ဂမ်ဘီယာ၏ စွတ်စွဲချက်များကိုပယ်ချရန် မြန်မာကိုယ် စားလှယ်အဖွဲ့ခေါင်းဆောင် ICJ ၌လျှောက်လဲတောင်းဆို

လူမျိုးသုဥ်းစေမှုဖြင့် မြန်မာနိုင်ငံအား ဂမ်ဘီယာက အ ပြည်ပြည်ဆိုင်ရာတရားရုံး(ICJ)တွင် တရားစွဲဆိုထားခြင်းအား ရင်ဆိုင်ဖြေရှင်းနေသည့် မြန်မာကိုယ်စား လှယ်အဖွဲ့ခေါင်းဆောင် ပြည်ထောင်စုဝန်ကြီးဦးကိုကိုလှိုင်မှ ICJ တွင် အထက်ပါအတိုင်း လျှောက်လဲတောင်းဆိုခဲ့ခြင်းဖြစ်သည်။
ဂမ်ဘီယာကတင်သွင်းသည့် လူမျိုးသုဉ်းစေမှုတားဆီးရေးနှင့် ပြစ်ဒဏ်ပေးရေးသဘောတူစာချုပ်ဖောက်ဖျက်ကြောင်းစွပ်စွဲချက်များသည် ဥပဒေကြောင်းအရခိုင်မာမှုမရှိသည့်အပြင် အချက်အလက်ပိုင်းအရလည်း ခိုင် မာမှုမရှိ၍ ယင်း စွတ်စွဲချက်အားလုံးကိုပယ်ချပေးရန် လျှောက်လဲတောင်းဆိုခဲ့သည်။
ထို့ပြင် တရားရုံးမှ ၂၀၂၀ ပြည့်နှစ်၊ ဇန်နဝါရီ ၂၃ ရက်တွင်ချမှတ်ခဲ့သော ကြားဖြတ်စီမံဆောင်ရွက်ချက်ကို ဖောက်ဖျက်ကြောင်း ဂမ်ဘီယာကတင်သွင်းသည့် စွပ် စွဲချက်များသည်လည်း ဥပဒေကြောင်းအရ၊ အချက်အ လက်ပိုင်းအရခိုင်မာမှုမရှိ၍ ယင်း စွပ်စွဲချက်ကိုလည်းပယ်ချပေးရန် လျှောက်လဲတောင်းဆိုခဲ့သည်။
ဂမ်ဘီယာကအဆိုပြုသည့် နစ်နာကြေးပေးရန်အပြင် အခြားအဆိုပြုချက်အားလုံးသည် ဥပဒေ ကြောင်းအရ၊ အချက်အလက်ပိုင်းအရခိုင်မာမှုမရှိ၍ ဂမ်ဘီယာ၏ တောင်းဆိုချက်အားလုံးကိုပယ်ချပေးရန် မြန်မာကိုယ်စားလှယ်အဖွဲ့ခေါင်းဆောင်က လျှောက်လဲတောင်းဆိုခဲ့သည်။

အအေးဒဏ်ကြောင့်ကိဗ်ကိုတိုက်ခိုက်မှုရပ်ရန်ပူတင်သဘောတူ--ထရမ့်ပ်

မော်စကို၏ တိုက်ခိုက်မှုများကြောင့် အအေးလွန်ကဲသောကာလအတွင်း သန်းနှင့်ချီသော လူများ၏ အိမ်များ၌ အပူပေးစက်များပြတ်တောက်သွားခဲ့သဖြင့် ကိဗ်နှင့် အခြားယူကရိန်းမြို့ကြီးများအပေါ် တိုက်ခိုက်မှုများကို ရပ်တန့်ထားရန် သူ၏ ပုဂ္ဂိုလ်ရေးအရတောင်းဆိုခဲ့ခြင်းကို ရုရှားသမ္မတ ဗလာဒီမာပူတင်က သဘောတူခဲ့သည်ဟု အမေရိကန်သမ္မတ ဒေါ်နယ်ထရမ့်ပ်က ကြာသပတေးနေ့တွင် ပြောကြားခဲ့သည်။
ယူကရိန်း၏ လျှပ်စစ်ဓာတ်အား အခြေခံအဆောက်အဦ များကို ရုရှားက တိုက်ခိုက်ခဲ့မှုကြောင့် လျှပ်စစ်မီး၊ အပူပေးစနစ်နှင့် ရေထောက်ပံ့‌ ရေးစနစ်များ ပြတ်တောက်ခဲ့ပြီး အပူချိန်များထိုးကျနေသောကာလတွင် စစ်ဒဏ်ခံနေရသောနိုင်ငံသည် လူသားချင်းစာနာမှုဆိုင်ရာ အကျပ်အတည်းအသစ်ကို ရင်ဆိုင်နေရသည်။
အပစ်အခတ်ရပ်စဲမှုနှင့် ပတ်သက်၍ ခရမ္မလင်က လတ်တလောတွင် အတည်ပြုပြောကြားခြင်းမျိုးမရှိသေးသော်လည်း ယူကရိန်းသမ္မတ ဇလန်းစကီးကမူ ထရမ့်ပ်ကို ကျေးဇူးတင်ကြောင်းနှင့် တိုက်ခိုက်မှုများ ရပ်တန့်သွားရေးအတွက် ဝါရှင်တန်ကို သူ အားကိုး ယုံကြည်ကြောင်း ပြောကြားခဲ့သည်။
“အအေးဒဏ်ကြောင့်၊ အရမ်းအေးလွန်းတာကြောင့် ဒီအတောအတွင်းမှာ ကိဗ်နဲ့ မြို့ကြီး၊ မြို့ငယ်တွေကို တစ်ပတ်ကြာလောက် ပစ်တာခတ်တာတွေ မလုပ်ဖို့ သမ္မတပူတင်ကို ပုဂ္ဂိုလ်ရေးအရ တောင်းဆိုခဲ့ပါတယ်” ဟု အိမ်ဖြူတော်တွင်ပြုလုပ်သည့် အစိုးရအဖွဲ့ အစည်းအဝေးတွင် ထရမ့်ပ်က ပြောကြားခဲ့သည်။
ယခုကဲ့သို့ သော အအေးဒဏ်မျိုးကို ၎င်းတို့မကြုံဖူးခဲ့ကြကြောင်း၊ ထို့ကြောင့် ကိဗ်နှင့် အခြားမြို့များကို သီတင်းတစ်ပတ်ကြာ မပစ်ခတ်ရန် ပူတင်ကို သူ တောင်းဆိုခဲ့ကြောင်းနှင့် ပူတင်ကလည်း သဘောတူပေးခဲ့ကြောင်း ထရမ့်ပ်က ပြောဆိုခဲ့သည်။
ယူကရိန်းအာဏာပိုင်များက ဝန်ဆောင်မှုများပြန်လည်ရရှိရန် အပူတပြင်းကြိုးပမ်းလျက်ရှိပြီး လာမည့်ရက်များအတွင်း အပူချိန်သည် အနုတ် ၃၀ ဒီဂရီစင်တီဂရိတ်အထိ သိသိသာသာကျဆင်းသွားမည်ဟု ယူကရိန်း အစိုးရမိုးလေဝသအေဂျင်စီက ကြာသပတေးနေ့တွင် ပြောကြားခဲ့သည်။

