ရန်ကုန် ၊မန္တလေးနဲ့ ပြင်ဦးလွင်မှာရှိတဲ့ နှစ်၁၀၀ အထက်ရှိ အဆောက်အအုံတွေကို ရှေးဟောင်းအဆောက်အအုံအဖြစ် သတ်မှတ်
အောက်တိုဘာ ၃
ရန်ကုန်တိုင်း နဲ့ မန္တလေးတိုင်းထဲက နှစ် ၁၀၀ သက်တမ်းအထက်ရှိတဲ့ အဆောက်အအုံ ၆၇ ခုကို ရှေးဟောင်းအဆောက်အအုံအဖြစ် သာသနာရေးနှင့်ယဥ်ကျေးမှုဝန်ကြီးဌာနက သတ်မှတ်လိုက်တယ်လို့ သိရပါတယ်။
မန္တလေးတိုင်းမှာဆိုရင် ချမ်းမြသာစည်မြို့နယ်က အဆောက်အအုံ ငါးခု၊ ချမ်းအေသားစံမြို့နယ်က အဆောက်အအုံ ခုနှစ်ခု၊ ပြည်ကြီးတံခွန်မြို့နယ်က လေးခု၊ မဟာအောင်မြေမြို့နယ်က လေးခု၊ အောင်မြေသာစံမြို့နယ်မှ ၁၁ခုနဲ့ပုသိမ်ကြီးမြို့နယ်က နှစ်ခု၊ ပြင်ဦးလွင်မြို့နယ်မှ အဆောက်အအုံး ၃၁ ခုဖြစ်တယ်လို့သိရပါတယ်။
ရန်ကုန်တိုင်းမှာတော့ အင်းစိန်မြို့နယ်ရှိ မွေးမြူရေး နှင့်ကုသရေးဦးစီးဌာနရုံး၊ ကမာရွတ်မြို့နယ် သထုံဆောင်နဲ့ ပြည်ဆောင်တို့ဖြစ်တယ်လို့သိရပါတယ်။
" နှစ်၁၀၀ အထက်အဆောက်အအုံတွေက တခြားမှာလည်းရှိပါသေးတယ်။ အခုက သူတို့တဖြေးချင်း စစ်တမ်းတွေယူပြီးသတ်မှတ်နေတဲ့သဘောထင်ပါတယ်။ တကယ်တော့ အဆောက်အအုံကနှစ်၁၀၀ ကျော်ရင် ရှေးဟောင်းအဆောက်အအုံဖြစ်သွားပြီ။ ရှေးသုက တရားဝင်သတ်မှတ်ခံရတဲ့ အဆောက်အအုံကတော့ တရားဝင် ပိုအကျုံးဝင်သွားတာပေါ့။ ရှေးဟောင်းစာရင်းဝင်သတ်မှတ်ရင် အဆောက်အဦးကိုပြင်ချင်တာရှိရင် ကိုယ့်သဘောနဲ့ကိုလုပ်လို့မရတော့ဘူး ။ရှေးသုကိုအရင်တင်ပြရမယ်။ သူတို့ခွင့်ပြုမှ သူတို့ဂိုက်လိုင်းအတိုင်းလုပ်ရမှာပါ။အထောက်အပံ့တချို့လည်းရကောင်းရနိုင်ပါတယ်။ " လို့ ရှေးဟောင်းသုတေသနပညာရှင်တယောက်ကပြောပါတယ်။
ယခု ရှေးဟောင်းအဆောက်အအုံအဖြစ် သတ်မှတ်ခံလိုက်ရတဲ့ နှစ် ၁၀၀ အထက်အဆောက်အအုံတွေက ကုန်းဘောင်ခေတ်နဲ့ ကိုယ်လိုနီခေတ်လက်ရာတွေဖြစ်ပြီး မူလလက်ရာတွေကျန်ရှိတဲ့ အဆောက်အအုံတွေဖြစ်တယ်လို့သိရပါတယ်။
" ကုန်းဘောင်ခေတ်လယ်နဲ့ ခေတ်နှောင်း လက်ရာတွေပါတယ်။ မန္တလေးမှာဆိုရင် ချမ်းသာရ ဘုရားတို့၊ သားတော်ရဘုရား တို့ပါတယ်။ သူတို့ဆိုရင် ကုန်းဘောင်ခေတ်လယ် လက်ရာတွေဖြစ်တယ်။ သင်္ဂဇာကျောင်းဆိုရင် ခေတ်နှောင်းလက်ရာပေါ့။ ပြင်ဦးလွင်က ကန်တော်ကြီးစားသောက်ဆိုင်ဆိုရင် ကိုယ်လိုနီခေတ်လက်ရာပါ။" လို့သူက ထပ်မံပြောပါတယ်။
