တိုင်ထောင်ပဲစိုက်ပျိုးနည်း-တိုင်ထောင်ပဲ 💥ပဲတောင့်ရှည်တွင် အပင်ရှည်မျိုးကို တိုင်ထောင်ပြီးအ စိုက်များကြပါတယ်။ အတောင့်အရောင်က အစိမ်းနု၊ အစိမ်းရင့်၊ အနီရောင်ဆိုပြီး အမျိုးမျိုးကွဲပြား ပါတယ်။ အစေ့အရောင်က အဖြူ၊ အနက်၊ အနီရောင်နဲ့ အဖြူအနီရောတဲ့ အရောင်ဆိုပြီးတော့လည်း အမျိုးမျိုး ရှိပါတယ်။
ကြိုက်နှစ်သက်သော ရေ၊ မြေ၊ ရာသီဥတု
တိုင်ထောင်ပဲဟာ သဲမြေမှ မြေစေးအထိ မြေအမျိုးမျိုးမှာ စိုက်ပျိုးနိုင်ပါတယ်။ အလွန်ချဉ်တဲ့မြေတွေမှာ ကောင်း ကောင်းမဖြစ်ထွန်းနိုင်ပါ။ စိုက်ပျိုးဖို့ အကောင်းဆုံး မြေချဉ်ငန်ဓာတ်ကတော့ (၆-၇)အတွင်းဖြစ်ပါတယ်။
အပူချိန် (၁၀)ဒီဂရီစင်တီဂရိတ်အောက်မှာ သီးပွင့်မှုကို လျော့နည်းစေပြီး ရာသီဥတုအရမ်းပူ ဒါမှမဟုတ် မိုး အရမ်းများရင်လည်း အပွင့်အသီးကို ကြွေစေပါတယ်။ အသင့်တော်ဆုံးအပူချိန်ကတော့ (၁၅-၂၂)ဒီ ဂရီ စင်တီဂရိတ်အတွင်းဖြစ်ပါတယ်။
မျိုးစေ့နှုန်းထား
ချုံပုတ်မျိုး (၄၀-၄၅)ကီလိုဂရမ်/ ဧက
တိုင်ထောင်မျိုး (၁၂-၁၅)ကီလိုဂရမ်/ဧက
မြေပြုပြင်ခြင်း
ထယ် (၂) စပ်၊ ထွန်(၂)စပ်နဲ့ ထွန်းရေးအသင့်အတင့်ကောင်းရင် စိုက်ပျိုးနိုင်ပါတယ်။ ရေမဝပ်တဲ့မြေကို ရွေးချယ်စိုက်ပျိုးရမှာ ဖြစ်ပါတယ်။
မြေသြဇာထည့်သွင်းအသုံးပြုခြင်း
တစ်ဧကအတွက် နွားချေးလှည်း (၅-၁၀)စီး၊ ယူရီးယား (၁၀၀)ကီလို၊ တီစူပါ (၅၀)ကီလို၊ ပိုတက်ရှ် (၂၅)ကီလို ထည့်ရမှာဖြစ်ပါတယ်။ နွားချေး၊ တီစူပါ၊ ပိုတက်ရ်ှနဲ့ ယူရီးယား(၅၀)ကီလိုကို မစိုက်ခင် မြေခံထည့်ပြီး ကျန်တဲ့ ယူရီးယား (၅၀)ကီလိုကိုတော့ ပေါင်းလိုက်၊ မြေဆွချိန်မှာ ထည့်သွင်းပေးရမှာဖြစ်ပါတယ်။ လုပ်အားတတ်နိုင်ရင် မျိုးစေ့ချချိန်မှာ ဓာတ်မြေသြဇာတွေကို အစေ့ပတ်ပတ်လည်(၃)လက်အကွာမှာ ချပေးရမှာဖြစ်ပါတယ်။ မဂ္ဂနီစီ ယမ်နဲ့ သွပ်ဓာတ်ချို့တဲ့ရင် အသီးမှာ ပရိုတင်းပါဝင်မှုကို လျော့နည်းစေနိုင်ပါတယ်။ မဂ္ဂနီစီယမ်ဓာတ် လိုအပ်ရင် အပင်ရဲ့အောက်ပိုင်းအရွက်ရဲ့နှုတ်ခမ်းပတ်ပတ်လည်မှာ အဝါရောင်ပြောင်းလာတာကို တွေ့ရနိုင်ပါတယ်။
မျိုးစေ့ချခြင်း
