ယာယီသမ္မတ ဦးမြင့်ဆွေ ကွယ်လွန်ကြောင်း အတည်ပြုထုတ်ပြန်လိုက်ပြီး နိုင်ငံတော်ဈာပန ကျင်းပမယ်
ဩဂုတ် ၇ - ၂၀၂၅
SS (VOM)
ယာယီသမ္မတ ဦးမြင့်ဆွေဟာ ဒီကနေ့ ဩဂုတ် ၇ ရက်၊ မနက် ၈ နာရီ ၂၈ မိနစ်က အမှတ် (၂) တပ်မတော်ဆေးရုံကြီးမှာ ကွယ်လွန်သွားခဲ့ပြီ ဖြစ်ပြီး ဈာပနအခမ်းအနားကို နိုင်ငံတော်အဆင့် ကျင်းပသွားမှာ ဖြစ်တယ်လို့ အမျိုးသားလုံခြုံရေးနှင့် ကာကွယ်ရေးကောင်စီ (ကာလုံ) သတင်းထုတ်ပြန်ရေးအဖွဲ့က ကြေညာချက် ထုတ်ပြန်ထားပါတယ်။
ယာယီသမ္မတ ဦးမြင့်ဆွေဟာ အာရုံကြောတွေ နှေးကွေးတုန့်ဆိုင်းတဲ့ ရောဂါ (Parkinson’s Disease) အပြင် အဆိုပါရောဂါနဲ့ ဆက်စပ်ဖြစ်ပေါ်တဲ့ အာရုံကြော အားနည်းရောဂါတွေနဲ့ ကွယ်လွန်သွားခဲ့တာဖြစ်ပြီး ကွယ်လွန်ချိန်မှာ အသက် (၇၄) နှစ် ရှိပြီဖြစ်တယ်လို့ သိရပါတယ်။
ယာယီသမ္မတရဲ့ ကျန်းမာရေး အခြေအနေနဲ့ ပတ်သက်လို့ အမျိုးသားလုံခြုံရေးနှင့် ကာကွယ်ရေးကောင်စီ (ကာလုံ) သတင်းထုတ်ပြန်ရေး အဖွဲ့က ပြီးခဲ့တဲ့ ဩဂုတ် ၅ ရက်၊ ညနေပိုင်းက ကြေညာချက်တစောင် ထုတ်ပြန်ခဲ့တာမှာ သူဟာ ၂၀၂၃ ခုနှစ်၊ နှစ်ဆန်းပိုင်းမှ စတင်ကာ လှုပ်ရှားရာမှာ တုန့်နှေးခြင်းနဲ့ အစာအာဟာရ စားသုံးနိုင်မှု အားနည်းလာခြင်းတို့ကို စတင် ခံစားခဲ့ရတာ ဖြစ်တယ်လို့ အဲဒီ ထုတ်ပြန်ချက်မှာ ဖော်ပြထားပါတယ်။
ဒါကြောင့် အထူးကု ဆရာဝန်ကြီးတွေ ပါဝင်တဲ့ အထူးဆေးကုသမှုအဖွဲ့က ကျန်းမာရေး စစ်ဆေးမှုတွေ ဆောင်ရွက်ခဲ့တာမှာ အာရုံကြောတွေ နှေးကွေးတုန့်ဆိုင်းတဲ့ ရောဂါ (Parkinson’s Disease)နဲ့ အဆိုပါ ရောဂါနဲ့ ဆက်စပ်တဲ့ အာရုံကြောအားနည်းခြင်း ရောဂါတွေ ခံစားနေရတာကို တွေ့ရှိခဲ့ရတာ ဖြစ်တယ်လို့ ဆိုပါတယ်။
အဆိုပါ ရောဂါတွေနဲ့ ပတ်သက်လို့ ပြည်တွင်းမှာသာမက စင်ကာပူနိုင်ငံမှာပါ ဆေးကုသမှုတွေ အကြိမ်ကြိမ် ခံယူခံပေမယ့်လည်း တိုးတက် ကောင်းမွန်လာခြင်း မရှိခဲ့ဘဲ ပြီးခဲ့တဲ့ ဇူလိုင်လ ၂၄ ရက်နေ့မှာ အမှတ် (၂) တပ်မတော်ဆေးရုံကြီး၊ ခုတင် (၁၀၀၀)၊ အထူးကြပ်မတ် ကုသဆောင်မှာ ထပ်မံ ဆေးရုံတက်ရောက် ဆေးကုသမှု ခံယူရင်း ကွယ်လွန်ခဲ့တာ ဖြစ်တယ်လို့ သိရပါတယ်။
