◾️ပါရီမြို့ နာမည်ကျော် လူဗားပြတိုက်မှအဖိုးမဖြတ်နိုင်သောရတနာများကိုဓားပြများ ရဲတင်းစွာ ခိုးယူ
ပါရီမြို့ နာမည်ကျော် လူဗားပြတိုက်မှ အပေါ်ထပ်ပြ တင်းပေါက်တစ်ခုကို ကရိန်းကားအသုံးပြု၍ ရိုက်ခွဲပြီးနောက် မျက်နှာပါအုပ်ထားသော ခေါင်းစွပ်များနှင့်သူခိုးများက ပြင်သစ်နန်းစဉ်ရတနာများ ထားရှိသောအပိုင်းမှ ပစ္စည်းများကို ခိုးယူပြီး ဆိုင်ကယ်များနှင့် ထွက်ပြေးသွားခဲ့ကြကြောင်း တာဝန်ရှိသူများက ပြောကြားကြသည်။
၂၀၂၄ ခုနှစ် က လည်ပတ်သူ ၈ ဒသမ ၇ သန်းကို ဆွဲဆောင်နိုင်ခဲ့ပြီး မိုနာလီဆာပန်းချီကားကဲ့သို့ အနုပညာပစ္စည်းများကို စုဆောင်းပြသထားသည့် ကမ္ဘာကျော်ပြတိုက်တွင် ရင်း နှီးမြုပ်နှံ မှု နည်းပါးခြင်းနှင့်ပတ်သက်၍ အရာရှိများက သ တိပေးမှုများလုပ်ဆောင်ထားပြီးဖြစ်သောနေရာ၌ ဖြစ်ပေါ်ခဲ့သော အနုကြမ်းစီးမှုကြောင့် ပြတိုက်လုံခြုံရေးအပေါ် မေးခွန်းထုတ်မှုများ ထွက်ပေါ်လာစေခဲ့သည်။
“ လူဗားပြတိုက်ကိုမှာ ကျူးလွန်ခဲ့တဲ့ ခိုးယူမှုက ကျွန်တော်တို့ရဲ့ သမိုင်းဖြစ်လို့ ကျွန်တော်တို့ တန်ဖိုးထားတဲ့အမွေကို တိုက်ခိုက်တာဖြစ်ပါတယ်။” ဟု ပြင်သစ်သမ္မတ အီမန်နျူရယ်မက်ခရွန်က ပြောကြားပြီး ခိုးယူခံရသောပစ္စည်းများကို ပြန်ရအောင်လုပ်ပြီး ကျူးလွန်သူများကို အပြစ်ပေးသွားမည်ဟု ၎င်းကဆက်ပြောသည်။
ပြတိုက်ဖွင့်လှစ်ပြီးချိန် နံနက် ၉ နာရီ ခွဲတွင် သူခိုးများက လှုပ်ရှားခဲ့ပြီး Galerie d'Apollon အဆောက်အဦ ထဲသို့ ဝင်ရောက်ခဲ့ကြောင်း ပါရီအစိုးရရှေ့နေ လော်ရာဘက်ကော က BFM TV အား ပြောကြားသည်။
ဓားပြမှုက ခြေက်မိနစ်၊ ခုနှစ်မိနစ်ခန့်သာ ကြာမြင့်ခဲ့ပြီးလက်နက်ကိုင်မထားသော်လည်း သံဖြတ်စက်များ ကိုင်ဆောင်ထားသောသူ လေးဦးက ကျူးလွန်ခဲ့ကြောင်း ၊ သူခိုးများက ပစ္စည်းကိုးခုကို အဓိကပစ်မှတ်ထားခဲ့ပြီး ရှစ်ခုအမှန်တကယ်ခိုးယူခံခဲ့ရကြောင်း ၊ နပိုလီယံ (၃) ဘုရင်၏ မိဖုရား ယူဂျင်း၏ သရဖူကိုမူ သူခိုးများထွက်ပြေးစဉ် ကျန်ရစ်ခဲ့ကြောင်း ရှေ့နေ လော်ရာက ပြောကြားသည်။
အဆိုပါ သရဖူသည် ယူရိုသန်းပေါင်းများစွာ တန်ဖိုးရှိပြီး အရေးအကြီးဆုံးပစ္စည်းဖြစ်ကြောင်း Drouot လေလံကုမ္ပဏီဥက္ကဌ အလက်ဆန်းဒါးဂျီကယ်လိုက ရိုက်တာသတင်းအားပြောကြားသည်။
သူခိုးတစ်ဦးက ရောင်ပြန်စွပ်ကျယ်ကို ဝတ်ဆင်ခဲ့ပြီး ယင်းစွပ်ကျယ်ကို စုံစမ်းစစ်ဆေးရေးမှူးများက ရရှိခဲ့သည်။
ဓားပြများက ထွက်ပြေးစဉ် ၎င်းတို့အသုံးပြုခဲ့သော ကရိန်းကို မီးရှို့ရန် ကြိုးစားခဲ့သော်လည်း မအောင်မြင်ခဲ့ကြောင်း ရှေ့နေ လော်ရာက ဆိုသည်။
ဓားပြမှုများဖြေရှင်းရာတွင် အောင်မြင်မှုရာခိုင်နှုန်းမြင့်မားသည့် ရဲတပ်ဖွဲ့ အထူးယူနစ်တစ်ခုကို ယင်း အမှုူအားကိုင် တွယ်ခိုင်းသွားမည်ဟု ပြည်ထဲရေးဝန်ကြီး လောရင့်နူနက်ဇ် က ပြောကြားသည်။
တစ်မှုထူးခြားသော အကြောင်းများကြောင့် ပြတိုက်ကို တစ်နေ့လုံး ပိတ်ထားမည်ဖြစ်ကြောင်း ကမ္ဘာပေါ်တွင် လာရောက်လည်ပတ်သူအများဆုံး ရရှိနေသော လူဗားပြတိုက်အဖွဲ့ က လူမှုကွန်ရက် X ပေါ်တွင် ပြောကြားသည်။
ယင်းပြတိုက်တွင်ထားရှိသော မိုနာလီဆာ ပန်းချီကားကို ၁၉၁၁ ခုနှစ်က ဝန်ထမ်းဟောင်းတစ်ဦး ပါဝင်ပတ်သက်သော ဓားပြမှုတွင် ခိုးယူခံခဲ့ရဖူးပြီး နောက် နှစ် နှစ်အကြာတွင်မှ ယင်းပန်းချီကားကို ပြန်လည်ရရှိခဲ့ကြောင်း သိရသည်။
သတင်း-ရဲမင်း
ကိုးကား-REUTERS
#နိုင်ငံတကာသတင်း
