ဈေးကွက်အတွင်း ပြည်ပသွင်းကုန် လက်ကျန် နည်းပါးလာ
စက်တင်ဘာ ၂၈
သွင်းကုန် ကန့်သတ်မှုတွေကြောင့် ဈေးကွက်အတွင်း ပြည်ပကုန်စည်တွေ လက်ကျန် ပိုမိုနည်းပါးလာနေပြီး ဈေးနှုန်း ထပ်မံ မြင့်တက်လျက်ရှိတယ်လို့ သုံးစွဲသူတွေနဲ့ ရောင်းချသူတွေဆီက သိရပါတယ်။
လက်ရှိမှာ ပြည်ပမှတင်သွင်းနေတဲ့ ဆောက်လုပ်ရေးကုန်စည်၊ အလှကုန်ပစ္စည်း၊ လျှပ်စစ်ပစ္စည်း၊ ဆေးဝါးနဲ့ ဆေးပစ္စည်း အစရှိတဲ့ လူသုံးကုန် ပစ္စည်းတွေဟာ ကိုဗစ်ကပ်ရောဂါ ကာလကထက်ကို ဈေးနှုန်း ပိုမို မြင့်တက်နေပြီး ဝယ်ယူရခက်နေတယ်လို့ သိရပါတယ်။
“ယိုးဒယား ကြာပန်း ဆပ်ပြာမှုန့်ဆို အရင် ၅၃၀၀ တန်တထုပ်က အခု ၇၀၀၀ ဈေး ဖြစ်နေတယ်။ ဒါတောင် ဝယ်မရဘူး။ ဆိုင်မှာပြန်ရောင်းဖို့ သွားဝယ်တာတောင် လိုသလောက်မရဘူး။ ခွဲတမ်းနဲ့ ရောင်းနေတယ်။ ပန်းကန်ဆေး ဆပ်ပြာဆီကနေ ရွှေဝါဆပ်ပြာအထိ အရင် ၆၀၀ ကျပ်ကနေ အခု ၁၀၀၀ အထက် ရောက်လာတယ်။ ကလေး သွားတိုက်ဆေးကလည် အရင် ၄၀၀၀ ကျော်ကနေ အခု ၅၀၀၀ ကျော် ဖြစ်နေပြီ။ ဈေးတွေက မနေ့ကဈေးနဲ့ ဒီနေ့ဈေးကိုမတူတာ” လို့ ကုန်စုံဆိုင် ဖွင့်လှစ်ထားသူ တယောက်က ပြောပါတယ်။
ဒါအပြင် ဆေးဝါးဈေးနှုန်းတွေလည်း မြင့်တက်နေပြီး တချို့သော ဆေးဝါးတွေမှာ ဈေးကွက်အတွင်း မရှိတော့တာကြောင့် အာနိသင်တူ တခြားဆေးဝါးတွေကို ရောင်းချနေရတယ်လို့ ဆေးဆိုင် ဖွင့်လှစ်ထားသူတွေက ပြောပါတယ်။
လက်ရှိမှာ ပြည်သူတွေ အများဆုံး ဝယ်ယူ သောက်သုံးနေတဲ့ ဆေးဝါးတွေဖြစ်တဲ့ ပါရာကပ် တကတ် ၁၆၀၀ ကျပ်၊ ဘိုင်အိုဂျက်ဆစ် တကတ် ၃၅၀၀ ကျပ်၊ ဒီကိုလ်ဂျင် တကတ် ၈၅၀၀ ကျပ်၊ ဒီကိုလ်ဂျင် တလုံး ၉၀၀ ကျပ်၊ Air-x တလုံး ၄၀၀ ကျပ်၊ Solmux တလုံး ၆၀၀ အထိဖြစ်နေတယ်လို့ သိရပါတယ်။
