စွမ်းအင်နဲ့ ဓါတ်သတ္တုဆိုင်ရာ သဘောတူညီချက် အမေရိကန်နဲ့ ယူကရိန်း လက်မှတ်ထိုး
ဝါရှင်တန်၊
မျိုးဆက်(VOM)
ယူကရိန်းရဲ့ စွမ်းအင်နဲ့ ဓါတ်သတ္တုအရင်းအမြစ်တွေကို ပူးတွဲအသုံးချရေး သဘောတူညီချက်ကို ယူကရိန်းနဲ့ အမေရိကန်တို့ လက်မှတ်ရေးထိုးလိုက်ပါတယ်။
ရုရှားနဲ့ စစ်ပွဲအပြီးမှာ ယူကရိန်းစီးပွားရေး နာလန်ထူစေဖို့ ပြန်လည်တည်ဆောက်ရေး ရင်းနှီးမြုပ်နှံမှု ရန်ပုံငွေထူထောင်ဖို့ကိုလည်း ယူကရိန်းနဲ့ အမေရိကန်တို့ သဘောတူခဲ့ပါတယ်။ ယူကရိန်းမှာ ရေရည်တည်တံ့တဲ့ ငြိမ်းချမ်းရေးနဲ့ သာယာ၀ပြောရေးကို နှစ်ဖက်စလုံးက ကတိကဝတ်ပြုထားကြောင်း အမေရိကန်ဘဏ္ဍာရေးဝန်ကြီး စကော့ဘက်ဆန့်က ပြောပါတယ်။
ယူကရိန်းကတော့ ဒီသဘောတူညီချက်ဟာ အမေရိကန်ရဲ့ စစ်ဘက်ဆိုင်ရာ အကူအညီတွေရယူရေးအတွက် မရှိမဖြစ်လိုအပ်တယ်လို့ အကဲခတ်တွေက ဆိုပါတယ်။ ယူကရိန်းမှာ ဂရပ်ဖိုက်၊ တိုက်တေနီယံနဲ့ လစ်သီယမ်လို အရေးပါတဲ့ ဓါတ်သတ္တုအများအပြားရှိတယ်လို့ ယုံကြည်ရပါတယ်။
ရှားပါးသတ္တုတွေဟာ ပြန်လည်ပြည့်ဖြိုးမြဲစွမ်းအင်၊ စစ်ဘက်ဆိုင်ရာ ပစ္စည်းတွေနဲ့ စက်မှုအခြေခံအဆောက်အအုံတွေမှာ အရေးပါတာကြောင့် လိုအပ်ချက်မြင့်မားနေပါတယ်။ ကမ္ဘာမြေရှားသတ္တုတွေရဲ့ ၉၀ ရာခိုင်နှုန်းစျေးကွက်ရှိနေတဲ့ တရုတ်နဲ့အမေရိကန်တို့အကြား ကုန်သွယ်ရေးစစ်ပွဲ အရှိန်မြင့်နေချိန်မှာ ယူကရိန်းနဲ့ အမေရိကန်တို့ သဘောတူညီချက် ရယူခဲ့တာဖြစ်ပါတယ်။
သယံဇာတအရင်းအမြစ်တွေကို ယူကရိန်းက ထိန်းချုပ်သွားမှာဖြစ်ပြီး ဓါတ်သတ္တု၊ ရေနံနဲ့ သဘာ၀ဓါတ်ငွေ့ဆိုင်ရာ စီမံကိန်းတွေမှာ အမေရိကန်ကုမ္ပဏီတွေက ပါဝင်သွားမှာဖြစ်ကာ ထုတ်လုပ်မှုအကျိုးအမြစ် အချိုးတူရရှိမှာဖြစ်ပါတယ်။
ဒီသဘောတူညီချက်အပါအဝင် စစ်ရေးကူညီထောက်ပံ့မှုတွေ ဆွေးနွေးဖို့ ယူကရိန်းသမ္မတ ဇီလန်စကီးဟာ ဖေဖော်ဝါရီလအတွင်းက အိမ်ဖြူတော်ကို သွားရောက်ခဲ့ပေမယ့်လည်း ဒေါ်နယ်ထရန့်နဲ့ စကားအခြေအတင်များပြီးနောက်မှာ သဘောတူညီချက်အတွက် နှောင့်နှေးခဲ့ပါတယ်။
