငံနယ်စပ်ဒေသတွင် အပြန်အလှန်ပစ်ခတ်မှုများ ဖြစ်ပေါ်လျက်ရှိပြီး နယ်စပ်ဒေသတွင် နေထိုင်လျက်ရှိသည့် ပြည်သူများအား အန္တရာယ်ကင်းရာသို့ ရွေ့ပြောင်းရန် သတိပေးလျက်ရှိကြောင်း ထုတ်ပြန်ချက်အရ သိရသည်။
ထိုင်းနှင့် ကမ္ဘောဒီးယား နှစ်နိုင်ငံတို့သည် မြန်မာနိုင်ငံနှင့် ချစ်ကြည်ရင်းနှီးသည့် နိုင်ငံများဖြစ်ကြပြီး အာဆီယံအဖွဲ့ဝင်နိုင်ငံများလည်း ဖြစ်သည်။
မြန်မာနိုင်ငံအနေဖြင့် နှစ်နိုင်ငံကြား လက်ရှိဖြစ်ပေါ်လျက်ရှိသည့် ပြဿနာများကို ငြိမ်းချမ်းစွာဖြေရှင်းနိုင်မည်ဟု ယုံကြည်ရပ်တည်ထားကြောင်း၊ သို့ဖြစ်ရာ ထိုင်းနိုင်ငံရောက် မြန်မာနိုင်ငံသားများအနေဖြင့် ထိုင်းနှင့် ကမ္ဘောဒီးယား နယ်စပ်ဒေသသို့ ခရီးသွားလာခြင်းကို ရှောင်ရှားကြရန်နှင့် နှစ်နိုင်ငံအကြား ဖြစ်ပေါ်နေသည့် ပဋိပက္ခများအကြား မလိုလားအပ်သည့် ဖြစ်ရပ်များဖြစ်ပေါခြင်း မရှိစေရန် မိမိတို့၏ လုံခြုံရေးကို သတိပြုကြရန် အသိပေး နှိုးဆော်ထားသည်။
