နေမျက်နှာပြင်ပေါ်မှာ ဖြစ်ပေါ်နေတဲ့ ကိုရိုနာ(Corona) တွေဟာ ငလျင်ဖြစ်ပေါ် ခြင်းနဲ့ သက်ဆိုင်မှု မရှိပါ။
Corona ဟာ နေလုံးရဲ့ မျက်နှာပြင်ပေါ်က သာမန်နေရာတွေထက် အပူချိန်ပိုများတဲ့ ဒေသတွေကို ဆိုလိုတာ ဖြစ်ပါတယ်။
Corona ဟာ ခရမ်းလွန်ရောင်ခြည်(Ultraviolet Ray) လွန်ကဲနေတဲ့ ဒေသတွေ ဖြစ်ပြီး သူတို့ကို နေမျက်နှာပြင်ပေါ်မှာ အမည်းရောင် အစက်ပြောက်တွေ အနေနဲ့ တွေ့နိုင်ပါတယ်။
Corona ဖြစ်ပေါ်နေတဲ့ ဒေသတွေဟာ သံလှိုက်စက်ကွင်း(Magnetic Field) ကျယ်ပြန့်ကြတဲ့အတွက် အပူလှိုင်းတွေ အာကာသထဲကို လွှတ်ထွက်လာပြီး Solar Wind ကို ဖြစ်ပေါ်စေနိုင်တယ် ဆိုတာ မှန်ပေမဲ့၊ Corona ကြောင့် ငလျင်ကို ဖြစ်စေတယ် ဆိုတာ အချက်အလက်အမှား တစ်ခုသာ ဖြစ်ပါတယ်။
နေလုံးကနေ ဖြစ်ပေါ်လာတဲ့ Solar Wind တွေ၊ Solar Storm တွေ၊ Solar Flare တွေ၊ Coronal Mass Ejection(CME) နဲ့ Radiation တွေဟာ အစွန်းကုန် ကမ္ဘာ့သံလိုက်စက်ကွင်းကိုသာ သက်ရောက်မှု ရှိပါတယ်။
စွမ်းအင်မြင့် CME တွေနဲ့ Corona တွေဟာ ကမ္ဘာ့သံလိုက်စက်ကွင်းအထဲကို ရောက်လာတဲ့အခါ လျှပ်စစ်စီးကြောင်း(Electric current) တွေကိုတော့ ထိခိုက်မှု ရှိပါတယ်။ Corona တွေဟာ ကမ္ဘာ့ရဲ့ အပေါ်ယံလေထုအလွှာကို ခဏတဖြုတ် သက်ရောက်သွားတာကြောင့် ဂြိုလ်တု(Satellite) တွေ အလုပ် မလုပ်တော့တာမျိုးတွေနဲ့ ကမ္ဘာ့ရဲ့ တောင်ကမ္ဘာခြမ်းနဲ့ မြောက်ကမ္ဘာခြမ်းဒေသတွေမှာ ဥတ္တရအလင်းတန်း(Aurora) တွေကိုသာ ဖြစ်ပေါ်စေတာ ဖြစ်ပါတယ်။ ဒီ Corona တွေကြောင့် ငလျင်ကို မဖြစ်စေပါဘူး။
ငလျင်ဟာ ကမ္ဘာ့ကျောက်အလွှာ (Tectonic Plate) ရွေ့လျားမှုကြောင့် ဖြစ်ပေါ်လာတဲ့ သဘာဝဘေးတစ်ခု ဖြစ်ပါတယ်။ ငလျင်ဟာ ဘယ်နေရာမှာ ဘယ်လိုပုံစံနဲ့ လှုပ်သွားသလဲ ဆိုတဲ့ အချက်အပေါ်မှာပဲ မူတည်နေတာပါ။ ငလျင်ဖြစ်ပေါ် ခြင်းကို အရှင်းဆုံး ဆိုရရင် ကမ္ဘာ့ကျောက်အလွှာဟာ စုစည်းထားတဲ့ ဖိအားတွေကို ရုတ်တရက် လွှတ်ထုတ်လိုက်တာပါ။ ဖိအားတွေဟာ နေရာအနှံ့ကို ပျံ့နှံ့သွားပြီး ဒါကို ကျွန်တော်တို့က ငလျင်လို့ သိထားကြပါတယ်။ ငလျင်ဟာ အချိန်မရွေး၊ နေရာမရွေးမှာ ဖြစ်နိုင်ပြီး ကြိုတင်ခန့်မှန်းလို့လဲ မရနိုင်ပါ။
