မိဘများ၏ ကျေးဇူးကိုသိတတ်ရန်နှင့်ကျေးဇူးဆပ်ရန်လိုသကဲ့သို့ တပ်မတော်အပေါ်တွင်လည်း ကျေးဇူးသစ္စာစောင့်သိရန် တပ်ချုပ်မှာကြား
ဒီဇင်ဘာ ၁၂ ရက်နံနက်ပိုင်းက ပြင်ဦးလွင်မြို့ရှိ တပ်မတော်နည်းပညာတက္ကသိုလ် ဗိုလ်လောင်းသင်တန်းအမှတ်စဉ်(၂၆)၏ သင်တန်းဆင်းဂုဏ်ပြုစစ်ရေးပြအခမ်းအနားအပြီးတွင် ထူးချွန်ဆုရရှိခဲ့ကြသည့် ဗိုလ်လောင်းများနှင့် ၎င်းတို့၏မိဘဆွေမျိုးများကို တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က တွေ့ဆုံ၍ ဂုဏ်ပြုအမှာစကားပြောကြားခဲ့သည်။
ဗိုလ်ချုပ်မှူးကြီးမင်းအောင်လှိုင်က " ကျွေးမွေးပြုစုစောင့်ရှောက်ခဲ့တဲ့ မိဘတွေရဲ့ ကျေးဇူးကိုသိတတ်ဖို့နဲ့ ကျေးဇူးဆပ်ဖို့လိုအပ်သလို တပ်မတော်အပေါ်မှာလည်း ကျေးဇူးသစ္စာ စောင့်သိရပါမယ် မိမိတို့ရဲ့ ရည်မှန်းချက်တွေ အောင်မြင်ဖို့၊ မိသားစုတွေရဲ့ ရည်မှန်းချက်တွေ မပပျောက်စေဖို့အတွက် စစ်သားကောင်းတစ်ယောက်ပီသစွာနဲ့ ဘဝတစ်လျှောက်လုံးဆက် လက်ကြိုးစားဆောင်ရွက်သွားရပါမယ်"ဟု မှာကြားသည်။
ထို့ပြင် မိမိကိုယ်ကိုထိန်းထိန်းသိမ်းနေထိုင်ပြီး မိသားစု၊ တပ်မတော်နှင့် နိုင်ငံတော်အတွက် အားကိုးအားထားရသည့် ခေါင်းဆောင်ကောင်းများဖြစ်ရန် စဉ်ဆက်မပြတ်ကြိုးပမ်းဆောင်ရွက်သွားကြရမည်ဟု ပြောသည်။
ထို့အတူ တန်ဖိုးရှိသည့်ပညာရပ်များကိုသင်ယူခဲ့ရသဖြင့် မိမိတို့၏ ရည်မှန်းချက်နှင့်ရည်ရွယ်ချက်ပန်းတိုင်များ မပျောက်ပျက်အောင် ဆက်လက်ကြိုးပမ်းဆောင်ရွက်သွားကြရမည်ဟုလည်း မှာကြားခဲ့သည်။
တပ်မတော်နည်းပညာတက္ကသိုလ်ဗိုလ်လောင်းသင်တန်းအမှတ်စဉ်(၂၆)တွင် အောင်စစ်သည် ဆုအား ဗိုလ်လောင်းဖြိုးကိုကို၊ လေ့ကျင့်ရေးထူးချွန်ဆုအား ဗိုလ်လောင်း သန်းထိုက်အောင် နှင့် စာပေထူးချွန်ဆုအား ဗိုလ်လောင်းအောင်ဖြိုးခိုင်တို့ရရှိခဲ့ကြပြီး ဗိုလ်ချုပ်မှူးကြီးမင်းအောင်လှိုင်မှ ဆုများပေးအပ်ချီးမြှင့်ခဲ့သည်။
