ယခုနှစ်အကုန်တွင် ရှက်ဖီးလ်ဝင်းနက်စ်ဒေးအား ပိုင်ရှင်သစ်ထံ လွဲပြောင်းနိုင်မယ်လို့ စီမံအုပ်ချုပ်မှုအဖွဲ့ ကြေညာလာ
======================
ရှက်ဖီးလ်ဝင်းနက်စ်ဒေးရဲ့ ပူးတွဲ စီမံအုပ်ချုပ်ရေးအဖွဲ့က အသင်းကို ဝယ်ယူရေးအတွက် ရင်းနှီးမြှပ်နှံသူ လေးဖွဲ့၊ ငါးဖွဲ့ရဲ့ ကမ်းလှမ်းမှု ရရှိထားပြီး ယခုနှစ်ကုန်ပိုင်းတွင် အသင်းကို ပိုင်ရှင်သစ်ထံ လွဲပြောင်းပေးနိုင်တော့မှာ ဖြစ်ကြောင်း အတည်ပြုလာပါတယ်။
သောကြာနေ့တုန်းက ပိုင်ရှင်ဒီဖုန်းချန်ဆီရီက ချန်ပီယံရှစ်ကလပ်အား စီမံအုပ်ချုပ်မှုလက်အောက်သို့ ဝင်ရောက်ရန် ဆုံးဖြတ်ခဲ့ပြီးနောက် ခရစ်ဝစ်ဖီးလ်က ပိုင်ရှင်သစ်ရှာဖွေနေပါတယ်။
ဝစ်ဖီးလ်က ရှက်ဖီးလ်ဝင်းနက်စ်ဒေးမှာ EFL စည်းမျဉ်းအရ ဈေးကွက်အတွင်းတွင် ၂၈ ရက်တိုင် ရှိနေမှာ ဖြစ်ပြီး ကောင်းမွန်တဲ့ ကမ်းလှမ်းမှုများ ရရှိထားကြောင်း အတည်ပြုလာပါတယ်။
ဒါ့အပြင် ဝစ်ဖီးလ်က ပိုင်ရှင်သစ်များက လာမယ့် ဇန်နဝါရီ အပြောင်းအရွှေ့ဈေးကွက်တွင် ကစားသမားသစ်များ ဝယ်ယူအားဖြည့်ပေးလာဖို့ မျှော်လင့်ကြောင်းလည်း ဆိုသွားပါတယ်။
ဝစ်ဖီးလ်က အသင်းအား ဝယ်ယူရေး ကမ်းလှမ်းမှုများကို လာမယ့်လတွင် ဆန်းစစ် ရွေးချယ်လာမှာ ဖြစ်ပြီး နှစ်မကုန်မီ အရောင်းအဝယ်အပြီးသတ်သွားမယ်လို့ ဆိုထားပါတယ်။
ရှက်ဖီးလ်ဝင်းနက်စ်ဒေးပရိသတ်များဟာ ဘဏ္ဍာရေးအကြပ်အတည်းကြားထဲသို့ ရောက်နေတဲ့ ကလပ်ရဲ့ စနေနေ့တုန်းက ပွဲကို ကွင်းလုံးပြည့်လာရောက်အားပေးကာ ကလပ်ရဲ့ အမှတ်တရစတိုးမှလည်း ပစ္စည်းများ ဝယ်ယူကာ ကလပ်ကို ငွေကြေးအားဖြည့်မှု ပြုလုပ်ခဲ့ကြပါတယ်။
ယခင်တုန်းက ရှက်ဖီးလ်ပရိသတ်များဟာ ကလပ်ရဲ့ပွဲများကို လာမကြည့်ဘဲ သပိတ်မှောက်လာခဲ့ကြတာပါ။
စီမံအုပ်ချုပ်ရေးအဖွဲ့ဟာ ပရိသတ်များရဲ့ အားပေးမှုကြောင့် ပေါင် ၅ သိန်းကျော်အထိ ရရှိကာ ကလပ်ကို အခက်အခဲကာလအတွင်း စီမံနိုင်လာကြပါတယ်။