မျိုးစေ့ချတဲ့အခါ အစိုဓာတ်များလွန်းရင် အစေ့ပုပ်သွားတတ်ပါတယ်။ တိုင်ထောင်ပဲကို အများအားဖြင့်တစ်တန်းနဲ့ တစ်တန်း (၃)ပေခြားပြီး တစ်ပင်နဲ့တစ်ပင် (၉-၁၂)လက်မခွာပြီး စိုက်ပျိုးရပါတယ်။ စိုက်ပျိုးပြီး အပင် (၂)ပတ် သားမှာ (၇)ပေခန့်ရှည်တဲ့ ဝါးတိုင်ဒါမှမဟုတ် ကိုင်းတန်တွေကို အပင်ခြေမှာ နွယ်တိုင်တက်နိုင်ဖို့ ထောင်ပေး ရပါတယ်။
ဝါးရှားတဲ့ဒေသမှာ တိုင်ထောင်ပဲကို သက်ကြီးပြောင်းဖူးမျိုးနဲ့ ရောပြီး စိုက်ပျိုးကြပါတယ်။
ချုံပုပ်မျိုးကို တစ်တန်းနဲ့တစ်တန်း (၁)ပေခွဲမှ (၂)ပေထိခြားပြီး တစ်ပင်နဲ့တစ်ပင် (၁)ပေခွာပြီး စိုက်ပျိုးရပါတယ်။ ရာသီဥတုသင့်တင့်တဲ့ ဒေသမှာ ရေရှိရင် ပဲ(၂)မျိုးလုံးကို တစ်နှစ်ပတ်လုံး စိုက်ပျိုးနိုင်ပါတယ်။
အပင်ပြုစုစောင့်ရှောက်ခြင်း
အပင်ပေါက်စုံတာနဲ့ ပေါင်းမြက်တွေကို နှိမ်နင်းပေးရပါမယ်။ အထူးသဖြင့် တိုင်ထောင်ပဲဟာ သက်တမ်းပိုရှည်တဲ့ အတွက်ပေါင်းကို ကြိုတင်ပြီး မနှိမ်နင်းထားနိုင်ရင် နောက်ပိုင်းတိုင်ထောင်ပြီးရင် ပေါင်းနှိမ်ရခက်ခဲနိုင်ပါတယ်။ ပဲပင်ရဲ့အမြစ်မှာ နိုက်ထရိုဂျင်ဖမ်းယူနိုင်တဲ့ ဘက်တီးရီးယားတွေရှိနေတာကြောင့် အမြစ်တွေကို မထိခိုက်အောင် သတိပြုဖို့လိုပါတယ်။
ရေသွင်းခြင်း
ပဲပင်ဟာ ခြောက်သွေ့တဲ့ရာသီဥတုဒဏ်ခံနိုင်ရည်ရှိပေမယ့် ရက်အတော်ကြာခြောက်သွေ့ရင် ရေသွင်းပေးဖို့ လိုအပ်ပါတယ်။ မိုးရာသီမှာ စိုက်ရင် ရေနုတ်မြောင်းလုပ်ထားပေးဖို့လိုပါတယ်။
ခူးဆွတ်ခြင်း
ပန်းပွင့်ပြီး (၇-၁၀)ရက်ခန့်ကြာတဲ့အခါ ပဲသီးတွေကို စတင်ခူးဆွတ်နိုင်ပါတယ်။ တစ်ဧကမှ သီးတောင့် (၁၅၀၀၀၀-၂၀၀၀၀၀) အထိ ထွက်နိုင်ပါတယ်။
မျိုးစေ့ထုတ်လုပ်ခြင်း
မျိုးစေ့ထုတ်လုပ်ဖို့အတွက် ရိတ်သိမ်းချိန် မိုးလွတ်ရင် အကောင်းဆုံးဖြစ်ပါတယ်။ အပင်ပေါ်မှာ အသီးတွေ ခြောက်လာမှ ခူးရမှာဖြစ်ပါတယ်။ မိုးရာသီမှာ မျိုးစေ့ထုတ်မယ် ဆိုရင် အစေ့ကို ကြိုတင်ခြွေပြီး ခြောက်သွေ့ အောင်နေပူလှန်းပြီးမှ ထုပ်ပိုးသိုလှောင်သင့်ပါတယ်။ ပဲမျိုးစေ့တွေကို သိုလှောင်တဲ့အခါ ပိုးထိုးတတ်တဲ့အတွက် ထုံးနဲ့ရောမွှေပြီး သိမ်းဆည်းသင့်ပါတယ်။
