#နိုင်ငံတကာသတင်း
◼ ဝါရှင်တန်နှင့် ကုန်သွယ်ရေးဆွေးနွေးမှုတွင် အမေရိကန်ငွေတိုက်စာချုပ်များက လက်နက်ကိရိယာတစ် ခုဖြစ်ကြောင်း ဂျပန်ပြောကြား
ဝါရှင်တန်နှင့်ကုန်သွယ်ရေးဆွေးနွေးမှုများတွင် အမေရိကန်ဒေါ်လာ တစ်ထရီလီယံနှင့်အထက် တန်ဖိုးရှိသော အမေရိကန်ဗဟိုဘဏ်ငွေတိုက်စာချုပ်များကို ဂျပန်က အသုံးချနိုင်ကြောင်း ဂျပန်ဘဏ္ဍာရေးဝန်ကြီး က ယနေ့ တွင်ပြောကြားလိုက်ရာ အမေရိကန်၏ ကြီးမားသော မြီရှင်အဖြစ် ဂျပန်၏အလေးသာမှုူကို ပထမဆုံးအကြိမ် ထုတ်ဖော်ပြောခြင်းဖြစ်ကြောင်း ရိုက်တာသတင်းအရ သိရသည်။
ဘဏ္ဍာရေးဝန်ကြီး ကတ်ဆူနိုဘူကာတို က ယင်း စာချုပ်များကို ရောင်းချသွားမည်ဟု ခြိမ်းခြောက်ခဲ့ခြင်း မရှိသော်လည်း ထရန့်အစိုးရထံမှ လိုက်လျောမှုများ ရရှိအောင်လုပ်ဆောင်ရာ၌ အမေရိကန်အစိုးရကြွေးမြီများကို အများဆုံးပိုင်ဆိုင်ထားသော ဂျပန် နှင့် တရုတ် က မည်သို့အရေးယူကြမည်ဆိုခြင်းနှင့် ပတ်သက်၍ ကမ္ဘာတစ်ဝန်းမှ ရင်းနှီးမြုပ်နှံသူများ စိုးရိမ်နေသော အကြောင်းအရာကို တို့ထိလိုက်ခြင်းဖြစ်သည်။
ဂျပန်ကဲ့သို့ အရေးပါသော မဟာမိတ်များ အပါအဝင် ကုန်သွယ်ဖက်နိုင်ငံများအပေါ် ကြီးမားသော အခွန်များချမှတ်သွားရန် အမေရိကန်သမ္မတ ဒေါ်နယ်ထရန့်၏ ဧပြီ ၂ ရက် ဆုံးဖြတ်ချက် ထွက်ပေါ်ခဲ့ပြီးနောက် ပြီးခဲ့သည့် လအတွင်း အမေရိကန် ငွေတိုက်စာချုပ်များအား အကြီးအကျယ်ရောင်းချမှု ဖြစ်ပေါ်ခဲ့သည်။
ကမ္ဘာပေါ်တွင် အမေရိကန်ငွေတိုက်စာချုပ်များ အများဆုံး ဝယ်ယူထားရသော ဂျပန်နိုင်ငံ၏ အဓိရည်ရွယ်ချက်မှာ လိုအပ်လာခဲ့ပါက ယန်းငွေအတွက် ကျားကန်ပေးရန် လုံလောက်သောပမဏ ထားရှိရေးဖြစ်ကြောင်း မစ္စတာကာတို က ဆိုသည်။
“ ဒါပေမယ့်လည်း သေချာတာကတော့ ကျွန်တော်တို့အနေနဲ့ ဆွေးနွေးညှိနှိုင်းမှုတွေမှာ ရွေးချယ်စရာကတ်တွေ အကုန်လုံးကို စားပွဲမှာ ထားဖို့လိုပါတယ်။ ငွေတိုက်စာချုပ်တွေကလည်း အဲဒီထဲ က ကတ်တစ်ခုဖြစ်နိုင်ပါတယ်။” ဟု မေးခွန်းတစ်ခုအား တုံ့ပြန်ရင်း ကာတာက ပြောကြားသည်။
အမေရိကန်နှင့်ဆွေးနွေးမှုများတွင် အမေရိကန် ငွေတိုက်စာချုပ်များကို ရောင်းချသွားမည်မဟုတ်ဟု ဂျပန် က အာမခံနိုင်ပါသလားဟု သတင်းထောက်က ကာတို အား မေးမြန်းချိန်၌ ကာတို က အထက်ပါအတိုင်း တုံ့ပြန်ခြင်းဖြစ်သည်။
ယင်းကတ်ကို မိမိတို့ အမှန်တကယ်အသုံးပြုမည် ဆိုသည်မှာ သီးခြားကိစ္စဖြစ်ကြောင်း ကာတိုက ဆက်လက်ပြောသည်။
ယင်းကိစ္စနှင့်ပတ်သက်၍ မှတ်ချက်ပေးရန် တောင်းဆိုမှုကို ရုံးချိန်ပြင်ပဖြစ်၍ အမေရိကန်ဘဏ္ဍာရေးဌာနက ချက်ခြင်းမတုံ့ပြန်ခဲ့ကြောင်း ရိုက်တာသတင်းက ဖော်ပြသည်။
ကာတို၏ ယနေ့မှတ်ချက်များသည် ပြီးခဲ့သည့် လ က အမေရိကန်ငွေတိုက်စာချုပ်များအား ရောင်းချသွားမည်မဟုတ်ဟု၎င်းပြောကြားခဲ့သည့်မှတ်ချက်များနှင့်အလွန်ခြားနားသွားကြောင်းရိုက်တာသတင်းက ဆက်လက်ဖော်ပြသည်။
သတင်း-ရဲမင်း
ကိုးကား-Reuters