ဖေဖော်ဝါရီလ ရွေးကောက်ပွဲ နာထာဖွန်း က ထိပ်ဆုံးမှရေပန်းစားနေ

ထိုင်းနိုင်ငံ၏ ပရိုဂရက်စ်ဆစ်ဗ် ပြည်သူ့ပါတီခေါင်းဆောင် နာထာဖွန်း ရောင်ပန်ယာဝပ်သည် ဇန်နဝါရီ ၃၀ ရက် သဘောထားစစ်တမ်းများတွင် ဆက်လက်ဦးဆောင်နေပြီး ဖေဖော်ဝါရီလ ၈ ရက် နေ့ရွေးကောက်ပွဲမတိုင်မီ အာဏာဆက်လက်တည်မြဲနိုင်ရန် ကြိုးပမ်းနေသော ဝန်ကြီးချုပ် အနူတင်ချန်ဗီရာကူလ် ရင်ဆိုင်နေရသည့် ပြင်းထန်သောစိန်ခေါ်မှုများကိုစစ်တမ်းများက မီးမောင်းထိုးပြနေသည်။
ဖေဖော်ဝါရီလရွေးကောက်ပွဲသည် မစ္စတာအနူတင်၏ ကွန်ဆာဗေးတစ် ဘွမ်ဂျိုင်ထိုင်းပါတီ၊ အာဏာရပါတီဟောင်း ဖွေထိုင်းနှင့် ပြုပြင်ပြောင်းလဲရေး ပြည်သူ့ပါတီတို့အကြား သုံးပွင့်ဆိုင်ပြိုင်ပွဲတစ်ခုဖြစ် နေပြီဖြစ်သည်။
ဇန်နဝါရီလ ၃၀ ရက် နေ့တွင် ထုတ်ပြန်ခဲ့သော Suan Dusit တက္ကသိုလ်၏ စစ်တမ်းတစ်ခုတွင် မစ္စတာနာထာဖွန်းကို စစ်တမ်းဖြေဆိုသူ ၃၅ ဒဿမ ၁ ရာခိုင်နှုန်းက ထောက်ခံခဲ့ပြီး အနူတင်သည် ၁၆ ဒဿမ ၁ ရာခိုင်နှုန်းဖြင့် တတိယနေရာတွင် ရပ်တည်ခဲ့သည်။ ဖွေထိုင်း၏ ဝန်ကြီးချုပ်လောင်း ယိုရှနန် ဝေါင်ဆာဝပ်က ၂၁ ဒဿမ ၅ ရာခိုင်နှုန်းဖြင့် ဒုတိယနေရာတွင် ရပ်တည်ခဲ့သည်။
ဇန်နဝါရီလ ၁၆ ရက် နေ့မှ ၂၈ ရက်နေ့အထိ ပြုလုပ်ခဲ့သောစစ်တမ်းတွင် လူပေါင်း ၂၆,၆၂၁ ဦးကို စစ်တမ်းကောက်ယူခဲ့ခြင်းဖြစ်သည်။
People's Party တဖြစ်လဲ Move Forward ပါတီသည် ၂၀၂၃ခုနှစ် ရွေးကောက်ပွဲတွင် အနိုင်ရခဲ့သော်လည်း ကွန်ဆာဗေးတစ်အမတ်များက အစိုးရဖွဲ့စည်းခွင့်ကို တားဆီးခဲ့ပြီး နောက်ပိုင်းတွင် တရားရုံးအမိန့်ဖြင့် ပါတီဖျက်သိမ်းခံခဲ့ရသည်။
အယုံအကြည်မရှိအဆို တင်၍မဲခွဲ ဆုံးဖြတ် သည်အထိ ဖြစ်သွားနိုင်ခြင်း နှင့် ၎င်း၏ အက်ကွဲ‌နေသော လူနည်းစုအစိုးရက ပြိုလဲသွားနိုင်သည့် ကစဉ့်ကလျား ဖြစ်နေသော လွှတ်တော်အစည်းအဝေးကာလအတွင်း ဝန်ကြီးချုပ်အဖြစ် ရက်ပေါင်း ၁၀၀ မပြည့်မီ ဒီဇင်ဘာလ ၁၂ ရက် နေ့တွင် မစ္စတာအနူတင်က ကြားဖြတ်ရွေးကောက်ပွဲကျင်းပမည်ဟု ကြေညာခဲ့သည်။

