🇨🇿 ချက်နိုင်ငံ (Czech Republic) အကြောင်း တစေ့တစောင်း 🇨🇿
ခြူးက ချက်နိုင်ငံမှာ ပညာသင်ကြားတယ်လို့ ပြောရင် တော်တော်များများက ချက်နိုင်ငံ ဆိုတာကို မကြားဖူး ကြပါဘူး။ အချို့ မြန်မာပြည်က လူကြီးတွေကတော့ ချက်ကိုဆလိုဗက်ကီးယားလားလို့ မေးကြတယ်။ ဒါလဲ မဟုတ်သေးပါဘူး။ ဒီပိုစ့်လေး ဖတ်ပြီးသွားရင်တော့ စာဖတ်သူတွေ ချက်နိုင်ငံ ဘယ်မှာ ရှိတယ်၊ ဘာလို့ ကျောင်းသားတွေ ချက်နိုင်ငံ မှာ ပညာသင်ကြား ကြတယ်ဆိုတာကို နားလည် သိရှိသွားကြမယ်လို့ ယုံကြည်ပါတယ်။
ချက်နိုင်ငံ၏ တည်နေရာ
___________________
- ချက်နိုင်ငံ ဟာ ဥရောပတိုက် အတွင်းမှာ တည်ရှိပါတယ်။ သူဟာ ဥရောပ အလယ်ပိုင်း (Central Europe) မှာ တည်ရှိပြီး ခရီးသွား အများစုက အရှေ့ဥရောပ (East Europe) မှာ ရှိတယ်လို့ မှားယွင်းစွာ ယူဆလေ့ ရှိပါတယ်။
- ချက်နိုင်ငံရဲ့ အိမ်နီးချင်း နိုင်ငံများကတော့ ဂျာမနီ (Germany)၊ ပိုလန် (Poland)၊ ဆလိုဗက်ကီးယား (Slovakia) နဲ့ ဩစတြီးယား (Austria) နိုင်ငံတို့ ဖြစ်ကြပြီး အကုန်လုံးက အတော်လှပတဲ့ နိုင်ငံတွေ ဖြစ်ကြပါတယ်။
- ပရာ့ (Prague) မြို့ဟာ ချက်နိုင်ငံရဲ့ မြို့တော်ဖြစ်ပါတယ်။ ပရာ့မြို့ကနေ ဆိုရင် အထက်ပါ နိုင်ငံများကို ၂နာရီ ကနေ ၄နာရီလောက် ရထားစီးရုံနဲ့ ရောက်သွား နိုင်ပါတယ်။ ဒါကြောင့်မို့ ကျောင်းသား တော်တော်များများက ဒီလို အချက်အချာကျတဲ့ ပရာ့မြို့ကနေ weekend trips တွေ စီစဉ်ပြီး ခရီးထွက်ရတာ ကို အတာ် သဘောကျကြ ပါတယ်။
ချက်လူမျိုးများ
____________
- ချက်နိုင်ငံမှာ လူပေါင်း ၁၀သန်းကျော်ကျော်သာ ရှိပါတယ်။ အဲဒီ့အတွက်ကြောင့် လူရှုပ်ရှုပ်ယှက်ယှက် မရှိဘဲ ကျောင်းသားတွေ စာအေးအေးဆေးဆေး ဖတ်နိုင်သလို နိုင်ငံရဲ့ လုံခြုံရေး အညွှန်းကိန်း (Global peace index) က ကမ္ဘာ့ ထိပ် နံပါတ် ၁၀မှာ ရှိပါတယ်။
- ရောက်ခါစ ကျောင်းသား တော်တော်များများက ချက်လူမျိုးတွေကို အေးတိအေးစက် ဖြစ်တယ်၊ နိုင်ငံခြားသားတွေကို မဖော်ရွေဘူးလို့ ထင်မိကြပါတယ်။ အဲဒါဘာလို့လဲဆိုတော့ ဒီကလူကြီး တော်တော်များများက အရင် ကွန်မြူနစ် အစိုးရ ခေတ်တုန်းက နိုင်ငံခြားသားတွေ ကျောင်းလာတက်တာ၊ အလုပ်လာလုပ်ကြတာ မကြုံဖူး ခဲ့ကြပါဘူး။ အဲဒါကြောင့် ဒီက လူကြီးတွေဟာ အင်္ဂလိပ်စာ မနားလည်ကြသလို နားလည်တဲ့ သူကလဲ ပြောရမှာ ဝန်လေးတတ်ကြပါတယ်။ အဲဒီတော့ ကျောင်းသားများ ချက်စာကို အနည်းငယ် သင်ယူပြီး ချက်လို နှုတ်ဆတ်တတ်ရင်တောင်မှ သူတို့က အတော်သဘောကျ ကြပါတယ်။