“ပစ္စည်းတွေ ပြတ်၊ အရောင်းအဝယ် မကောင်းဘူး။ တချို့ဆိုင်တွေဆို ခဏဆိုပြီး ပိတ်ထားကြတဲ့ ဆိုင်တွေတောင် ရှိတယ်။ ဈေးက အကုန်တက်တာ။ နိုင်ငံခြားဆေးတွေတင် မကဘူး။ တိုင်းရင်းဆေးတွေလည်း ဈေးတက်တာပဲ။ လူတိုင်းသုံးနေတဲ့ ဆရာခိုဆေးဆို အရင် ကျပ် ၃၀၀၊ ၄၀၀ ဈေးကနေ တက်လာလိုက်တာ အခု တဘူး ၁၆၀၀ ဖြစ်နေပြီ။ တိုင်းရင်းဆေး ဘာကြောင့်တက်လဲဆို အဓိက က ကုန်ကြမ်းရှားနေတာ။ ပြည်ပကလည်း ကုန်ကြမ်း ဝယ်မရဘူး။ ပြည်တွင်းမှာလည်း လိုသလောက် ဝယ်လို့မရဘူး။ ဒါကြောင့် တိုင်းရင်းဆေးတွေလည်း ဈေးတက်လာတယ်” လို့ ဆေးဆိုင် ဖွင့်လှစ်ထားသူက ပြောပါတယ်။
တိုင်းရင်းဆေးအတွက် လိုအပ်တဲ့ ကုန်ကြမ်းတွေကို ပြည်ပကနေ ထက်ဝက်နီးပါးလောက် တင်သွင်းနေရတာဖြစ်ပြီး ပြည်တွင်းမှာလည်း ကုန်ကြမ်း ဝယ်ယူနေရတာ ရှိပေမယ့် လတ်တလော ဖြစ်ပွားနေတဲ့ နယ်မြေ မအေးချမ်းမှုတွေကြောင့် လိုသလောက် ဝယ်ယူလို့မရ ဖြစ်နေတယ်လို့ ဆိုပါတယ်။
ဆေးဝါးတွေကို ရေကြောင်းကနေ တရားဝင် တင်သွင်းပါက ရာခိုင်နှုန်းအပြည့် အခွန် ပေးဆောင်ရတာကြောင့် ဈေးပိုကြီးလာနိုင်ပြီး နယ်စပ်ကနေ တင်သွင်းပါကလည်း ကန့်သတ်မှုတွေ၊ ဖမ်းဆီးခံရမှုတွေ ရှိနေတာကြောင့် အခက်အခဲများစွာ ရှိနေတယ်လို့ သိရပါတယ်။
ဒါနဲ့ပတ်သက်လို့ စီးပွားရေးဈေးကွက် ကျွမ်းကျင်သူ တယောက်က “စီးပွားကူးသန်း ဝန်ကြီးကတော့ ပို့ကုန်ထက် သွင်းကုန် ပိုများနေတယ်။ သေချာ စိစစ်ရမယ်လို့ ပြောထားတာရှိတယ်။ ဘာကြောင့် သွင်းကုန်များပြီး ပို့ကုန် နည်းနေလဲ၊ အဖြေကတော့ ရှင်းပါတယ်။ ပြည်တွင်းမှာ ဘာမှ မယ်မယ်ရရ မထုတ်လုပ်နိုင်လို့ပါ။ ဒါကြောင့် သွင်းကုန်လျှော့ချင်ရင် ပိတ်ရမှာမဟုတ်ဘူး။ ကိုယ့်ပြည်တွင်းက လိုအပ်တာတွေကို ထုတ်လုပ်ပေးနိုင်အောင် ကြိုးစားရမှာ။ ကိုယ့်ဆီကမထွက်ဘဲ မသွင်းစေချင်ရင်တော့ ကုန်စျေးနှုန်းတက်အောင် လုပ်တာပဲ” လို့ ပြောပါတယ်။
လက်ရှိ ဆေးဝါးတွေ ပြတ်လပ်နေတာဟာ တနိုင်တပိုင် ရောင်းချတဲ့ ဆေးဆိုင်တွေတင် မကဘဲ ဈေးဝယ်စင်တာတွေ၊ ဆေးဆိုင်ကြီးတွေမှာပါ ပြတ်လပ်နေတာ ဖြစ်တယ်လို့ ဈေးကွက်အတွင်းက သိရပါတယ်။
လတ်တလော ပစ္စည်းရှားပါးမှု ဖြစ်ပွားနေတဲ့ ဆေးဝါးတွေထဲမှာ ဆီးချို၊ နှလုံး၊ အာရုံကြောနဲ့ သွေးတိုးရောဂါ ဆေးဝါးတွေလည်း ပါဝင်နေတယ်လို့ သိရပါတယ်။