ဥရောပသမဂ္ဂ နှင့် မြန်မာနိုင်ငံအကြား အနုပညာကတဆင့် ဖော်ပြနိုင်မည့်အနုပညာပြိုင်ပွဲကျင်းပမည်
ဆုငွေ ကျပ် ၁၅ သိန်းထိ အမြင့်ဆုံးချီးမြှင့်မည်

“ဥရောပသမဂ္ဂ-မြန်မာ -ချိတ်ဆက် ယှက်နွယ် အသံဖလှယ်” ခေါင်းစဥ်ဖြင့် ဥရောပသမဂ္ဂနှင့် မြန်မာနိုင်ငံကြားက ဘုံတန်ဖိုးများ၊ ယဥ်ကျေးမှုဖလှယ်မှုများ နှင့် လူမှုအဖွဲအစည်းများကို ပိုမိုနီးကပ်စေမည့်လူသားချင်းချိတ်ဆက်မှုများကို အနုပညာကတဆင့် ဖော်ပြနိုင်ရန် အနုပညာပြိုင်ပွဲကျင်းပမည်ဖြစ်ကြောင်း EU - Myanmar က ယနေ့ ဇန်နဝါရီ(၃၀)ရက်နေ့ ၌ အသိပေးထုတ်ပြန်ထားသည်။
မြန်မာနိုင်ငံအခြေစိုက်နေထိုင်နေသည့် အနုပညာရှင်အားလုံးကိုပြိုင်ပွဲဝင်ရန်လည်း EU -Myanmar က ဖိတ်ခေါ်ထားသည်။
ပါဝင်ယှဉ်ပြိင်မည့်အနုပညာရှင်များအနေဖြင့် ပန်းချီ၊သရုပ်ဖော်ပုံများ၊ခဲခြစ်ပန်းချီ၊ဒစ်ဂျစ်တယ်အနုပညာ၊ ပုံနှိပ်အနုပညာ၊ များဖြင့် ဝင်ရောက်ယှဉ်ပြိုင်နိုင်မည်ဖြစ်ပြး အသေးစိတ်အချက်အလက်များ ကို EU -Myanmar ၏ facebook လူမှုကွန်ယက်စာမျက်နှာတွင် ဖော်ပြထားကြောင်း သိရသည်။
အဆိုပါ ပြိုင်ပွဲအတွက် ပထမဆု ကို ကျပ်(၁၅)သိန်း၊ ဒုတိယဆုကို (၁၀)သိန်း၊ တတိယဆုကို (၅)သိန်းချီးမြှင့်မည်ဖြစ်ပြီး ဆုရရှိသူများ၏ အနုပညာများကိုလည်း EU -Myanmar ၏ လူမှုကွန်ယက်စာမျက်နှာတွင် ဖော်ပြပေးမည်ဖြစ်ကြောင်း သိရသည်။
ပြိုင်ပွဲဝင်မည်သူများ အနေဖြင့် ၂၀၂၆ မတ်လ (၁)ရက်နေ့ နောက်ဆုံးထားပေးပို့နိုင်မည်ဖြစ်ပြီး ဆန်ကာတင် အနုပညာလက်ရာ (၂၀)ကိုလည်း ပြပွဲကျင်းပမည်ဖြစ်ပြီး ထပ်မံကြေညာပေးမည်ဖြစ်ကြောင်းလည်း သိရသည်။

MWL အမျိုးသမီးလိဂ် ရာသီပိတ် ချန်ပီ ယံလုပွဲ ဧရာဝတီအသင်းနှင့် ISPE အ သင်းတို့ ယနေ့ ယှဉ်ပြိုင်ကစားမည်

