တစ်ရက်က ကျွန်မတို့ Cosmo ဆိုတဲ့ ဘူဖေးဆိုင်မှာ သွားစားကြတော့…စားပွဲတစ်ခုမှာ..လူတွေဟာ..အစားအသောက်တွေ တောင်ပုံယာပုံ ယူထားတာကို မြင်ရတော့..စိတ်ထဲ သူတို့ကိုယ်စား ရှက်မိသလိုလို ခံစားလိုက်ရပါတယ်..။ ဘူဖေးစားပြီဆို လူတွေဟာ လောဘစိတ်တွေ အလိုလို ဝင်လာတတ်ပါတယ်..။ ငါပေးထားရတာနဲ့ တန်အောင်စားမယ်..ဆိုတဲ့လောဘအတွေးနဲ့ ပန်းကန်ထဲ ကုန်ကုန်မကုန်ကုန် အပြည့်အမောက်အလျှံကြီး ထည့်ယူလာတတ်ပါတယ်..။ ပြီးတော့ ကုန်အောင်မစားနိုင်တော့ဘဲ..ပန်းကန်ထဲမှာ ဟိုကျန်ဒီကျန်နဲ့ အလေအလွင့်တွေ ဖြစ်ရတာဟာ..ဆိုင်ရှင်ဘက်ကကြည့်ရင်..နစ်နာပါတယ်..။
ကျွန်မလည်း ဟိုးအရင်က ဘူဖေးစစားကာစတုန်းကဆို…ပန်းကန်ထဲ စားချင်တာတွေ ဟိုထည့်ဒီထည့် ထည့်ပြီး..ပြည့်လျှံနေတတ်တာကို ရှက်ရကောင်းမှန်းမသိခဲ့ပါဘူး…။ စားပြီးမကုန်တော့မှ တစ်သျှူးလေးတွေနဲ့ ဖုံးပြီးချန်ထားခဲ့ဖူးပါတယ်…။ အခုပြန်တွေးကြည့်မှပဲ…ရှက်ဖို့ကောင်းမှန်းသိပါတယ်..။ လူတွေရဲ့ သဘောက သူများမှားတာကိုသာ..မြင်နိုင်တာ..လက်ညှိုးထိုးဖို့လွယ်တာဖြစ်ပြီး..ကိုယ့်အမှားကိုတော့ မြင်ဖို့..သတိထားမိဖို့ တော်တော်ခက်ပါတယ်…။ အခုတော့ ဘူဖေးစားရင်..ကိုယ်ကြိုက်တာလေးကိုပဲ နည်းနည်းစီ ကုန်နိုင်သလောက်သာထည့်..လိုမှထပ်ဖြည့်ပြီးစားပါတယ်..။ သိသာတာက ဟိုးအရင်ကလို လောဘတကြီး မထည့်တော့တဲ့အတွက်..လိပ်ပြာလုံစွာ ခံစားလာရပါတယ်…။
လောဘရဲ့သဘာဝဟာ..တကယ်ရှက်ဖို့ကောင်းတာမို့..ကျွန်မတို့ လောဘမကြီးမိအောင် ရှက်တတ်ဖို့သင်ယူရမှာဖြစ်ပါတယ်..။ တချို့ဆို...သူများရဲ့ပစ္စည်းတွေကို လိမ်ညာလှည့်စားပြီး ယူတတ်တာကို ရှက်ရကောင်းမှန်းတောင် တွေးမိမယ်မထင်ပါဘူး..။ ဆွေမျိုးသားချင်းအချင်းချင်း အမွေတွေ လုယူလိုက်တာမျိုး…သူတစ်ပါးရဲ့ မိသားစုကလေးကို ဖျက်ဆီးဖြိုခွင်းပြီးမှ…ကိုယ်လိုချင်တဲ့လူကို အရယူလိုက်တာမျိုးဟာ…ကျူးလွန်နေတဲ့သူအဖို့တော့..သူလုပ်တာ မှန်နေတယ်လို့ပဲ ထင်ချင်ထင်နေမှာပါ..။ သူ့ရဲ့လုပ်ရပ်ဟာ..ရှက်စရာကောင်းမှန်း…သူ မသိတာလား..မသိချင်ယောင်ဆောင်နေသလားဆိုတာ..သူကိုယ်တိုင်ပဲ သိပါလိမ့်မယ်…။
လောဘစိတ်ဟာ..သူတစ်ပါးအပေါ် ကိုယ်ချင်းစာနာစိတ်ကင်းမဲ့သွားပြီး…ကိုယ်တစ်ယောက်တည်း ရဖို့အတွက်..ဘယ်သူဘာပဲဖြစ်ဖြစ် ချနင်းပစ်လိုက်ဖို့ ဝန်မလေးတော့ပါဘူး…။ ကိုယ့်စိတ်မှာ လောဘဖြစ်နေတယ်ဆိုရင်..သိလိုက်ဖို့ အရေးကြီးပါတယ်..။ ငါ လောဘဖြစ်နေပြီ..လျှော့မှ..လို့ ကိုယ့်ကိုယ်ကိုယ် သတိပေးနိုင်ရပါမယ်..။ ဒီတစ်ဘဝစာကလေးအတွက်..ဒီလောက်လောဘကြီးနေဖို့ မလိုအပ်ပါဘူး..။ သေတဲ့အခါ..အကုန်လုံးထားရစ်ခဲ့ရပြီး…လက်ဗလာနဲ့ ပြန်ထွက်သွားရမှာပါ..။ ကိုယ်လုပ်ခဲ့တဲ့ ကုသိုလ်..အကုသိုလ်တရားတွေပဲ..ကိုယ်နဲ့အတူတူယူဆောင်သွားရမှာဖြစ်ပါတယ်..။ ဒါကြောင့်..သူတစ်ပါးဘဝပျက်ဆီးသွားစေလောက်အောင်..ကြောက်စရာကောင်းတဲ့ လောဘစိတ်မျိုးဝင်လာရင် ရှက်တတ်ဖို့ သင်ယူပါ…။
#လွန်းထားထား
#ရှက်တတ်ဖို့သင်ယူပါ
Credit to owner
