မနေ့က အစ်မတစ်ယောက်နဲ့ စကားပြောဖြစ်တော့..သူပြောလိုက်တဲ့ စကားလေးကို အလွန် သဘောကျသွားမိပါတယ်..။ သူ့မှာ သားလေးနှစ်ယောက်ရှိပါတယ်..။ နှစ်ယောက်စလုံးက မင်းသားတွေလို ရုပ်ရည်ချောမောသလို..ပညာတွေလည်းတတ်ပါတယ်..။ သားအကြီးက အောင်မြင်တဲ့ လုပ်ငန်းရှင်တစ်ယောက်တောင် ဖြစ်နေပါပြီ..။ သားအငယ်ကတော့ ဆရာဝန်ဘွဲ့ရထားပြီးသူပါ..။ သားအကြီးက အိမ်ထောင်ကျပြီးသားဖြစ်သလို..သားအငယ်ကလည်း..ချစ်သူရည်းစားရှိပါတယ်..။
အစ်မက သူ့သားတွေ မိန်းမ မရမှာ..ချစ်သူ မရမှာကို အလွန်စိုးရိမ်ခဲ့တယ်လို့ ဆိုပါတယ်..။ ပြီးတော့ သူ့သားတွေနဲ့ ပတ်သက်လာမယ့် ချစ်သူကောင်မလေးတွေကိုလည်း…လိုက်ချစ်ပေးဖို့ အဆင်သင့်အမြဲရှိနေတယ်လို့ ဆိုပါတယ်..။ ကိုယ့်သားကို ချစ်လို့ ကိုယ့်ဘဝထဲ ဝင်လာတဲ့ မိန်းကလေးတွေကို အစ်မကတော့ ကျေးဇူးလည်းတင်တယ်..အသိအမှတ်ပြု လက်ခံပေးလိုက်တယ်.. လို့ဆိုတဲ့စကားလေးကို ကျွန်မက အရမ်းနှစ်သက်သွားမိပါတယ်..။
ကျွန်မတို့ရဲ့ဘဝမှာ..အကြောင်းအမျိုးမျိုးကြောင့် ကိုယ့်ဘဝထဲ ဝင်ရောက်ပတ်သက်လာသူတွေကို အသိမှတ်ပြုပေးဖို့..လက်ခံပေးဖို့ တကယ်အရေးကြီးပါတယ်..။ ကျွန်မတို့ တစ်ယောက်နဲ့တစ်ယောက် တွေ့ဆုံပတ်သက်ခွင့်ရလာတာကိုက ဆုံတွေ့ဖို့ အကြောင်းရှိလို့ ဆုံခွင့်ရခြင်းသာ ဖြစ်ပါတယ်…။
တစ်ချို့က ကောင်းသောဆုံတွေ့ခြင်းတွေဖြစ်ပြီး…ကောင်းကျိုးရလဒ်တွေ ရရှိဖို့ ဖြစ်ပပါတယ်..။ တစ်ချို့သောဆုံတွေ့ရခြင်းတွေကတော့..ပေးဆပ်စရာ ဝဋ်ကြွေးတွေဆပ်ဖို့…ဆိုးကျိုးတွေရရှိဖို့ ဆုံတွေ့ကြရတာဖြစ်ပါတယ်..။ ဘယ်လိုပဲဖြစ်စေ…ကောင်းသောဆုံတွေ့ရခြင်းပဲဖြစ်ဖြစ်..ဆိုးသောဆုံတွေ့ရခြင်းပဲဖြစ်ဖြစ်…ကျွန်မတို့ လက်ခံအသိအမှတ်ပြုပေးရမှာဖြစ်ပါတယ်..။ ငြင်းဆန်လို့..ရှောင်ပြေးလို့..အပြစ်တင်လို့ မရပါဘူး..။ အသိအမှတ်မပြုချင်လို မရပါဘူး..။ လက်မခံချင်လို့ မရပါဘူး…။
ဥပမာတစ်ခုပြောပြရရင်..ကျွန်မက အရင်တုန်းက အရဟံဂုဏ်တော်ကို တစ်နေ့ပုတီး၁၀၈ ပတ်အမြဲ နေ့စဉ်ပုံမှန် စိပ်ပါတယ်..။ ဆေးကျောင်းပထမနှစ်စတက်ကတည်းက စပြီးစိပ်ခဲ့တာဖြစ်ပါတယ်..။ အရဟံဂုဏ်တော် ပုတီး၁၀၈ ပတ်ပြည့်ဖို့အတွက် တစ်နာရီကျော်ကျော် အချိန်ပေးရပါတယ်..။ ထိုတစ်နာရီကို နေ့တိုင်းပုံမှန်စိပ်တာက ကျွန်မရဲ့ဘာဝနာကုသိုလ်တစ်ခုပါပဲ..။ ဆေးကျောင်းတက်တုန်းကဆို..စာမေးပွဲတွေရှိလို့ သူငယ်ချင်းအိမ် ညအိပ်ညနေ စာသွားကျက်ရင်တောင်..အပျက်မခံဘဲ..ဆယ့်နှစ်နာရီမထိုးခင် အခန်းထဲပြေးဝင်ပြီး အရဟံကို ၁၀၈ ပတ်ပြည့်အောင်..ကြိုးစားပြီးစိပ်ခဲ့သူပါ..။