Myanmar Women League 2025-26 အမှတ်ပေးဘောလုံးပြိုင်ပွဲ၏ ရာသီပိတ်နောက်ဆုံးပွဲစဉ်ဖြစ်သည့်ချန်ပီယံလုပွဲတွင် ဧရာဝတီအသင်းနှင့် ISPE အသင်းတို့ ထိပ်တိုက်တွေ့ဆုံ ယှဥ်ပြိုင်ကစားသွားကြမည်ဖြစ်သည်။
ယနေ့ ဇန်နဝါရီ (၃၁)ရက် ညနေ (၃)နာရီခွဲအချိန်တွင် ရန်ကုန်မြို့ သုဝဏ္ဏဘောလုံးကွင်းအတွင်း ယှဉ်ပြိုင်ကြမည်ဖြစ်ကာ Pyone Play Youtube Channel ကလည်း တိုက်ရိုက်ထုတ်လွှင့်ပြသသွားမည်ဖြစ် ကြောင်းသိရသည်။
ပွဲစဉ်အတွက် ပရိတ်သတ်များ အိမ်အပြန်ခရီးအဆင်ပြေစေရန် ဧရာဝတီအမျိုးသ မီးအသင်းက ကားစီစဉ်ပေးထားကြောင်း သိရသည်။
ဧရာဝတီအမျိုးသမီးအသင်းသည် ယခုနှစ် ချန်ပီယံလုပွဲမတိုင်ခင်အချိန်အထိ ရမှတ် (၃၉)မှတ် ရရှိအောင် စွမ်းဆောင်ထားနိုင်သလို ၊ လက်ရှိချန်ပီယံ ISPE အသင်းသည်လည်း ရမှတ်(၃၆)မှတ်ဖြင့် အဆင့်(၂)နေရာတွင် ဦးဆောင်နေကြသည့် အသင်းများဖြစ် သည်။
ယခုနှစ်ဘောလုံးရာသီ ချန်ပီယံဆု မည် သည့်အသင်း ဆွတ်ခူးမည်ဆိုသည့် အဆုံးအဖြတ်အတွက် ကွင်းအတွင်း လာရောက်အားပေးကြရန် လိဂ်ကော်မတီကလည်း ဖိတ်ခေါ်ထားသည်။
ထို့ပြင် Myanmar Women League 2025-26 အမှတ်ပေးဘောလုံးပြိုင်ပွဲ၏ ရာသီပိတ်နောက်ဆုံးပွဲစဉ်နှင့် ဆုချီးမြှင့်ပွဲအခမ်းအနားအား သုဝဏ္ဏကွင်း၌ တဆက်တည်းကျင်းပသွားမည်ဖြစ်ကြောင်း သိရသည်။

ဥတ္တရသီရိမြို့နယ်ကိုဗဟိုပြု၍ အင်အားအနည်းငယ်ရှိငလျင်တစ်ခု ယနေ့ ဇန်နဝါရီ ၃၁ ရက်နံနက်အစောပိုင်းကလှုပ်ခတ်

မန္တလေးငလျင်ကြီးလှုပ်ခတ်ပြီး နောက်ဆက်တွဲငလျင်အမှတ်စဥ်(၂၇၂)အဖြစ် ယနေ့ ဇန်နဝါရီ ၃၁ ရက်နံနက်အစောပိုင်းက နေပြည်တော်၊ ဥတ္တရသီရိမြို့နယ်ကိုဗဟိုပြုလှုပ်ခတ်ခဲ့ကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာနထံမှ သိရသည်။
ဥတ္တရသီရိမြို့နယ်၏ တောင်-အနောက်တောင်ဘက်(၄) မိုင်ခန့်အကွာ အနက်(၈)ကီလိုမီတာကိုဗဟိုပြု၍ အင် အားရစ်(ခ်)တာစကေး(၃ ဒသမ ၁)အဆင့်ရှိ အင်အားအနည်းငယ်ရှိသောငလျင်သည် နံနက် ၅ နာရီ ၁၂ မိနစ် ၅၁ စက္ကန့်ကလှုပ်ခတ်ခဲ့ခြင်းဖြစ်ကြောင်း သိရသည်။
ထို့ပြင် ယမန်နေ့ ဇန်နဝါရီ ၃၀ ရက်ညနေ ၅ နာရီ ၄၆ မိနစ် ၃၀ စက္ကန့်ကလည်း ပုသိမ်ကြီးမြို့နယ်၏ တောင်ဘက်(၃)မိုင်ခန့်အကွာ အနက်(၉)ကီလိုမီတာကိုဗဟိုပြု ၍ အင်အားရစ်(ခ်)တာစကေး(၃ ဒသမ ၂)အဆင့်ရှိ အင်အားအနည်းငယ်ရှိသော ငလျင်လှုပ်ခတ်ခဲ့ကြောင်း သိရသည်။

