◾တာချီလိတ်၌တင်ကျန်နေသည့်နုန်းများထဲမှ လူသေအလောင်းတွေ့ရှိ
ရှမ်းပြည်နယ်(အရှေ့ပိုင်း)၊ တာချီလိတ်မြို့၌ ရေကြီးရေလျှံဖြစ်ခဲ့သည့် မကာဟိုခမ်းရပ်ကွက်တွင် ယမန်နေ့(သြဂုတ် ၂၃ ရက်) မွန်းလွဲ ၂ နာရီခန့်ကနုန်းများထဲမှလူသေအလောင်းတစ်လောင်းတွေ့ရှိခဲ့ကြောင်း ဦးလှမိုးလူမှုကူညီရေးအသင်းထံမှသိရသည်။
မကာဟိုခမ်းရပ်ကွက်ရှိ မေဖလားဝါးကွင်း ဟုန်တက်ခန်းမဘေး၌ ရေကျသွားချိန်တွင် တင်ကျန်နေသောနုန်းများထဲမှ အမျိုးသားအလောင်းတစ်လောင်းတွေ့ရှိခဲ့ပြီး ဦးလှမိုးလူမှုကူညီအသင်းက ဆေးရုံသို့ ပို့ဆောင်ပေးခဲ့ကြောင်းသိရသည်။
“အတိကျပြောရတာတော့ခက်ပါတယ်။ ပြောစကားတွေကတော့ သေဆုံးသူကအရက်သောက်ထားလို့ ရေစီးထဲဖြတ်ကူးချိန်မျောပါပြီး နုန်းနွံနေရာမှာပြန်မထနိုင်ဘဲ နစ်မြုပ်သေဆုံးတယ်လို့ပြောတာပဲ” ဟု ဦးလှမိုးလူမှုကူညီရေးအသင်းမှ တာဝန်ရှိသူတစ်ဦးကပြောသည်။
ယခုနှစ်တာချီလိတ်ရေကြီးမှုမှာ ယမန်နေ့(သြဂုတ် ၂၃ ရက်) တွင် (၁၂)ကြိမ်မြောက်ရေကြီးခြင်းဖြစ်ပြီး လူသေဆုံးမှုမှာ ယခုနှစ်အတွင်းပထမဆုံးသေဆုံးသူဖြစ်ကြောင်းသိရသည်။
သတင်း - ပိုင်လေး
ဓာတ်ပုံ - ဦးလှမိုးလူမှုကူညီရေးအသင်း
#ပြည်တွင်းသတင်း