ဦးမြင့်ဆွေကို အဖ ဦးကြီးမောင်၊ အမိ ဒေါ်ကြည်တို့က ၁၉၅၁ ခုနှစ်၊ ဇွန်လ ၂၄ ရက်နေ့မှာ မန္တလေးမြို့မှာ မွေးဖွားခဲ့တာဖြစ်ပြီး မွန်လူမျိုးတယောက် ဖြစ်တယ်လို့ သိရပါတယ်။
၁၉၇၁ ခုနှစ်မှာ စစ်တက္ကသိုလ်မှ အပတ်စဉ် ၁၅ နဲ့ ဘွဲ့ရရှိခဲ့ပြီး ၁၉၉၇ ခုနှစ်မှာ ဗိုလ်မှူးချုပ်နဲ့ အမှတ် (၁၁) ခြေမြန်တပ်မ ဌာနချုပ် တပ်မမှူး ဖြစ်လာခဲ့တယ်လို့ သိရပါတယ်။
၂၀၀၁ ခုနှစ်မှာ ရန်ကုန်တိုင်း စစ်ဌာနချုပ် တိုင်းမှူးအဖြစ် ဗိုလ်ချုပ်ရာထူးနဲ့ တိုးမြှင့် ခန့်အပ်ခြင်းခံရပြီး ရန်ကုန်တိုင်း အေးချမ်းသာယာရေးနှင့် ဖွံ့ဖြိုးရေးကောင်စီရဲ့ ဥက္ကဋ္ဌအဖြစ်လည်း တာဝန်ယူခဲ့တယ်လို့ သိရပါတယ်။
၂၀၀၄ ခုနှစ်မှာ ဦးခင်ညွန့်ကို ဖယ်ရှားပြီးနောက် ဦးမြင့်ဆွေဟာ စစ်ဘက်ရေးရာ လုံခြုံရေးအရာရှိချုပ် ဖြစ်လာခဲ့ပြီး အဲဒီနောက် ၂၀၀၆ ခုနှစ်၊ ဇန်နဝါရီလမှာတော့ အမှတ် (၅) စစ်ဆင်ရေးကွပ်ကဲမှု ဌာနချုပ်ရဲ့ အရာရှိချုပ် ဖြစ်လာခဲ့တယ်လို့ သိရပါတယ်။
၂၀၀၅ ခုနှစ်မှာ ဦးမြင့်ဆွေဟာ ဒုတိယဗိုလ်ချုပ်ကြီး အဆင့်ကို တိုးမြှင့်ခြင်းခံရတဲ့ ပထမဆုံး မွန်လူမျိုး ဖြစ်ခဲ့ပြီး ၂၀၀၉ ခုနှစ်မှာလည်း စစ်ထောက်ချုပ်အဖြစ် ရာထူးတိုးမြှင့်ခြင်း ခံခဲ့ရကာ ၂၀၁၀ ခုနှစ်မှာတော့ စစ်ဖက်ဆိုင်ရာ ရာထူးကနေ အနားယူခဲ့တယ်လို့ သိရပါတယ်။
၂၀၁၀ အထွေထွေ ရွေးကောက်ပွဲ ပြီးတဲ့နောက်မှာတော့ ဦးမြင့်ဆွေကို သမ္မတ ဦးသိန်းစိန်က ရန်ကုန်တိုင်း ဝန်ကြီးချုပ်အဖြစ် အဆိုပြုခဲ့တာကြောင့် ၂၀၁၁ ခုနှစ်၊ မတ်လ ၃၀ ရက်နေ့မှ ၂၀၁၆ ခုနှစ်၊ မတ်လ ၃၀ ရက်နေ့အထိ ရန်ကုန်တိုင်း ဝန်ကြီးချုပ်တာဝန်ကို ထမ်းဆောင်ခဲ့တယ်လို့ သိရပါတယ်။
၂၀၁၂ ခုနှစ်မှာ ဦးတင်အောင်မြင့်ဦး ဒုတိယသမ္မတအဖြစ်ကနေ နုတ်ထွက်ခဲ့တဲ့အတွက် ဒုတိယသမ္မတအဖြစ် ဦးမြင့်ဆွေကို အဆိုပြုခဲ့ပေမယ့် သားဖြစ်သူဟာ ဩစတြေးလျ နိုင်ငံသားအဖြစ် ခံယူထားတာကြောင့် မြန်မာ့ဖွဲ့စည်းပုံ အခြေခံဥပဒေအရ သမ္မတအရည်အချင်းနဲ့ ပြည့်မီခြင်း မရှိတဲ့အတွက် မအောင်မြင်ခဲ့ဘူးလို့ သိရပါတယ်။
