MySPACE

24 w - Translate

ဝက်လက်မြို့နယ်ရှိ (၃၂၇)ဧကအား ရှိမ္မကားတောရကြီးကျောင်း တောရိုင်းတိရစ္ဆာန်ဘေးမဲ့တောအဖြစ်သတ်မှတ်

စစ်ကိုင်းတိုင်း၊ ဝက်လက်မြို့နယ်ရှိ (၃၂၇)ဧကကို ဇီဝမျိုးစုံမျိုးကွဲများထိန်းသိမ်းကာကွယ်ရန်အတွက် “ရှိမ္မကားတောရကြီးကျောင်း တောရိုင်းတိရစ္ဆာန်ဘေးမဲ့တော”အဖြစ်သတ်မှတ်ကြောင်း သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနမှ အမိန့်ကြော်ငြာစာအမှတ်(၁၂ /၂၀၂၅)ဖြင့် ဇန်နဝါရီ ၂၃ ရက်ကကြေညာခဲ့သည်။

ရှိမ္မကားတောရကြီးကျောင်း တောရိုင်းတိရစ္ဆာန်ဘေးမဲ့တောသည် ဝက်လက်မြို့နယ်၊ မ္မကားကျေးရွာနှင့် ငါးရယ်ကျေးရွာကြား ဧရာဝတီမြစ် ကမ်းဘေးတွင်ရှိကာ ဆရာတော်ကြီးများက ခေတ်အဆက်ဆက်ထိန်းသိမ်းစောင့်ရှောက်ခဲ့သဖြင့် တောတောင်သဘာဝအလှအပရှုခင်းများ၊ အဖိုးတန်ရှေးဟောင်းယဉ်ကျေးမှုလက်ရာအဆောက်အအုံများ ယနေ့တိုင်တည်ရှိနေသည့်နေ ရာဖြစ်သည်။

အဆိုပါ ဘေးမဲ့တောအတွင်း သဘာဝဝန်းကျင်ထိန်းသိမ်းရေးအပြည်ပြည်ဆိုင်ရာအဖွဲ့(IUCN) ၏ ကာကွယ်ထိန်းသိမ်းမှုအဆင့်သတ်မှတ်ချက်အရ မျိုးသုဉ်းရန်အန္တရာယ်ရှိသော ရှားပါးမျိုးစိတ်စာရင်းဝင်ပြီး မြန်မာနိုင်ငံတွင်သာ ပေါက်ဖွားကျက်စားသော မြန်မာ့ရွှေသမင်များနှင့် တောကြောင်မျိုးစိတ်များ၊ ရှဉ့်၊ တွားသွားသတ္တဝါများနှင့် ခါ၊ ရွှေပြည်စိုး၊ ကြက်တူရွေးငှက်မျိုး စိတ်များ နေထိုင်ကျက်စားလျက်ရှိသည်။

ထို့ပြင် အပူပိုင်းတောခြောက်အမျိုးအစားတွင် ရှင်သန်သည့် သန်း၊ ဒဟတ်၊ တမာ၊ ရှား၊ ကုက္ကိုသစ်မျိုးများနှင့် အခြားအပင်မျိုးစိတ်များလည်း ပေါက်ရောက်လျက်ရှိသည်။

ထို့ကြောင့် ရှိမ္မကားတောရကြီးကျောင်း တောရိုင်းတိရစ္ဆာန်ဘေးမဲ့တောအား ငှက်မျိုးစိတ်များ ကျက်စားရာဒေသဖြစ်သောကြောင့် ရှေရှည်တည်တံ့စေရန်၊ အပူပိုင်းဒေသဂေဟစနစ်များကို ထိန်းသိမ်းကာကွယ်စောင့်ရှောက်နိုင်စေရန်တို့အတွက်ရည်ရွယ်၍ “ရှိမ္မကားတောရကြီးကျောင်း တောရိုင်းတိရစ္ဆာန်ဘေးမဲ့တော”အဖြစ် သတ်မှတ်ဖွဲ့စည်းခဲ့ခြင်းဖြစ်ပါသည်။