Part-2
*အဖွင့်များ
ဒုတိယသမ္မတအယ်လ်ဂိုးလ်ကို ရုပ်မြင်သံကြား၌ တွေ့ ရသည့်အခါ တင်းတင်းမာမာရှိသည်ဟု မြင်ကြသည်။ ကျွန်တော်ကမူ ထိုသို့မမြင်ပေ။ သူ့ကိုတက်ကြွ စိတ်အားထက်သန်သည့်သူဟု မြင်သည်။ သူ့ကိုတင်းမာခက် ထန်သည်ဟု မြင်သူများပင်လျှင် သူငယ်ငယ် ကျောင်းသားဘဝက အကြောင်းများ၊ သူ့အဖေ တက်နက်ဆီပြည်နယ်က ဆီနိတ်တာအမတ် ဖြစ်စဉ်က အကြောင်းများကို ပြန်မေးကြည့်လျှင် သူသည် တက်ကြွ စိတ်အား ထက်သန်သည့် သူတစ်ယောက်အဖြစ် မြင်ကြလိမ့်မည်။ သူကလေးများအကြောင်းကို ပြောကြည့်ပါ။ ထိုအခါ သူသည် ရင်းနှီးနွေးထွေးစွာရှိပြီး အလွန်လူသားဆန်သည့် အယ်လ်ဂိုးဖြစ်နေသည်ကို တွေ့ ရမည် ။ ထိုအကြောင်းအရာများကို ပြောခြင်းဖြင့် ဒုတိယသမ္မတနှင့် အောင် အောင်မြင်မြင် စကားစတင်နိုင်သည်။ သူနှင့် စကားပြောဆိုရာတွင် အချိ အများကြီးပြောနိုင်သည့် နိုင်ငံရေးဆိုင်ရာ အကြောင်းအရာများရှိသည်။ သို့သော် သူနှင့်အရင်းနှီးဆုံး အကြောင်းအရာက စတင်ပြောဆိုခြင်းအားဖြင့် သူသည် ပို၍ရင်းရင်းနှီးနှီးဖြစ်လာမည်။ အခြားသူများလည်း ထို့အတူပင် ဖြစ်သည်။
သင်သည် ပါတီပွဲတစ်ခု၌ ရောက်နေသည့်အခါ ထိုပါတီပွဲကပင်လျှင် စကားပြောစရာ အကြောင်းတစ်ခုဖြစ်သည်။ ကျွန်တော့်မိတ်ဆွေ သူငယ်ချင်း များ ကျွန်တော့်အတွက် အသက် ၆ဝ ပြည့် မွေးနေ့အခမ်းအနား ကျင်းပသည့် အခါ သူတို့က ထိုမွေးနေ့ကို လယ်ရီကင်း၏ ၁၀ နှစ်မြောက်မွေးနေ့ အကြိမ် ၅ဝ မြောက်ဟုခေါ်ပြီး ၁၉၄၀ ပြည့်လွန်နှစ်များက ဘရုကလင်းအကြောင်း ရေးဖွဲ့ထားသည့် သီချင်းတစ်ပုဒ်ကို ဆိုကြသည်။ ထိုညက စကားဝိုင်းတွင် လွမ်းစရာအကြောင်းများကို ပြောကြသည်။ တစ်ခါတစ်ရံ၌ နောက်ခံ အခြေ အနေက စကားပြော၍ကောင်းသော အခြေအနေမျိုးကို ဖြစ်စေနိုင်သည်။ ထိုညက ပါတီပွဲကို အိမ်ဖြူတော်၏တစ်ဖက်ရှိ သမိုင်းဝင်ဒီကေတာ ဟောက်(စ်)၌ ကျင်းပရာ ထိုအကြောင်းအရာကိုလည်း လူအများက စိတ်ဝင် စားစွာ ဆွေးနွေးနေသည်ကိုလည်း တွေ့ ရသည်။
အကယ်၍သင်သည် အခြားတစ်ယောက်၏အိမ်၌ သို့မဟုတ် ရုံး၌ ပါတီပွဲသွား၍တက်ခဲ့လျှင် ပရိဘောဂများ၊ အမှတ်တရပစ္စည်းများ အကြောင်း ကို အိမ်ရှင်က စိတ်လိုလက်ရ ပြောပြလိမ့်မည်။ ရင်ပြင်နီ၌ ရိုက်ထားခဲ့သော ဓာတ်ပုံတစ်ပုံရှိကောင်းရှိမည်။ ထိုသို့တွေ့လျှင် ရုရှားသို့သွားသည့် ခရီး အကြောင်းမေးပါ။ နံရံပေါ်၌ မင်ဖြင့်ရေးဆွဲထားသော ပန်းချီကားတစ်ချပ် ရှိကောင်းရှိမည်။ ထိုပန်းချီကားကို သူ၏သားသမီး သို့မဟုတ် သူ၏မိသားစု ထဲက တစ်ယောက်ယောက် မည်သူရေးဆွဲသည်ကို မေးကြည့်နိုင်သည်။
#ဆက်ရန်ရှိ