ဒါပေမယ့်လည်း ၂၀၁၆ ခုနှစ်၊ မတ်လ ၁၁ ရက်နေ့မှာတော့ ဒုတိယအကြိမ် ပြည်ထောင်စုလွှတ်တော်မှာ တပ်မတော်သား ကိုယ်စားလှယ်တွေက ဒုတိယသမ္မတလောင်းအဖြစ် အဆိုပြု တင်မြှောက်ခဲ့တဲ့အတွက် ၂၀၁၆ ခုနှစ်၊ မတ်လ ၁၅ ရက်နေ့မှာ လွှတ်တော်မဲ ၂၁၃ မဲနဲ့ ပြည်ထောင်စုသမ္မတ မြန်မာနိုင်ငံရဲ့ ဒုတိယသမ္မတ (၁) ဖြစ်လာခဲ့တယ်လို့ သိရပါတယ်။
၂၀၁၈ ခုနှစ်၊ မတ်လ ၂၁ ရက်နေ့မှာ နိုင်ငံတော်သမ္မတ ဦးထင်ကျော်က သမ္မတအဖြစ်မှ နုတ်ထွက်ခဲ့တာကြောင့် အခြေခံဥပဒေအရ ဦးမြင့်ဆွေဟာ ယာယီသမ္မတအဖြစ် ကျမ်းကျိန်ဆိုပြီး လွှတ်တော်မှ သမ္မတအသစ် ရွေးချယ် တင်မြှောက်တဲ့အထိ ဆောင်ရွက်ခဲ့တယ်လို့ သိရပါတယ်။
ဒါအပြင် နိုင်ငံရေး အပြောင်းအလဲ ကာလဖြစ်တဲ့ ၂၀၂၁ ခုနှစ်မှာလည်း ဖေဖော်ဝါရီလ ၁ ရက်နေ့ကနေ ၂၀၂၄ ခုနှစ်၊ ဇူလိုင်လ ၂၂ ရက်နေ့အထိ ယာယီသမ္မတတာဝန်ကို ထမ်းဆောင်ခဲ့တယ်လို့ သိရပါတယ်။
အဲဒီနောက်မှာ နိုင်ငံတော် အုပ်ချုပ်ရေး၊ ဥပဒေပြုရေးနဲ့ တရားစီရင်ရေး အာဏာတို့ကို ယာယီသမ္မတ ဦးမြင့်ဆွေက တပ်မတော်ကာကွယ်ရေး ဦးစီးချုပ် ဗိုလ်ချုပ်မှူးကြီးမင်းအောင်လှိုင်ထံ လွှဲအပ်ခဲ့တယ်လို့ သိရပါတယ်။
ယာယီသမ္မတာဝန် ထမ်းဆောင်နေစဉ်အတွင်း ၂၀၂၂ ခုနှစ်၊ ဧပြီလ ၁၇ ရက်နေ့မှာ ဦးမြင့်ဆွေကို နိုင်ငံတော် စီမံအုပ်ချုပ်ရေးကောင်စီ ဥက္ကဋ္ဌက အမိန့်ကြော်ငြာစာ အမှတ် ၆၂/၂၀၂၂ အရ ပြည်ထောင်စု စည်သူသင်္ဂဟဘွဲ့ဖြစ်တဲ့ သတိုးမဟာ သရေစည်သူဘွဲ့ကို ချီးမြှင့် အပ်နှင်းခဲ့တယ်လို့ သိရပါတယ်။
ယာယီသမ္မတ ဦးမြင့်ဆွေဟာ ၂၀၂၃ ခုနှစ်၊ နှစ်ဆန်းပိုင်းမှ စတင်ကာ ကျန်းမာရေးအခြေအနေ ချို့ယွင်းလာတဲ့အတွက် ဆေးကုသမှုတွေ ခံယူခဲ့ပေမယ့်လည်း တိုးတက် ကောင်းမွန်လာခြင်း မရှိတာကြောင့် ၂၀၂၄ ခုနှစ်၊ ဇူလိုင်လ ၂၂ ရက်နေ့မှာ ၎င်းရဲ့ ယာယီသမ္မတ တာဝန်တွေကို နိုင်ငံတော် စီမံအုပ်ချုပ်ရေးကောင်စီ ဥက္ကဋ္ဌ (လက်ရှိ နိုင်ငံတော်လုံခြုံရေးနှင့် အေးချမ်းသာယာရေး ကော်မရှင် ဥက္ကဋ္ဌ) ထံ လွှဲပြောင်း ပေးအပ်ခဲ့တယ်လို့ သိရပါတယ်။
Photo - CJ