ထီးချိုင့်မြို့မှာ တိုက်ပွဲတွေ တကျော့ပြန် ဖြစ်ပွားနေ

စစ်ကိုင်းတိုင်း၊ ထီးချိုင့်မြို့မှာ အခုရက်ပိုင်းအတွင်း တိုက်ပွဲတွေ တကျော့ပြန် ဖြစ်ပွားနေပြီး ဧရာဝတီတံတားအနီးနဲ့ မြို့ပေါ်နေရာတချို့မှာ တိုက်ပွဲ ပြင်းထန်နေတယ်လို့ ​မြေပြင်စစ်​ရေးသတင်းအ​ခြေအ​နေသိသူက​ပြောပါ်တယ်။
ထီးချိုင့်မြို့ကို ပြန်လည် ထိန်းချုပ်နိုင်ဖို့အတွက် ပြီးခဲ့တဲ့ ဇန်နဝါရီ ၂၈ ရက်နေ့၊ မနက် ၅ နာရီဝန်းကျင်မှ စတင်ကာ ဒေသတွင်း လက်နက်ကိုင် ပူးပေါင်းတပ်တွေက အင်အားဖြည့်တင်းပြီး ထိုးစစ်ဆင်လာခြင်း ဖြစ်တယ်လို့ သိရပါတယ်။
“ထီးချိုင့်မှာ တိုက်ပွဲမဖြစ်တာ တနှစ်ကျော်ကြာပြီ။ ပြီးခဲ့တဲ့ နှစ်ရက်လောက်ကမှ ပြန်ဖြစ်နေတာ။ လက်နက်ကိုင် တပ်တွေက ဧရာဝတီတံတား ဝန်းကျင်နဲ့ မြို့ပေါ်ကို အဓိက တိုက်နေတာပေါ့။ အရပ်သားတွေကိုလည်း ရှောင်ခိုင်းထားတယ်။ အသေးစိတ် အခြေအနေကိုတော့ လုံခြုံရေး အခြေအနေအရ ပြောလို့မရသေးဘူး” လို့ စစ်ရေး သတင်းရင်းမြစ်က ပြောပါတယ်။
လက်ရှိမှာတော့ ထီးချိုင့်မြို့အတွင်း နေထိုင်တဲ့ ဒေသခံတွေနဲ့ မြို့အနီးဝန်းကျင်က ရပ်ကွက်တွေ၊ ကျေးရွာတွေက ဒေသခံတွေဟာ ဘေးလွတ်ရာ နေရာတွေကို တိမ်းရှောင်နေကြရတယ်လို့ ဆိုပါတယ်။
ဒေသတွင်း လက်နက်ကိုင် ပူးပေါင်းတပ်တွေဟာ ထီးချိုင့်မြို့ကို လွန်ခဲ့တဲ့ ၂၀၂၃ ခုနှစ်၊ နိုဝင်ဘာလ ၈ ရက်နေ့မှာ ပထမအကြိမ် စတင် တိုက်ခိုက်ခဲ့ဖူးပြီး ၂၀၂၄ ခုနှစ်၊ စက်တင်ဘာလလောက်အထိ တိုက်ပွဲတွေ ရှိခဲ့တယ်လို့ သိရပါတယ်။
အဲဒီအချိန်က မြို့ရဲ့နေရာ အတော်များများကို ထိန်းချုပ်နိုင်ခဲ့ပေမယ့် အစိုးရတပ်ရဲ့ တန်ပြန် ထိုးစစ်ဆင်မှုနဲ့ လေကြောင်း တိုက်ခိုက်မှုတွေကြောင့် ပြန်လည် ဆုတ်ခွာခဲ့ရတာဖြစ်ပြီး လက်ရှိမှာတော့ တကျော့ပြန်တိုက်ပွဲ ဆင်နွှဲနေတာ ဖြစ်တယ်လို့ သိရပါတယ်။
လက်ရှိမှာ ထီးချိုင့်မြို့အပြင် စစ်ကိုင်းတိုင်းအတွင်းက ဗန်းမောက်၊ ကသာ၊ ကောလင်းနဲ့ ဝန်းသိုမြို့တို့မှာလည်း တိုက်ပွဲတွေ ရှိနေပြီး စစ်ရေး ဆက်လက် တင်းမာနေဆဲ ဖြစ်တယ်လို့ သိရပါတယ်။
ကသာမြို့ကို ပြီးခဲ့တဲ့ ၂၀၂၅ ခုနှစ်၊ ဒီဇင်ဘာ ၂၆ ရက်နေ့မှ စတင်ကာ ဒေသတွင်း လက်နက်ကိုင်တပ်တွေက ထိုးစစ်ဆင် တိုက်ခိုက်ခဲ့တာဖြစ်ပြီး လက်ရှိအချိန်အထိ လေကြောင်း တိုက်ခိုက်မှုတွေနဲ့အတူ မြို့ထဲမှာ တိုက်ပွဲတွေ ဖြစ်ပွားလျက်ရှိတယ်လို့ သိရပါတယ်။
စစ်ရေးလေ့လာသူတွေရဲ့ သုံးသပ်ချက်အရ ကသာနဲ့ ထီးချိုင့်မြို့တို့ဟာ မန္တလေး - စစ်ကိုင်း - ဗန်းမော် လမ်းကြောင်းတလျှောက်ကို ရေလမ်း၊ ကုန်းလမ်းတွေနဲ့ ချိတ်ဆက်နိုင်တဲ့ ဗျူဟာမြောက် ဒေသတွေ ဖြစ်တဲ့အတွက် နှစ်ဖက်စစ်ရေးအရ အလွန်အရေးပါတဲ့ နေရာတွေ ဖြစ်တယ်လို့ သိရပါတယ်။
ဒါအပြင် ဗန်းမောက်မြို့မှာလည်း တိုက်ပွဲတွေ ဖြစ်ပွားနေတာမှာ လက်ရှိမှာတော့ တိုက်ပွဲကာလ နှစ်ပတ်ကျော် ကြာမြင့်လာပြီဖြစ်ပြီး ပစ်ခတ်မှုတွေ နေ့စဉ် ရှိနေဆဲဖြစ်ကာ လေကြောင်း တိုက်ခိုက်မှုတွေကြောင့် ဗန်းမောက်မြို့ပေါ်က နေအိမ်တွေနဲ့ ဘာသာရေး အဆောက်အအုံ အများအပြားလည်း ပျက်စီးခဲ့ရတယ်လို့ သိရပါတယ်။
ကချင်လွတ်လပ်ရေး တပ်မတော် (KIA) ထိန်းချုပ်ထားတဲ့ ဗန်းမောက်မြို့ကို ပြန်လည်ရရှိနိုင်ဖို့ ရှမ်းနီ အမျိုးသားများတပ်မတော် (SNA) က အစိုးရတပ်ရဲ့ အကူအညီနဲ့ ထိုးစစ်ဆင် တိုက်ခိုက်နေတာဖြစ်ပြီး လက်ရှိမှာ မြို့ရဲ့ ၈၀ ရာခိုင်နှုန်းနီးပါးကို ပြန်လည် ထိန်းချုပ်ထားနိုင်ပြီ ဖြစ်တယ်လို့ သိရပါတယ်။
အဲဒီလိုပဲ ကောလင်းမြို့နယ် အတွင်းမှာလည်း ဒေသတွင်း လက်နက်ကိုင်တပ်တွေ ထိန်းချုပ်ထားရာ နယ်မြေဖြစ်တဲ့ သစ်ဖုလတောင်အနီးမှာ တိုက်ပွဲတွေ ဆက်လက် ဖြစ်ပွားနေပြီး အစိုးရတပ် စစ်ကြောင်းဟာ သစ်ဖုလတောင်မှ ကီလိုမီတာ ၆ မိုင်ခန့်အကွာရှိ ကျောက်တန်းကျေးရွာမှာ တပ်စွဲထားတယ်လို့ သိရပါတယ်။
လက်ရှိမှာ ကောလင်းမြို့နယ် အရှေ့ခြမ်းက ကျေးရွာတွေကို ဝန်းသိုအခြေစိုက် ခြေမြန်တပ်ရင်း (ခမရ - ၁၁၁ နဲ့ ၁၂၀) တပ်တွေက အင်အားအများအပြားနဲ့ နယ်မြေရှင်းလင်းရေး လုပ်ဆောင်နေတာကြောင့် ဒေသခံတွေ ဘေးလွတ်ရာကို တိမ်းရှောင်နေကြရတယ်လို့ သိရပါတယ်။