ချက်နိုင်ငံမှာ နေတဲ့ စရိတ်စက
_______________________
- ချက်နိုင်ငံတွေက တက္ကသိုလ် တွေရဲ့ ကျောင်းစရိတ်က UK တို့ USA တို့နဲ့ ယှဉ်ရင် ၅ဆလောက်အထိ သက်သာပါတယ်။ ပညာရေးကတော့ EU Standard နဲ့ ညီမျှပါတယ်။ ချက်မှာ ကျောင်းပြီးရင် သူ့နိုင်ငံ အတွင်း အလုပ်ဆက်လုပ်နိုင်သလို အခြား ဥရောပနိုင်ငံတွေမှာလဲ သူတို့ဘာသာစကား ပြောတတ်ရင် အလုပ်သွားလုပ်လို့ ရပါတယ်။
- ချက်မှာ တခြား ဥရောပနိုင်ငံ တွေလို ယူရို (Euro) မသုံးပါဘူး။ ချက်ကိုရိုနာ (Czech Koruna = Czech crowns = Czk) ကိုသုံးကြပါတယ်။ အဲဒါကြောင့် သူ့ရဲ့ အိမ်နီးချင်း နိုင်ငံတွေနဲ့ ယှဉ်ရင်တောင် နေစရိတ်စားစရိတ်က ပို သက်သာနေပါတယ်။
- Student discount အကြောင်း။ ချက်နိုင်ငံရောက်ရင် အသက် ၂၆နှစ်အောက် ကျောင်းသားတိုင်း International Student Identity Card (ISIC) ကို တက္ကသိုလ် အသီးသီးက ထုတ်ပေးကြပါတယ်။ ချက်မှာ တစ်မြို့နဲ့ တစ်မြို့ ကူးမယ်ဆိုရင် ကားနဲ့ သွားမလား၊ ရထားနဲ့ သွားမလား၊ ဘစ်ကားနဲ့ သွားမလား အကုန်ရှိပါတယ်။ ISIC နဲ့ ဆိုရင် ၇၅% အထိစျေးလျှော့ ပေးပါတယ်။ နောက်ပြီး စာအုပ်ဆိုင်တိုင်းက ၁၀% အမြဲ စျေးလျှော့ပေးပါတယ်။ electronic ဝယ်ရင်လဲ သုံးလို့ရလို တချို့ စားသောက်ဆိုင်တွေကလဲ ISIC အတွက် အထူးပရိုမိုးရှင်းတွေ အမြဲပေးထား ပါတယ်။
အထက်ပါ အကြောင်းအရာတွေကြောင့် ချက်နိုင်ငံကို လာတဲ့ ကျောင်းသားတိုင်းက ဒီမှာ ပညာသင်ရတာကို ဘဘောကျကြပါတယ်။ ဒါ့ကြောင့် မြန်မာပြည်မှာ ရှိတဲ့ ညီငယ် ညီမငယ်များကလဲ နိုင်ငံခြားပညာ သင်မယ် ဆိုရင် UK, US, Australia, Japan စတဲ့နိုင်ငံ တွေချည်း စိတ်ထဲ မထားပဲ ချက်နိုင်ငံကိုလဲ ထည့် စဉ်းစား ကြဖို့ တိုက်တွန်း လိုပါတယ်။
ဒီပိုစ့်လေးကို ဖတ်ပြီး ချက်နိုင်ငံမှာ ပညာသင်ကြားဖို့ စိတ်ဝင်စားတယ်၊ ထပ်ပြီး သိချင်တယ် ဆိုရင် Like & share လုပ်ပြီး ခြူးရဲ့ Czech-in with Chyuu page လေးကို support လုပ်ပေးပါ။ စာဖတ်သူများ အားလုံးကို ကျေးဇူးတင် ပါတယ်။ ❤️