ဒါအပြင် တခြား လူသုံးကုန် ပစ္စည်းတွေဖြစ်တဲ့ တစ်ရှူး၊ ဖယောင်းတိုင်၊ မီးသီး၊ မီးချောင်း၊ ထမင်းပေါင်းအိုး၊ ဒယ်နီ၊ အလှကုန်နဲ့ အဝတ်အထည်တွေဟာလည်း တင်သွင်းခွင့် ကန့်သတ်ချက်တွေကြောင့် ဈေးနှုန်း ကြီးမြင့်လာသလို ဈေးကွက်မှာလည်း ပစ္စည်းပြတ်လပ်တဲ့အထိ ဖြစ်နေတယ်လို့ သိရပါတယ်။
“အခုလို ပြည်ပအဝင် ပိတ်ထားတာကတော့ ကုန်သည်တွေ အကြိုက်ပေါ့။ ပစ္စည်းတွေ မဝင်လို့ဆိုတဲ့ အကြောင်းပြချက်နဲ့ ၁၀၀ တန်ပစ္စည်း တခုကို တသောင်းလောက် တင်ရောင်းနေကြတာ။ တရုတ်ကလာတဲ့ ဒယ်နီဆိုရင် သူတို့ ပစ္စည်းအဝင် မပိတ်ခင်က ကျပ် လေးသောင်းဝန်းကျင်၊ အခု ခုနစ်သောင်း ကျော်သွားပြီ။ ပစ္စည်း မရှိဘူး၊ နောက်လည်း ဒီပစ္စည်းက ဝင်ချင်မှဝင်တော့မှာဆိုပြီး ဆိုင်တွေက အဆမတန် ဈေးတက်ပစ်လိုက်တာ” လို့ ပြည်သူတယောက်က ပြောပါတယ်။
၂၀၂၁ ခုနှစ်နောက်ပိုင်း အဆမတန် မြင့်တက်လာတဲ့ ကုန်ဈေးနှုန်းကို ထိန်းချုပ်နိုင်ဖို့ အစိုးရက အမေရိကန်ဒေါ်လာ၊ ရွှေ၊ စက်သုံးဆီ၊ ဆန်၊ ဆီနဲ့ စိုက်ပျိုးရေးလုပ်ငန်းသုံး သွင်းအားစုတွေကို ရည်ညွှန်းဈေးတွေ သတ်မှတ်ခြင်းအပြင် နိုင်ငံခြားငွေ လိုအပ်ချက်ကြောင့်လည်း သွင်းကုန်တွေကို ထိန်းချုပ်ခြင်းတွေ ပြုလုပ်နေသလို သွင်းကုန်လိုင်စင် လျှောက်ထားရာမှာလည်း မူဝါဒ သတ်မှတ်ချက်တွေကြောင့် လနဲ့ချီ ကြန့်ကြာမှုတွေ ရှိနေတယ်လို့ သိရပါတယ်။
ဒါအပြင် ပြီးခဲ့တဲ့ ဩဂုတ်လ ၁၃ ရက်နေ့ကလည်း ဆေးဝါး၊ စာသောက်ကုန်နဲ့ လူသုံးကုန်ပစ္စည်းတွေ အပါအဝင် ကုန်ပစ္စည်း ၃၅ မျိုးကို ယာယီတင်သွင်းခွင့် ပိတ်ပင်လိုက်တယ်ဆိုတဲ့သတင်း လူမှုကွန်ရက်မှာ ပျံ့နှံ့ခဲ့ပါတယ်။
အဆိုပါသတင်း ထွက်ပေါ်လာပြီးတဲ့နောက် လက်ရှိမှာ ပြည်ပက တင်သွင်းတဲ့ စားသောက်ကုန် အပါအဝင် လူသုံးကုန်ပစ္စည်းတွေ ဈေးအဆမတန် မြင့်တက်လာပြီး ဝယ်ယူရ ခက်လာတယ်လို့ သိရပါတယ်။
Photo - CJ
Credit - Voice of Myanmar News Agency
#သတင်းဟင်းလေးအိုးကြီး