ကျွန်မရဲ့ချစ်သူနဲ့ လက်ထပ်ပြီးချိန်မှာတော့..ခင်ပွန်းဖြစ်သူက ဝိပဿနာသမားစစ်စစ်ဖြစ်ပါတယ်..။ တရားစခန်းတွေလည်း မကြာခဏဝင်လေ့ရှိပါတယ်..။ ကျွန်မကိုပါ တရာစခန်းဝင်ဖို့ တိုင်တွန်းတော့ ကျွန်မမှာ အရဟံဂုဏ်တော်စိပ်တာပျက်မှာစိုးလို့ နေ့ရွှေ့ညရွှေ့ ရွှေ့ခဲ့ရပါတယ်..။ ကျွန်မအတွက်က အရဟံဂုဏ်တော်မပျက်မကွက်စိပ်ရေးက အဓိက အရေးအကြီးဆုံးဖြစ်နေခဲ့တာကိုး..။
နောက်ဆုံးတော့ တရားစခန်းဝင်ဖြစ်ခဲ့ပြီး ခင်ပွန်းနဲ့အတူ..ဝိပဿနာတရားကို အတူတူအားထုတ်လေ့ကျင့်ရင်း..ဝိပဿနာတရားရဲ့အနှစ်သာရကို ကောင်းစွာသိရှိတန်ဖိုးထားလာမိပါတယ်..။ သေသေချာချာ စဉ်းစားမိတော့ ဒီခင်ပွန်းနဲ့သာ မဆုံစည်းမိရင်..ကျွန်မ ဝိပဿနာတရားကို အားထုတ်ဖြစ်ချင်မှ အားထုတ်မိမှာပါ..။ ကျွန်မအတွက် ဝိပဿနာမျိုးစေ့အထုံလေးပါသွားဖို့အတွက်..ဒီခင်ပွန်းနဲ့ ဆုံစည်းခွင့်ရတာဖြစ်ပါတယ်..။ ဒါကို လက်ခံအသိအမှတ်ပြုရပါတယ်..။
ကျွန်မကို တရားပုံမှန်အားထုတ်ဖြစ်အောင်..တရားစခန်းတွေဝင်ဖြစ်အောင်..အမြဲတိုက်တွန်းအားပေးခဲ့သူက ကျွန်မရဲ့ယောက္ခမဖြစ်သူပါ..။ အန်တီဟာ ကျွန်မကို သူ့ရဲ့သားတွေနဲ့ အတူတူ သမီးတစ်ယောက်လိုပဲ လက်ခံအသိအမှတ်ပြုပေးခဲ့သူဖြစ်ပါတယ်..။ တရားအသိတွေ..ကျွန်မ မသိသေးတာတွေ..နားမလည်တာတွေ..မေးတိုင်း စိတ်ရှည်လက်ရှည် ရှင်းပြပေးခဲ့သူပါ..။ အန်တီကိုယ်တိုင်က တရားပြသူဆရာမတစ်ယောက်မို့ ကျွန်မမေးသမျှကို ရှင်းလင်းနားလည်အောင် အမြဲပြောပြပေးနိုင်သူဖြစ်ပါတယ်..။ ကျွန်မကို ဝိပဿနာမျိုးစေ့လေး ချပေးခဲ့သူဟာ အန်တီကိုယ်တိုင်လည်း ဖြစ်ပါတယ်..။ ဒါကိုလည်း ကျွန်မက လက်ခံအသိအမှတ်ပြုရပါတယ်..။ ကျေးဇူးလည်း တင်ရပါတယ်..။
တစ်ယောက်နဲ့တစ်ယောက် အကြောင်းဆုံလို့ ပတ်သက်ခွင့်ရတဲ့အခါ…သူ့ကိုတော့ ဘယ်လိုအနိုင်ယူလိုက်မယ်..အကြောမခံဘဲ တင်စီးထားလိုက်မယ်..မလှန်နိုင်အောင်ဖိနှိပ်ထားလိုက်မယ်..စတဲ့ အတွေးဆိုးတွေဟာ..လူနှစ်ယောက်ဆက်ဆံရေးမှာ..မစစ်မှန်တဲ့ ဆက်ဆံရေး…အသိအမှတ် မပြုနိုင်..လက်ခံမပေးနိုင်တဲ့ ဆက်ဆံရေးမျိုးဖြစ်ပါတယ်..။ ဒီဆက်ဆံရေးဟာ အဆိပ်အတောက်ဖြစ်စေတဲ့ ဆက်ဆံရေးမျိုးသာ ဖြစ်ပါတယ်..။
ခင်ပွန်းနဲ့ ဇနီးပဲဖြစ်စေ…ယောက္ခမနဲ့ ချွေးမ..သားမက်ပဲဖြစ်စေ…မိဘနဲ့ သားသမီးပဲဖြစ်စေ…ညီအစ်ကို မောင်နှမချင်းပဲဖြစ်စေ…သူဘာပဲဖြစ်ဖြစ်..လက်ခံပေးဖို့..အသိအမှတ်ပြုပေးဖို့..ချစ်ခင်တန်ဖိုးထားပေးဖို့ အရေးကြီးပါတယ်…။ ဒါဟာ ဆက်ဆံရေးတစ်ခုရဲ့ အဓိကသော့ချက်တစ်ခုလည်းဖြစ်ပါတယ်..။
#လွန်းထားထား
#ပိုအေးချမ်းတဲ့ကိုယ်