မော်လူးဒေသ လေကြောင်း တိုက်ခိုက်ခံရမှု ရှစ်ယောက် သေဆုံး

‌စစ်ကိုင်းတိုင်း၊ အင်းတော်မြို့နယ်၊ မော်လူးဒေသမှာ မနေ့ ဇန်နဝါရီ ၂၉ ရက်၊ ညပိုင်းက လေကြောင်းတိုက်ခိုက်မှု ဖြစ်ပွားခဲ့ပြီး ရှစ်ယောက် သေဆုံးခဲ့တယ်လို့ ဒေသခံတွေက ပြောပါတယ်။

မော်လူးဒေသ လေဘိုကျေးရွာမှာ မနေ့ ည ၉ နာရီဝန်းကျင်က လေကြောင်းတိုက်ခိုက်မှု ဖြစ်ပွားခဲ့တာဖြစ်ပြီး နေအိမ် နှစ်လုံးလည်း ပျက်စီးသွားခဲ့တယ်လို့ သိရပါတယ်။

“မနေ့က လေယာဉ်က နေ့လယ်ပိုင်းမှာ တကြိမ်ကြဲသေးတယ်။ အဲဒီမှာ လူအထိအခိုက် မရှိဘူး။ ညပိုင်းကျမှ လူထိတာ။ ခုနောက်ပိုင်း မော်လူးမှာ လေကြောင်း တိုက်ခိုက်မှုတွေ ခပ်စိတ်စိတ်ဖြစ်လာတယ်” လို့ ဒေသခံတယောက်က ပြောပါတယ်။

လက်ရှိမှာတော့ လေဘိုကျေးရွာက ဒေသခံတွေ အပါအဝင် အနီးဝန်းကျင် ကျေးရွာတွေက ဒေသခံတွေဟာ လေကြောင်း တိုက်ခိုက်မှုတွေ ထပ်မံ ဖြစ်ပွားလာမှာကို စိုးရိမ်တဲ့အတွက် ဘေးလွတ်ရာကို ရှောင်တိမ်းနေကြပြီ ဖြစ်တယ်လို့ သိရပါတယ်။

မော်လူးဒေသအတွင်း လေကြောင်း တိုက်ခိုက်မှုတွေ မကြာခဏဆိုသလို ဖြစ်ပွားလျက်ရှိတာမှာ ပြီးခဲ့တဲ့ ဇန်နဝါရီ ၂၁ ရက်နေ့ကလည်း မာန်ဟဲကျေးရွာရှိ ပြည်သူ့လုံခြုံရေးအဖွဲ့ (ပလဖ) ရုံးမှာ လေကြောင်း တိုက်ခိုက်မှု ဖြစ်ပွားခဲ့တာကြောင့် ငါးယောက် သေဆုံးကာ လေးယောက် ဒဏ်ရာရရှိခဲ့တယ်လို့ သိရပါတယ်။

အဲဒီလိုပဲ ဇန်နဝါရီ ၂ ရက်နေ့ကလည်း ရွာရှည်ရွာ စာသင်ကျောင်းမှာ လေကြောင်း တိုက်ခိုက်မှုကြောင့် တယောက် သေဆုံးကာ နှစ်ယောက် ထိခိုက်ဒဏ်ရာ ရရှိခဲ့တယ်လို့ သိရပါတယ်။

ဒေသတွင်း လက်နက်ကိုင်တပ်တွေဟာ မော်လူးမြို့ကို ၂၀၂၃ ခုနှစ်၊ ဒီဇင်ဘာလ ၁၃ ရက်နေ့က သိမ်းယူခဲ့တာဖြစ်ပြီး အဲဒီနောက် ရုံးနဲ့ စခန်းတွေကို လူနေကျေးရွာတွေအတွင်း ထားရှိထားတာ ဖြစ်တယ်လို့ သိရပါတယ်။

ဒါကြောင့် လေကြောင်း တိုက်ခိုက်ခံရတဲ့အခါ လူထိခိုက် သေဆုံးမှုတွေ မကြာခဏ ဖြစ်ပေါ်နေရတဲ့အပေါ် ဒေသခံတွေကြား ဝေဖန်မှုတွေ မြင့်တက်လျက် ရှိတယ်လို့ သိရပါတယ်။

