တစ်နေ့တာ ရှင်သန်ရုန်းကန်နေရတဲ့သူတွေချည်းပါပဲ ။ အချစ်ကြောင့် ပင်ပန်းနေတာဖြစ်ဖြစ် ၊ အလုပ်ကြောင့် စိတ်ပင်ပန်းတာပဲဖြစ်ဖြစ် ဒါဟာ လူတိုင်း ကြုံနေရလေ့ရှိတဲ့ အရာတွေထဲက တစ်ခုပဲမို့ ကိုယ် တစ်ယောက်တည်း ရင်ဆိုင် ပင်ပန်းနေရတာ မဟုတ်ပါဘူး ။ တစ်နေ့တာရဲ့ နေဝင်ချိန်လေးမှာ အလှဆုံး ပြုံးနိုင်နေသ၍ သင် ရှင်သန်ရကျိုးနပ်ပါတယ် ။
ဘယ်လောက်ပဲ ပင်ပန်းပင်ပန်း ကိုယ့်ဘဝရဲ့ နေ့ရက်တွေကို အလှဆုံးပြုံးရင်း ရင်ဆိုင်ကျော် ဖြတ်ပါ ။ သောကတွေနဲ့ ထပ်ထပ်ပြီး ရင်ဆိုင်နေတာက နှစ်ခါ ပင်ပန်းပါတယ် ။ ပင်ပန်းနေရတာခြင်း အတူတူ အဆိုးတွေကိုပဲ ထပ်ထပ်တွေးပြီး ကြေကွဲဝမ်းနည်းနေတဲ့သူတွေထဲ ကိုယ်မပါစေနဲ့။
နေဝင်ချိန်ရှိသလို နေထွက်ချိန် ဆိုတာလည်း ရှိတာမို့ အချိုတစ်လှည့် ၊ အခါးတစ်လှည့်ပဲဆိုတာ မြဲမြဲ မှတ်ထားပါ ။ လူပင်ပန်းတာထက် စိတ်ပင်ပန်းတာမျိုး ကြုံဖူးကြမှာပါ ။ အဲဒီလို အချိန်မျိုးမှာ ကိုယ့်အတွေးတွေက မကောင်းတဲ့ဘက်ကို ပိုပြီး ရောက်နေခဲ့ရင် ပိုပြီးတော့ ခက်ခဲပင်ပန်းတာတွေပဲ ရှေ့လျှောက်တွေ့နေရမှာမို့ ခုကြုံနေရတဲ့ မကောင်းတဲ့အရာတွေက ခဏပါပဲ ငါ အဆင်ပြေအောင် ကျော်ဖြတ်နိုင်တယ် ဆိုတဲ့ စိတ်လေးထားပါ ။ စိတ်ဆိုတဲ့အရာက အရာရာကို ဦးဆောင်နေတာပဲမို့ ကောင်းတဲ့ဘက်က တွေးရင် ကောင်းတဲ့အရာတွေပဲ ဖြစ်လာမှာပါ ။
ဒါကြောင့် အဆိုးတွေပြီးရင် အကောင်းလာမှာဆိုတဲ့ အသိလေးနဲ့သာလျှင် ပြဿနာတွေကို ရင်ဆိုင်တိုက်ခိုက်ပါ ။ နေဝင်ချိန် ၊ နေထွက်ချိန် ရှိသလိုပဲ ကိုယ်တွေရှင်သန်နေထိုင်တဲ့ ဒီလောကကြီးကလည်း အကောင်းအဆိုးတွေနဲ့ ဒွန်တွဲနေတာပါ ။ ခံနိုင်ရည်ရှိပြီး တိုက်ထုတ်နိုင်ဖို့လေးပဲ လိုပါတယ် ။
