ကမ္ဘောဒီးယားက လူလိမ်ဂိုဏ်းခေါင်းဆောင် ချန်ဇီကို ဖမ်းဆီး
ကမ္ဘောဒီးယားတွင် လူကုန်ကူးသည့် အလုပ်သမားများကို ကမ္ဘာတစ်ဝန်း ဒေါ်လာဘီလျံနှင့်ချီ၍ လိမ်လည်လှည့်ဖြားရန် အွန်လိုင်းလိမ်လည်မှုစင်တာများကိုဖွင့်လှစ်ထားသည်ဟု စွပ်စွဲခံထားရသော တရုတ်နိုင်ငံဖွား သူဌေးကြီး ချန်ဇီ ကို ကမ္ဘောဒီးယားတွင်ဖမ်းဆီးပြီး တရုတ်နိုင်ငံသို့ လွှဲပြောင်းပေးခဲ့ကြောင်း ဖနောင်ပင်က ဗုဒ္ဓဟူးနေ့တွင် ပြောကြားခဲ့သည်။
ကမ္ဘောဒီးယားအာဏာပိုင်များသည် “တရုတ်နိုင်ငံသား ၃ ဦးဖြစ်သည့် ချန်ဇီ ၊ ရှူးဂျီလျန်နှင့် ရှောင်ဂျီဟွေးတို့ကို ဖမ်းဆီးခဲ့ပြီး ၎င်းတို့ကို တရုတ်ပြည်သူ့သမ္မတနိုင်ငံသို့ လွှဲအပ်ခဲ့ကြောင်း ပြည်ထဲရေးဝန်ကြီးဌာန၏ သတင်းထုတ်ပြန်ချက်တွင် ဖော်ပြထားသည်။
အဆိုပါ စစ်ဆင်ရေးသည် နိုင်ငံဖြတ်ကျော် ရာဇဝတ်မှု တို-က်ဖျ-က်ရေး ပူးပေါင်းဆောင်ရွက်မှုခွင်အတွင်း အင်္ဂါနေ့တွင် လုပ်ဆောင်ခဲ့ပြီး တရုတ်အာဏာပိုင်များ၏ တောင်းဆိုမှုအရ လုပ်ဆောင်ခဲ့ခြင်းဖြစ်သည်။
ချန်ဇီ၏ ကမ္ဘောဒီးယားနိုင်ငံသားဖြစ်မှုကို ဒီဇင်ဘာလတွင် တော်ဝင်အမိန့်ဖြင့် ပြန်လည်ရုပ်သိမ်းခဲ့ကြောင်း ဝန်ကြီးဌာနက ပြောကြားခဲ့သည်။
ဖမ်းဆီးမှုသည် ကမ္ဘောဒီးယားနှင့် တရုတ်တရားဥပဒေစိုးမိုးရေး အာဏာပိုင်များကြား လပေါင်းများစွာ ပူးပေါင်းဆောင်ရွက်မှုများပြုလုပ်ပြီးနောက် ဖမ်းဆီးခံရခြင်းဖြစ်ကြောင်း ပြန်ကြားရေးဝန်ကြီး နေသ့ဖီက ပြောကြားခဲ့သည်။
ယူအက်စ်နှင့် ယူကေ အာဏာပိုင်များသည် အစောပိုင်းတွင် တရုတ်နွယ်ဖွား ချန် ၃၈ နှစ်ကို ပိတ်ဆို့အရေးယူခဲ့သည်။ အမေရိကန်ထောင်ပေါင်းများစွာကို လိမ်လည်လှည့်ဖြားပြီး ခေတ်မီသော ငွေကြေးခဝါချမှုလုပ်ငန်းကို ချုပ်ကိုင်ခဲ့သူ ချန်နှင့် ပတ်သက်၍ ဝါရှင်တန်က အောက်တိုဘာလတွင် စွဲချက်တင်ထားသည်။
ယူအက်စ် အာဏာပိုင်များသည် လက်ရှိပေါက်ဈေးဖြင့် ကော်ပီ ၂ ဘီလျံခန့်တန်ဖိုးရှိသော ဘစ်ကွိုင်ပေါင်း ၁၂၇,၂၇၁ ကို ချန်၏ ပရင့်စ်ဂရု စီးပွားရေးအင်ပါယာမှ သိမ်းဆည်းရမိခဲ့သည်။
ထိုင်းအာဏာပိုင်များသည် ချန် သို့မဟုတ် ပရင့်စ်ဂရုနှင့် ပတ်သက်သည့် အဖွဲ့အစည်းများ၏ ပိုင်ဆိုင်မှုများကို သိမ်းဆည်းထားခြင်း ရှိ၊ မရှိကို ထိုင်းအာဏာပိုင်များက ဆက်လက်စုံစမ်းစစ်ဆေးလျက်ရှိကြောင်း၊ ရာဇဝတ်မှု ကျူးလွန်ကြောင်း သက်သေပြပါက သိမ်းဆည်းမည်ဖြစ်သည်။
