တောင်တရုတ်ပင်လယ်မှာဖြစ်စေ၊ ဘင်္ဂလားပင်လယ်အော်မှာဖြစ်စေ မုန်တိုင်းတလုံးဖြစ်လာရင် ဘယ်ဘက်ကလာလာ အနည်းနဲ့အများ မြန်မာနိုင်ငံအပေါ်သက်ရောက်မှုရှိပါတယ်။
🔸 ဘင်္ဂလားပင်လယ်အော်မှာဖြစ်လာရင် မြန်မာနိုင်ငံဘက်ကိုဦးတည်ရွေ့လျားသည်ဖြစ်စေ အိန္ဒိယ/ဘင်္ဂလားဒေ့ရှ်နိုင်ငံတွေဘက်ကို ဦးတည်ရွေ့လျားသည်ဖြစ်စေ မုန်တိုင်းလမ်းကြောင်းရဲ့ညာဘက်ခြမ်းက မြန်မာနိုင်ငံမှာ မုန်တိုင်းအရှိန်သက်ရောက်မှုကပိုများတတ်ပြီး မြန်မာ့ကမ်းရိုးတန်းများနဲ့မြန်မာနိုင်ငံတောင်ပိုင်းဒေသတွေမှာ မိုးရေချိန်ရရှိမှုပိုများတတ်၊ မိုးသက်လေပြင်းတွေကျတတ်ပါတယ်။
🔸 တောင်တရုတ်ပင်လယ်က မုန်တိုင်းတွေကတော့ အရှေ့ဘက်ကိုရွေ့လျားရင်ကိစ္စမရှိ၊ အနောက်ဘက် တရုတ်၊ ဗီယက်နမ်နိုင်ငံတွေရှိတဲ့ တောင်တရုတ်ပင်လယ်ဘက်ကိုဦးတည်ရွေ့လျားလာရင် အရှေ့လေပွေလှိုင်း၊ မုန်တိုင်းအကြွင်းအကျန်တွေကြောင့် အထူးသဖြင့် မြန်မာနိုင်ငံအရှေ့ဘက်ခြမ်းဒေသတွေဖြစ်တဲ့ ရှမ်းပြည်နယ်၊ ကရင်ပြည်နယ်၊ မွန်ပြည်နယ်နဲ့ အလယ်ပိုင်းမိုးနည်းရေရှားဒေသတွေမှာ မိုးရေချိန်ကောင်းကောင်းရတတ် မိုးဦးကာလအတွင်းကလို အနောက်တောင်မုတ်သုံလေကို အတင်းဆွဲသွင်းတာမဟုတ်ရင် လေပြင်းတိုက်ခတ်နိုင်တာ နည်းပါတယ်။
🔸 မိုးနှောင်းကာလတွေမှာဖြစ်ပေါ်တတ်တဲ့ တောင်တရုတ်ပင်လယ်ဘက်က မုန်တိုင်း/တိုင်ဖွန်းမုန်တိုင်းတွေက ၂၀၂၅ ခုနှစ်ရဲ့ မိုးလယ်ကာလမကုန်ဆုံးခင်မှာစောစီးစွာဖြစ်ပေါ်လာကြပြီး အခုဖြစ်လာမည့် ၁ လုံးအပါအဝင် ၃ ကြိမ်ရှိသွားဖြစ်ပါတယ်။
🔸 တောင်တရုတ်ပင်လယ်မှာမုန်တိုင်းတွေဖြစ်ပြီး အနောက်ဘက်ကို ရွေ့လျားလာပြီဆိုတာနဲ့ မုန်တိုင်းအရွယ်အစား၊ မုန်တိုင်းအားနဲ့ ရွေ့လျားရာလမ်းကြောင်းတွေကို အတော်သတိထားစောင့်ကြည့်ပြီး တင်ပေးနိုင်မှ အရှေ့ဘက်က မုန်တိုင်းအကြွင်းအကျန်တွေကြောင့် မြန်မာနိုင်ငံမှာဖြစ်ပေါ်ခံစားရတတ်တဲ့ ရေကြောင့်ဖြစ်လာတဲ့သဘာဝဘေးပေါင်းစုံ ... (Rivers' Flood, Surface Flood နဲ့ Flash Flood)တွေအတွက် ကြိုတင်ပြင်ဆင်ချိန်ရပြီး အသက်ဆုံးရှုံးမှုတွေကို လျှော့ချနိုင်ပါမယ်။
🔸 ခုချိန်အထိ တဖြည်းဖြည်းအားကောင်းလာပြီး အနောက်ဘက်ကို ဦးတည်ရွေ့လျားလာတဲ့ တောင်တရုတ်ပင်လယ်က လေဖိအားနည်းရပ်ဝန်း(တိုင်ဖွန်းမဖြစ်သေး)ရဲ့ မုန်တိုင်းအား၊ အရွယ်အစားနဲ့ ဦးတည်ရွေ့လျားရာလမ်းကြောင်းတွေကို စောင့်ကြည့်လျှက်ရှိပါကြောင်း။
(ဩဂုတ်လ ၂၃ ရက် နံနက် ၀၀၃၀ နာရီ)




