ဘဝမှာ ကောင်းမွန်တဲ့အရာတွေကို ပိုင်ဆိုင်ဖို့ ပေးချေရမယ့် တန်ကြေးက အတွေးတိုင်းအပေါ်မှာ တာဝန်ယူခြင်းပါ ။
ပျော်ရွှင်ခြင်းရဲ့လျှို့ဝှက်ချက်က သင် နှစ်သက်တဲ့အရာတွေကို တွေ့အောင် ရှာဖွေပါ ။ ပြီးရင် အဲဒီအရာပေါ်မှာ
သင့်ရဲ့စွမ်းအင်တွေ အကုန် ပုံအပ်လိုက်ပါ ။
အခြားသူတစ်ယောက်ရဲ့ စိတ်ကူးအိပ်မက်တွေအကြောင်း
တွေးလိုက်တိုင်း သင့်ရဲ့စိတ်ကူးအိပ်မက်တွေကို အကောင်အထည်ဖော်ဖို့ သင့်မှာ ရှိတဲ့အချိန်တွေ ပဲ့ပါသွားတယ်ဆိုတာ မမေ့ပါနဲ့ ။
လူအချို့ထက် ပိုပြီးထက်မြက်နေခြင်း သာလွန်ခြင်းမှာ မြင့်မြတ်ခြင်းဆိုတာ မရှိဘူး ။ တကယ်မြင့်မြတ်ခြင်းဆိုတာ
ကိုယ့်ကိုယ်ကိုယ် အမြဲကောင်းမွန်အောင် ကြိုးစားခြင်းမှာသာ တည်ရှိတယ် ။
သင့်ဘဝရဲ့ အကန့်အသတ်တွေဆိုတာ သင် ကိုယ်တိုင် ချမှတ်ထားတဲ့အရာတွေပါ ။ ဘဝမှာ အရေးမပါတဲ့ အရာတွေကို No လို့ ပြောရဲခြင်းဟာ ဘဝမှာ အရေးပါတဲ့ အရာတွေကို Yesလို့ ပြောဖြစ်အောင် အကူအညီပေးတယ် ။
ကိုယ်ချင်းစာတရား နဲ့ အကြင်နာတရားရှိခြင်းဟာ လူတစ်ယောက်ကို ပိုမိုပြီးပြည့်စုံစေတယ် ။
ဒီစာအုပ်ကို ဖတ်မိလိုက်တာ နောင်တရတယ် ။ သိနေတာကြာပြီ ခုမှ ဖတ်မိရလေခြင်းဆိုတဲ့ အဖတ်နောက်ကျလေခြင်းဆိုတဲ့ နောင်တမျိုးပါပဲ ။
ဖာရာရီလမ်းခွဲ တဲ့ ။ စာအုပ်နာမည်လေးက ကဗျာဆန်ဆန်လေးပါပဲ ။ နာကြင်ဖွယ် လမ်းခွဲတစ်ခုခုကို ရည်ရွယ်ပြီး ရေးသားထားတဲ့ ဝတ္ထုလို့ တွေးထင်စရာပေါ့ ။
ကျနော်လည်း အရင်က ဒီလိုပဲ ထင်ထားခဲ့တာပါ ။ ဖတ်ကြည့်လိုက်တော့မှာ ကိုယ် ထင်ထားတာနဲ့ လုံးဝ ကွဲလွဲနေကြောင်းသိလိုက်ရတယ် ။ အို.. ဖာရာရီလမ်းခွဲဆိုတာ
နာကျင်စရာ တစ်စုံတစ်ခုနဲ့ လမ်းခွဲခြင်းကို ရေးသားထားတာမှမဟုတ်ဘဲ ပျော်ရွှင်ဖို့ အောင်မြင်ဖို့ အတွက်
အကောင်းဆုံး ဆေးနည်းတစ်ခု ဘဝအဓိပ္ပါယ်အစစ်ကို တွေ့ရစေမယ့် စိတ်ရဲ့သော့ချက်တစ်ခုကို လမ်းညွှန်ထားတဲ့ စာအုပ်ကောင်းတစ်အုပ် ဖြစ်နေပါတယ် ။
နိုင်ငံကျော် ထိတ်ထိတ်ကြဲ ရှေ့နေကြီး ဂျူလီယန်မန်တဲလ် ဆိုတဲ့လူတစ်ယောက်ဟာ စည်းစိမ်ဥစ္စာတွေ အောင်မြင်မှုတွေ နဲ့ လူတိုင်း လိုချင်မက်မောစရာတွေကိုပိုင်ဆိုင်ပြီး လိုလေသည်မရှိ ပြည့်စုံတဲ့ဘဝတစ်ခုကို ရရှိထားခဲ့တယ် ။ ငွေကြေးဥစ္စာတွေ ရာထူးစည်းစိမ်တွေနဲ့