မန္တလေးက သိမ်နီကြီး ၊ သင်္ဂဇာကျောင်း ၊ မဟာလောကရန်နှိမ်အောင်တော်မူဘုရား၊ ချမ်းသာရဘုရား၊ သားတော်ရဘုရား၊ ပြည်ကျောင်း အပါအဝင် အဆောက်အအုံး ၃၃ လုံးသတ်မှတ်ခံရတာဖြစ်တယ်လို့သိရပါတယ်။
ပြင်ဦးလွင်မြို့နယ်ကတော့ ကန်တော်ကြီးစားသောက်ဆိုင် ၊ ထင်းရှူးမြိုင်၊ခရိုင်ဗိုလ်တဲ၊ မြိုင်ကြီး ၊မီးရထားရိပ်သာ၊ ရှေးဟောင်းအိမ်နံပါတ် ၂၈၊ ဒေါ်မာဂရက်နေအိမ် ၊ဇီဝကအိမ် စတဲ့အဆောက်အအုံ ၃၁ လုံးဖြစ်တယ်လို့သိရပါတယ်။
သာသနာရေးနှင့်ယဥ်ကျေးမှုဝန်ကြီးဌာနကရှေးဟောင်းအဆောက်အအုံတွေအဖြစ် သတ်မှတ်ရာမှာ ယဉ်ကျေးမှုအရနီးစပ်မှုအပါအဝင် ထိန်းသိမ်းဖို့လိုအပ်တဲ့ ရှေးဟောင်း အဆောက်အအုံတွေ ဦးစားပေး ရွေးချယ်သတ်မှတ်နေ တာဖြစ်တယ်လို့သိရပါတယ်။
" ရှေးဟောင်းအဆောက်အအုံတိုင်းကို တချိန်တည်းအများကြီးသတ်မှတ်တာမျိုးလုပ်ပြီး မထိန်းသိမ်းနိုင်ရင် အဆင်မပြေဘူး။ဒါကြောင့် ထိန်းသိမ်းဖို့လိုတဲ့အဆောက်အဦးကို အရင်သတ်မှတ်တယ်။လိုအပ်တဲ့ထိန်းသိမ်းမှုတွေပြင်ဆင်တာရှိမယ်။နေထိုင်သူတွေကိုလည်း ရှေးဟောင်းနဲ့ပတ်သက်တာ သတိပြုဖို့ပြောပြရတယ်။ရှေးဟောင်းအဆောက်အအုံတွေ ပျက်စီးတာ၊ ဖြိုဖျက်ခံရတာတွေမဖြစ်အောင်ကာကွယ်တဲ့အနေနဲ့ သတ်မှတ်တာပေါ့။ရှေးဟောင်းအဆောက်အအုံအဖြစ်သတ်မှတ်ခံလိုက်ရပြီဆိုရင် ဘာလုပ်ချင်လုပ်ချင်ရှေးသုကိုအရင်တင်ပြခွင့်ပြုချက်ယူရမှာပါ။" လို့ ရှေးဟောင်းသုတေသနဦးစီးဌာနမှ ညွှန်ကြားရေးမှုတယောက်ကပြောပါတယ်။
နှစ် ၁၀၀ အထက်အဆောက်အအုံတွေကို ရှေးဟောင်းအဆောက်အအုံအဖြစ် သတ်မှတ်တာဟာ ရှေးဟောင်းအဆောက်အအုံများ ကာကွယ်ထိန်းသိမ်းရေး ဥပဒေ ပုဒ်မ ၃၄၊ ပိုဒ်ခွဲ(ခ)
အရ အပ်နှင်းထားတဲ့ လုပ်ပိုင်ခွင့်ကို ကျင့်သုံးပြီးသာသနာရေးနှင့်ယဉ်ကျေးမှုဝန်ကြီးဌာနက ဆောင်ရွက်နေ တာဖြစ်တယ်လို့ သိရပါတယ်။
နှစ် ၁၀၀ အထက်ရှိတဲ့ အဆောက်အအုံတွေကို နှစ်စဥ် စစ်တမ်းပြုစုရွေးချယ်ပြီး ရှေးဟောင်းအဆောက်အအုံအဖြစ် သတ်မှတ်ပေးနေတာဖြစ်တယ်လို့လည်းသိရပါတယ်။
Photo -Cj
Credit - Voice of Myanmar News Agency
#သတင်းဟင်းလေးအိုးကြီး
