အိန္ဒိယက ပြည်တွင်းလုပ် ဟိုက်ပါဆိုးနစ်ဒုံးကျည် စမ်းသပ်မှုအောင်မြင်
နိုဝင်ဘာ ၁၈၊ နိုင်ငံတကာ။
အိန္ဒိယနိုင်ငံသည် ပြည်တွင်းလုပ် အသံထက်မြန်သည့် ဟိုက်ပါဆိုးနစ် တာဝေးပစ်ဒုံးကျည် တစ်စင်းကို အောင်မြင်စွာ စမ်းသပ်ခဲ့ကြောင်း အိန္ဒိယအာဏာပိုင်များက ပြောကြားခဲ့သည်ဟု ရိုက်တာမှ ဖော်ပြခဲ့သည်။
ထိုစမ်းသပ်မှုကြောင့် အိန္ဒိယသည် ခေတ်မီနည်းပညာများကို ပိုင်ဆိုင်သည့် နိုင်ငံများထဲတွင် ပါဝင်လာခဲ့ပြီး အိန္ဒိယစစ်တပ်အတွက် အထင်ကရ အောင်မြင်မှုတစ်ခု ဖြစ်လာခဲ့သည်။
ကမ္ဘာ့အင်အားကြီး နိုင်ငံများသည် အသံထက် ၅ ဆကျော် မြန်ဆန်သည့် ဟိုက်ပါဆိုးနစ် အမျိုးအစားဒုံးကျည်များ ကို ထုတ်လုပ်ရန် ကြိုးပမ်းနေကြောင်း၊ အိန္ဒိယသည်လည်း တရုတ်၊ ရုရှားနှင့် အမေရိကန်တို့နည်းတူ ဟိုက်ပါဆိုး နစ် တာဝေးပစ်ဒုံးကျည်များ ပိုင်ဆိုင်ရန် ကြိုးပမ်းလုပ်ဆောင်နေသည်။
အိန္ဒိယက စမ်းသပ်ခဲ့သည့် ဒုံးကျည်ကို နိုင်ငံပိုင် ကာကွယ်ရေးသုတေသနနှင့် ဖွံ့ဖြိုးတိုးတက်ရေးအဖွဲ့က မိတ်ဖက် ကုမ္ပဏီများနှင့်အတူ ထုတ်လုပ်ခဲ့ခြင်းဖြစ်ပြီး ကီလိုမီတာ ၁၅၀၀ (မိုင် ၉၃၀) အကွာအဝေးအထိ ပျံသန်းနိုင်စေရန် ရည်ရွယ် ထုတ်လုပ်ခဲ့ခြင်း ဖြစ်သည်ဟု အစိုးရက ထုတ်ပြန်ခဲ့သည်။
"ဒုံးကျည်ပျံသန်းမှု မှတ်တမ်းအရ တိကျမှုမြင့်မားစွာနဲ့ အောင်မြင်စွာ ပျံသန်းနိုင်ခဲ့တာကို အတည်ပြုနိုင်ခဲ့ပါတယ်" ဟု ထုတ်ပြန်ချက်တွင် ဖော်ပြခဲ့သည်။
ထိုဒုံးကျည်ကို Dr APJ Abdul Kalam ကျွန်းပေါ်မှ အိုဒစ်ရှာ (Odisha) ပြည်နယ် ကမ်းလွန်ရေပြင် အတွင်းသို့ နိုဝင်ဘာ ၁၆ ရက်က ပစ်လွှတ်ခဲ့ခြင်းဖြစ်ကြောင်း ထုတ်ပြန်ချက်တွင် ဖော်ပြခဲ့သည်။
ကာကွယ်ရေးဝန်ကြီး ရာဂျ်နက် ဆင်း (Rajnath Singh) က ထိုစမ်းသပ်မှုကို သမိုင်းဝင် အောင်မြင်မှုအဖြစ် X လူမှု မီဒီယာတွင် ရေးသားဖော်ပြခဲ့ပြီး အိန္ဒိယသည် ထိုကဲ့သို့ ခေတ်မီဆန်းပြားသည့် နည်းပညာများကို ပိုင်ဆိုင်သည့် နိုင်ငံအနည်းစုတွင် ပါဝင်လာပြီဖြစ်ကြောင်း ရေးသားခဲ့သည်။
Source: ရိုက်တာ
ပုံ - အိန္ဒိယဒုံးကျည် စမ်းသပ် ပစ်လွှတ်နေစဉ်
Credit - Myanmar International News
#သတင်းဟင်းလေးအိုးကြီး
