#နိုင်ငံတကာသတင်း
◼အပစ်ရပ်မှုဆက်လက်တည်မြဲနေပြီး အိန္ဒိယနှင့်ပါကစ္စတန်အရာရှိများ ရှေ့လာမည့် အဆင့်များကို ဆက်ဆွေးနွေးမည်
နှစ်ပေါင်း ၃၀ နီးပါးကာလအတွင်း အပြင်းထန်ဆုံးသောတိုက်ခိုက်မှုများ ဖြစ်ပေါ်ခဲ့ကာ အပစ်အခတ်ရပ်စဲမှုကြောင့် နယ်စပ်တွင် တည်ငြိမ်အေးချမ်းမှု ပြန်လည်ရရှိခဲ့ပြီးနောက် နျူကလီးယားပိုင်ဆိုင်သော အိမ်နီးချင်းနှစ်နိုင်ငံကြား ရှေ့ဆက်လုပ်ဆောင်မည့်အဆင့်များအတွက် အိန္ဒိယနှင့်ပါကစ္စတန်စစ်ဘက် အရာရှိများကြား ယနေ့ ဆွေးနွေးသွားကြမည်ဖြစ်ကြောင်း သိရသည်။
အပစ်အခတ်ရပ်စဲမှုအား ကနဦး ချိုးဖောက်မှုများရှိခဲ့ပြီးနောက် ယမန်နေ့ညက ပေါက်ကွဲမှုသို့မဟုတ် လက်နက်ကြီးပစ်ခတ်မှု သတင်းများမကြားရဘဲ မကြာသေးမီရက်များအတွင်း ပထမဆုံးငြိမ်သက်သောညတစ်ည ဖြစ်ခဲ့ကြောင်း အိန္ဒိယစစ်ဘက် ပြောကြားပြီး စာသင်ကျောင်းတချို့ကိုမူ ပိတ်ထားဆဲဖြစ်သည်။
လေးရက်ကြာကာလအတွင်း တစ်ဖက်နှင့်တစ်ဖက်စစ်စခန်းများကိုပါ ပစ်မှတ်ထားခဲ့သည့် ပြင်းထန်သော ပစ်ခတ်တိုက်ခိုက်မှုများဖြစ်ပေါ်ခဲ့ပြီး ဝါရှင်တန်ထံမှ သံတမန်ရေး နှင့် ဖိအားများရှိခဲ့ပြီးနောက် စနေနေ့က စတင်သည့် အပစ်ရပ်စဲမှုကို အမေရိကန်သမ္မတ ဒေါ်နယ်ထရန့် က ကြေညာခဲ့သည်။
စနေနေ့က အပစ်ရပ်ချိုးဖောက်မှုများနှင့် ပတ်သက်၍ အိန္ဒိယစစ်ဘက် က ပါကစ္စတန်ထံသို့ သတင်းစကားတစ်ရပ် တိုက်ရိုက်ပေးပို့ခဲ့ကာ ချိုးဖောက်မှုများ ထပ်မံဖြစ်ပေါ်ခဲ့ပါက လက်တုံ့ပြန်မည့်အကြောင်းကို ပြောကြားခဲ့ကြောင်း အိန္ဒိယစစ်ဘက် အရာရှိကြီးတစ်ဦး က ပြောကြားသည်။
နှစ်ဖက်စလုံးမှ စစ်ဆင်ရေးဆိုင်ရာ ကွပ်ကဲရေးမှူးချုပ်နှစ်ဦး က ယနေ့ နေ့လယ် ၁၂ နာရီ၌ ဆက်သွယ်စကားပြောကြမည်ဖြစ်ကြောင်း စနေနေ့က ထုတ်ပြန်ချက်တစ်ရပ်တွင် အိန္ဒိယ နိုင်ငံခြားရေးဝန်ကြီး ဌာနက ပြောကြားသည်။ ပါကစ္စတန်ဘက်ကမူ ယင်းအစီအစဉ်နှင့်ပတ်သက်၍ မှတ်ချက်ပေးခြင်းမရှိပေ။
ခရီးသွား ၂၆ ဦးသေဆုံးခဲ့သော တိုက်ခိုက်မှုအတွက် အိန္ဒိယက ပါကစ္စတန်အား အပြစ်တင်ခဲ့ပြီးနောက် နှစ်ဖက်ကြားဆက်ဆံရေးဆိုးရွားသွားခဲ့ပြီး မဟာပြိုင်ဘက်နှစ်ဦး က စစ်စခန်းများကိုပါ ပစ်မှတ်ထားတိုက်ခိုက်ခဲ့ကြပြီး အရပ်သားများလည်း ဒါဇင်နှင့်ချီ၍ သေဆုံးခဲ့သည်။
အဆိုပါ စွပ်စွဲမှုများကို ပါကစ္စတန် က ငြင်းဆိုပြီး ဘက်မလိုက်သော စုံစမ်းစစ်ဆေးမှုလုပ်ရန် တောင်းဆိုခဲ့သည်။
ပါကစ္စတန်နှင့် ပါကစ္စတန်ပိုင်ကက်ရှ်မီးယားဒေသမှ အကြမ်းဖက် အခြေခံအဆောက်အဦးများအား တိုက်ခိုက်ခဲ့ကြောင်း အိန္ဒိယက ပြောကြားသော်လည်း ယင်းနေရာများမှာ အရပ်သားနေရာဌာနများဖြစ်ကြောင်း ပါကစ္စတန်အစိုးရ က ပြောကြားသည်။
အပစ်အခတ်ရပ်စဲမှုရရှိအောင် စွမ်းဆောင်ပေးခဲ့ခြင်းအတွက် ဝါရှင်တန်ကို ကျေးဇူးတင်ကြောင်း အစ္စလာမာဘတ် က ပြောပြီး အိန္ဒိယနှင့်ဖြစ်နေသည့် ကက်ရှ်မီးယားအငြင်းပွားမှုအား ကြားဝင်စေ့စပ်ပေးမည်ဟူသော ထရန့်၏ ကမ်းလှမ်းမှုကို ကြိုဆိုခဲ့သော်လည်း နယူးဒေလီက အမေရိကန်ပါဝင်ပတ်သက်မှုအကြောင်း သို့မဟုတ် ကြားခံနေရာတစ်ခု၌ဆွေးနွေးမည့်ကြောင်းကို ဖွင့်ဟ ပြောဆိုခြင်းမရှိကြောင်း ရိုက်တာသတင်းက ဖော်ပြသည်။
ပါကစ္စတန်နှင့် အငြင်းပွားမှုများကို နှစ်ဖက်ကြားတိုက်ရိုက်ဖြေရှင်းရမည် ဖြစ်ကြောင်း အိန္ဒိယ က ပြောကြားကာ ကြားလူပါဝင်ပတ်သက်မှုများကို ပယ်ချခဲ့ကြောင်း သိရသည်။
သတင်း-ရဲမင်း
