ကျပ်ငွေစက္ကူတချို့ ဖျက်သိမ်းဖွယ်ရှိကြောင်း ကောလာဟလ ဖြန့်ဝေသူတွေကို အရေးယူမယ်
တရားဝင် ထုတ်ဝေထားတဲ့ ကျပ်ငွေစက္ကူတချို့ ဖျက်သိမ်းဖွယ်ရှိကြောင်း ကောလာဟလ ဖြန့်ဝေသူတွေကို ထိရောက်တဲ့ အရေးယူမှုတွေ ပြုလုပ်သွားမယ်လို့ မြန်မာနိုင်ငံတော် ဗဟိုဘဏ်က မနေ့ နိုဝင်ဘာက ၁၀ ရက်မှာ သတိပေးချက် ထုတ်ပြန်လိုက်ပါတယ်။
လူမှုကွန်ရက် စာမျက်နှာပေါ်မှာ လက်တလော ထွက်ပေါ်နေတဲ့ သတင်းတွေအရ မြန်မာ့ငွေစက္ကူတချို့ ဖျက်သိမ်းနိုင်ဖွယ် ရှိနေတဲ့အပြင် အသစ်တွေ အစားထိုးဖွယ် ရှိနေပြီး ဘဏ်တွေလည်း ပိတ်သိမ်းတော့မှာဖြစ်တဲ့အကြောင်း သတင်းမှားတွေ ဖြန့်ဝေမှုတွေ ရှိနေတယ်လို့ သိရပါတယ်။
ဒါကြောင့် ဗဟိုဘဏ်အနေနဲ့ လက်ရှိမှာ သတင်းမှားတွေ ဖြန့်ဝေနေတဲ့ လူပုဂ္ဂိုလ်တွေ၊ Page နဲ့ Group တွေရဲ့ Admin တွေကို တည်ဆဲဥပဒေတွေနဲ့အညီ အရေးယူနိုင်ဖို့အတွက် တရားဥပဒေစိုးမိုးရေး အဖွဲ့အစည်းတွေနဲ့ ပူးပေါင်း ဆောင်ရွက်လျက်ရှိတယ်လို့ သိရပါတယ်။
“ဒီကိစ္စတွေနဲ့ ပတ်သက်ပြီး ပြည်သူလူထု အမှန်အတိုင်း သိရှိစေဖို့ ဗဟိုဘဏ် ဝက်ဘ်ဆိုက်မှာလည်း ရှင်းလင်း ဖော်ပြခဲ့ပြီးဖြစ်ပါတယ်။ ဒါက နိုင်ငံတော်ရဲ့ စီးပွားရေး ဖွံ့ဖြိုးတိုးတက်မှုကို မလိုလားတဲ့သူတွေ၊ ငွေရေးကြေးရေးဈေးကွက် တည်ငြိမ်ရေးကို မလိုလားတဲ့သူတွေ တမင် လူမှုကွန်ရက်ပေါ်ကနေ ဖျက်လို့ဖျက်စီးသဘောမျိုး သတင်းမှားတွေ ဖြန့်နေတာပါ။ ဒါတွေကို ထိထိရောက်ရောက် အရေးယူသွားဖို့ ရှိပါတယ်” လို့ ဗဟိုဘဏ်မှ တာဝန်ရှိသူတယောက်က ပြောပါတယ်။
လက်ရှိမှာ Social Media Platform Facebook Group တွေဖြစ်တဲ့ “အခေါက်ရွှေ ရောင်းသူ ဝယ်သူတိုက်ရိုက်” Public Group နဲ့ “Gold” PublicGroup စတာတွေကတဆင့် Profile အတုတွေ၊ Lock ချထားတဲ့ Profile တွေ၊ အမည်မဖော်ရဲတဲ့အတွက် Anonymous participant အမည်တွေ အသုံးပြုပြီး သတင်းမှားတွေကို ဖန်တီး ရေးသားလျက်ရှိတယ်လို့ သိရပါတယ်။
အခုလို ရေးသားမှုတွေဟာ တည်ငြိမ်လျက်ရှိတဲ့ ငွေကြေးကဏ္ဍကို ပျက်စီးစေဖို့၊ မြန်မာ့ဘဏ်လုပ်ငန်းစနစ် ကမောက်ကမဖြစ်စေဖို့၊ နိုင်ငံခြားငွေတွေအပေါ် ဈေးကစားနိုင်ဖို့နဲ့ ကုန်ဈေးနှုန်း ကြီးမြင့်စေဖို့ စတဲ့ ရည်ရွယ်ချက်တွေနဲ့ လုပ်ဆောင်နေခြင်းဖြစ်တယ်လို့ ဆိုပါတယ်။
လက်ရှိမှာ မည်သည့်ဘဏ်မှ ပိတ်သိမ်းရတဲ့ အခြေအနေ၊ ပိတ်သိမ်းဖို့အစီအစဉ် လုံးဝ မရှိတဲ့အပြင် ဗဟိုဘဏ်အနေနဲ့ ငွေစက္ကူတွေ ဖျက်သိမ်းခြင်း၊ အသစ်ထုတ်ဝေခြင်းတွေကိုလည်း ပြုလုပ်ဖို့ အစီအစဉ်မရှိဘူးလို့ ထုတ်ပြန်ချက်မှာ ရေးသားထားပါတယ်။
ဒါကြောင့် ပြည်သူတွေအနေနဲ့ မလိုလားအပ်တဲ့ ဆုံးရှုံးနစ်နာမှုတွေ မဖြစ်ပေါ်စေဖို့အတွက် ပြင်ပမှဖြန့်ဝေလျက်ရှိတဲ့ ကောလာဟလ သတင်းတွေကို ယုံကြည်မှုမရှိကြဖို့နဲ့ ဗဟိုဘဏ်မှ တရားဝင်ထုတ်ဝေထားတဲ့ ငွေစက္ကူတွေကို ယုံကြည်စိတ်ချစွာ သုံးစွဲနိုင်တယ်လို့ ဆိုပါတယ်။
ဒါအပြင် ဗဟိုဘဏ်မှ တရားဝင် ခွင့်ပြုချက်လိုင်စင် ရရှိထားတဲ့ ဘဏ်တွေ၊ ငွေရေးကြေးရေး အဖွဲ့အစည်းတွေဆီမှာလည်း ငွေကြေးနဲ့ပတ်သက်တဲ့ ဝန်ဆောင်မှုတွေဖြစ်တဲ့ ငွေအပ်နှံခြင်း၊ ငွေလွှဲပြောင်း/လက်ခံခြင်း စတဲ့ ငွေကြေး ဝန်ဆောင်မှုတွေကို ယုံကြည်စိတ်ချစွာ ရယူနိုင်တယ်လို့ ဗဟိုဘဏ်က အသိပေးထားပါတယ်။
