အမြင့်တက်လာတဲ့ ယစ်ထုတ်လေး Carlos Prates
ဒီနှစ်အတောအတွင်းမှာ တဟုန်ထိုးနာမည်ကြီးလာတဲ့ ဘရာဇီးဖိုက်တာကို မိတ်ဆက်ပါဦးမယ်။ နာမည်က Carlos Prates တဲ့။ အရင်က မွေထိုင်းထိုးသလို ကစ်ဘောက်ဆင်လည်း ကစားတယ်။ မွေထိုင်းထိုးမယ်ဆိုတော့ ထိုင်းနိုင်ငံအထိ ပြောင်းလာပြီး Phuket Fight Club မှာ လေ့ကျင့်ခဲ့တာပါ။
Carlos Prates က ဘရာဇီးဖိုက်တာဆိုတော့ BJJ Black Belt ရထားတာ အငြင်းပွားဖွယ်မရှိပါဘူး။ Grappling ကစားသလို မွေထိုင်းလည်း လေ့ကျင့်ပါသေးတယ်။ အစောပိုင်းမှာ MMA သီးသန့်ထိုးတာပါ။ နောက်ပိုင်းတော့ ထိုင်းနိုင်ငံမှာ မွေထိုင်းကစားပါတယ်။ MMA နဲ့ မွေထိုင်းပြိုင်တူထိုးတယ်လို့တောင် ပြောနိုင်ပါတယ်။
မွေထိုင်းပွဲမှာ Carlos Prates က Diesellek ကို ပထမအချီမှာ အလဲထိုးဖူးတယ်။ Diesellek ဆိုတာက မြန်မာပရိသတ်တွေ ရင်းနှီးပြီးသားဖြစ်ပြီး နာမည်ကျော်မွေထိုင်းဖိုက်တာပါ။ ၂၀၁၈ ခုနှစ်မှာ ကျင်းပခဲ့တဲ့ MLWC ပြိုင်ပွဲမှာ Diesellek က Dave Leduc ကို ရှုံးဖူးတယ်။
Carlos Prates နဲ့ Dave Leduc တို့လည်း ဖူးခက်မြို့မှာ မွေထိုင်းထိုးဖူးတယ်။ Dave Leduc ရဲ့ Range Control က အလုပ်ဖြစ်ခဲ့ပြီး အနိုင်ရခဲ့ပါတယ်။ ကိုယ့်အမြင်တော့ တော်တော်ကြည့်ကောင်းပါတယ်။ Dave Leduc နဲ့ Carlos Prates တွဲဆိုင်းကို စိတ်ဝင်စားရင် ဒီမှာ bit.ly/4iEKAxQ ကြည့်ပါ။
Carlos Prates က ONE Warriors Series ပြိုင်ပွဲမှာလည်း ဝင်ထိုးဖူးတယ်။ ONE Championship အတွက် လက်ရည်စစ်တာပါ။ ကိုဗစ်နောက်ပိုင်းမှာ ONE Championship က ONE Warriors Series ပြိုင်ပွဲကို ဆက်မကျင်းပတော့တာမို့ Carlos Prates လည်း ရှေ့ဆက်မရောက်လိုက်ဘူး။
၂၀၂၁ ခုနှစ်နောက်ပိုင်းမှာ Carlos Prates က မွေထိုင်းဆက်မထိုးတော့ဘဲ MMA သီးသန့်ပဲ ကစားပါတော့တယ်။ နိုင်ပွဲဆက်လာပြီး Dana White's Contender Series မှာ ဝင်ပြိုင်ခွင့်ရလာတယ်။ Mitch Ramirez ကို အလဲထိုးပြီး UFC Contract ရလိုက်ပါတယ်။