“ဒီက ဒေသခံတွေ အများစုကတော့ ရွာတွေပေါ် လေယာဉ်တွေ ခဏခဏဝဲနေတာကို မကြိုက်ကြဘူး။ ရွာထဲမှာ စခန်းတွေ ရှိနေတာကိုလည်း မလိုလားကြဘူး။ သူတို့ရဲ့ တည်နေရာကို အစိုးရတပ်က သိနေပြီးလောက်ပြီ ဖြစ်တဲ့အတွက် သူတို့စခန်းတွေ ရွာထဲရှိနေသမျှ လေကြောင်းအန္တရာယ်က ရှိနေဦးမှာပဲ။ အခုက ဘယ်လိုဖြစ်နေလဲ ဆိုတော့ သူတို့ ကာကွယ်ပေးတယ်လို့ ဆိုကာမှ လူတွေခဏတိုင်း သေနေကြရသလို ဖြစ်နေပြီ” လို့ နောက်ထပ် ဒေသခံတယောက်က ပြောပါတယ်။

ဒါအပြင် လက်ရှိမှာ အင်းတော်နဲ့ မော်လူးမြို့ အနီးဝန်းကျင်က ဒေသတွေဖြစ်တဲ့ ကသာ၊ ကောလင်းနဲ့ ဝန်းသိုမြို့နယ်တွေထဲမှာလည်း လေကြောင်းတိုက်ခိုက်မှု၊ လက်နက်ကြီး ပစ်ခတ်မှုတွေနဲ့အတူ တိုက်ပွဲဖြစ်ပွားမှုတွေ ရှိနေတယ်လို့ သိရပါတယ်။

ပြီးခဲ့တဲ့ ဇန်နဝါရီ ၂၈ ရက်နေ့၊ မွန်းလွဲ ၃ နာရီဝန်းကျင်ကလည်း ကသာ မြို့ရှောင်ကွင်းလမ်းမှာ လက်နက်ကြီး ကျရောက်မှုကြောင့် နှစ်ယောက် သေဆုံးခဲ့တဲ့အပြင် ဆိုင်ကယ် တစီးလည်း ပျက်စီးခဲ့တယ်လို့ သိရပါတယ်။

ချန်ပီယံလိဂ်မောင်းအောင်ကာ ဘဝအပြောင်းအလဲဖြစ်သွားစေမယ့် ငွေကြေး ရရှိသွားတဲ့သူတစ်ဦး ထွက်ပေါ်လာ
======================
ကံအရမ်းကောင်းတဲ့ ပရိသတ်တစ်ဦးဟာ ချန်ပီယံလိဂ် လိဂ်အဆင့် နောက်ဆုံးပွဲစဉ်များအား မောင်းလောင်းရာမှ ဘဝအပြောင်းအလဲ ဖြစ်သွားစေနိုင်တဲ့ ငွေကြေး ရရှိသွားခဲ့ပါတယ်။
ဗုဒ္ဓဟူးနေ့ညတုန်းက ချန်ပီယံလိဂ်လိဂ်အဆင့် နောက်ဆုံးပွဲစဉ်များအားလုံး တစ်ပြိုင်တည်း ကစားသွားခဲ့ပါတယ်။
ပရီးမီးယားလိဂ်ကလပ်များဖြစ်ကြတဲ့ အာဆင်နယ်၊ လီဗာပူး၊ စပါးစ်၊ ချဲလ်ဆီး၊ မန်စီးတီးတို့ နိုင်ပွဲကိုယ်စီ ရရှိကာ ချန်ပီယံလိဂ် ၁၆ သင်း ရှုံးထွက်အဆင့်သို့ တိုက်ရိုက် တက်ရောက်သွားခဲ့ကြပါတယ်။
တဖက်တွင် နယူးကာဆယ်မှာလည်း လက်ရှိချန်ပီယံ ပီအက်စ်ဂျီကို အဝေးကွင်းတွင် တစ်ဂိုးစီသရေကစားပြီး ပလေးအော့ဖ်အဆင့်မှ ထပ်မံ ကြိုးစားနိုင်ခွင့် ရသွားပါတယ်။
ချန်ပီယံလိဂ် လိဂ်အဆင့် နောက်ဆုံးပွဲ ၁၈ ပွဲလုံးကို တပြိုင်တည်း ကစားသွားခဲ့ပြီး တစ်ကမ္ဘာလုံးမှ ပရိသတ်များဟာ ချန်ပီယံလိဂ်မှာ ကံကောင်းခြင်းတွေ ရှာဖွေခဲ့ကြပါတယ်။
ကံအရမ်းကောင်းတဲ့ ပရိသတ်တစ်ဦးကတော့ ၇ ပွဲမောင်းအား ပေါင် ၇၇၅ လောင်းပြီး ပေါင် ၁၅၀၈၂.၆၉ ရရှိသွားပါတယ်။
သူဟာ လီဗာပူး-ကွာရာဘတ်၊ ဘင်ဖီကာ-ရီးရဲလ်မက်ဒရစ်၊ ကလပ်ဘရုဂျက်-မာဆေးနှင့် အက်သလက်တီကို-ဘိုဒို/ဂလမ့်ပွဲစဉ်တို့အား ၃ ဂိုးဂိုးပေါ် ရွေးချယ်ပြီး စပါးစ်က ဖရန့်ဖတ်ကို အနိုင်ရမယ်၊ ဘီလ်ဘာအို-စပို့တင်းပွဲနှင့် နပိုလီ-ချဲလ်ဆီးပွဲတို့တွင် နှစ်သင်းလုံး ဂိုးသွင်းမယ်ဆိုပြီး ရွေးချယ်သွားခဲ့ပါတယ်။
အံ့ဩသင့်စရာကောင်းစွာပဲ သူ့ရွေးချယ်မှုအားလုံး မှန်ကန်သွားပါတယ်။

