တက္ကသိုလ်ဝင်စာမေးပွဲကာလအတွင်း လျှပ်စစ်မီးမပျက်ရေး အလေးထားဆောင်ရွက်ပေးမည်
********************
(ပြည်တွင်း) မတ်လ ၁၁
၂၀၂၅ ခုနှစ်၊ တက္ကသိုလ်ဝင်စာမေးပွဲကာလအတွင်း လျှပ်စစ်ဓာတ်အား စဉ်ဆက်မပြတ်ရရှိရန် ဆောင်ရွက်သွား မှာဖြစ်တဲ့အပြင် ကျောင်းသူ/ကျောင်းသားများ သွားလာရေး လွယ်ကူချောမွေ့စေရန် YBS ယာဉ်များထပ်တိုး ပြေးဆွဲပေးမှာဖြစ်တယ်လို့ သိရပါတယ်။
၂၀၂၅ ခုနှစ်၊ မတ်လ ၁၇ ရက်မှ ၂၂ ရက်အထိ ကျင်းပမည့် တက္ကသိုလ်ဝင်စာမေးပွဲကာလအတွင်း လျှပ်စစ်မီး မပြတ်တောက်ရေး အလေးထားဆောင်ရွက်ကြရန် လျှပ်စစ်နှင့် စွမ်းအင်ဖွံ့ဖြိုးရေးကော်မရှင်ကနေ သိရပါတယ်။
တက္ကသိုလ်ဝင်တန်းနှင့် တက္ကသိုလ်/ကောလိပ်စာမေးပွဲများ တပြိုင်တည်းကျင်းပမှာဖြစ်တဲ့အတွက် စာမေးပွဲဖြေဆိုချိန် ကာလနှင့် သင်ခန်းစာများ လေ့လာကျက်မှတ်ချိန် ကာလများအတွင်း လျှပ်ဓာတ်အားစဉ်ဆက်မပြတ်ရရှိရေး အထူးအလေးထားဆောင်ရွက်မှာ ဖြစ်တယ်လို့ သိရပါတယ်။
ဒါ့အပြင် တက္ကသိုလ်ဝင်စာမေးပွဲကာလအတွင်း ဆေးရုံတက်ရောက်နေရသော ကျောင်းသား/ကျောင်းသူများ အတွက်ရည်ရွယ်ကာ ဆေးရုံစာဖြေဌာန ၄ ခုကို ရန်ကုန် ပြည်သူ့ဆေးရုံကြီး၊ မြောက်ဥက္ကလာပ အထွေထွေရောဂါကု နှင့် သင်ကြားရေးဆေးရုံကြီး၊ ဗဟိုအမျိုးသမီးဆေးရုံကြီးနှင့် ဝေဘာဂီအထူးကုဆေးရုံကြီးတို့မှာ ဖွင့်လှစ်မယ်လို့ မြန်မာနိုင်ငံစာစစ်ဦးစီးဌာနကနေ သိရပါတယ်။
