#ယနေ့ထုတ်သတင်းစာ_နိုင်ငံတကာသတင်း
◼ တောင်ကိုရီးယားထုတ်တံဆိပ်ကပ်ပြီး အမေရိကန်သို့ တရုတ်ထုတ်ကုန်များတင်ပို့မှု အရှိန်မြှင့်နှိမ်နင်းမည်
အမေရိကန်၏ အခွန်ကောက်ခံမှုကို ရှောင်ရှားရန်အတွက် တရုတ်ကဲ့သို့ ပြည်ပနိုင်ငံများ၏ထုတ်ကုန်များတွင် တောင်ကိုရီးယားထုတ်ဟု တံဆိပ်ကပ်ဖုံးကွယ်မှုများကို အရှိန်မြှင့်နှိမ်နင်းမည်ဖြစ်ကြောင်း တောင်ကိုရီးယားတာဝန်ရှိသူများက ဧပြီ ၂၂ ရက်တွင် ပြောသည်။
ထိုသို့ ပြည်ပကုန်ပစ္စည်းများကို တောင်ကိုရီးယားတွင် ထုတ်လုပ်သည်ဟု တံဆိပ်ကပ်ထားသောထုတ်ကုန်အများအပြားကို တွေ့ရှိပြီးနောက် အရေးယူမည့်အစီအစဉ်ကို တောင်ကိုရီးယား အကောက်ခွန်ဌာနက ကြေညာခဲ့ခြင်းဖြစ်သည်။
လွန်ခဲ့သည့်နှစ် နိုဝင်ဘာလအတွင်းကလည်း အမေရိကန်သို့တင်ပို့သည့် တရုတ်နိုင်ငံမှ မွေ့ရာများတွင် တောင်ကိုရီးယား ထုတ်ကုန်များကဲ့သို့ ပုံဖျက်တံဆိပ်ကပ်မှုတွင်ပါဝင်သည့် သံသယဖြစ်ဖွယ် လုပ်ငန်းများကို ရှာဖွေတွေ့ရှိခဲ့သည်ဟုဆိုသည်။
ထို့ပြင် ဇန်နဝါရီလတွင် တရုတ်အမျိုးသားတစ်ဦးတင်သွင်းသည့်တရုတ်လုပ်ဘက်ထရီများတွင် တောင်ကိုရီးယား၌ တည်ထောင်ထားသည့် ကုမ္ပဏီတစ်ခု၏ ထုပ်ပိုးခြင်းနှင့်တံဆိပ်များကိုပြောင်းလဲကာ အမေရိကန်သို့တင်ပို့မှုတစ်ခုကိုလည်း တွေ့ရှိခဲ့သည်။
ထုတ်လုပ်သည့်နိုင်ငံ၊ တံဆိပ်အတုများဖြင့် တောင်ကိုရီးယားမှ အမေရိကန်သို့ ကုန်ပစ္စည်းတင်သွင်းမှုများကို တွေ့ရှိခဲ့ပြီး ယင်းမှာ တရုတ်နိုင်ငံအပေါ် အမေရိကန်ကောက်ခံနေသည့် အခွန် ၁၄၅ ရာခိုင်နှုန်းကို ရှောင်ရှားရန်ရည်ရွယ်ကြောင်း အကောက်ခွန်အရာရှိများကိုကိုးကား၍ တောင်ကိုရီးယားသတင်းဌာနများက ဖော်ပြထားသည်။
အင်န်အိတ်ချ်ကေ