တကယ်ဆိုရင် Carlos Prates က UFC အဖွဲ့အစည်းကို ဒီနှစ်ရောက်မှ ပွဲထွက်ခွင့်ရတာပါ။ ပွဲဦးထွက်မှာတင် Trevin Giles ကို အလဲထိုးပြီး အပိုဆုကြေးရလိုက်တယ်။ Charles Radtke ကိုလည်း အလဲထိုးတာပါပဲ။ အပိုဆုကြေးက အဆင့်သင့်ပါပဲ။ Carlos Prates ကို ပိုထင်ရှားသွားစေတာက Li Jingliang ကို အလဲထိုးနိုင်လိုက်မှပါ။
နောက်ဆုံးပွဲမှာ Carlos Prates က Neil Magny ကို ပထမအချီမှာတင် အလဲထိုးလိုက်ပါတယ်။ Neil Magny မှာလည်း သတိလစ်သွားရတယ်။ တော်တော်နာမည်ကြီးသွားပါတယ်။ Carlos Prates က UFC အဖွဲ့အစည်းမှာ (၄) ပွဲကစားထားပြီး (၄) လုံးကို အလဲထိုးနိုင်ထားသလို အပိုဆုကြေး (၄) ပွဲတောင် ရထားတယ်။ ပွဲဦးထွက်ကစားသမားအတွက် တော်တော်ကြမ်းလို့ Debut of the Year ဆုတောင် ရသွားနိုင်တယ်။
Carlos Prates က UFC Welterweight Ranking မှာ အဆင့် (၁၃) ဖြစ်နေပြီ။ အားသားချက်က ပြီးခြေပြီးလက်ရှိတာပါ။ ဒူး၊ တံတောင်၊ ခြေလက်တွေက အလဲထိုးနိုင်တာပါ။ ဘယ်သန်ကစားသမားဖြစ်ပြီး လက်တံ (၇၈) လက်မတောင် ရှိတာမို့ အတော်မလွယ်တဲ့ ကစားသမားပါ။ Grappling Skill လည်း တန်းမြင့်မြင့်မှာရှိနေပါတယ်။
Tai Tuivasa တို့ ဖိနပ်ထဲ ဘီယာထည့်သောက်တာ Carlos Prates က ရယ်ချင်သေးတယ်။ LFA 154 ပြိုင်ပွဲမှာ Eduardo Ramon ကို အလဲထိုးပြီး Carlos Prates က သံဇကာပေါ်တက်လိုက်တယ်။ သံဇကာပေါ်မှာတင် ဝီစကီပုလင်းကို ကောက်မော့တာပါ။ ရေမရောဘဲ သောက်နိုင်တာ တော်ရုံယစ်ထုတ်မဟုတ်ဘူး။ ကြေးစားရလဒ်က (၂၁) ပွဲနိုင်ပြီး (၆) ပွဲရှုံးထားတယ်။ ပွဲမရှုံးတာ (၅) နှစ်ကျော်ပြီ။ (၁၆) ပွဲကို အလဲထိုးထားတာပါ။
Carlos Prates က စီးကရက်စွဲနေတယ်။ (၁၂) နှစ် (၁၃) နှစ်သားတည်းက သောက်လာတာတဲ့။ ကိုဗစ်အတောအတွင်းမှာ ပွဲမရှိတော့ မလေ့ကျင့်ဖြစ်ဘဲ ဆေးခြောက်သောက်တယ်တဲ့။ ဆေးခြောက်ကို သိပ်မကြိုက်တော့ စီးကရက်ပဲ ပြန်သောက်ပါတယ်တဲ့။ အခုဆိုရင် တစ်နေ့မှာ (၈) လိပ် ဒါမှမဟုတ် (၁၀) လိပ်လောက် သောက်ပါတယ်။ ပွဲမထိုးခင်မှာ စီးကရက်ဖွာလိုက်ရမှ နေသာထိုင်သာရှိတာတဲ့။ အရက်သောက်တယ်၊ စီးကရက်လည်း သောက်ပါတယ်။ တော်တော်ကို မလွယ်တဲ့ ဖိုက်တာပါပဲ။ Jack Della Maddalena ကို စိန်ခေါ်ထားတယ်။ ဘယ်လောက်ထိ တက်လာမလဲ စောင့်ကြည့်ဦးမယ်။