ပြည့်ပြည့်စုံစုံနေရပေမယ့်လည်း အသက် ၅၃ နှစ်အရွယ် ဂျူလီယန်ဟာ အသက် ၇၀ အရွယ် အဖိုးအိုတစ်ယောက်လို အိုစာနေခဲ့တယ် ။ သူ့အလုပ်ရဲ့ ဖိစီးမှုကြောင့် စိတ်ပိုင်းဆိုင်ရာရော ရုပ်ပိုင်းဆိုင်ရာပါ ထိခိုက်ပျက်စီးတာတွေ ရှိလာတာပေါ့ ။ တစ်နေ့ ဂျူလီယန်ဟာ သူ့အလုပ်ဖြစ်တဲ့ တရားရုံးအတွင်းမှာပဲ နှလုံးထဖောက်ပြီး လဲကျသွားခဲ့တယ် ။ ဒီမတိုင်ခင်ကမှ စိတ်ဒဏ်ရာတစ်ခုကိုလည်း သူ ရနေခဲ့တယ် ။ နောက်ဆုံး သူ့အလုပ်ကိုတောင် စွန့်လွှတ်လိုက်ရတယ် ။ ဒီလိုနဲ့ ဂျူလီယန်ဟာ သူပိုင်ဆိုင်သမျှတွေကို ရောင်းချပြီး ရှေးဟောင်း ယဥ်ကျေးမှု ရှေးဟောင်းအလေ့အထတွေပေါတယ် ။ အိန္ဒိယကို ထွက်ခွာခဲ့တယ် ။ ဒီနောက် ဟိမဝန္တာတောနက်ထဲမှာရှိတဲ့ သူတော်စင်ကြီးတွေနဲ့ဆုံပြီး ဘဝရဲ့အဓိပ္ပါယ်ကို ရှာတွေ့သွားခဲ့တယ် ။ တကယ်အောင်မြင်တဲ့ဘဝ တကယ်စစ်မှန်တဲ့ပျော်ရွှင်မှုကို ဘယ်လိုယူရသလဲဆိုတဲ့အချက်ကို
ပိုင်ပိုင်နိုင်နိုင် သိသွားခဲ့တယ် ။
အရာရာတိုင်းဟာ အကြောင်းမဲ့ဖြစ်ခဲ့ကြတာ မဟုတ်ဘူး
ဘဝမှာ ဖြစ်ပျက်သမျှအရာတိုင်းမှာ အကြောင်းပြချက်ရှိပြီး ကျရှုံးမှုတိုင်းမှာလည်း သင်ခန်းစာယူစရာတွေ ကိန်းဝပ်နေပါတယ် ။ ဘယ်လိုကျရှုံးမှုပဲဖြစ်ဖြစ် ကျရှုံးမှုတိုင်းဟာ လူတစ်ယောက် တိုးတက်ဖို့ အမြဲအသုံးဝင်ပါတယ် ။ ပြီးဆုံးသွားတဲ့ အတိတ်တွေအတွက် ဘယ်တော့မှ နောင်တမရပါနဲ့ ။ အဲဒီအစားအတိတ်ဟာ ကိုယ့်ကို ဘဝအကြောင်းသင်ပေးနေတဲ့ ဆရာတစ်ယောက်အဖြစ်သာ စိတ်ထဲသတ်မှတ်ထားပါ ။
ဒါကတော့ ဂျူလီယန်ကို သူတော်စင်တစ်ယောက်
ပြောခဲ့တဲ့စကားပေါ့ ။ စိတ်ဆိုတာ အကောင်းဆုံးအစေခံပါ ။ ဒါပေမယ့် အဆိုးရွားဆုံး သခင်လည်း ဖြစ်နေတတ်တယ် ။ ဒါက ဂျူလီယန် ပြောခဲ့တဲ့စကားပါပဲ ။
ဆရာမိုးရှင်းရဲ့ ဖာရာရီလမ်းခွဲ ဆိုတဲ့ ဒိီစာအုပ်လေးဟာ သေချာတာကတော့ တစ်ခါဖတ်ပြီး မေ့ပစ်ရမယ့်စာအုပ်မဟုတ်ပဲ အကြိမ်ကြိမ်ပြန်ဖတ်ပြီး စွဲမြဲနေရမယ့်စာအုပ်ကောင်းလေးတစ်အုပ်ပါပဲ ။ ဒီစာအုပ်ထဲမှာပါတဲ့ အကြောင်းအရာတွေ အလေ့အကျင့်တွေ နည်းလမ်းတွေဟာ ကျနော်တို့ လျှောက်လှမ်းနေတဲ့ ဘဝမှာ စစ်မှန်တဲ့အောင်မြင်မှုတွေ စိတ်ချမ်းသာပျော်ရွှင်မှုတွေကို ရှာတွေ့ဖို့ အကောင်းဆုံး အထောက်အကူ ဖြစ်စေပါတယ် ။
#ဖာရာရီလမ်းခွဲ
#themonkwhosoldhisferrari
#မိုးရှင်း
