TNLA ထိန်းချုပ်ရာ နမ့်ဆန်မြို့နယ်ကို နှစ်ရက်ဆက်တိုက် လေကြောင်းတိုက်ခိုက်
အောက်တိုဘာ ၁၄၊ ၂၀၂၅
ရှမ်းပြည်နယ်မြောက်ပိုင်း၊ TNLA ထိန်းချုပ်ရာ ပလောင်ကိုယ်ပိုင်ပိုင် အုပ်ချုပ်ခွင့်ရ ဒေသ၊ နမ့်ဆန်မြို့နယ်မှာ အောက်တိုဘာလ ၁၃ နဲ့ ၁၄ နှစ်ရက် ဆက်တိုက် လေကြောင်းနဲ့ ဗုံးကြဲ တိုက်ခိုက်ခံရလို့ လူ ထိခိုက်၊ သေဆုံးမှုရှိကြောင်း ဒေသခံတွေဆီက သိရပါတယ်။
"ဒီေန့ အောက်တိုဘာလ ၁၄ ရက်နေ့ မနက် ၇ နာရီ ၁၅ လောက်က အုမ်းမစွမ် ရွာကို ဗုံးကြဲ သွားပါတယ်။ လူ တယောက် သေတယ်။ နှစ်ယောက် ထိခိုက် ဒဏ်ရာရတယ်" လို့ ဒေသခံ တယောက်က ပြောပါတယ်။
လေကြောင်း ဗုံးက နမ့်ဆန်မြို့နယ်ထဲက အုမ်းမစွမ်ရွာမှာ ကျရောက်ပြီး နေအိမ် တချို့လည်း ထိခိုက် ပျက်စီးသွားတယ် လို့ သူက ပြောပါတယ်။
"မနေ့က ကယားကြီးရွာမှာ ဗုံးကြဲသွားတာဟုတ်တယ်။ လူ တယောက်တော့ လက်မှာ နည်းနည်းထိသွားတယ်။" လို့ ဒေသခံ အမျိုး သမီးတယောက်က ပြောပါတယ်။
အောက်တိုဘာလ ၁၃ ရက်နေ့ မွန်းလွဲ ၁ နာရီဝန်းကျင်ခန့်က နမ့်ဆန်မြို့နယ် ကယားကြီးရွာကို ဂျက်ဖိုက်တာနဲ့ ဗုံးကြဲတိုက်ခိုက်ခံရတာဖြစ်ပြီး ရွာထဲက စာသင်ကျောင်း၊ ရပ်ကွက် ၂၊ ရွာအစွန် ဘက်တွေမှာ ကျရောက်ခဲ့ကာ ကျောင်းဆောင်တွေနဲ့ နေအိမ် တွေထိခိုက် ပျက်စီးခဲ့တယ်လို့ သူက ပြောပါတယ်။ ရွာထဲက စာသင်ကျောင်း၊ ရပ်ကွက် ၂၊ ရွာအစွန် ဘက်တွေမှာ ကျရောက်ခဲ့ကာ ကျောင်းဆောင်တွေနဲ့ နေအိမ် တွေထိခိုက် ပျက်စီးခဲ့တယ်လို့ သူက ပြောပါတယ်။
နမ့်ဆန်မြို့နယ်၊ အုမ်းစွမ်ရွာကို အောက်တိုဘာလ ၁၄ ရက်နေ့ မနက် ၇ နာရီ ၁၅ မိနစ် ခနိ့က ဂျက်ဖိုက်တာနဲ့ ကြဲချတိုက်ခိုက်ခံရသလို နမ့်ဆန်မြို့နယ် ကယားကြီးရွာကို အောက်တိုဘာလ ၁၃ ရက်နေ့ နေ့လယ် ၁ နာရီ ဝန်းကျင်ခန့်က ဂျက်ဖိုက်တာနဲ့ ဗုံးကြဲတိုက်ခိုက်ခံရလို့ လူတယောက် ထိခိုက် ဒဏ်ရာရကာ ကျောင်းဆောင် နှစ်ဆောင်နဲ့ နေအိမ် ၆ အိမ် ထိမှန် ပျက်စီးသွားကြောင်း TNLA ဘက်က သတင်းထုတ်ပြန်ထားပါတယ်။
ပြီးခဲ့တဲ့ အောက်တိုဘာ ၄ ရက်နေ့ကလည်း နမ့်ဆန်မြို့နယ်၊ ဇယ်တုန်ဟုန်းရွာကို လေကြောင်းဗုံးကြဲတိုက်ခိုက်ခံရလို့ ၂ ယောက်သေဆုံးပြီး လူ ၉ ယောက် ထိခိုက် ဒဏ်ရာရကာ နေအိမ် ၁၆ အိမ်ခန့် ထိခိုက်ပျက်စီး ခဲ့ပါသေးတယ်။
Photo Crd: ဒေသခံ