ချန်ပီယံလိဂ်မှ ထွက်ခဲ့ရပြီးနောက် ထုတ်ပယ်ခံရမယ့်အရေးနှင့် ရင်ဆိုင်နေရတဲ့ ယူနိုက်တက်ပစ်မှတ်နည်းပြ
====================
ရောဘတ်တိုဒီဇာဘီဟာ ချန်ပီယံလိဂ်မှ ထွက်ခဲ့ရပြီးနောက် ထုတ်ပယ်ခြင်းမခံရမီ ရာထူးမှ နုတ်ထွက်ခွင့်ရန် တောင်းဆိုခြင်းခံလာရကြောင်း သိရပါတယ်။
အသက် ၄၆ နှစ်ရှိ ဘရိုက်တန်နည်းပြဟောင်းရောဘတ်တိုဒီဇာဘီဟာ ၂၀၂၄ ခုနှစ်တုန်းက အဲရစ်တန်ဟက် ထုတ်ပယ်ခြင်းမခံရမီကတည်းက ယူနိုက်တက်နည်းပြရာထူးအတွက် သတင်းထွက်လာခဲ့သူ ဖြစ်ပါတယ်။
သူဟာ ရူဘင်အမိုရမ် ထုတ်ပယ်ခံလာရချိန်တွင် မိုက်ကယ်ကာရစ်အား ရာသီအကုန်အထိ ခန့်အပ်ထားပေမယ့်လည်း နွေရာသီတွင် ယူနိုက်တက်အမြဲတမ်းနည်ပြအဖြစ် ခန့်အပ်ခြင်းခံရရန် ရေပန်းစားနေပါတယ်။
ဒါပေမယ့် ရောဘတ်တိုဒီဇာဘီဟာ မကြာမီကာလအတွင်းတွင် အလုပ်လက်မဲ့ ဖြစ်ပြီး ယူနိုက်တက်အား ကိုင်တွယ်ရန် ပိုမိုအခြေအနေကောင်းလာမယ့် အခြေအနေမှာ ရှိနေပါတယ်။
Foot Mercato က အီတလီလူမျိုးနည်းပြဟာ ဗုဒ္ဓဟူးနေ့ညတုန်းက ချန်ပီယံလိဂ်မှ ထွက်ခဲ့ရပြီးနောက် ရာထူးမှ နုတ်ထွက်ရန် တောင်းဆိုခြင်းခံခဲ့ကြောင်း သိရပါတယ်။ ဒါ့အပြင် ယင်းသတင်းဌာနကပင် ရောဘတ်တိုဒီဇာဘီမှာ မနုတ်ထွက်ပါက ထုတ်ပယ်ခြင်းခံရနိုင်တဲ့ အန္တရာယ်တွင် ရှိနေကြောင်း ဖော်ပြသွားပါတယ်။
မာဆေးဟာ ကလပ်ဘရုဂျက်အား ၃-၀ ဂိုးဖြင့် အံ့ဩသင့်ဖွယ်ရှုံးနိမ့်ကာ ပလေးအော့ဖ်နေရာနှင့် လွဲခဲ့တာလည်း ဖြစ်ပါတယ်။
ရောဘတ်တိုဒီဇာဘီဟာ မနက်ဖြန် စနေနေ့တွင် ပဲရစ်အက်ဖ်စီနှင့် ရင်ဆိုင်ကစားရမှာ ဖြစ်ပေမယ့်လည်း ကြာသပတေးနေ့က အသင်းကို လေ့ကျင့်ခန်းပင် ပြုလုပ်ခြင်း မရှိကြောင်း သိရပါတယ်။
ဒီဇာဘီဟာ ၂၀၁၈ ခုနှစ်မှ ၂၀၂၁ ခုနှစ်အတွင်းတွင် ဆက်စ်ဆူလိုအား အောင်မြင်စွာ ကိုင်တွယ်ပြီးနောက် ရှက်တာဒိုးနက်စ်အား တစ်နှစ်ကိုင်တွယ်ခဲ့ကာ ဘရိုက်တန်အား ကလပ်သမိုင်းတွင် ပထမဆုံးအကြိမ်အဖြစ် အဆင့် ၆ နေရာမှာ ရပ်တည်ကာ ဥရောပဝင်ခွင့်ရအောင် စွမ်းဆောင်ပေးခဲ့သူ ဖြစ်ပါတယ်။
သူဟာ ဘရိုက်တန်ကို နှစ်နှစ်ခန့်သာ ကိုင်တွယ်ပြီး စာချုပ်ဖျက်သိမ်းကာ ၂၀၂၄ ခုနှစ်တွင် မာဆေးအား ကိုင်တွယ်ခဲ့ပါတယ်။
တကယ်လို့များ ရောဘတ်တိုဒီဇာဘီသာ ထုတ်ပယ်ခြင်းခံလာရပါက ယူနိုက်တက်အနေဖြင့် သူ့အား ခန့်အပ်လာချိန်တွင် နစ်နာကြေးပေးလာရမှာ မဟုတ်ပါဘူး။
ရောဘတ်တိုဒီဇာဘီရဲ့ အခြေအနေကို စောင့်ကြည့်နေတာ ယူနိုက်တက်တစ်သင်းတည်း မဟုတ်ပါဘူး။ စပါးစ်ဟာလည်း လိဂ်တွင် အခြေအနေမကောင်းမှုကြောင့် သောမတ်စ်ဖရန့်အား ထုတ်ပယ်လာပါက ရောဘတ်တိုဒီဇာဘီအား ခန့်အပ်ရန် လျာထားပါသေးတယ်။