ဖူဂျီအန်းတွင် ၁၉၈၇ ခုနှစ်တွင်မွေးဖွားခဲ့ပြီး ချန်သည် ၂၀၁၀ ပြည့်နှစ်နောက်ပိုင်းတွင် ကမ္ဘောဒီးယားသို့မပြောင်းရွှေ့မီ အွန်လိုင်းဂိမ်းကုမ္ပဏီငယ်တစ်ခုတွင် ၎င်း၏အသက်မွေးဝမ်းကြောင်းကိုစတင်ခဲ့ပြီး ထွန်းကားလာသောအိမ်ခြံမြေကဏ္ဍကိုလည်း လျင်မြန်စွာဝင်ရောက်ခဲ့သည်။ တရုတ်နိုင်ငံသားဖြစ်ခွင့်ကို စွန့်လွှတ်ခဲ့ပြီး ၂၀၁၄ ခုနှစ်တွင် ကမ္ဘောဒီးယားနိုင်ငံသား ဖြစ်လာခဲ့သည်။
စီဟာနုဗီးလ် ရှိ ပရင့်စ်ဂရုက လုပ်ကိုင်သည့် နည်းပညာပန်းခြံသည် ထောင်ပေါင်းများစွာသော ဆွဲဆောင်မှုရှိသော အလုပ်အကိုင်ကမ်းလှမ်းမှုများဖြင့် ဖြားယောင်းသွေးဆောင်ကာ အွန်လိုင်းလိမ်လည်မှုများတွင် ပါဝင်ရန် အတင်းအကြပ်လုပ်ဆောင်နေကြောင်း နောက်ပိုင်းတွင် သတင်းများထွက်ပေါ်လာခဲ့သည်။
ပြီးခဲ့သည့်နှစ် နိုဝင်ဘာလတွင် ဟောင်ကောင်ရဲများက သံသယရှိနိုင်ငံစုံ ငွေကြေးခဝါချမှုဂိုဏ်းတစ်ခုမှ အမေရိကန်ဒေါ်လာ သန်း ၃၅၀ ကို သိမ်းဆည်းခဲ့ပြီး အဆိုပါဂိုဏ်းသည် ချန်နှင့် ဆက်စပ်နေသည်ဟု သတင်းရင်းမြစ်များက ဖော်ပြသည်။
ထိုင်ဝမ်အာဏာပိုင်များသည် ဇိမ်ခံကား ၂၆ စီးအပါအဝင် ပရင့်စ်ဂရု ပိုင်ဆိုင်မှုဖြစ်သော ကော်ပီ ၄၅ သန်းကိုလည်း သိမ်းဆည်းခဲ့သည်။
၂၀၂၀ ခုနှစ်မှ ၂၀၂၂ ခုနှစ်အတွင်း တရုတ် ရာဇဝတ်တရားရုံး စီရင်ချက်များအရ ပရင့်စ်ဂရုသည် တရားမဝင် ဝင်ငွေ အနည်းဆုံး ယွမ် ၅ ဘီလျံ (ဒေါ်လာ သန်း ၇၀၀) ရရှိသည့် နိုင်ငံဖြတ်ကျော် အွန်လိုင်းလောင်းကစား ရာဇဝတ်ဂိုဏ်းအဖြစ် နာမည်ဆိုးဖြင့် ဖော်ပြထားပါသည်။
၂၀၂၀ ပြည့်နှစ် မေလတွင် ပေကျင်းရဲတပ်ဖွဲ့သည် ပရင့်စ်ဂရုကို စုံစမ်းစစ်ဆေးရန် အထူးအဖွဲ့တစ်ဖွဲ့ကို ဖွဲ့စည်းခဲ့ကြောင်း တရားရုံးမှတ်တမ်းများတွင် ဖော်ပြထားသည်။
ထိုအချိန်မှစ၍ တရုတ်၏ ပြည်နယ်အဆင့် တရားရုံးများက အနည်းဆုံးအမှုဆုံးဖြတ်ချက် ၇ ခုခန့် ထုတ်ပြန်ခဲ့ပြီး ပရင့်စ် သို့မဟုတ် ပရင့်စ်ဂရုနှင့် ဆက်နွယ်နေသော အဆင့်နိမ့်ဝန်ထမ်းများကို လောင်းကစားလုပ်မှုနှင့် ငွေကြေးခဝါချမှုများဖြင့် အပြစ်ရှိကြောင်းတွေ့ရှိသဖြင့် ပြစ်ဒ-ဏ်ချမှတ်ခဲ့သည်။
