အာဆင်နယ်ကို ချန်ပီယံလိဂ်အမှတ်ပေးဇယားထိပ်ဆုံးသို့ ပို့ဆောင်ပြီး စံချိန်သစ် ရေးထိုးလာတဲ့ မာတင်နယ်လီ
=====================
အာဆင်နယ်ဟာ ကလပ်ဘရုဂျက်အား သက်တောင့်သက်သာဖြင့် အနိုင်ယူကာ ချန်ပီယံလိဂ်အမှတ်ပေးဇယားထိပ်ဆုံးသို့ တက်လှမ်းလာခဲ့ပြီး ဂါဘရီရယ်မာတင်နယ်လီမှာလည်း သမိုင်းဝင်ညတစ်ည ပိုင်ဆိုင်လာပါတယ်။
ဘရာဇီးတိုက်စစ်သမားဟာ Jan Breydel Stadium ပွဲစဉ်ရဲ့ ဒုတိယပိုင်းတွင် အာဆင်နယ်အတွက် ဂိုးသွင်းယူပြီး သမိုင်းမှတ်တိုင်သစ် စိုက်ထူခဲ့တာလည်း ဖြစ်ပါတယ်။
အာဆင်နယ်ဟာ မနေ့ညတုန်းက ကလပ်ဘရုဂျက်နှင့်ပွဲတွင် နိုနီမာဒူကီရဲ့ သွင်းဂိုး ၂ ဂိုး၊ မာတင်နယ်လီရဲ့ ၁ ဂိုးဖြင့် ၃-၀ ဖြင့် သက်တောင့်သက်သာဖြင့် အနိုင်ရခဲ့ပါတယ်။
ဒါပေမယ့် မာတင်နယ်လီဟာ ယင်းဂိုးကြောင့် အာဆင်နယ်သမိုင်းတွင် ချန်ပီယံလိဂ် ၅ ပွဲဆက် ဂိုးသွင်းနိုင်တဲ့ ပထမဆုံးကစားသမားဖြစ်လာပါတယ်။
သူဟာ ကလပ်ဘရုဂျက်နှင့်ပွဲမတိုင်မီ ဘီလ်ဘာအို၊ အိုလံပီယာကို့စ်၊ အက်သလက်တီကို၊ ဘိုင်ယန်မြူးနစ်တို့နှင့် ပွဲစဉ်တွေမှာလည်း ဂိုးသွင်းထားနိုင်ပါတယ်။
မာတင်နယ်လီဟာ ၂၀၀၀ ခုနှစ် ဧပြီလတုန်းက သီယာရီဟင်နရီက ယူအီးအက်ဖ်အေဖလားပြိုင်ပွဲ ၆ ပွဲဆက် ဂိုးသွင်းနိုင်ပြီးနောက် ဥရောပပြိုင်ပွဲတွင် ၅ ပွဲဆက် ဂိုးသွင်းနိုင်တဲ့ ပထမဆုံး အာဆင်နယ်ကစားသမားလည်း ဖြစ်ပါတယ်။
မာတင်နယ်လီဟာ ယခုရာသီ ပြိုင်ပွဲအရပ်ရပ်တွင် ၆ ဂိုးသွင်းထားပြီး ယင်းမှ ၅ ဂိုးကို ပရီးမီးယားလိဂ်တွင် သွင်းထားပါတယ်။
အာဆင်နယ်ဟာ ဘယ်လ်ဂျီယံနိုင်ပွဲကြောင့် ၃ မှတ်ဖြတ်ပြီး ချန်ပီယံလိဂ်အမှတ်ပေးဇယားထိပ်ဆုံးမှာ ရပ်တည်နေပါတယ်။
မီခေးလ်အာတီတာရဲ့ အာဆင်နယ်ဟာ နောက်ထပ် ချန်ပီယံလိဂ်ပွဲစဉ်အဖြစ် ဆန်စီရိုသို့ သွားရောက်ကာ အင်တာမီလန်နှင့် ရင်ဆိုင်ရမှာ ဖြစ်ပြီး ရှုံးထွက်အဆင့်ပွဲစဉ်မတိုင်မီ နောက်ဆုံးပွဲအဖြစ် ကိုင်ရက်အယ်မာတီနှင့် ရင်ဆိုင်ရပါမယ်။
