#ယနေ့ထုတ်သတင်းစာ_နိုင်ငံတကာသတင်း
◼ မြဝတီဘက်ခြမ်းသောင်တင်နေသူ နိုင်ငံခြားသားများကို လွှဲပြောင်းရေး သက်ဆိုင်ရာနိုင်ငံများနှင့် ထိုင်းအစိုးရချိတ်ဆက်နေ
မြန်မာနိုင်ငံ မြဝတီမြို့ အွန်လိုင်းလိမ်လည်မှုလုပ်ငန်းများမှ ပြန်လည်လွတ်မြောက်လာပြီးနောက် ထိုင်း-မြန်မာ နယ်စပ်တွင် သောင်တင်နေသော ပြည်ပနိုင်ငံသား ၇ဝဝဝ ခန့်ကို လွှဲပြောင်းအပ်နှံနိုင်ရေးအတွက် သက်ဆိုင်ရာနိုင်ငံများမှ တာဝန်ရှိသူများ၊ သံရုံးများနှင့်ပူးပေါင်းဆောင်ရွက်နေကြောင်း ထိုင်းနိုင်ငံခြားရေးဝန်ကြီးဌာန ပြောရေးဆိုခွင့်ရှိသူက မတ် ၆ ရက်တွင်ပြောကြားသည်။
လက်ရှိအချိန်တွင် မြန်မာဘက်ခြမ်း အွန်လိုင်းလိမ်လည်မှုလုပ်ငန်းများမှ ကယ်ထုတ်ပေးထားရသော နိုင်ငံခြားသား ၇ဝဝဝ ခန့်တို့ကို ဘီဂျီအက်ဖ်တပ်ဖွဲ့က စီစဉ်ပေးထားသော စခန်းများ၌နေရာချထားရကြောင်း သိရသည်။
မိမိတို့အနေဖြင့် ထိုင်း-မြန်မာနယ်စပ်တစ်လျှောက် သောင်တင်နေ သည့် နိုင်ငံခြားသားများကို လွှဲပြောင်းအပ်နှံနိုင်ရေးအတွက် သက်ဆိုင်ရာနိုင်ငံများမှတာဝန်ရှိသူများ၊ သက်ဆိုင်ရာသံရုံးများနှင့် ချိတ်ဆက်ဆွေးနွေးနေကြောင်း ထိုင်းနိုင်ငံခြားရေးဝန်ကြီး ဌာန ပြောရေးဆိုခွင့်ရှိသူက ပြောကြားသည်။
မြဝတီဘက်ခြမ်း၌ သောင်တင်နေသူများထဲတွင် ထိုင်းနိုင်ငံ၌ သံရုံးဖွင့်ထားခြင်းမရှိသည့် အာဖရိကနိုင်ငံများမှ နိုင်ငံသားများလည်း ပါဝင်နေကြောင်း ထိုင်းနိုင်ငံခြားရေးဝန်ကြီးဌာန ပြောရေးဆိုခွင့်ရှိသူ၏ အဆိုအရသိရသည်။
မြဝတီ၌သောင်တင်နေသူ ပြည်ပနိုင်ငံသားများကို ပြန်လည်လွှဲ ပြောင်းလက်ခံနေသော နိုင်ငံများထဲတွင် တရုတ်နှင့် အင်ဒိုနီးရှားကဲ့သို့နိုင်ငံများလည်း ပါဝင်သည်။
မြန်မာဘက်ခြမ်း၌ သောင်တင်နေသူ ပြည်ပနိုင်ငံသားများအနက် တရုတ်နိုင်ငံသား ၁၅ဝဝ နီးပါးကိုယခု သီတင်းပတ်အတွင်း လေကြောင်းခရီးစဉ် ၁၉ ခုဖြင့်ခေါ်ထုတ်ရန် တရုတ်နိုင်ငံက စီစဉ်ထားရာ ပထမဆုံးလေယာဉ်မှာ မတ် ၆ ရက်တွင် ထိုင်းနိုင်ငံမဲဆောက်မြို့မှတစ်ဆင့် တရုတ်နိုင်ငံသို့ထွက်ခွာသွားပြီဖြစ်ကြောင်း သိရသည်။
မြဝတီမြို့ရှိ သက်ဆိုင်ရာနိုင်ငံသားများအား လွှဲပြောင်းလက်ခံမည့်နိုင်ငံများအနေဖြင့် လွှဲပြောင်းအပ်နှံရေးလုပ်ငန်းစဉ်များအတွက် ထိုင်း-မြန်မာ နယ်စပ်သို့တာဝန်ရှိသူများ စေလွှတ်ပေးရန် ထိုင်းအစိုးရက တောင်းဆိုထားသည်။
တရုတ်၊ထိုင်းနှင့်မြန်မာတာဝန်ရှိသူများက မြန်မာဘက်ခြမ်း နယ်စပ်တစ်လျှောက်ရှိ အွန်လိုင်းလိမ်လည်မှုလုပ်ငန်းများကို ဖြိုခွင်းရန် ကြိုးပမ်းနေချိန်တွင် ဘီဂျီအက်ဖ်အဖွဲ့ က မြဝတီအွန်လိုင်းလိမ်လည်မှုလုပ်ငန်းများမှ နိုင်ငံခြားသားများကိုခေါ်ထုတ်ထားခြင်းဖြစ်သည်။
ရိုက်တာ
