ယောချောင်းရေလျှံ၍ ပေါက်နယ် ရွာ ၃ ရွာက စပါးခင်းများ ပျက်စီး
ဧရာဝတီ၊ စက်တင်ဘာ ၂၆၊ ၂၀၂၅
ချင်းတောင်တန်းတွင် မြစ်ဖျားခံစီးဆင်းသည့် ယောချောင်း မိုးကြီးပြီးရေလျှံမှုကြောင့် မကွေးတိုင်း ပေါက်မြို့နယ် ရေယဥ်၊ ဇီးဖြူကုန်း၊ သဖန်းချောက်ကျေးရွာမှ စပါးခင်းများနှင့် လယ်ယာမြေများ ရေတိုက်စားပျက်စီးကုန်ကြောင်း ဒေသခံများထံမှ သိရသည်။
ယခုရက်ပိုင်းအတွင်း ရာဂါဆာတိုင်ဖွန်းမုန်တိုင်းအရှိန်ကြောင့် နိုင်ငံတဝန်းလုံး မိုးထစ်ချုန်းရွာပြီး မိုးကြီးသဖြင့် ယောချောင်း ရေလျှံခဲ့ခြင်းဟု သိရသည်။
“မိုးဆက်တိုက်ရွာ ချောင်းရေတိုး ရေလျှံပြီး စပါးခင်းတွေကို တိုက်ဖြိုကုန်တာ။ ကျနော်တို့ ပေါက်နယ်ထဲမှာတော့ ဒီ ၃ ရွာ ဖြစ်တယ်လို့ ကနဦးသိရတယ်။ ဒီနေ့မနက်ထိ ရေတိုက်စားလို့ စပါးခင်းတွေ ဧက ၃၀ ထက်မနည်း ပျက်စီးသွားပြီ။ အခုထိလည်း ချောင်းရေက စီးနေဆဲပဲ။ ဒီနှစ်မိုးလယ်တုန်းက မိုးခေါင်တော့ မြေပဲတွေ ခွက်ခွက်လန်အောင် ရှုံးခဲ့ကြတယ်။ အခု နှောင်းမိုးကောင်းပြန်တော့ စိုက်ခင်းလေးတွေ ဖြစ်မယ်ရှိသေး ချောင်းရေလျှံပြီး ကမ်းဖြိုခံရပြန်ရောဗျာ” ဟု ဒေသခံတဦးက ပြောသည်။
ပြီးခဲ့သည့်နှစ်ကလည်း ယောချောင်းရေလျှံခဲ့ရာတွင် ပေါက်မြို့နယ်အတွင်းမှ စစ်ဘေးရှောင် သားအမိနှစ်ဦး မျောပါ သေဆုံးခဲ့သလို ပေါက်နယ် ယောချောင်းဘေးရှိ ရေယဉ်ရွာသည် ဩဂုတ် ၂၀ ရက်၌ စစ်တပ်စစ်ကြောင်းထိုးပြီး နေအိမ် ၃၂ လုံး မီးရှို့ဖျက်ဆီးခံထားရသည်။
ယောချောင်း (ယောမြစ်)သည် ချင်းပြည်နယ် နတ်မတောင် အမျိုးသားဥယျာဉ်အတွင်း မင်းတပ်မြို့နယ်၏ အနောက်မြောက် ဘက် မိုင် ၂၀ ခန့်အကွာ ရှောင်သာရွာအနီး၊ ရွှန်းလောင်းချောင်းနှင့် အခြားချောင်းငယ်များ ပေါင်းဆုံရာမှ ဖြစ်ပေါ်လာသည့် ရေစီးသန်သော ချောင်းတခုဖြစ်ပြီး ဧရာဝတီမြစ်၏ မြစ်လက်တက်တခုလည်း ဖြစ်သည်။
ဒေသခံတဦးက “မင်းတပ်က ချောင်းဖျားပေါ့။ ဆိပ်ဖြူမှာ ဧရာဝတီနဲ့ သွားပေါင်းတယ်။ ချောင်းဘေးတလျောက် ကပ်လျက် ရွာတွေလည်း တော်တော်များတယ်။ တချို့ရွာတွေကျ ချောင်းဘေးကပ်လျက် မဟုတ်ပေမယ့် စိုက်ခင်း၊ လယ်ယာမြေတွေ က ချောင်းဘေးမှာ။ အခု စိုက်ခင်းပျက်တဲ့ရွာတွေက ချောင်းဘေးမဟုတ်တော့ ရွာတော့မထိဘူး။ ချောင်းရေလျှံပြီး ရွာတွေ မှာ ကမ်းပြိုတာတွေ ရှိတယ်လို့သိရတယ်” ဟု ပြောသည်။
ယောချောင်းသည် မင်းတပ်၊ ကျောက်ထု၊ ပေါက်၊ ပခုက္ကူ၊ ဆိပ်ဖြူမြို့နယ်များကို ဖြတ်သန်းစီးဆင်ပြီး ချောင်းဘေးကပ် လျက် ရွာများအဖြစ် မင်းတပ်မြို့နယ်တွင် ရှောင်ထရွာ၊ ကျောက်ထုမြို့နယ်တွင် အနိမ့်၊ ကွန်ခင်း၊ ပေါက်တော၊ ငှက်ချောင်း၊ ကျင်လိန်ရွာ၊ ပေါက်မြို့နယ်တွင် အုန်းတောတောင်စု၊ စံဖဲ၊ သမားတော်၊ ပြင်ချောင်း၊ နံ့သာ၊ ကျောင်းကုန်း၊ နတ်စင်ကုန်းရွာ၊ ပခုက္ကူမြို့နယ်တွင် ဂဝံလေးတိုင်၊ စညောင်ရွာ၊ ဆိပ်ဖြူမြို့နယ်တွင် အင်းကန်၊ သံပုရာပင်၊ ရွာမ၊ ကပိုင်၊ ဒေါသာ၊ ပင်းတလဲ၊ မယ်ဇလီကွေ့၊ ချောင်းမကြီး၊ တူရွင်းမျောရွာများ ဖြတ်သန်းစီးဆင်းကြောင်း သိရသည်။
ကပ္ပလီပင်လယ်ပြင်နှင့် ဘင်္ဂလားပင်လယ်အော်တွင် မုတ်သုံလေအားကောင်းနေခြင်း၊ လေထုမငြိမ်မသက်မှုများ ဖြစ်ပေါ် လာနိုင်ခြင်းနှင့်အတူ တောင်တရုတ်ပင်လယ်ပြင်၌ ဖြစ်ပေါ်နေသော တိုင်ဖွန်းမုန်တိုင်း “ရာဂါဆာ” မှ ပြတ်ထွက်လာသော တိမ်တိုက်များကြောင့် ယနေ့မှစ၍ စက်တင်ဘာ ၃၀ ရက်ထိ မိုးသည်းထန်ရွာသွန်းပြီး မိုးကြီးနိုင်သည်ဟု စစ်ကော်မရှင် လက်အောက်ခံ မိုးလေဝသနှင့် ဇလဗေဒညွန်ကြားမှုဦးစီးဌာနက ထုတ်ပြန်ထားသည်။