နေကနေ လာတဲ့ Corona ဟာ ကမ္ဘာ့လေထုအလွှာ အနည်းငယ်နဲ့ သံလိုက်စက်ကွင်းအပေါ်ကိုသာ သက်ရောက်မှု ရှိနိုင်ပြီး ကမ္ဘာ့မြေထုအလွှာနဲ့ သက်ဆိုင်မှု မရှိပါဘူး။ Corona ကြောင့် သံလိုက်စက်ကွင်းကို သက်ရောက်စေသော်ငြား ကမ္ဘာရဲ့ သံလိုက်စက်ကွင်းနဲ့ လျှပ်စစ်စက်ကွင်းပြောင်းလဲမှုတွေဟာလဲ ငလျင်ဖြစ်ပေါ် ခြင်းနဲ့ သက်ဆိုင်မှု မရှိပါ။
၁၉၈၉ ခုနစ်မှာ အမေရိကန်အခြေစိုက် ပထဝီမြေဆိုင်ရာ သုတေသနပြုတဲ့ အဖွဲ့ (USGS) ဟာ ကယ်လီဖိုးနီးယားပြည်ထောင်စု၊ Parkfield ဒေသမှာ လျှပ်စစ်နဲ့ သံလိုက်စက်ကွင်းအာရုံခံ ကိရိယာတွေ အပါအဝင် တခြား မြေကြီးအချက်အလက်တွေကို တိုင်းတာတဲ့ ကိရိယာတွေနဲ့ စမ်းသပ်မှု ပြုပြီး ငလျင်ကို ခန့်မှန်းဖို့ ကြိုးစားခဲ့ကြပါတယ်။
ဒါပေမဲ့ ငလျင်မဖြစ်ပေါ်ခင်မှာလဲ လျှပ်စစ်၊ သံလိုက်စက်ကွင်း ပြောင်းလဲဲမှု မရှိသလို ဘာလက္ခဏာမှလဲ မပြခဲ့ပါဘူး။ နောက် ၁၉နှစ်အကြာ၊ ၂၀၀၄ ခုနစ်ကို ရောက်တဲ့ အခါမှသာ ငလျင်ဖြစ်ပေါ်ခဲ့ပါတယ်။
ရုရှားအခြေစိုက် အာကာသနဲ့ ငလျင်ဆိုင်ရာ လေ့လာရေးအဖွဲ့(Russian Space Weather and Seismic Studies) က ၁၉၉၀ ခုနစ်နဲ့ ၂၀၀၀ ခုနစ်အထိ Corona ဟာ ကမ္ဘာ့ကျောက်အလွှာကို သက်ရောက်မှု ရှိ၊ မရှိကို သုတေသနပြုခဲ့ပါတယ်။ ငလျင်ဖြစ်ပါတယ် ဆိုတဲ့ ခိုင်လုံတဲ့ အချက်အလက်ကို မရှာနိုင်ခဲ့သလို Corona ကြောင့် ငလျင်ဖြစ်ကြောင်းကိုလဲ သက်သေမပြနိုင်ခဲ့ပါဘူး။
ဒီလို သိပ္ပံနည်းကျ အချက်အလက်တွေကြောင့် ငလျင်ဟာ ကမ္ဘာ့အတွင်းပိုင်းက ပထဝီမြေဆိုင်ရာ ဖိအားပြောင်းလဲခြင်း (Internal Geological Stress) နဲ့သာ သက်ဆိုင်မှု ရှိပြီး ပြင်ပ သက်ရောက်မှု(External Stress) နဲ့ မသက်ဆိုင်ပါဘူးဆိုတာ ထင်ရှားပါတယ်။
NASA နဲ့ USGS (United States Geological Survey) လို သိပ္ပံအဖွဲ့အစည်းတွေကလဲ Corona နဲ့ ငလျင်ဖြစ်ပေါ်မှုဟာ သက်ဆိုင်မှု မရှိဘူးလို့ အခိုင်အမာ အဆိုပြုထားပြီး ဖြစ်ပါတယ်။
ပြည်သူများအနေနဲ့ ယုံကြည်စိတ်ချရတဲ့ သတင်းဌာနတွေ၊ တကယ်တတ်ကျွမ်းနားလည်တဲ့ ပညာရှင်တွေဆီကနေပဲ စောင့်ကြည့်နားထောင်ဖို့နဲ့ ဘယ်အရာကို မဆို စဥ်းစားတွေးခေါ် ပြီး အမှန်နဲ့ အမှားကို ခွဲခြားကြဖို့ကို တိုက်တွန်းနှိုးဆော်လိုက်ပါတယ်။
